Iosepha Semita
Na Elder Neil L. Andersen
No te Pŭpŭ no te Tino Ahuru Ma Piti Aposetolo
Ua maʻiti Iesu Mesia i te hoȇ taata moʻa, te hoȇ taata parau-tiʻa, no te arataʻi i te Faahoʻi-faahou-raa mai i te ȋraa o Ta’na evanelia. Ua maʻiti Oia ia Iosepha Semita.
I to’na farerei-matamua-raa i te peropheta Ioseph Semita i te 17raa o to’na matahiti, ua pii te hoê melahi ia Iosepha ma to’na iʻoa e ua parau atu ia’na e, e veʻa oia, o Moroni, tei tonohia mai mua mai i te aro o te Atua e e ohipa ta te Atua na’na ia rave. A feruri na e aha rȃ te manaʻo o Iosepha a parau ai te melahi ia’na « e itehia to’na ra iʻoa no te maitai e no te ino i rotopu i te mau fenua, te mau opu, e te mau reo atoa ».1 Peneiaʻe no te hitimahuta i roto i te mata o Iosepha Semita i tapiti ai Moroni i te parau e, e parauhia te mea maitai e te mea ino atoa no niʻa ia’na i rotopu i te mau taata atoa.2
Ua tae marû noa mai te mau mea maitai no niʻa ia Iosepha Semita ; te mau parau ino rȃ ua haamata oioi ia te reira. Ua papaʻi Iosepha : « E mea maere roa i te mea e tamaiti itea-ore-hia e ua riro ïa oia… ei taata rahi i tupu ai… te varua hamani ino puai roa e te varua faahapa i niʻa ia’na ».3
A tupu noa’i te here no Iosepha Semita i te rahi, ua tupu atoa hoʻi te au ore no’na. I te 38 o to’na matahiti, ua taparahi-pohe-hia oia e te hoê pǔpǔ e 150 taata tei peni i to ratou mau hohoʻa mata.4 Noa’tu ua hope taʻue noa te oraraa o te Peropheta, te haamata noa ra te parau maitai e te ino no niʻa ia Iosepha.
E tiʻa anei ia tatou ia maere i te mau mea ino tei parauhia no’na ? Ua parauhia te aposetolo Paulo ei taata aoaoa e te maamaa.5 Ua parauhia to tatou Faaora here, te Tamaiti a te Atua, ei taata aamu e te inu uaina e tei ûruhia e te demoni.6
Ua parau te Fatu ia Iosepha no niʻa i to’na hopearaa :
« E ui mai to te mau hopea no te ao nei i to oe iʻoa, e e parau amuamu hoi te feia maamaa ia oe, e e faatupu o hade i te riri rahi ia oe ;
A titau noa’i te feia mâ i te aau… te feia paari… e te feia taiata ore hoi, i te mau haamaitairaa i te mau taime atoa i raro aʻe i to oe rima ra ».7
No te aha te Fatu i faati‘a’i i te parau ino ia apee atoa mai i te parau maitai ? Hoê tumu maori râ, na teie patoʻiraa i te mau mea a te Atua e faatuu i te turi o te feia imi i raro no te imi i te pahonoraa.8
O Iosepha Semita te peropheta no te Faahoʻi-faahou-raa mai. Ua haamata ta’na ohipa varua i te fâraa mai te Metua e te Tamaiti, ma te peehia e te mau fâraa e rave rahi o te mau veʻa no te raʻi mai. Ua riro oia ei mauhaa i roto i te rima o te Atua no te faahaereraa mai i te papaʻiraa moʻa, te haapiiraa tumu tei moʻe na, e te faahoʻi-faahou-raa mai o te autahuʻaraa. E titau te faufaa rahi o te ohipa a Iosepha i te tahi mea hau atu i te feruriraa noa ; e titau te reira ia tatou ia « ani i te Atua »9 tatou, mai ia Iosepha. E tiʻa i te mau uiraa varua ia farii i te mau pahonoraa varua no ô mai i te Atua.
E rave rahi o te feia pato‘i i te ohipa no te Faahoʻi-faahou-raa mai o te ore roa e tiʻaturi nei e, te paraparau nei te mau veʻa no te raʻi i te taata i te fenua nei. Te parau nei ratou e eita roa e nehenehe i te mau api auro ia horoʻahia mai e te hoê melahi e ia iritihia e te mana o te Atua. No taua tiʻaturi ore ra i patoʻi oioi ai ratou i te iteraa papû a Iosepha, e te vahi oto, te tutava nei te tahi i te haafaufaa ore i te oraraa o te Peropheta ma te parau i te parau haavare no niʻa i to’na huru taata.
