Safeini Kinaser Kewe
Seni Preseten Henry B. Eyring
Aewin Chon Aninis non ewe Aewin Presetensi
Ua iotek ach sipwe ammonakicheta ne awora met chok sokkun angangen pristut ewe Samon epwe isseta mwach non manauach won fonufan.
Kich meinisin sia angei feiochun tumunu ekkoch. Nupwen sia mwarei ewe pristut an Kot sipwe angei ewe wis me ren Kot ne tumunu ekkewe manau ese much an Noun kewe. Ena wis mi ennet, mi amwarar, me fan ekkoch a men weires.
Mi wor ekkewe presetenin mwichen elter ra ausening nepwinei ra sisinei met ua poraus usun. Iei met a fis ngeni emon me neimi. Ai nuku a fis ngeni chommong me neimi—nap seni fan eu chok. Tichikin ewe poraus epwe sokopat, nge nonnomun mi nonno fengen.
Emon elter kese sineiochu a tingor om aninis. A keren sinei pwe mi namwot epwe amwokutu punuan we me nour we monukon seni imwer ikkewe ra kan nonnom ia ngeni pwan eu imw mi arap ngenir.
I me punuan we ra fen tingorei emon chiener ar repwe aea wan we tarkau pwe repwe tongeni amwokutu pisekir kewe. Chiener a mut ngenir ar repwe aea ewe taraku. Ewe sam a poputa ne anukunuk pisekir kewe non ewe taraku, nge mwirin chok a poputa, a efeingaua sekurun. Chienan ewe a awora ewe taraku ese tauwei ne anisir. Ewe sam a men osukosuk. A ekiek usum, noun we presetenin mwichen elter.
Non atun a tingor om aninis, a kunoken neanowas. A sereni ranin om kopwe fiti eu mwichen Fan nekunion. Ka fen pwon om kopwe anisi punuom ren angangen imw. Noum kewe semirit ra tingor om kopwe urumot fengen rer, nge kese mwo tuffichin fori.
Ka pwan sinei pwe ekkewe chon om mwich, akkaewin ekkewe mi nukuchar, ekkewe en mi kan titingor ar aninis fan chommong, repwe pwan tauweingaw usum chok.
Ewe Samon a sinei epwe wor ekkei sokkun ran nupwen A kokoruk ngeni ei wis, iwe A ngonuk eu tutunap ne anisuk. A eu kapas monomon faniten ekkewe chon pristut mi kon tauweingaw. Fan ekkoch sia eita ngeni ewe porausen ewe Re Samaria. Nge a ennetin eu poraus faniten emon chon pristut mi nap non ekkei ranin soponon mi osukosuk are weires.
Ewe tutunap a men fich ngeni ekkewe chon angangen pristut mi kan tauweingaw. Nge kene chok chechemeni pwe en ewe Re Samaria esap en ewe pris are ewe Chon Levi pwe ra chok nu seni ewe mwan mi feingau.
Meni kosap fen ekiek usun ena tutunap nupwen ka weri ekkana sokkun osukosuk. Nge ua iotek pwe kopwe chechemeni nupwen ekkana sokkun ran ra eto sefan, pwe repwe ennetin fis.
Ese akkafat ngeni kich non ekkewe pukfel pwata ewe Re Samaria a akanaemon ne sai won anen Jerusalem ngeni Jericho. Ai nuku ese chok anaemon ne kukunou fetan pun epwe fen sinei pwe chon sona ra awiti ekkewe rese kon tumunuoch. A fetan pwe epwe fori och mettoch, me usun a fich ngeni ar oreni, a wor noun tongki fiti no me wain.
Iwe non kapasen ewe Samon ewe Re Samaria, a konou nupwen a kuna ewe mwan mi feingau, pun, “a fakkun tongei.”
