Heheuraa tamau
Na te presideni Henry B. Eyring
Tauturu Matamua i roto i te Peresideniraa Matamua
Eita te haavâraa a te taata e te mana‘o maramarama e nava‘i no te farii i te mau pahonoraa i te mau uiraa no ni‘a i te mea faufaa a‘e i roto i te oraraa. E titau tatou i te heheuraa no ô mai i te Atua ra.
Ta’u ti‘aturiraa no tatou i teie mahana ia farii tatou paatoa i te here e i te maramarama no ô mai i te Atua ra. E rave rahi o te faaroo mai nei i teie mahana o te hinaaro rû nei i te haamaitairaa no te heheuraa o te taata iho no ô mai i to tatou Metua here i te Ao ra.
No te mau peresideni misioni, e riro ïa o te hoê pure taparu no te ite nahea ia faaitoito i te hoê misionare i roto i te fifi. No te hoê metua tane e aore ra, hoê metua vahine i te hoê vahi i te ao nei tei ninahia i te tama‘i, e riro ïa o te hoê hinaaro tuutuu ore ia ite e, e faanuu anei i to’na utuafare i te hoê vahi pe‘ape‘a ore e aore ra, e faaea noa i te vahi tei reira ratou. E rave rahi hanere peresidini tĭtĭ e te mau episekopo e pure nei i teie mahana no te ite nahea ia tauturu i te Fatu ia faaora i te hoê mamoe mo‘e. E no te hoê peropheta, e riro ïa o te iteraa eaha ta te Fatu e hinaaro ia parau oia i to te Ekalesia e i te hoê ao arepurepu.
Ua ite tatou paatoa e, eita te haavâraa a te taata e te mana‘o maramarama e nava‘i no te farii i te mau pahonoraa i te mau uiraa no ni‘a i te mea faufaa a‘e i roto i te oraraa. E titau tatou i te heheuraa no ô mai i te Atua ra. E eita tatou e titau hoê noa iho heheuraa i roto i te hoê tau hepohepo, e hinaaro râ tatou ia tahe tamau noa mai te heheuraa. Eita tatou e hinaaro hoê noa iho anapa o te maramarama e te tamahanahana, e hinaaro râ tatou i te haamaitairaa tamau o te aparauraa i te Atua.
Te tumu mau i ti‘a mai ai te Ekalesia no te mea ïa, ua ite hoê tamaiti apî e, e parau mau te reira. Ua ite te tamaiti apî ra o Iosepha Semita e, eita oia e ite na roto ia’na iho e, tei hea te Ekalesia e amui atu. No reira, ua ui oia i te Atua mai ta te buka a Iakobo i parau ia’na e, e nehenehe. Ua fâ maira te Atua te Metua e Ta’na Tamaiti Here i roto i te hoê uru raau. Ua pahono mai raua i te uiraa tei ore e tae‘ahia i te mana o te Iosepha no te tatara.
E i reira, aita oia i pii-noa-hia e te Atua ia haamau i te Ekalesia mau a Iesu Mesia, ua faaho‘i-atoa-hia mai râ i reira te mana no te ti‘aoro i te Varua Maitai ia ti‘a i te heheuraa no ô mai i te Atua ra ia tae tamau noa mai.
Teie te tatararaa a te peresideni Boyd K. Parker no te reira tapa‘o faaite o te Ekalesia mau : « Te vai tamau noa nei te heheuraa i roto i te Ekalesia : e farii te peropheta i te reira no te Ekalesia ; e farii te peresideni no to’na tĭtĭ, no to’na misioni, e aore ra, no ta’na pŭpŭ autahu‘araa ; e farii te episekopo no to’na paroisa ; te metua tane no to’na utuafare ; te taata no’na iho ».
E haamata, e hope, e e tamau noa te reira faanahoraa nehenehe o te heheuraa, ia farii ana‘e tatou i te heheuraa no tatou iho. E rave tatou i te taata rahi ra o Nephi, te tamaiti a Lehi, ei hi‘oraa na tatou. Ua moemoeahia to’na metua tane. Ua faariro te tahi atu mau taata i roto i te utuafare o Nephi i te moemoea a Lehi ei ohipa aoaoa. I roto i te moemoea te vai ra te faaueraa no ô mai i te Atua ra ia faaruru i te ati rahi o te ho‘iraa i Ierusalema e tii i te mau api tei roto i reira te parau na te Atua no te hopoi na muri iho ia ratou i roto i to ratou tere i te fenua i parauhia ra.
