Katantan man Tamnei aika Bubuaka—te Mweenga ae Boboto iaon Kristo
Te kabane n raoiroi n raumea n te aonaaba … bon ana raumea te aomata inanona are e roko man te koaua ae nano ae maeka inanom.
Tariu ao mwaneu aika tangiraki, n te bong aei I kakabwaiaki ni karekeia tibu aika 13 inanon te bootaki n taromauri. Raonakira irouia ikai e a karekea au iango bwa N na titirakinai, “Tera ae I tangiriia tibu bwa a na ataia?” N te ingabong aei I tangiria n taetae ma te koaua nakoia au utu ao ami utu.
Ngaira aika taan kairiiri a rikirake ara tabeaianga ibukin te urubwai are e riki man tamnei aika buakaka inanon maiuia kain te Ekaretia ao aia utu. Tatan e buakaniira ma bwai ni buaka aika boou.
Teuana bukina ngkai ti mena iaon te aonaaba bwa tina reiakinna n taotaoni nanora ni kaibwabwaru ao ara namakin n rabwatara ae mamate. Namakin aikai ake e anganiira te Atua e buokiira bwa tina tangiria ni mare ao ni karikiia natira. Te aro n reitaki ae kaan inanon te mare imarenan te mwaane ao te aine are e uotiia nati ni karekei rabwataia ao e nanonaki naba bwa e na tamaroa, te namakin n tangira are e ikotii nano aika uoua n tangira, katiteuanaaki n te tamnei ao n te rabwata, ao n uota bwaninin te kimwareirei ao te kukurei ngkai ti reiakinna ni karimoaia moa tabeman. Beretitenti Spencer W. Kimball e reirei bwa inanon te mare, “te kainnaba … e moanibwai ni maiun te buumwaane ke te buuaine, ao … [akea] riki ae anaaki nanona iai iroun te aomata [ke] te bwai [ke] te bwai teuana ae e na raka riki iaon ae raonakin te kainnaba. …
“Te mare e kantaningaaki bwa a bane inanona te kakaonimaki ao te onimakinaki ae bwanin.”1
Ririki aika a nako temanna natira e tara n nanokawaki. I rin inanon ana ruu ni matu, ngke e a kaota nanona ao ni kabwarabwara nakoiu bwa e a tia n iriia raraona nakon aia auti ao n noori n tiaki nanona tamnei aika kakubanako ao ni kamwengabuaka ao mwakuri iaon te terewition imarenan te mwaane ao te aine n akea kunnikaia. E tang ao e kaota aron te namakin are e buakaka are e namakinna n te bwai are e a tia n nooria ao e tangiria bwa e na nako man ana iango. I rang kakatonga bwa iai ana onimaki irou, n anganai au tai ni karaua nanona ae aki kairua ao marakin nanona ni buokia bwa e na ata aron reken te karaunano rinanon ana Mwakuri ni Kamaiu te Tia Kamaiu. I uringa te namakin ae tabu are I karekea ngke ti uaia ni katorobubua, ngkai te tina ao te nati aine, ao ni bubuti te ibuobuoki mairoun Tamara are i Karawa.
A mwaiti ataei, kairake, ao ikawai aika a tia n noori tamnei aika buakaka n tiaki nanoia, ma e rikirake mwaitiia mwaane ao aine ake a rineia bwa a na matakuakini ao a katikaki nanoia bwa a na manga karaoia ni karokoa e a riki bwa te anua ae kareke. Aomata aikai a kona n tangiria ma nanoia ni kabane n otinako man te bwai ni kamwane aei ma n tainako aki kona n tokanikai ni karaoia ibon irouia. Ai kukureira ngaira ngkai naake ti tangiriia a rineia ni kaotibure nakoira ngaira aika kaaro ke taan kairiiri n te Ekaretia. Ti na rang iangoraoi ngkana ti aki kaeka ma te tounako, un, ke te riribai, are a kona iai ni manga kainabwaabu.
Ngaira aika kaaro ao taan kairiiri ti riai n reirei ma natira ao ara roronrikirake iaon bwaai aika reitinako, n ongora ma te tangira ao te matata. A riai n ata kakamakun tamnei aika bubuaka ao aroia n tokanikai iaona inanon maiuia, ni karika te Tamnei bwa e na kitaniia, uruani namakin, kewekewe, ao n uruani aro n reitaki, n aki kona n tianiia ibon irouia, ao n taua aia tai, iango, ao korakoraia.