Nge ese chok tongei, pwe an tong a fiti foffor. Fansoun meinisin oupwe chechemeni tichikin ewe poraus:
“[A] pwereno ren atewe, a ninatiw no o wain non kinasan kewe o a finitano, iwe a ekieta won noun we mann o a wano non ew imwen wasona, ikewe a tuttumunu i ie
“Iwe sorota, a angei ruefou foun silver o ngeni ewe chon tuttumunu ewe imwen wasona. Iwe a ereni, Kopwe chok tumunu atei, nge nupwen upwe niwinsefanito, upwe niwini ngonuk met ukukun ka anusano ren atei.”1
Ami me ekkewe chon pristut oua koko ne emweni oupwe sinei unugat mettoch. Aewin, ewe Samon epwe ngonuk, ika kopwe tingor, ekkewe memmefen tong A pwisin mefi faniten ekkewe mi osupwang. Oruan, Epwe awora pwan ekkoch, usun ewe chon tumunu imwen wasona, ne fituk non om angang. Iwe aunungatin, ewe Samon, usun chok ewe Re Samaria, epwe aniwini meinisin ekkewe ra awora aninis ngeni ekkewe mi osupwang.
Ami kana presetenin mwich oua fen awora ena sokkun angang nap seni eu chok. Ka fen tingorei pwan ekkoch chon pristut an ewe Samon ar repwe aninis, ren om nuku pwe repwe ponueni non tong. Kese niuokusiti om kopwe tingor ngeni ekkewe ra fen aninis fan chommong pun ka sinei pwe a mecheres ngenir ar repwe mefi tong. Ka tingorer pun ka sinei pwe me nom ra fen mefi kichiochun ewe Samon nupwen ra finata ne aninis. Ka tingorei ekkoch mi fen wesen tauweingaw, fan om sinei pwe watten asor, epwe pwan aniwini watte ngenir seni ewe Samon. Ekkewe ra fen aninis me nom ra mefi watten ewe tong an ewe Chon Amanau.
Meni ka angei pwarata om kosap tingor emon an epwe aninis ne uwau pisek seni ewe taraku. En emon souemwen iwe ka sineiochu chon ami mwich tori ar famini. A unusoch an ewe Samon sineir.
A sinei ewe fefin a mefi weires pokiten punuan ese tongeni awora fansoun ne fori met mi namwot ne tutumunu ekkewe mettoch me namwot ngeni i. A sinei menni semirit repwe feioch seni ar kuna semer feino sefan ne anisi aramas are ika mi namwot ekkewe semirit repwe mefi pwe ra kon auchea ngeni semer pwe epwe nonnom rer non ena ran. Nge A pwan sinei ion epwe feioch seni ewe tingor ne awora angang nge ese fen pwa pwe i emon epwe och ne aninis.
Kese tongeni unusen sineiochu meinisin chon om mwich, nge Kot a tongeni. Iwe, usun ka fen fori fan chommong, ka iotek ne sinei ion kopwe tingor ne anisi ekkoch. Ewe Samon a sinei ion epwe feioch seni ewe tingor ne aninis me ion epwe feioch seni om kosap tingor ngenir. Ena ewe pwarata epwe eto reom nupwen ka emwen non ewe pristut.
Ua kuna ei sokkun a fis nupwen ngang emon anuon. Ngang ewe aewin chon aninis non eu mwichen pris. Ewe pisop a kokoriei eu ran non imwei. A apasa pwe a mochen ai upwe fiti i ne churi emon fefin mi mano punuan a namwot aupwe aninis i. A era pwe mi namwot ai upwe anisi i.
Nupwen ua awiti an epwe sato ren imwei, ua oro ekkis osukosuk. Ua sinei pwe a wor noun ewe pisop kewe chon aninis mi pochokun o mirit. Emon souapung mi itefouno. Ewe emon a nemeni eu kompani mi watte me epwap winiti emon Meinap Unusen. Ewe pisop epwap pwan winiti emon Meinap Unusen. Pwata ewe pisop a tingor ngeni emon kukkun pris, “A namwot om aninis”?
