18:1

Feito, Fitikem

Seni Preseten Dieter F. Uchtdorf

Aruemonun Chon Aninis non ewe Aewin Presetensi

Ese nifinifin ami kewe tufich, porausen manauemi nom, are pochokunen ami kewe kapasen pwarata, a wor neniemi non ei Mwichefen.

Non ewe fansoun nom a wor emon mwan mi tan pwe mi nom non eu rumw mi watte ikkewe ia meinisin ekkewe namanamen fonufan ra mwichfengen. A esinna pwe ita iteiten namanam mi fakkun och.

A churi ruemon kamwet ir mi chon tupuni ewe Mwichefenin Jises Kraist ren Aramas mi Pin non Fansoun Soponon me a eis, “Met oua anamwota seni ami kana chon mwichefen?”

“Ause anamwota mwo och mettoch,” ra ponueni. “Nge ewe Samon a tingor ach sipwe epinano meinisin.”

Ekkewe ruemon kamwet ra soposopono ne poraus usun ekkewe wis non ewe Mwichefen, sensen famini pwan an fefin chon amwa, angangen misineri, pwinin famini iteitan wik, angangen tempel, aninis ngeni mi osupwang, pwan wisan sense.

Ewe mwan a eis “Oua ngenir niwinir moni fan itan ekkewe angang ra for?”

Ekkewe ruemon kamwet ra era, “Apw, Ra pwisin asora ar fansoun.”

Ekkewe ruemon kamwet ra pwan pwan era, “iteitan wonu maram chon am Mwichefen ra fiti are katon ewe mwichenapen mwichefen non ukukun 10 auwa.”

Ewe mwan a eis, “Aramas ra afanafan non ukukun engon auwa?”

“Nge ami mwichfengen iteitan wik? Ifan ukukun taman?”

“Unungat auwa, iteitan Raninifel!”

Ewe mwan a era, “mwa met. Ekkewe chon ami na mwichefen ra ennetin fori met ena oua apasa?”

“Ewer pwan och mettoch. Ause mwo erenuk usun angangen uruon famini, camp an serafo, mwichen afanafan, anneani pukfel, sukunen chon emwen, mwichen serafo iteitan wik, seminary an nesesor, aninisin tumunu ekkewe imwan fan, pwan a wor annukun kapasen emirit an ewe Samon, echikifen iteitan maram ne anisi ekkewe mi osupwang, me asoren eu ne engon.”

Ewe mwan a era, “Iei ngang mi osukosuk. Pwata oupwe mochen fiti ena sokkun mwichefen?”

Ekkewe ruemon kamwet ra emenimen me apasa, “Ita me rem kesap fen kapas eis.”

Pwata Emon Epwe Mochen Fiti Ena Sokkun Mwichefen?

Non ei kinikinin fansoun nupwen a wor chommong mwichefen mi nom ekkis meinisin won fonufan ra kuna ekkisatiw ukukkun an memper non ar namanam, nge Ewe Mwichefenin Jises Kraistren Aramas mi Pin non Fansoun Soponon—mi kukkun seni ekkewe ekkoch mwichefen— mi eu ekkewe mwichefen mi muttir ne marita won fonufan. Seni September 2013 a nu seni 15 minion chon mwichefen won ekkis meinisin won unusen fonufan.

A wor chommong sokkopaten popun ei a fis, nge upwe poraus won ekkoch?

Ewe Mwichefen an ewe Samon

Akkom, ei Mwichefen mi aniwinatiw me ren Jises Kraist Pwisin. Non ei kopwe kuna ewe mwumwuta ne fori mettoch fan Itan—ne papatais fan itan omusomusen tipis, epinano ngeni ewe Ngun mi Fel, pwan ririfengen won fonufan me non nang.¹

Ekkewe ir mi fiti ei Mwichefen ra tongei ewe Samon Jises Kraist me ra mochen tapweno mwirin. Ra pwapwa non ar sinei pwe Kot a fos sefan ngeni chon fonufan. Nupwen ra angei efeiochun pristut mi pin me fori pwon fengen ren Kot, ra tongeni mefi An manaman non manauer.² Nupwen ra tonong non ewe tempel mi pin, ra mefi pwe ra nom mwen Mesan. Nupwen ra anneani ekkewe pukfel³ me manaueni afanafanen Noun kewe soufos, ra arap ngeni ewe Chon Amanau ewe ra kan tongei.