Tamnei aika bubuaka a rang ni kakamaku, buakaka, ao ni kai nooraki nakon riki are mai imwaina. Ngkai ti maroro ma natira, n ikotaki ti kona ni karaoa te baire n utu ma kainibaire ao taian tia, n iangoraoi ni katani mweengara n raumeai bwaai aika a maiu man te iti. Kaaro, ti ataia bwa bwaai aika a maiu man te titi ma korakora te intanete, tiaki kaombiuta, bon kangaanga aika rang bubura?2
Aomata aika kairake ao ikawai, ngkana kam reke n ana bwai ni kamwane Tatan n tamnei aika a buakaka, uringnga aron ana nanoanga ara Tia Kamaiu ae tangiraki. Ko ataia bwa nanora ana tangira te Uea n tangiriko ao n nabeiko, riki ngkai? Ara Tia Kamaiu iai mwaakana ni kaitiakiko ao ni kamarurungko. E kona ni kanakoa te maraki ao te rawawata are ko namakinna ao ni karaoia bwa ko na manga itiaki rinanon mwaakan Ana Mwakuri ni Kamaiu.
Ngaira aika taan kairiiri ti rang n tabeaianga naba ibukiia buu ao utu ake a rootaki n te rawawata man te anua ae kareke man tamnei aika bubuaka. Unimwaane Richard G. Scott e reirei: “Ngkana akea am bure ae kakaiaki, tai karawawatako i mwiin ana bure temanna n akea bukina. … Ko kona n namakina te nanoanga. … Ko tuai moa ni katoka iaom te namakin ni katabeaki ibukin mwakuri akanne.”3 Ataia ae ko aki maroa. Iai buokam. Bowi ni maroro iaon Kamarurung iaon anua aika a kareke ibukiia buu e tauraoi, ni ikotaki ma te maroro-iaon tareboon, ike a kona buu n tarebon ibukin te bowi ao n irii man mweengaia.
Tariu ao mwaneu, tina kanga ni kataniia natira ao te roronrikirake? Raumea bon bwaai ni mwakuri aika a rang boongana, ma te raumea ae te kabanea ni korakora n te aonaaba, bon tii teuana are e na bon nakoraoi ana mwakuri, bon te raumea inanon te aomata are e roko man te nano ao te koaua ae teimatoa n ana tangira Tamara are i Karawa ao ana karea ni kamaiu ara Tia Kamaiu ibukira n tatabemaniira.
Tina kanga ni kairiira natia nakon te rairaki ae nano ao ni karekea ana Mwakuri ni Kamaiu ara Tia Kamaiu? I tatangira ana katanoata te burabeti are Nibwaai n te bwai are a karaoia ana aomata nakaoia te roronrikirake n ana bong: “Ti kakarabakauakina Kristo, ao ti kimwareirei iroun Kriso, ao ti tataekina Kristo, [ao] ti taetae ni burabeti ibukin Kristo … bwa natira a na ataia bwa antai ae a na kawaria ibukin kamaunan aia bure.”4
Ti na kanga ni karaoa te reirei aei inanon mweengara? Tabeman mai iroumi a tia n ongo mai irou aron kukurein kainnabau, Mel, ao ngai n namakin ngkai ti riki bwa kaaro irouia aman natira. Ngkai ti kaitarai kakaewenako n te aro ni kairiiri ni karo ao n teimatoa inanon kakaewenako n te maiu, ti rang kainnanoa te ibuobuoki. Ti tataro ao ti bubuti bwa tina ata te bwai ae tina karaoia. Te kaeka are e roko e bon matata: “E bon Nakoraoi ngkana te auti e aki barongaaki ao ataei a bwaini aia bwai ni matu ao mwakuri tabeua a tiku n aki karaoaki. Ti te bwai ae e na riai ni karaoaki inanon te mweenga bon kamatebwaian koroboki aika a tabu ni katoa bong ao te tataro kainutu n te tairiki ni katoa wiiki.”
Ti bon kataia ni karaoi bwaai aikai, ma aki moanibwai n tainako ao, ibuakon kamangaongao, n tabetai ti katinanikui. Ti bitii bwaai aika ti riai ni boboto iaona ao ti kataia n aki raraomaeakin bwaai aika aki rang bongana. Ara maroro e waaki n te taetae, kimwareirei, ao te kabwarabwara, ao ni kakoaua iroun Kristo ni kataia n tataro ao ni kamatebwai koroboki aika a tabu ni katoa bong ao ni karaoi ara kai n utu n te tairiki ni katoa wiiki.
