Boon—ao Kakabwaia—n Riki bwa Ana Reirei Iesu
Kakorakorako. Maiuakina te euangkerio ma te nanomatoa e ngae ngke tabeman ake i rarikim a aki maiuakinna.
Beretitenti Monson, ti tangiri ngkami. Ko a tia n kabanea nanom e ngae ngke e na roota marurungim nakon wewete nako are e a tia n anganiko te Uea, riki n te nakoa ae tabu are ko taua ngkai. Te Ekaretia aio e karabwako ibukin am mwakuri ae aki mwaeiei ao am kakaonimaki ae aki bwaka nakon te beku.
Ma te kamoamoa ao te kaunganano nakoia aomata ni kabane ake a kainnanoia bwa a na teimatoa n aki mwaeiei ni boong aikai, I taekinna nakoimi ni kabane ao riki te roro ae rikirake n te Ekaretia bwa ngkana e tuai n riki nakoimi, teuana te bong are ko na kainnanoia iai n kamanoa am onimaki ke tao ni kekeiaki ma bwainikirinakim ake a roko ibukina bwa ngkoe kaain ana Ekaretia Iesu Kristo ibukiia Aika Itiaki ni Boong aika Kaitira. Taai aikai a kainnanoa te ninikoria ao te karinerine n am itera.
Te katooto, temanna te mitinare te titita e koroboki nakoiu tabeua te tai n nako: “Ngai ao toau ti noora te mwaane n tekateka iaon te kaintekateka n te tabo ni kamaangngang ngke e katawanou. Ngke ti kaania, e taraira ao e noori arara ake iaora. Ma te matabubuaka, e kibarake ao e katioa baina bwa e na oreai. I bwatuku ao I tua, ma e a manga katakananaai ni kanana ao e taetae buakaaira n taeka aika a rangi ni bubuaka. Ti taonnako n akea te bwai ae ti taekinna. I kataia ni kaoi amwarake ake ni moamoau, ma I a manga namakina manatuan te buteeta ngke e boo ma bukin atuu. N tabetai ao e kaangaanga te maiu ni mitinare ibukina bwa n te tai arei ao I tangiria n oki rikaaki, ni kaeka te mwaane ae tua karako arei, ao ni kangai, ‘Bukin tera ko karaoa aei!’ Ma I aki.”
Nakon te mitinare ae kakaonimaki aio, o natiu, n oin am taneiai ao ko a riki bwa kaain aia kurubu mwaane ao aine aika a kaokoro ake a tia, n aron are e taekinna te burabeti man Ana Boki Moon are Iakobwa, “n iangoa maten [Kristo], ao n [namakina rawawatan] ana kaibangaki ao n [uota] buakakan te aonaaba.”1
Eng, ibukin Iesu, ao e korea ae kangai tarin Iakobwa are Nibwaai: “Ao te aonaaba ibukin buakakana, a na taraia bwa te bwai ae akea bonganana; mangaia ae a na bwainikirinna, ao e na kariaia; ao a na oroia, ao e na kariaia. Eng, a na baewareia, ao e na kariaia, ibukin ana tangira ma ana taotaonakinnano ae korakora nakoia natiia aomata.”2
N titebo ma ana taneiai te Tia Kamaiu, iai te rongorongo ae abwabwaki n te aki butimwaeaki ao anga nano aika kammaraki irouia burabeti ao abotoro, mitinare, ao membwa n rooro nako—aomata ni kabane ake a tia ni kataia ni karinea ana wewete te Atua n buokia aomata nakon te “kawai ae tamaroa riki.”3
“Ao tera ae N na atongnga riki [ibukiia]?” e titiraki teuare e korea ana boki Ebera.
“[Naake] a … bonoti wiia raian,
“A kamatea kabuebuen te ai, a rawei maiuia mani win te kabaang, … a riki n ninikoria n te buaka, a kataea aia kai taian [taanga] …
“[Noori] aia mate ni kautaki man te mate [ma] tabemwang a kamarakaki, …
“Ao … a kataki ni kakanikoaia ao ni kataereaia, … ni kabaeaia ao ni kainakiia:
“A karebanaki n atibu, … a korouaki n tao, a kaririaki, a kamateaki n te kabaang: … a tiotio nako ni kunnikaiia ni kunia tiibu ma kunia kooti; akea aia bwai, a karawawataki, [ao] a bwainikirinaki;
“([Naake] a aki tau kaain te aonaaba ma ngaiia:) … a tiotio nako n rereua, ao i aoni maunga , ao i nanoni bwanganimatang ma kinonon te aba.”4
Akea te nanokokoraki bwa a tang anera i karawa ngke a korea aia karea ana reirei Iesu n te aonaaba are n taai aika mwaiti a kaitara nakon ana tua te Atua. Te Tia Kamaiu a bwaka oin rannimatana ibukiia naake a tia n aki butimwaeaki inanon bubua n ririki ao man tiringaki i nanon aia tai ni beku i Rouna. Ao ngkai E a aki butimwaeaki ao e nang tiringaki.