E oto ihoa ra tatou ia otohe anaʻe te hoê taata i to’na iteraa papu, o ona hoʻi tei faahanahana ia Iosepha i te hoê taime e tei faahapa i te Peropheta i muri iho.10
Ua parau Elder Neal A. Maxwell i te hoê taime, e « Te tuatapaparaa i te aamu o te Ekalesia na roto i te mata o te feia taiva, ua riro ïa te reira « mai te uiuiraa ia Iuda no te taa i te huru o Iesu. E faarahi noa te feia taiva i te parau no ratou iho eiaha râ no niʻa i te faanahoraa ta ratou i faaruʻe atu ».11
Ua parau Iesu, « E faaora’tu i tei tuhi mai ia outou… e pure hoi i te feia i parau ino mai e tei hamani ino ia outou ».12 E horoʻa na i te maitai i te feia e faahapa nei ia Iosepha Semita, a ite ai tatou i roto i to tatou iho aau e peropheta oia na te Atua ma te farii atoa i te tamahanahanaraa e ua tohuhia teie mau mea atoa e Moroni.
Nahea e tiʻa ai ia tatou ia pahono i te hoê taata e imi mau nei i te parau mau e o te peʻapeʻa nei i te mau parau ino ta’na e faaroo e aore râ e taiʻo no niʻa i te peropheta Iosepha Semita ? Parau papû, e farii tamau noa tatou i te mau uiraa parau ti‘a e te mau.
No te mau uiraa no niʻa i te huru o Iosepha, e nehenehe ta tatou e faaʻite i te mau parau a te tauasini taata tei mâtau maitai ia’na e tei horoʻa i to ratou ora no te ohipa ta’na i tauturu i te haamau. Ua parau o John Taylor, tei pupuhihia e maha taime e te mau taata ino tei taparahi pohe ia Iosepha : « Te faaʻite papû nei au i mua i te Atua, te mau melahi, e i te mau taata e, e taata maitai [o Iosepha], e te tura, e te viivii ore… [e] to’na huru i te vahi taata ore e i te vahi taata, e ore ïa e tiʻa ia faainohia—e ua ora oia e ua pohe ei taata mau no te Atua ».13
E nehenehe ta tatou e faahaamanaʻo i te taata e imi mau nei i te parau mau e eita te haamaramaramaraa i niʻa i te itenati e « titiʻa » i te parau mau. E ere te tahi mau haamaramaramaraa, noa’tu to ratou huru papû, i te parau mau.
E rave rahi mau matahiti aʻenei ua taiʻo vau i te hoê papaʻiraa i roto i te veʻa Time tei faaʻite i te iteraahia te hoê rata, tei manaʻohia e ua papaʻihia e Martin Harris tei ore i tuʻati i te aamu o Iosepha Semita no te iteraahia te mau papaa parau no te Buka a Moromona.14
Ua faaruʻe te tahi mau melo i te Ekalesia no taua parau ra.15
Te mea oto, ua faaruʻe oʻioʻi noa ratou. I te mau avaʻe i muri mai ua ite te mau aivanaa (e ua faaʻite te taata haavare) e, te rata e haavareraa mau ïa.16 E taahia e e uiui paha outou i te mea ta outou e faaroo i te parau apî, eiaha râ outou e feaa i te iteraa papû o te mau peropheta a te Atua.
E nehenehe ta tatou e faahaamanaʻo i te taata imi e noa’tu e parau mau, e nehenehe te tahi mau parau no niʻa ia Iosepha i te iritihia e i te faaohipahia i rapae atu i to’na vairaa mau.
Ua faahohoʻa mai Elder Russell M. Nelson i teie hiʻoraa. Ua parau oia : « Te tavini ra vau ei aivanaa no te faatereraa hau no te Fenua Marite i te Pû no te Hiʻopoʻaraa Maʻi i Atlanta, Georgia. I te hoȇ taime a tiaʻi ai au i te hoȇ pereoo uira no te uta ia’u i te tauraa manureva i te hoperaa ta matou mau apooraa, ua taravarava vau i niʻa i te matie ma te fanaʻo maitai i te mahanahana o te mahana hou a hoʻi atu ai i te… toʻetoʻe no Utaha… I muri iho ua farii au i roto i te vehi rata te hoȇ hohoʻa tei patahia e te hoȇ taata tei faaohipa i te hoȇ pata hohoʻa na te atea, o te faaʻite ra i to’u taime faafaaearaa i niʻa i te matie. I raro aʻe i te hohoʻa te hoȇ ïa papaʻiraa, « Aivanaa a te Hau i te Pû Hiʻopoʻaraa » E mea tiʻa te hohoʻa, e mea tiʻa te papaʻiraa, ua faaohipahia rȃ te parau mau no te faaʻite i te hoȇ hiʻoraa hape ».17 Eita tatou e faaruʻe i te tahi mea ta tatou i ite e parau mau no te tahi mea aita â tatou i taa maitai.