Te rao e kauringai n te tai ae tibwa nako, “Ngkana ko butiia te aine bwa e na wareki koroboki aika a tabu ao n tatataro riki, e riki bwa te rawawata irouia. A kaman namakinna bwa e a rang mwaiti te bwai ae a na karaoia.”
Tariu ao mwaneu, ibukina bwa I ataia ibon irou, ao mai iroun kainnabau, I riai ni kakoauai kakabwaia ni kamatebwaian koroboki aika a tabu ni katoa bong ao te tataro ao kainutu n te tairiki ni katoa wiiki. Aikai raoi bwaai aika kakaraoaki ake e buoka kanakoan te rawawata, ao a anga kairiiri nakon maiura, ao n raoni katantan nakon mweengara. Imwiina, ngkana tamnei aika buakaka ke kakaewenako tabeua a kaoti nakoia ara utu, ti kona ni butiia te Uea ibukin ana ibuobuoki ao ni kantaninga te kairiiri ae tamaroa mairoun te Tamnei, n ataia bwa ti a tia ni karaoa te bwai are e kantaningaira Tamara bwa tina karaoia.
Tariu ao mwaneu, ngkana ti tuai ni karaoi waaki aikai inanon mweengara, ti kona n tainako ni bane ni moanna mangkai. Ngkana natira a ikawai ao a rawa n raoniira, ti kona ni moanna mai iroura. Ngkana ti karaoia, ana bitaki te Tamnei e na waaki ni kaona mweengara ao maiura ao , inanon te tai, natira a na iriira.
Uringnga bwa Abotoro aika a maiu a tia naba ni berita bwa ngkana ti ukoukoriia ara bakatibu ao ni katauraoia araia ara utu ibukin te tembora, ti na katanaki ngkai ao inanon nako maiura ngkai ti kateimatoai arora n tau ibukin te rekomente nakon te tembora.5 Te berita raa!
Te roronrikirake, karaoa tibwangam ibukin maiuraoin maium n tamnei. Tiringa am tareboon ngkana e riai, anenea kunan te Moanrinan, tataro ibukin te ibuobuoki, iangoa te kibu n booki aika a tabu, otinako man te tamnei, tamnein te Tia Kamaiu, anaa te toa ma te kororaoi, kamatebwaia Ibukin Korakoraia te Roronrikirake, riki bwa banna ni katoto nakoia raraom, onimakiniia kaaro, nako kawara am bitiobi, bubuti ibukin te ibuobuoki, ao ukoukora te maroro ma temanna ae mwaatai, ngkana e kainnanoaki.
Tera ae I tangiriia tibu bwa a na ataia? I tangiriia ao ngkami bwa kam na ataia bwa I ataia bwa e maiu te Tia Kamaiu ao e tangiriira. E a tia ni kabomwi ibukin ara bure, ma ti riai ni katorobubua imatan Tamara are i Karawa, n te nanorinano ae nano, ni kaoti ara bure, ao ni bubutiia bwa e na kabwarai ara bure. Ti riai n tangiria ni bitii nanora ao ara kantaninga ao ni bwaina te nanorinano ae tau n ukoukora te ibuobuoki ao kabwaraan ara bure mairouia ake ti bure nakoia ke ni katinanikuia.
I ataia bwa Iotebwa Timiti e noora te Atua, Tamara are i Karawa, ao ara Tia Kamaiu, Iesu Kristo. I kakoaua bwa iai ara burabeti ae maiu iaon te aba, Beretitenti Thomas S. Monson. I kakoaua naba bwa tina bon aki kairaki nako ngkana ti irii nanon aia reirei ana burabeti te Atua. I kakoaua ni mwaakan ara berita aika a tabu ao kakabwaia n te tembora.
I ataia bwa ana Boki Moomon e bon koaua! I aki kona ni kabwarabwara mwaakan te boki ae tamaroa aei. I tii ataia bwa, n raonaki ma te tataro, ana Boki Moomon e uota te mwaaka are e kataniia utu, kakorakorai reitaki, ao e anga te kakoaua nakon te aomata i matan te Uea. I kakoauai bwaai aikai n aran Iesu Kristo ae tabu, amen.