Pinepine tatou i te faahiti i te parau itoito a Nephi i te taime a ani ai to’na metua tane ia ratou ia ho‘i i Ierusalema. Ua ite outou i te mau parau ra : « E haere atu vau, e rave hoi i te mau mea ta te Fatu i faaue maira ».
E faaroo a‘era Lehi ia Nephi i te parauraa i taua mau parau ra, te na ô ra te papa‘iraa e, « oaoa roa iho ra oia ». Oaoa to’na i te mea e, ua ite oia e, ua haamaitaihia Nephi i te heheuraa papû e, teie moemoea o to’na metua tane, e aparauraa mau ïa no ô mai i te Atua ra. Aita o Nephi i parau e, « E haere atu vau, e rave hoi i te mau mea ta to’u metua tane i parau mai ia’u ia rave ». Ua parau râ oia e, « E haere atu vau, e rave hoi i te mau mea ta te Fatu i faaue maira ».
Na roto mai i to outou iteraa i roto i to outou iho utuafare, ua ite atoa outou e, no te aha Lehi i « oaoa roa [ai] ». No roto mai to’na oaoa i te iteraa e, ua farii Nephi i te heheuraa haapapû.
E rave rahi metua tei haamau i te ture utuafare no te ho‘iraa mai te tamarii paari i te fare i te pô. Tera râ, a feruri na i te oaoa ia ite te mau metua, mai te hoê tei ite, tau hepetoma noa i ma‘iri a‘e nei e, te hoê tamarii tei faaru‘e i te utuafare aita i maoro a‘e nei, aita oia i haamau noa i te hoê hora ho‘iraa fare no’na, ua haapa‘o atoa râ oia i te Sabati mai tei haapiihia ia’na i te utuafare. E faatupu te heheuraa a te hoê metua, i te hoê ohipa vai maoro i roto i te heheuraa o te taata iho, o te tamau noa e tae roa’tu i ni‘a i te tamarii.
E mea papû e, ua maramarama maitai to’u metua vahine i te reira parau tumu o te heheuraa. I to’u apîraa, e tapiri au i te opani muri ma te maniania ore ia ho‘i ana‘e mai au i te fare i te maororaa pô. Titauhia ia’u ia haere na mua i te piha o to’u metua vahine no te haere i roto i to’u piha. Noa’tu e, e haere marû noa vau, ia tae ana‘e au i mua i to’na opani afa matara noa, e faaroo vau i to’u i‘oa, ma te marû, « Hal. Haere mai na maa taime iti ».
E tomo vau i roto e e parahi i te hiti o to’na ro’i. E mea poiri i roto i te piha. Ahiri outou i faaroo, e mana‘o outou e, e paraparauraa hoa noa ïa no ni‘a i te oraraa. Tera râ, i teie mahana, te haamana‘o nei â vau i te mau mea ta’na i parau mai, ua tuati noa te puai ta’u i ite i te taime a tai‘o ai au i to’u haamaitairaa patereareha.
Aita vau i ite e, eaha ta’na i ani i roto i te pure, a tia’i noa ai oia ia’u i taua mau pô ra. Te mana‘o nei au e, te tahi tuhaa no ni‘a ïa i to’u vai-pe‘ape‘a-ore-raa. Ua papû râ ia’u e, ua pure oia mai ta te hoê patereareha e pure hou a horo‘a ai oia i te hoê haamaitairaa. E pure oia ia ti‘a i ta’na mau parau ia tae i roto i te taata ei mau parau na te Atua, eiaha na’na. Ua pahohohia te mau pure a to’u metua vahine no taua haamaitairaa ra i ni‘a i to’u upoo. Tei roto oia i te ao varua hau atu i te 40 matahiti i teie nei. Ua papû roa ia’u e, e oaoa rahi to’na, i haamaitaihia hoi au mai ta’na i ani, ia faaroo vau i roto i ta’na parau a‘o i te mau faaueraa a te Atua. Ua tamata vau ia haere e ia rave hoi mai ta’na i hinaaro ia rave au.
Ua ite au i te reira â semeio o te heheuraa tamau i roto i te mau peresideni tĭtĭ e te mau episekopo i roto i te Ekalesia. E, mai te reira te heheuraa i te mau ti‘a faatere o te utuafare, te faufaa o te heheuraa, tei te huru ïa o te feia e arata‘ihia no te farii i te heheuraa haapapû.