Iwe, iei ua sineioch pwe a chok ereniei: “Ewe Samon a mochen efeiochuk.” Non imwan ewe fefin mi mano punuan, ua kan mairu pwe ua kuna an ereni ewe fefin pwe esap tongeni angei mwo och aninis seni Mwichefen tori a amansoua ewe taropwen tumunufichi moni a annomu ren me mwen. Nupwen aua niwiniti neim, pwe a kuna ukukun ai mairu pokiten met a fis, iwe a ekkis takir pun ua mairu me a era, “Hal, nupwen a kouno an asonapa noun moni, epwe tongeni anisi ekkewe ekkoch.”
Pwan eu fansoun, ua fiti nei we pisop ne feino imwan emon sam me in ir mi ukuun sakaw iwe ra tiini nour kewe ruemon kukkun nengin mi niuokus ar repwe suki asam. Mwirin a wes ne kapas ngeni ekkewe ruemon nengin, aua suu me a ereniei, “Sise mwo tongeni siwini osukosukun manauer, nge ra tongeni mefi pwe ewe Samon a tongeir.”
Non pwan eu pwinin ua fiti i ne feino imwan emon mwan ese fiti fan non chommong ier. Ewe pisop a ereni pwe a men tongei i me an aninis a men namwot ngeni ewe wart. A usun ese fokkun nifinifin ngeni ewe mwan. Nge ena fansoun, pwan iteiten fansoun ua fiti ewe pisop, a men anisiei.
Use tongeni sinei ika ewe pisop a iotek an epwe sinei menni pris epwe feioch ren ar fiti i non ekkana fansoun churi aramas. Meni a pwan tingor pwan ekkoch pris ne fiti i fan chommong. Nge ewe Samon a sinei pwe eu ran upwe pwan winiti emon pisop me upwe tingor ekkewe mi patapateno ar nuku ar repwe niwiniti pwichiochun ewe kapas allim. Ewe Samon a sinei pwe eu ran upwe wiseni wisen pristut ne tumunu fitepuku are fen fitengerou noun Semach won Nang kewe semirit a men namwot ngenir aninis non pekin inis.
Ami kana anuon ouse tongeni sinei ifa sokkun fofforun angangen pristut ewe Samon a ammonakemita ne awora. Nge iteiten chon pristut epwe fokkun achocho ne awora aninis non pekin ngun. Kich meinisin sia wiseni ena wis. Ina wisach non eu mwich. Ina wisach non famini. Ika Setan a fiu ngeni ewe nuku an emon chon om mwich ika chon om famini, kopwe mefi tong. Usun chok ewe angang me umoumouch mi kawor seni ewe Re Samaria, kopwe pwan anisir ren ewe safein echikara kinaser nupwen mi kan namwot ngenir.
Nupwen ka fiti angangen misineri, kopwe churi fitengerou aramas a men namwot ngenir aninis non pekin ngun. Chommong, tori fansoun ka aitir, resap fen sinei pwe mi wor kinaser non pekin ngun, minne epwe eriaffour ese much, ika rese safeini. Kopwe fiti angangen ewe Samon ne amanauer. Ewe Samon chok a tongeni safeini kinaser non pekin ngun nupwen ra etiwa ekkewe efeiochun manau ese much.
Non wisom usun emon chon mwich, emon sensen famini, me emon misineri, kese tongeni echikarata feingauen ngun chinon chok pwisin om nuku mi wesen pochokun. Mi nap seni om kopwe chok anneani pukfen me iotekir iteiten. Ewe iotek ese fiti nuku me om ekkis chok annea pukfel ese naf ne ammonuketa. Ewe kapasen apochokun mi namwot ngonuk a feito ren ewe aurour seni ewe 84 sopun non ewe Doctrine and Covenants: pwe sisap resin otota met sipwe apasa, nge sipwe chok sou-aucheani non tupuwach ekkewe kapasen amanau, iwe ach tipachem epwe wareto non ewe atun mi namwot.2
Sia chok tongeni angei ena pwon ika sia “sou-aucheani” ekkewe kapasen amanau iteiten. Ewe kinikinin ena wokisin mi poraus usun sou-aucheani a wewen ai upwe mefi och mettoch usun ekkewe kapas. Awewe chok, nupwen ua feino anisi emon a tipemwaremwar usun an nuku non an ewe Soufos Joseph Smith we koko seni nang, och memmef ra niwinitiei.