“O Ierutarem, Ierutarem,” e tang n takarua Iesu, “ae ko kamateia burabeti, ao ko karebanaiia ake a kanakoaki nako im, ai bati ra au kani bobotia natim, n ai aron te moa-aine, ngkana e botia bunna i aani baina, ao kam rawa!
“Noria, e nang kitanaki mwaneabami nako imi.”5
Ao iai te rongorongo ae kakaawaki ibukiia kairake n ataenimwaane ao ataeinaine n te Ekaretia aio. Tao ko na tabeaianga bwa e materaoi te tei n ninikoria ni kamanoa te koaua n te reirei ni kauarinan ke nakom n am mition ao ko kunea bwa am koaua ake ko taui inanom a kauntabaaki ke ni kabanea am konaa n tei ni matoa n taabo ake n tabetai ao a bwainingarea te maiu n tauakin te aro. Eng, e bon materaoi, ibukin te bwai ae na riki ngkana ti aki karaoi aikai bwa ara “mwaneaba” e na “kitanaki” nako ira—aomata aika kitanaki, utu aika uruaki, maeka aika a kitanaki, ao aaba aika uruaki.
Ngaia are iai iroura rawawataia naake a weteaki bwa a na reirei ana rongorongo Kristo. N raona te reirei, te kaungaunga, ao anganiia aomata te raunnano man aia mwakuri (anne mwakoron te riki bwa ana reirei Iesu ae tamaroa), n te tai teuana ma teuana taan uarongorongo aikai a weteaki bwa a na raraoma, a na kauring, ao n tabetai bwa a na tang (anne mwakoron te riki bwa ana reirei Iesu ae kamaraki). A rang ataia bwa te kawai are e kaeineti nakon te aba ni berita are “raanga n te rannimamma ao ana karewe te manibeeru”6 e riai n rinanon kawain te Maunga are Tinai, e raanga ma “ko na” ao “ko na tai.”7
Ma, taan tataekini tuua aika a roko mai ieta a aki rangi ni butimwaeaki ni boong aikai n aron taai ake ngkoa, n aron are a kona ngkai ni kakoauaa mitinare aine ake a kamanatuaaki n te buteeta. Riribai bon te taeka ae buakaka, ma e ngae n anne iai aomata ni boong aikai ake a na taetae n aron Aaba, “I ribaa [te burabeti Mikaia]; bwa e aki raoiroi ana taetae ni burabeti nako iu, ma e aki toki n [taetae ni burabetiia] te buakaka.”8 Te aekaki n riribai anne ibukin ana kokoaua te burabeti are e anaa maiun Abinataai. Aio ana taeka nakon te Uea ae Noa: “Ibukina bwa I a tia n tuangko te koaua ao ko un irou. … Ibukina bwa I a tia n taekina ana taeka te Atua ko a tia n taku bwa I baba”9 ke, n aron are a tataekinna aomata ngkai, aki reirei, kairaki iroun te mwaane, momotikitaeka, aki akoi, e uarereke am atatai n te aonaaba, ko nanoro, ao ko a kara.
Titebo ma are e tang n takaruaea te Uea nakon te burabeti ae Itaia:
“Ataei [aikai] … a na aki ongo ana tua te Uea:
“[A] taku nakoia taan mamata, Tai mamata; ao n taku nakoia burabeti, Tai taetae ni burabeti bwaai aika riai nako ira, taekin taeka ni kewekewe:
“Kam na nako mai nanon te kawai, kam na rairaki ni kitana te kawai; kamauna Atuaia Iteraera ae Tabu mai matara.”10
Ao e kananokawaki, raoraou aika kam uarereke, bwa bon anuan ara tai are ngkana aomata a tangira te atua, a tangiria bwa atua aikai a na aki rangi ni kairoro, atua aika a bebete, atua aika ti nanakoraoi n taainako ma bon akea naba aia babaire teutana, atua ake a anganganiira te namakin ae raoiroi, aika a kakangareira, ao man kakakukureira.11
Titebo ngke te aomata e karika te Atua bwa katotongana! N tabetai—ao aio kanga te kaitira n karariki—aomata aika a tangira te aro ae bebete aikai a wetea aran Iesu bwa temanna are kanga aekakin te Atua ae “kamwengaraoi” aio. E koaua aei? Teuare e aki ti taekinna bwa ti na aki urui tuua, ma ti na bon aki naba iangoa uruakakiia. Ao ngkana ti iangoa uruakakiia, ti a tia n urui i nanora. E taraa ni “kamwengaraoi” te reirei anne, e kakanongora, e tatangiraki irouia aomata aika a ti kan kukukurei ao aki kan karaoi bwaai aika a kaangaanga?