Ua ite au i te reira semeio o te heheuraa i muri a‘e i te ati i tupu na roto i te parariraa te haapahuraa pape no Teto Dam i Idaho i te matahiti 1976. E rave rahi o outou tei ite i te aamu no te ohipa i tupu. Tera râ, e nehenehe te hi‘oraa o te heheuraa tamau tei fariihia e te hoê peresideni tĭtĭ e haamaitai ia tatou paatoa i roto i te mau mahana i muri nei.
E rave rahi tauatini taata tei faahaerehia i rapae i to ratou faaearaa no te mea ua ino roa to ratou fare. Na te hoê peresideni tĭtĭ, hoê taata faaapu, i arata‘i i te mau ohipa tautururaa. Tei roto vau i te hoê piha haapiiraa i te fare haapiiraa tua rua no Ricks tau mahana i muri a‘e i te ati. Ua tae mai te hoê ti‘a no te piha faatere a te hau no te ati. Ua tomo mai oia e to’na mau tauturu i roto i te piha rahi i reira to te peresideni tĭtĭ haaputuputuraa mai i te mau episekopo e i te tahi mau faatere no te tahi atu mau faaroo. Tei reira vau no te mea e rave rahi o te feia tei ora mai, te utuutuhia ra ratou e te noho ana‘e ra i te fare haapiiraa ta’u e peresideni ra.
A haamata ai te putuputuraa, ua ti‘a a‘era te ti‘a no te piha faatere a te hau no te mau ati i ni‘a e ua haamata a‘era i te parau ma te reo mana i te mau mea e titauhia ia rave. I muri iho, ua tapura oia i na ohipa faufaa e pae e aore ra, e ono, ua pahono mâru atura te peresideni tĭtĭ e, « Ua oti te reira i te ravehia e matou ».
Tau minuti i muri mai, na o mai nei te ti‘a no te piha faatere a te hau no te mau ati e, « Ia’u i mana‘o, e parahi noa vau e e hi‘o noa maa taime iti ». Ua faaroo a‘era oia e to’na mau tauturu i te mau episekopo e te mau peresideni pŭpŭ peresibutero ia faaite mai i te mau ohipa ta ratou i rave. Ua faataa mai ratou eaha te arata‘iraa ta ratou i farii e i apee no roto mai i to ratou mau ti‘a faatere. Ua faati‘a atoa ratou i te mau mea tei faaûruhia ia ratou ia rave, a pee ai ratou i te mau arata‘iraa no te ite mai i te mau utuafare e no te tauturu ia ratou. Ua maoro te pô. E rohirohi roa ratou paatoa no te faaite i to ratou pe‘ape‘a maoti te faaiteraa i to ratou here i te taata.
Ua horo‘a’tura te peresideni tĭtĭ i te tahi mau arata‘iraa hopea i te mau episekopo e ua faaara maira oia i te taime no te apooraa i te po‘ipo‘i roa no te afa‘i mai i te parau faaite.
I te po‘ipo‘i a‘e, ua tae mai te ti‘a no te hau e 20 minuti na mua a‘e a haamata ai te apooraa parau faaite e te faaueraa ohipa. Te ti‘a ra vau i piha‘iho noa. Ua faaroo vau ia’na i te parau-marû-raa i ni‘a i te peresideni tĭtĭ, « Peresideni, eaha ta oe e hinaaro ia’u e i te mau melo o ta’u pŭpŭ ia rave ? »
Te mea ta taua taata ra i ite, ua ite ïa vau i te reira i te mau taime ati e te tamataraa, ati a‘e te ao nei. Ua tano te Peresideni Packer. E tae mai te heheuraa tamau i te mau peresideni tĭtĭ ra no te huti ia ratou i ni‘a a‘e i to ratou iho paari e te aravihi. E, i ô atu i te reira, e horo‘a te Fatu i te feia ta te peresideni e arata‘i, i te hoê faaiteraa haapapû e, no ô mai ta’na mau faaueraa i te Atua ra, na roto i te Varua Maitai, haere atu i roto i te hoê taata hara nei.
Ua haamaitaihia vau ia piihia ia pee i te mau ti‘a faatere faaûruhia i te pae rahi o to’u oraraa. I to’u apî-roa-raa ua piihia vau ia riro ei tauturu no te hoê peresideni pŭpŭ peresibutero. Ua riro na vau ei tauturu i raro a‘e e piti na peresideni mataeinaa, e no hoê Episekoporaa Faatere Rahi o te Ekalesia, hoê melo no te Pŭpŭ no te Tino Ahuru Ma Piti Aposetolo, e hoê tauturu i raro a‘e e piti Peresideni no te Ekalesia. Ua ite au i te heheuraa i horo‘ahia ia ratou e i muri iho te haapapûraa i te mau taata e pee ia ratou.