Nuku mi Fiti Foffor

Pwan eu popun aramas mi fiti pwe ewe Mwichefen mi awora ewe tufichin fofforoch.

Nuku non Kot mi och, nge chommong aramas ra mochen fiti ar foffor napseni ar mochen ausening chok ngeni chon afanafan are “anchang usun [ar] non nom nang.”⁴ Ra mochen ar nuku epwe fiti foffor. Ra mochen fori ar angang ne soposopono ei angang mi unusen namwot.

Iei a fis autun ra fitikem–epwe wor chommong ar tufichin ekkisiwini ar nipwakoch, kirokiroch, me fansoun ngeni angangoch. Pun ese wor nouwis mi angei niwinir moni non achkewe mwich won unusen fonufan, ach kewe memper ra pwisin fori ewe angangen afanafan. Ra angei ar koko seni pwarata. Fan ekkoch sia pwisin finata; fan ekkoch aramas mi “finikicheta.” Sia kuna pwe ach angang esap fofforun osou mi chou nge mi chok ach tufichin apwonueta ekkewe pwon sia for non pwawpwa ne angang ngeni Kot me Noun kewe.

Ach Feioch mi Auchea

Ewe Aunungatin popun aramas ra choni ewe Mwichefen mi chok pokiten ach fetan won ewe anen an Kraist kewe chon kaeo epwe emwenikich ngeni ekkewe feioch mi auchea.

Sia kuna pwe angangen papatais mi chok nepoputan ach sai ne winiti an Jises chon kaeo. Iteitan ran sia mwin ne fetan ren Jises Kraist epwe emwenikich ngeni kinamwe me pwari ach popun non ei manau me sipwe angei ewe pwapwa mi watte me kuna ewe manau ese much.

Ekkewe ir mi fetan won ei an non nuku repwe kunnu seni chommong osukosuk, riaffou, me niamam non ei manau.

Ekkewe ir mi osupwang non pekin ngunur me ekkewe mi nimenimoch non netiper repwe kuna ar tipachem mi aucheanap ikkei.

Ekkewe ir mi riaffou are netipengau repwe kuna pochokun.

Ekkewe ir mi chou pokiten ar tipis repwe kuna omusomus, repwe ngaseno, me asoso.

Ngeni Ekkewe Ir Mi Tou

Ewe angangen kutta ewe ennet mi emweni fitu minion aramas ngeni Ewe Mwichefenin Jises Kraist ren Aramas mi Pin non Fansoun Soponon. Nge, a wor ekkoch ra tou seni ewe Mwichefen akkom ir mi tongei.

Emon epwe tongeni eis, “Ika ewe kapas allim mi wesewesen amwarar, pwata emon epwe tou seni?”

Fan ekkoch sia ekieki pwe ir mi song ren emon, chipwang, are uren tipis. Nge, esap iei mecheres an ewe popun ra tou. Ennet, esap chok wor eu popun fan itan meinisin ekkewe ra tou seni ewe mwichefen.

Ekkoch chon mwichefen ra attures non chommong ier won ar kapas eis ika repwe aimufesenir seni ewe Mwichefen.

Non ei Mwichefen mi sufoniti an aramas pwisin finata, mi aniwinsefanito me ren emon anuon a eisini chommong an kapas me a pwisin kutta ponuan, sia asamonu ekkewe ir mi wesewesen kutta ewe ennet. Epwe achou netipach nupwen sia kuner ne tou seni ewe Mwichefen sia tongei me ewe ennet ir mi kuna, nge sia sufoniti ar pungun ne mwareiti ewe Kot mi Napanap ren met ir mi mefi mi wesewesen pung non netiper, usun sia pwisin angei ena tufich fan itach. ⁵

Kapas Eis Rese Mwo Ponueni

Ekkoch ra weires ren ekkewe kapas eis ese mwo wor ponuan usun ekkewe foffor are kapas a fen fis me nom. Sia ennetin esinna pwe non ukukun 200 ier an uruon ewe mwichefen—pwan fiti ekkewe foffor mi amwokutu memef, pung, me mettochun nang—a wor ekkoch kapas mi fen apasa are foffor mi fisita mi tongeni awora kapas eis an tipemwaramwar non netipan ekkoch.

Fan ekkoch a wor kapas eis mi fisita pwe ese unus ach sinei och mettoch me mi namwot epwe wor ach engino. Nupwen unusen ewe ennet mi pwar, ekkewe mettoch sise mwo sinei usun akkom epwe wor ponuer pwe sipwe sinenap.