E nehenehe ia tatou ia faahaamanaʻo i te taata imi e ere anaʻe o Iosepha ta te mau melahi i farerei.
Ua papaʻi te mau ite no te Buka a Moromona, « Te faaʻite atu nei matou ma te mau parau mau e, i fa maira te hoȇ melahi a te Atua no te raʻi mai e… ua ite matou i taua mau api ra ».18 E nehenehe ta tatou e faahiti atoa i te tahi atu mau taata.19
E tiʻa i te taata e imi mau nei ia hiʻo i te parareraa o te evanelia tei faahoʻi-faahou-hia mai ei hotu no te ohipa a te Fatu na roto i te Peropheta.
Te vai nei i teie nei hau atu i te 29 000 amuiraa e 88 000 misionare e haapii nei i te evanelia na te ao atoa nei. E rave rahi milioni Feia Moʻa i te Mau Mahana Hopea Nei e tutava nei i te pee ia Iesu Mesia, i te ora i te hoê oraraa maitai, i te atuatu i te feia veve, e i te horoʻa i to ratou taime e ta ratou mau taleni no te tautururaa ia vetahi ȇ.
Ua parau Iesu :
« E ore e tia i te raau maitai ia faahotu mai i te huero ino, e ore atoa i te raau ino e faahotu mai i te huero maitai…
« … E ite hoi outou ia ratou i ta ratou i faahotu mai ».20
E mea papu maitai teie nei mau tatararaa, eiaha rȃ te taata imi ia tiʻaturi noa i niʻa i te reira no te faaoti i ta’na maʻimiraa i te parau mau.
E tiʻa i te taata faaroo tataʻitahi ia farii i te hoȇ haapapûraa varua no te misioni hanahana e te huru o te peropheta Iosepha Semita. E mea mau teie no te mau uʻi atoa. E tiʻa i te mau uiraa varua ia farii i te mau pahonoraa varua no ȏ mai i te Atua ra.
Tei te pae hitiaa o te rȃ iho nei au o te Fenua Marite e ua paraparau mai te hoȇ misionare tahito ia’u no te hoȇ hoa tei hinaaro i te faaruʻe i te Ekalesia no te mau parau ta’na i farii no niʻa i te peropheta Iosepha Semita. Ua aparau raua e rave rahi mau taime, e e au ra te feaa atoa nei teie misionare tahito i muri mai i teie mau aparauraa.
Noa’tu e ua tiʻaturi au e e nehenehe ia’na ia haapuai i to’na hoa, ua peʻapeʻa vau no to’na iteraa papû. E au mau taeaʻe e au mau tuahine, e horoʻa’tu vau i te hoȇ parau faaararaa ia outou : eita outou e riro ei tautururaa rahi no vetahi ȇ mai te mea e ere to outou iho faaroo i te mea papû.
Tau hebedoma i maʻiri aʻenei ua rave au i te hoȇ manureva no te tere atu i Amerika Apatoʻa. Ua faahaere te ihi reva i to matou mata i niʻa i te hoȇ video no niʻa i te parururaa. Ua faaarahia matou e « Eita te reira e tupu, ia taui rȃ te faito mataʻi i roto i te manureva, e matara mai ïa te mau tapoʻi i niʻaʻe i to outou mau parahiraa, e marua mai ïa te mau hutiraa mataʻi. Mai te mea e tupu te reira, a toro atu te rima no te huti mai i te hoȇ tapoʻi hutiraa mataʻi. A tuu te reira i niʻa i to outou ihu e te vaha. A faahee atu te tapeʻa uaua na niʻaʻe i to outou upoʻo e a faatano te tapoʻi hutiraa mataʻi mai te mea e hinaarohia. I muri iho, teie faaararaa : « A haapapû i te faaafaro i to outou iho tapoʻi hutiraa mataʻi hou a tauturu atu ai ia vetahi ȇ ».
