Ewe Pochokunen Nikitu
Seni Elter Richard J. Maynes
Seni ewe Presentsi an Ekkewe Fik
Ach tufichin nikitu tori nesoponon non wenechar a wewe ngeni ukukkun pochokunen ach kapasen pwarata me anonnonen ach ekesiwin.
Iteitan nesesor nupwen sia neno, sia kuna eu ran mi masou ngeni osukosuken manau. Ekkei osukosuk ra pwa non chommong napanap: osukosuken inis, weiresin moni, weiresin chiechi, sossotun ekiek, me osukosuken nuku pwisin.
Chommong osukosuk sia weri non manauach sia tongeni pworacho ngeni; iwe nge, ekkoch ra weires ne weweiti me sise tongeni pworacho ngenir me repwe nom rech tori sia mano. Nupwen sia nikitu seni ekkewe osukosuk sia tongeni awesano me nupwen sia sopweno ne nikitu ekkewe osukosuk sise tongeni awesano, mi auchea sipwe chechemeni pwe pochokunen ngun sia weri epwe anisikich ne nikitu meinisin ekkewe osukosuk sia weri non manauach.
Pwiich me fefinach, Semach won Nang a tongeikich, a akokkota nonnomuch won fonufan pwe sipwe tongeni kaeo ekkewe nesen mi namwot sipwe kaeo ach sipwe tufichin angei manau ese much fan Mesan.
Eu poraus seni manauen ewe Soufos Joseph Smith a awewe ei nongonong. Ewe Soufos me ekkoch chiechian kewe ra kanupus non Liberty, Missouri, fan fitu maram. Non ar riaffou non kanupus, ewe Soufos Joseph a tingorei ewe Samon non iotekin netipetekison pwe ekkewe Souneng repwe piichino seni ar riaffou. Ewe Samon a ponuweni me ren an aiti ewe Soufos Joseph, me kich meinisin, pwe ekkewe osukosuk sia weri, ika sia nikitu, repwe fan iten ochun kich. Ewe Samon a ponuweni an Joseph tingor me ren an apasa:
Pwe ngunun epwe uren kinamwe. An kewe sossot me riaffou repwe fis ekkis chok fansoun,
Me ika epwe nikitu senir, Kot epwe atekiata i won nang.”1
Semach won Nang a akokkota ach sai non manau pwe testin ach pochokun. Sia kuna mettoch mi och me ngaw me sia angei ewe pungun finata fan itach a nom rech. Usun ewe soufos seni Puken Mormon itan Samuel a aiti, “Ami mi ngas seni mettocoh meinisin; oua pwisin nemeni inisimi are ami foffor. Oupwe sinei pwe Kot a ngenikemi ami tipachem me sinenap, a ngenikemi ami oupwe aramas mi ngaseno seni fan nemenem.”2
Semach won Nang a pwan weweiti pwe pokiten nonnomuch sisap fini mi pung are wenechar iteitan. Pokiten sise unusoch me pokiten sia mwanino, mi namwot aninis ne niwinsefan fan Mesan. Ewe aninis mi namwot mi kawor seni ekkewe afanafan, awewe, me an Jises Kraist asoren achasefan. An ewe Chon Amanau asoren achasefan a atufichi ach sipwe weri manau es emuch me ren ewe nongonongen aier. Ika sia ennetin aier, ewe Achasefan a tongeni aniskich pwe sipwe nimenimoch, ekkesiwini nonnomuch, me nikitu non ach osukosuk.
Nikitu mi eu nongonong mi auchea a nom non annukun Jises Kraist. Mi auchea pokiten ochun ach manau ese much mi wewe ngeni ach tufichin nikitu non wenechar.
Non 2 Nifai 31 ewe soufos Nifai a aitikich pwe mwirin sia angei ewe chok annuk pwisin paptais pwe Jises Kraist a etiwa me angei ewe niffangen ewe Ngun mi Fel, mi namwot sipwe “feino mwach o fetenap won ewe kapasen Kraist, o achocho tori nesoponon, [me mwirin] nengeni iei usun anon ewe Sam; [Sipwe] manaueni ewe manau esemuch.”3
Ina minne, ika sipwe angei ewe feioch mi nap nein meinisin feiochun Semach won Nang kewe, manau ese much, ni namwot sipwe fori ekkewe feioch mi annuk me sopweno ne anneasosichi ekkewe pwon mi pin. Non pwan ekkoch kapas sipwe nikitu.