Teie heheuraa no te taata iho no te fariiraa, o ta tatou paatoa e hinaaro nei, eita ïa e tae ohie noa mai, eita atoa e roaa ohie noa na roto noa i te aniraa. Te horo‘a mai nei te Fatu i te arata‘iraa i muri nei no te tauturu ia tatou ia farii i te reira mau faaiteraa no ô mai i te Atua ra. E arata‘iraa ïa no te mau taata atoa e imi nei i te heheuraa no te taata iho mai tei titauhia ia tatou.
« Ia î noa atoa hoi to outou mau aau i te aroha i te mau taata atoa, e i te utuafare faaroo, e ia faaunauna noa te taiata ore i to outou mau feruriraa i te mau taime atoa ; ei reira to outou ti‘aturiraa e puai roa ai i mua i te aro no te Atua ; e e ma‘iri mai ai te haapiiraa no te autahu‘araa i ni‘a i to outou aau mai te hupe no te ra‘i maira.
« E e riro te Varua Maitai ei apiti no ouotu i te mau taime atoa ».
Na roto mai i te reira, e rave mai au i te a‘oraa no tatou paatoa. Eiaha e vahavaha i te mana‘o e roaa mai ia outou no te here i te peropheta o te Atua. I te mau vahi atoa ta’u e haere i roto i te Ekalesia, noa’tu o vai te peropheta i te reira taime, e ui mai te mau melo e, « Ia ho‘i atu oe i te pû faatereraa o te Ekalesia, e ti‘a anei ia oe ia parau atu i te peropheta e, ua here roa matou ia’na ? »
Ua hau roa’tu te reira i te haamori aito e aore ra, i te mau mana‘o haafaahiahia i te mau aito, o te tupu mai i roto ia tatou i te tahi taime. E horo‘a te reira no ô mai i te Atua ra. Na roto i te reira e farii ohie atu â outou i te horo‘a no te heheuraa haapapû ia paraparau ana‘e oia i roto i to’na toro‘a ei peropheta no te Fatu. Te here e tupu mai i roto ia outou, o te here ïa o te Fatu no te mau taata atoa tei riro ei auvaha parau No’na.
E ere te reira i te mea ohie ia farii tamau noa i te mea e, pinepine te Fatu i te ani i To’na peropheta ia horo‘a i te a‘oraa tei riro ei mea teimaha no te taata ia haapa‘o. E tamata te enemi o to tatou varua ia arata‘i ia tatou ia au ore e ia tapetete te mana‘o no ni‘a i te piiraa o te peropheta no ô mai i te Atua ra.
Ua ite a‘e nei au e mea nahea e nehenehe ai i te Varua Maitai ia haaputapû i te hoê aau marû no te paruru o te hoê pipi haehaa a Iesu Mesia na roto i te heheuraa haapapû.
Ua tono te peropheta ia’u ia horo‘a i te mana taati mo‘a i ni‘a i te hoê taata i roto i te hoê oire na‘ina‘i atea. Tei te peropheta ana‘e ra te taviri no te faaoti e, o vai te farii i te mana mo‘a tei horo‘ahia’tu e te Fatu ia Petero ra, te Aposetolo faatere. Ua farii atoa vau i te reira mana taati, tera râ, na roto ana‘e i te faaueraa a te Peresideni o te Ekalesia e ti‘a ai ia’u ia horo‘a’tu i te reira i te tahi atu taata.
No reira, i roto i te hoê piha i roto i te hoê fare pureraa i te atea ê roa ia Roto Miti, ua tuu vau i to’u na rima i ni‘a i te upoo o te hoê taata tei ma‘itihia e te peropheta ia farii i te mana taati. E itehia i ni‘a i to’na na rima te mau tapa‘o o te hoê oraraa ohipa i roto i te repo ia roaa te tahi maa vahi iti tauturu no te oraraa. Ua parahi ta’na vahine iti na‘ina‘i i piha‘i iho ia’na. E ite-atoa-hia i ni‘a ia’na te mau tapa‘o o te mau matahiti ohipa teimaha i piha‘i iho i ta’na tane faaipoipo.
Ua faahiti au i te mau parau tei horo‘ahia mai e te peropheta. « No te mana e te hopoi‘a i tuuhia mai ia’u e te », i reira e faahiti ai i te i‘oa o te peropheta, « tei mau i te mau taviri atoa o te autahu‘araa i ni‘a i te fenua nei i teie tau, te horo‘a’tu nei au i te mana taati i ni‘a ia oe », i reira e faahiti ai i te i‘oa o te taata, e i muri iho te i‘oa o te hiero i reira oia e tavini ai ei taata taati.