Esap chok ekkewe kapas seni ewe Puken Mormon. A eu memmefin nuku me ennet a eto inet chok ua annea fitu chok tetenin kapas seni ewe Puken Mormon. Use tongeni pwon pwe epwe eto ren iteiten aramas mi tipemwaremwar usun ewe Soufos Joseph Smith ika ewe Puken Mormon. Ua sinei pwe Joseph Smith i ewe Soufosun ewe Aniwinsefanito. Nge ua sinei pwe ewe Puken Mormon mi ewe kapasen Kot, pokiten ua aucheani.
Ua pwisin sinei pwe ka tongeni angei om sinei ewe ennet seni ewe Ngun mi Fel pokiten a fis ngeniei. Mi namwot kich sipwe pwisin sinei me mwen ewe Samon epwe aea kich ne anisi emon aramas sia kan tongei minne a feingau ren ekkewe ra fiu ngeni ennet.
Mi wor pwan eu mettoch sipwe ammonata. Chon fonufan rese kan afanni ekkewe metekin pwan ekkoch. Ina eu popun ewe Chon Amanau a resin achocho ne afanafan usun An Achasefan me An pwinitanong won pwisin I ekkewe metekin me netipengawen meinisin noun Semach won Nang kewe semirit pwe Epwe sinei ifa usun epwe anisir.
Ese fen mecheres ngeni ekkewe noun Semach won Nang chon pristut mi kon angoch ar repwe ani ena sokkun tong. Chon fonufan rese kan engino ngeni ewe emon ese tongeni kuna ewe ennet minne mi kurufat ngeni kich. Sipwe tumunu pwe ach sise engino ese wewen pwe sia etipisi ika amam ekkoch.
Non ach ammonata ne awora aninis faniten ewe Samon non wisach usun Noun kewe chon pristut, mi wor eu wokisin epwe emweni kich. A masoueni eu niffang mi nawot ngeni ach achocho, ekkis meinisin ewe Samon ewe tinikicheno. A nom ren ewe Re Samaria. Mi namwot epwe pwan nom rech, me ewe Samon a ereni kich ia sipwe kuna me ia:
“Iei minne, ami pwi achengicheng kana, are ese wor ami tong ennet, iwe, ese wor aneami, pwe ewe tong ennet esap tongeni morono. Iei minne, oupwe kamochuno won ewe tong ennet pwe iei eu a napanap seni meinisin, pwe ekkewe mettoch meinisin repwe morono—
“Nge ewe tong ennet iei ewe tong an Kraist, epwe nom tori feinfeino chok; iwe, are emon a wor ren ewe tong ennet non ewe ranin soponon, iwe i epwe kuna feioch chapur.
“Iei minne, ami pwi achengicheng kana, oupwe iotek ngeni ewe Sam non pochokunen netipemi, pwe epwe amasoua non netipemi ren ei sokkun tong, a watiw won meinisin ekkewe ir mi netip ennet ne feino mwirin Noun we Jises kraist; pwe oupwe pwan winiti noun Kot; pwe nupwen an epwe feito sipwe usun chok i, pwe sipwe fakkun kuna i won inisin; iwe, epwe wor ach apinukunuk; pwe sipwe fakkun nimenimoch usun chok i.” 3
Ua iotek ach sipwe ammonakicheta ne awora met chok sokkun angangen pristut ewe Samon epwe isseta mwach non manauach won fonufan. Non iten Jises Kraist mi pin, amen.