Ach tufichin nikitu tori nesoponon non wenechar epwe wewe ngeni pochokunen ach kapasen pwarata me napanapan ach ekkesiwin. Nupwen ach kapasen pwarata mi pochokun me sia ennetin ekkesiwin ngeni ewe kapas allimen Jises Kraist, sipwe mefi pwarata seni ewe Ngun mi Fel nupwen sia fini och mettoch, Kraist epwe nom nukunapan met sia fini, me met sia fini epwe anisi ach mochen ne nikitu non wenechar. Ika ach kapasen pwarata mi apwangapwang me ese napanap ach ekkesiwin, mi napanap tufichin sipwe rikino seni ekkewe oreniengawen ewe fonufan pwe sipwe fini met mi ngaw.
Ua mochen poraus usun eu mettoch mi awewe met mi namwot ne nikitu non pekin inis me upwe awewe ngeni met mi namwot non pekin ngun. Nupwen ua niwin seni ai we misin ua tufichin fiti urumoten pasiket ren emon souemwen non college non California. Ei souemwen a ennetin mochen noun kewe chon urumot repwe ataiso me mwen nepoputan atun pasiket. Eu annukun ataiso me mwen aua tongeni attapa ewe pworen pasiket ina pwe aupwe saa won ekkewe chukuchukuta epwe aukuku muttirin am fansoun. Ua chechemeni aewin ai achocho ne saa won ei an mwirin ua niwin seni ai we misin: Ua nuku pwe upwene pe.
A fitu wik ren ai akkachocho ne ataiso me mwen ua apwonueta ewe saa non fansoun mi koukoch. A fakkun apwapwa pwe ua tufichin saa won ena an nge pwan muttir saa ngeni nesoponon ewe an.
Ne angangoch non pasiket, mi namwot kopwe ataiso. Om pochokun non pekin inis a fiti eu sokkun mon, ena mon mi achocho weires, pwonen netip, me pwisin nemenem. Nikitu non pekin ngun a pwan fiti eu sokkun mon. Mi nonno chok ewe mon: achocho weires, pwonen netip, me pwisin nemenem.
Mi namwot pwe eu kapasen pwarata, usun inisum, epwe pochokun ika ka mochen nikitu. Iwe ifa usun ach kapasen pwarata repwe pochokun? Sise tongeni pochokun non pekin inis fan iten pasiket me ren ach katon pasiket won tifi. Iwe usun chok, ach kapasen pwarata resap pochokun me ren ach katon mwichenapen mwichefen won tifi. Mi namwot sipwe stati me kaeo ekkewe nongonongen ewe kapas allimen Jises Kraist, me sipwe akkachocho ne manauenir. Ina usun sia winiti noun Jises Kraist chon kuno, me ina usun sia kouta ach kapasen pwarata mi nikitu.
Nupwen sia weri sossot non manauach me sia mochen nikinikin Jises Kraist, mi namwot sipwe ammonata non pekin ngun. Ach ammonata non pekin ngun a wewen pwe sia kaeo pochokunen ngun—sipwe pochokun non pekin ngun. Sipwe fakkun pochokun non pekin ngun minne sipwe fini mi pung iteitan. Sipwe pochokun non ach mochen me tufichin manaueni ewe kapas allim. Usun emon chon makk a apasa, “Mi namwot kopwe winiti efou fau ewe chonupupu ese tongeni mokut.” Nupwen sia kaeo pochokunen ngun, ekkewe orenien fonufan mi mwan, me pwan ach osukosuken iteitan ran, resap fakkun ekkesiwini ach tufichin nikitu non wenechar.
Pokiten sia weri osukosuk iteitan ran, mi auchea pwe sipwe anganga ach pochokunen ngun iteitan ran. Nupwen sia anganga pochokunen ngunuch, ekkewe oreni mi mwan an ewe fonufan, tori pwan pwisin ach kewe osukosuk iteiten ran, esap fakkun angaw ach tufich ne nikitu non wenechar.
Awewen pochokunen ngun ra feito seni pwisin ach uruon famini. Me nein ekkewe tuttunapen ach kewe neuo, sipwe tongeni kuna awewe mi pwarata ekkewe kinikinin nikitu non manauer.
Eu tuttunap seni pwisin ai uruon famini a awewe ei nongonong. Semenapei we Joseph Watson Maynes a uputiw non 1856 non Hull, Yorkshire, England. An famini ra fiti ewe Mwichefen non England me ra sai ngeni Salt Lake City. A punueni Emily Keep non 1883, me ra nounou wanumon semirit. Joseph a kokko ngeni wisen misineri non June 1910, nupwen a 53 ierin. Ren aninis seni punuan we me nour kewe wanumon semirit, a niwin ngeni England ne fori angangen misineri.