Fan ekkoch a wor sokkofesenin ekiek usun wewen ewe “ennet.” Eu kapas eis mi awora tipemwaremwar non emon, mwirin a resin achocho ne weweoch, mi tufich an epwe awora nuku non pwan emon.

Mwanninon Aramas Rese Unusoch

Iwe, upwe wesewesen ennet, a wor ekkewe fansoun nupwen ekkewe chon mwichefen are souemwenin Mwichefen ra chok mwannino. Meni a wor kapas mi apasa are foffor mi fis rese fich ngeni ach nuku, nongonong, are annuk.

Ai nuku pwe ewe Mwichefen epwe chok unusoch ika mi emwen me ren aramas mi unusoch. Kot mi unusoch, pwan An kewe nongonong mi unusen pung. Nge A angang me rech—Noun kewe rese unusoch—me ekkewe aramas rese unusoch repwe mwannino.

Won ewe taropwean itenap an ewe Puken Mormon, sia anneani, “Iwe iei, are mi wor och mwan, iwe, a mwanin aramas; iei minne ausap atipisi forien Kot, pwe aupwe nimenimoch non ewe fansoun kapung ren Kraist.” ⁶

A iei usun napanapan seni nom me epwe iei tori ewe ranin unusoch atun Kraist epwe wisan nemeni fonufan.

Sonapan pwe ekkoch ra turutiw pokiten mwanninon pwan ekkoch aramas. Nge ese pwan nifinifin ekkei mettoch, pwe ewe ennet ese much an ewe kapas allim an ewe Mwichefenin Jises Kraist esap tongeni nimengaueno, kisekisetiw, are tatakis.

Ngang emon Aposel an ewe Samon Jises Kraist me ua pwisin kuna angangen me napanapan ei Mwichefen, me ua wau pwisin ai pwarataesap wor eu finien watte usun ei Mwichefen are aramasan kewe epwe fis ika esap akkom ekkewe chon emwen raresin kutta netipan, emwenin, me etiwan Semach ese Much. Iei eweMwichefenin Jises Kraist. Kot esap mwut ngeni An Mwichefen an epwe rikino seni ewe an mi pung are kuf ne apwonueta netipan.

A Pwan Wor Neniom

Ngenir mi pwisin aimufesenir seni ewe Mwichefen, ua apasa, chienei kana achengicheng, mi chiwen wor neniemi ikkei.

Feito me apacheta ami kewe nipwakoch, niffang, me forfor ngeni am kewe. Ika sia fori en kich meinisin sipwe napeno.

Ekkoch repwe eis, “Nge met usun ai kewe tipemwaremwar?”

Aramas meinisin a wor ar kewe kapas eis—ewe foun iran ach pungun mochen sinei ewe ennet epwe pukuta me marita tori mi chok efoch iran ach tipachem mi watte. Chommong chon ewe Mwichefen, non eu me eu fansoun, ra ennetin ekieki usun ar kewe kapas eis mi auchea. Eu popun an ewe mwichefen a awora aninis ne amarita ei foun iran nuku—ese nifinifin ika mi fotukatiw non pwunungau an tipemwaremwar. Nuku a wewen pwe sipwe aneanei are mochen och mettoch sise mwo kukuna nge mi pung are ennet. ⁷

Iei minne, pwi me fefinei—chienei kei mi auchea—ouse mochen oupwe akkom tipemwaremwar usun met oua aani tipemwaremwar me mwen oupwe tipewaremwar usun ami nuku. ⁸ Sisap mwut ngeni ekkewe memef an tipemwaremwar ar repwe foteki kich me amwochu kich seni ewe tong mi unus, kinamwe, pwan ekkewe nifang a eto ren ach nuku non ewe Samon Jises Kraist.

Ekkoch repwe era, “Use fich ngenikemi non ewe Mwichefen.”

Ika oupwe tongeni kuna non netipem, oupwe tongeni kuna pwe oua ennetin fich napseni ami pwisin ekiek. Oupwe mairu pwe oupwe kuna pwe mi pwan wor am kewe mochen me osukosuk usumi. Porausen manauemi epwe ekkis sokkofesen seni manauan ekkoch Chon Mwichefen, nge enan epwe tongeni eu feioch ngenikich meinisin. Pwi me fefinei kei, chiechiach mi unusen auchea, ami kana nipwakoch me ekiek mi namwot ngenikem. Sokkofesenin manauan emon me emon won unusen fonufan mi pochokunen ei Mwichefen.