E rahi noa’tu ȃ te mau mea ino e parauhia no niʻa i te peropheta Iosepha Semita a nuu atu ai tatou i te Tae-piti-raa mai o te Faaora. Eita te mau faahitiraa parau tano ore e te mau haavareraa e iti mai. Te vai nei te mau melo no te utuafare e te mau hoa o te hinaaro i ta outou tautururaa. Teie ïa te taime no te faaafaro i to outou iho hutiraa mataʻi varua ia ineine outou no te tauturu i te mau taata e imi ra i te parau mau.21
E tae mai te hoȇ iteraa papû no niʻa i te peropheta Iosepha Semita ia tatou tataʻitahi na roto i te mau raveʻa taa ê atoa. E tae mai te reira a tururi ai outou no te pure, ma te ani i te Atua ia haapapû mai e e peropheta mau oia. E tae mai te reira a taiʻo ai outou i te aamu o te peropheta no niʻa i te Orama Matamua. E nehenehe te hoȇ iteraa papû e tae mai i roto i to outou aau a taiʻo faahou ai outou i te Buka a Moromona. E tae mai te reira a faaʻite ai outou i to outou iho iteraa papû no niʻa i te Peropheta aore rȃ a tiʻa ai outou i roto i te hiero e a ite ai outou e ua faahoʻihia mai i niʻa i te fenua nei te mana taatiraa moʻa na roto ia Iosepha Semita.22 Ma te faaroo e te hinaaro mau e haapuaihia ïa to outou iteraa papû no niʻa i te peropheta Iosepha Semita. E faarari tamau mai paha te mau popo pape e rave rahi tei na te hiti mai, i tera e tera taime, eiaha râ, eiaha roa’tu te reira ia tinai i ta outou auahi ama o te faaroo.
Na te feia apȋ e faaroo mai nei i teie mahana, e aore râ o te tai‘o mai i te mau mahana i muri nei, te horoʻa atu nei au i te hoȇ titauraa papû maitai : Ia noaa ia outou te hoȇ iteraa papû no outou iho no niʻa i te peropheta Iosepha Semita. Ia tauturu to outou reo i te faatupu i te mau parau tohu a Moroni ia parau i te parau maitai no niʻa i te Peropheta. Teie na manaʻo e piti : A tahi a imi i te mau irava i roto i te Buka a Moromona ta outou i manaʻo e i ite e e parau mau roa. E a faaʻite atu te reira i muri iho i to te utuafare e i te mau hoa i roto i te pureraa pȏ utuafare, haapiiraa evanelia, e ta outou mau piha haapiiraa a te Feia Apȋ Tamaroa e Feia Apȋ Tamahine, ma te faaʻite e ua riro Iosepha ei mauhaa i roto i te rima o te Atua. I muri iho, a taiʻo i te iteraa papû o te peropheta Iosepha Semita i roto i te Poe Taoʻa Rahi aore rȃ i roto i teie buka iti, e 158 reo i teie nei. E nehenehe ta outou e ite i te reira i niʻa i te itenati i ni‘a ia LDS.org aore rȃ i te mau misionare ra. Teie to Iosepha iho iteraa papû no te mea tei tupu mai. A taiʻo pinepine i te reira. A feruri ia haruharu i te iteraa papû o Iosepha Semita na roto i to outou iho reo, a faaroo tamau i te reira, e a faaʻite atu te reira i te mau hoa. Na te faarooraa i te iteraa papû o te Peropheta na roto i to outou iho reo e tauturu i te faahaere mai i te iteraa ta outou e tutava ra.
Te iteraa papû o te peropheta Iosepha Semita, na roto e 158 reo i teie nei.
Te vai nei i mua nei te mau mahana faahiahia e te maere. Ua parau te peresideni Thomas S. Monson : « E tamau noa teie ohipa rahi… i te haere i mua, ma te taui e ma te haamaitai i te mau oraraa… Aore roa e puai i te ao taatoa nei e nehenehe e tapeʻa i te ohipa a te Atua. E haere noa teie ohipa i mua, noa’tu te mau mea e tupu mai ».23
Te horoʻa’tu nei au ia outou to’u iteraa papû e o Iesu te Mesia, to tatou Faaora e Taraehara. Ua maʻiti Oia i te hoȇ taata moʻa, te hoȇ taata parau-tiʻa, no te arataʻi i te Faahoʻi-faahou-raa mai i te ȋraa o Ta’na evanelia. Ua maʻiti Oia ia Iosepha Semita.
Te faaʻite nei au e e taata parau-tiʻa e te viivii ore o Iosepha Semita, e pǐpǐ oia na te Fatu o Iesu Mesia. Ua fȃ mai te Atua te Metua e Ta’na Tamaiti, o Iesu Mesia ia’na. Ua iriti oia i te Buka a Moromona na roto i te horoʻa e te mana o te Atua.
I roto i ta tatou sotaiete i ô mai i te paruru o te pohe, e taa maitai mai tatou i te piiraa moʻa e te misioni hanahana a te peropheta Iosepha Semita. Eita e maoro roa, e ite faahou ïa outou e o vau nei e e rave rahi atu ȃ « milioni taata i te ʻTaeaʻe Iosepha’ ».24 I te iʻoa o Iesu Mesia, amene.