Mwirin a angang ren nuku ren ukukun ru ier, a saa won noun we paisiken ren chienan we ngeni Sukunen Raninifel non Gloucester, England, me ewe taia a chop. A totiw seni noun we paisiken ne kuna met a fis. Nupwen a kuna pwe a ngaw me epwe fansoun nangatam ne forsefanni, a ereni chianan we ne feino me poputa ewe mwichen Raninifel me epwap feino ikkewe. Newesinon chok an kapas, a seneta nepun. A muttir mano non ewe chok otun pun foun ngasagnasan a ngaweno.
Joseph Watson Maynes ese kuna sefanni punuan we me nour kewe wanumon semirit me non ei manau. Ra tongeni uwei inisin ngeni Salt Lake City me a fis an mi ma non ewe Imwen Chufengenin Waterloo. Elter Anthony W. Ivins seni ewe Mwichen Engon me Ruemon Aposel a fos non ewe mi ma me a aitikich eu nesen mi auchea usun manau, mano, me nikitu: “Iei met ewe kapas allim a ngenikich—esap pwe site mano, nge sipwe pworacho ngeni mano seni ewe epinukunukun eu manausefan. … A fich ngeni [Joseph Maynes] ]. … Sia pwapwa, me kinamwe ne sinei pwe aramas ra mano non wenechar, non ar nuku, me ra anneasosich ngeni ar nuku.”4
Ei tuttunapen famini a kuu netipei ai upwe akkachocho ne tapweno ewe nenien appirun nikitu me pochokunen ngun usun semenapei we. Ua pwan mwar ren an punuan we, Emily, nuku minne mwirin Joseph a mano manauan a weires fan choun osan. An kapasen pwarata a pochokun me a usun an ekkesiwin ren an anneasosich ngeni an nuku me a pwan aneamon ne tumunu wanumon noun kewe semirit.
Ewe Aposel Paul a apasa, “Sipwe asu seni kich ekkewe mettoch meinisin mi eppeti kich, pwan ekkewe tipis mi fotekini kich, nge sipwe chok nikiitu ne ssa non ewe kitir mi nom mwach.”5 Ewe kitir fan mesach won ei fonufan mi eu kitirin nikitu mi uren osukosuk. Ekkwe osukosuk non ei kitir mi ekkewe osukosuk sia weri nupwen sia pwata iteitan ran. Sia nom won fonufan ne saa non ewe kitir, ne aea ach pungun finata, me finata nefinen met mi pung me mi mwan. Ika sipwe pworacho ne awesano ewe kitir ren sufon me niwinsefanita ngeni Semach won Nang, mi namwot sipwe monatiw mon achocho weires, pwonen netip, me pwisin nemenem. Mi namwot sipwe pochokun non pekin ngun. Sipwe kaeo pochokunen ngun. Mi namwot ach kapasen pwarata repwe pochokun minne sipwe ennetin ekkesiwin, me niwinin ina pwe sipwe kuna ewe kinamwe me pochokun mi namwot ne nikitu non met sokkun osukosuk sia weri.
Iwe ren met sokkun osukosuk ka weri iteitan ran, kopwe chechemeni—ren ewe pochokunen ngun ka kaeo, fiti aninis seni ewe Samon, nesoponon ewe kitir kopwe tongeni apwapwaiti ewe mirit usun ewe Aposel Paul a pwarata nupwen a apasa:
“A tori ai fansoun upwe ne asorata manauei. Iei a tori ewe fansoun pwe upwe ne feinno seni ei manau.
“Ua fen fori ukukun ai tongeni non ewe kitir, ua fen amuchchu ewe kitir o ua fen amwochu ewe nuku:
“Iwe iei ewe winen pwroacho fanasengesin ewe manau mi pung a chok witiwiti ei, ewe niffang ach Samon, ewe Sou-Apung mi pung, epwe ngeni ei non ewe Ran.”6
Ua kapasen pwarata usun ennetin nonnomun Semach won Nang mi tong me An kokkoten pwapwa ese much, minne a efisata pwe sia nom won fonufan non ei fansoun. Amo ewe Ngunun ewe Samon epwe pwarata ngenikich meinisin ne pwisin kaeo ewe pochokun ne nikitu. Non iten Jises Kraist, amen.