Ua tahe a‘era te roimata i ni‘a i to’na paparia. Ua ite a‘era vau e, te ta‘i atoa ra ta’na vahine. Ua tia’i au ia hau raua. Ua ti‘a a‘era te vahine i ni‘a e ua haere maira i piha‘i iho ia’u. Hi‘o maira i ni‘a e ua parau maira ma te haamâ rii e, ua oaoa oia e ua pe‘ape‘a atoa râ. Ua parau maira oia e, ua au roa oia ia haere i te hiero na muri iho i ta’na tane, i teie nei nei râ, ua mana‘o oia e, eiaha oia e haere na muri iho ia’na, no te mea, ua ma‘iti te Atua ia’na no te hoê ti‘aturiraa hanahana e te mo‘a. E ua parau maira oia e, ua tupu mai te mana‘o ti‘amâ ore ia riro ei hoa no’na no te hiero no te mea, aita ta’na e nehenehe e tai‘o e e papa‘i.
Ua tamarû vau ia’na e, e hi‘oraa hanahana no ta’na tane ia apiti oia ia’na i roto i te hiero no to’na mana rahi i te pae varua. I roto i te faito ha‘iha‘i roa o to’u aporaa mai i ta’na mau parau, ua parau atu vau ia’na e, ua heheu mai te Atua ia’na i te mau mea i ô ê atu i te mau ite atoa o te fenua nei.
Ua ite oia na roto i te horo‘a o te Varua e, ua horo‘a mai te Atua i te hoê ti‘aturiraa rahi na roto mai i Ta’na peropheta i te tane ta’na i here. Ua ite oia iho e, te mau taviri no te horo‘a i taua mana taati ra ua mauhia ïa e te hoê taata aitâ oia i ite a‘e nei e ta’na iho i ite e, e peropheta ora ïa na te Atua. Ua ite oia, ma te ore e faaitehia mai e te hoê a‘e ite ora e, ua pure te peropheta i ni‘a i te i‘oa o ta’na tane. Ua ite oia iho e, ua pahono mai te Atua.
Ua ite atoa oia e, te mau oro‘a ta ta’na tane e rave, e taati te reira i te taata no te oraraa mure ore i roto i te basileia tiretiera. Ua haapapû oia i roto i to’na mana‘o e to’na aau e, te fafauraa ta te Fatu i rave i mua ia Petero, te vai noa nei â te reira i roto i te Ekalesia : « E ta oe e haamau i raro nei, e haamau-atoa-hia ïa i te ao ». Ua ite oia iho i te reira, na roto i te heheuraa, no ô mai i te Atua ra.
E ho‘i na tatou i ta tatou parau omuaraa. « Te vai tamau noa nei te heheuraa i roto i te Ekalesia : e farii te peropheta i te reira no te Ekalesia ; e farii te peresideni no to’na tĭtĭ, no to’na misioni, e aore ra, no ta’na pŭpŭ autahu‘araa ; e farii te episekopo no to’na paroisa ; te metua tane no to’na utuafare ; te taata no’na iho ».
Te faaite papû atu nei au ia outou e, e parau mau. Te faaroo nei te Metua i te Ao ra i ta outou mau pure. Te here nei Oia ia outou, e ua ite Oia i to outou i‘oa. O Iesu te Mesia, te Tamaiti a te Atua, e to tatou Ora, ua here Oia ia outou i te faito eita e itea ia outou.
Te ninii mai nei te Atua i te heheuraa, na roto i te Varua Maitai, i ni‘a i Ta’na mau tamarii. Te paraparau nei Oia i Ta’na peropheta i ni‘a i te fenua nei, o Thomas S. Monson i teie mahana. Te faaite papû nei au e, te mau nei e te faaohipa nei oia i te mau taviri atoa o te autahu‘araa i ni‘a i te fenua nei.
Mai te mea e, e faaroo outou i roto i teie amuiraa i te mau parau a te feia ta te Atua i pii no te paraparau ei mono No’na, te pure nei au ia farii outou i te heheuraa haapapû ta outou e hinaaro nei no te imi i to outou haerea i roto i te tere no te ho‘i faahou i te fare, no te parahi i piha‘i iho Ia’na i roto i te hoê utuafare taatihia e a muri noa’tu. Na roto i te i‘oa o Iesu Mesia ra, amene.