Ekkoch repwe apasa, ““Use nuku pwe upwe tongeni apwonueta ami kewe annuk.”

Ina popunen ami oupwe feito! Ewe Mwichefen mi nom pwe epwe apochokunata ekkewe rese unusoch, ekkewe mi riaffou, pwan ekkewe mi pekus. Mi masou ren ekkewe aramas mi mochen fori ekkewe annukun Kot ren unusen netiper, ese nifinifin pwe rese mwo unusoch non ar aneasochisir.

Ekkoch ra era, “Ngang mi sinei emon chon ami na Mwichefen mi emon chon nikotupotup. . Use tongeni fiti eu mwichefen a wor na sokkun aramas non.”

Ika omw awewen an chon nikotupotup mi wewen ngeni emon ese unusoch non an manaueni met i mi nuku, iwe kich meinisin mi chon nikotupotup. Ese wor emon me neich mi unusoch usun Kraist. Nge kich meinisin sia ennetin mochen pworacho ach mwannino me ach mochen tipis. Ren unusen netipach me ngunuch sia mochen winiti usun ewe Samon ekkis me ekkis ren aninisin ewe Achasefanin Jises Kraist.

Ika iei mochenin netipemi, iwe ese nifinifin ami kewe tufich, porausen manauemi nom, are pochokunen ami kewe kapasen pwarata, a wor neniemi non ei Mwichefen. Feito, Fitikem!

Feito, Fitikem!

A wor sokkopaten ach nipwakingaw, nge ua ennetin sinei pwe oupwe kuna nein ekkewe chon ei Mwichefen chommong ekkewe aramas mi unusen murinno. Ewe Mwichefenin Jises Kraist mi korato ekkewe aramas mi kirokiroch me ekkewe tumunuoch, ekkewe mi wenechar me ekkewe mi niwpakoch.

Ika ka ekieki pwe kopwe kuna ekkewe aramas mi unusoch ikkei, kopwe fakkun netipengau. Nge ika en mi kutta ekkewe nongonongen Kraist mi unusoch, ewe kapasen Kot “mi echikarata ekkewe ngun mi feiengau,” ⁹ me mwokutokutun ewe Ngun mi Fel mi epinipin, kopwe kuna ikkei. Non ei fansounen kisikisino nuku—non ei fansoun nupwen aramas ra mefi pwe ir mi touau seni ewe Samon non nang—kopwe kuna ekkewe aramas ra mochen sinei me arap ngeni ar Samon ren ar repwe angang ngeni Kot me aramasen fonufan, usun met ke for. Feito, Fitikem!

Kopwe Pwan Su?

Mi achema ngeniei usun ewe fansoun non manauan ewe Samon nupwen chommong ra nikiti I ¹⁰. Jises a eisini Noun kewe engon me ruemon chon kuno:

“Oua mochen oupwe pwan su seni ei?”

“Iwe, Simon Peter a ponuweni, Samon, ion am aupwe feinno ren? En chok a wor reom ekkewe kapasen manau ese much.” ¹¹

Mi wor fansoun nupwen mi namwot ach sipwe ponueni ewe chok kapaseis. Sipwe ne pwan su? Are sipwe usun Peter ne komochunuk ngeni ekkewe kapasen manau ese much?

Ika en mi kutta ewe ennet, wewen, me ewe an epwe siwini om nuku pwe epwe winiti foffor; ika en mi kutta eu nenien kinamwe: Feito, Fitikem!

Ika ka tou seni ewe namanam ka nuku non akkom: Feito sefan. Fitikem!

Ika a wor omw mochen fangeta: Soposopono pwan ekkisano. Mei wor neniom ikkei.

Ua mochen pesei ngenikemi meinisin oua ausening are anneani ekkei kapas: Feito, fitikem. Feito me ausening ngeni kapasen ewe Kraist mi pwetete. Oune mwarei ami kewe irapengas me tapweno mwirin I. ¹²

Feito, fitikem! Ikkei kopwe kuna ekkewe mettoch mi auchea ese wor niwinin.

Ua pwarata pwe ikkei kopwe kuna ekkewe kapasen manau ese much, ewe anen kinamwe, ewe pwonen omusomus, pwan pwapwa.

Ngang mi iotek non unusen netipei pwe nupwen oua pwisin kutta ewe ennet epwe pwar ngenikemi me non netipemi ewe mochenin feito me fitikem. Fan itan Jises Kraist, amen.