Ao naake a ti kan karaoa te bure ti teutana? E taku Iesu n akea te nanokokoraki, ngkana e bure matam nakoim, koutia. Ngkana e bure baim nakoim, koreia kanakoa.12 “I aki roko bwa N na [uota] te rau, ma te kabaang,”13 E kauringiia aomata ake a taku bwa E taekini ti baika a katokabeti. E aki kakubanako bwa imwin ana kabwarabwara nako, aomata a “[butiia] bwa e na kitana abaia.”14 E aki kakubanako bwa imwin ana kakai nako, mwaakana e bukinaki bwa mairoun teuare e buakaka ao tiaki te Atua.15 E ootara bwa te taeka ae rangi ni kinaaki ae “Tera ae na karaoia Iesu? tiaki n taainako ae iai mwina ae nakoraoi.
N teuana te tai ae rangi ni kakaawaki n Ana mwakuri iaon te aba, e taku Iesu, “Kam na Itangitangiri imarenami, n ai arou ae I tangirii ngkami.”16 Ni kakoauaa bwa a oota raoi bwa aekakira te aeka n tangira anne, E taku, “Ngkana kam tangirai, tou mwin au tua”17 ao “ane … ri aon [te] tua teuana ae maraurau, ma n reireiia aomata te aro aei, e na atongaki bwa … moan te mangori n uean te Atua.”18 Te tangira ae kororaoi bon boton ara kainnano iaon te aonaaba aei n ae aki bwanin ibukina bwa te raoiroi e riai n raonna n taainako. Ngaia are ngkana te tangira bon kairara, n aron are e bon riai, ngkanne man ana taeka Teuare rabwatan te tangira, ti riai ni katoka riaoan tuua ao aron boutokakia aomata nakon riaon tuua. E ataia raoi Iesu bwa tera ae a mwaninga aomata aika mwaiti ni boong aikai: bwa iai te kaokoro ae kakaawaki imarenan te tua ni kabwarai buure (are iai Ana kona ae akea tokina ni karaoia) ao te kauring ibukin kaungakina (are teuana te tai ae E karaoa aei).
“Raao, riki raoraou aika kam uarereke, kaninikoriai riki ngkami. Te tangira n ai aron Kristo ae e Itiaki ae e reke man te raoiroi ae koaua e kona ni bita te aonaaba. I kakoaua bwa ana euangkerio Iesu Kristo ae koaua man maiu e mena n te aonaaba aio ao ngkami bon membwa n Ana Ekaretia ae koaua man maiu, aika a kataia n tibwauaia. I kakoaua te euangkerio ao te Ekaretia anne, ma te kakoaua ae onoti ni kiingin te nakoanibonga aika kaokaki ake a karokoa mwaakan ao korakoran otenanti ni kamaiu. I rangi ni koaua riki bwa kiing akanne a tia ni kaokaki ao bwa otenanti akanne a manga tauraoi rinanon Ana Ekaretia Iesu Kristo ibukiia Aika Itiaki ni Boong aika Kaitira nakon ae I ataia bwa I tei i matami n te tabo n taetae aio ao kam tekateka i matau n te maungatabu aei.
Kakorakorako. Maiuakina te euangkerio ma te nanomatoa e ngae ngke tabeman ake i rarikim a aki maiukinna. Kamanoa am koaua ma te karinerine ao te nanoanga, ma kamanoi. Bwanaa aika kaunganano mangkoa, n ikotaki ma bwanaa ake kam na ongo n te maungatabu aei ao te bwanaa are kam a tibwa tia n ongo mairoun Beretitenti Thomas S. Monson, e na kairiko ni maiuna maiun te Kiritian ae ana reirei Iesu. Bon te kawai ae eti, ao te kawai ae wariki ao e aki n ae e a bon kakaunganano naba, ma e kona ni kaunga man nakoraoi touakina, “ma … te teimatoa i nanon Kristo, … ma te kaantaninga ae tamaroa ma ni kororaoi, ma tangiran te Atua ma aomata ni kabane.”19 Ni maiuakinan aio ma te ninikoria, ko na karekea te onimaki ae matoatoa, ko na karekea te kamanoaki man te bwainikirinaki irouia tabemwang, man taian kanoa i buakon te ukeuke n anti, ao ko na namakina korakoran ara Tia Kabooira ae ai aron te bwaa, are ngkana ti katea iai maiumi n ai aron Kristo ae teimatoa ko aki kona ni bwaka.20 N aran Iesu Kristo ae tabu, amen.