Te Autahuʻaraa faaineine
Na te peresideni Henry B. Eyring
Tauturu Matamua i roto i te Peresideniraa Matamua
I roto i te faaineineraa autahuʻaraa, e mea hau aʻe te « faaʻite mai » i te « parau mai ».
Te mauruuru nei au i te amuiraa mai i te autahuʻaraa a te Atua, o te parare nei na te ao taatoa nei. Te faahiahia nei au i to outou faaroo, ta outou taviniraa e ta outou mau pure.
Ta’u poroʻi i teie pô no niʻa ïa i te Autahuʻaraa a Aarona. E poroʻi atoa teie na tatou paatoa o te tauturu nei i roto i te faatupuraa i te mau parau fafau a te Fatu i te feia tei mau i te mea ta te mau papaʻiraa moʻa i faataa mai ei « autahuʻaraa iti ». Ua pii-atoa-hia te reira te autahuʻaraa faaineine. E paraparau atu ïa vau i teie pô no niʻa i taua faaineineraa hanahana ra.
Ua î te faanahoraa a te Fatu no Ta’na ohipa i te faaineineraa. Ua faaineine oia i te fenua no tatou ia ite tatou i te mau tamataraa e te mau raveʻa no te oraraa tahuti nei. A parahi ai tatou i ônei, tei roto ïa tatou i te hoê « tau faaineineraa » mai ta te mau papaʻiraa moʻa i pii.
Ua faaʻite mai te peropheta Alama i te faufaa uʻana no taua faaineineraa ra no te ora mure ore, i reira hoʻi tatou e nehenehe ai e ora e a muri noa’tu i roto i te mau utuafare i pihaʻiho i te Atua te Metua e ia Iesu Mesia.
Ua haamaramarama mai oia i te titauraa no te faaineineraa mai teie te huru : « E ua ite tatou e, e tae mai te pohe i nia i te taata atoa ra, oia, te pohe i parauhia e Amuleka ra, oia hoʻi te pohe tino ; ua horoahia maira râ te tau i te taata e tatarahapaʻi oia, i riro ai teie nei ora ei tau tamataraa, e ei tau ia faaineine i te farereiraa’tu i te Atua, e ei tau faaneheneheraa no taua vairaa mure ore ra i parauhia e maua, e o tei muri hoʻi ïa i te tia-faa-hou-raa o te feia i pohe ra ».
Mai teie taime i horoʻahiaʻi ia tatou ia ora i roto i te tahuti nei no te faaineine i te farereiraa’tu i te Atua, ua riro atoa ïa te taime tei horoʻahia ia tatou no te tavini i roto i te Autahuʻaraa a Aarona ei taime no te faaineine ia tatou ia haapii mai nahea ia horoʻa i te tautururaa faufaa rahi ia vetahi ê. Mai ta te Fatu e horoʻa nei i te tautururaa e titauhia nei e tatou no te faaoromaʻi i te mau tamataraa o te oraraa tahuti nei, te tono atoa nei Oia i te tautururaa ia tatou i roto i ta tatou faaineineraa autahuʻaraa.
Ta’u poroʻi, na te feia ïa ta te Fatu e tono nei no te tauturu i te feia e mau nei i te Autahu‘araa a Aarona ia faaineine e na te feia iho e mau nei i te Autahuʻaraa a Aarona. Te aʻo nei au i te mau metua tane. Te aʻo nei au i te mau episekopo. E te aʻo nei au i te feia atoa no te Autahuʻaraa a Melehizedeka tei tiʻaturihia ei mau hoa e ei mau haapii no te feia apî tamaroa tei roto i te faaineineraa autahuʻaraa.
Te arue nei e te haamauruuru nei au ia outou e rave rahi na te ao atoa nei e o te faaroo mai a muri aʻe.
E taata tauʻa ore au, mai te mea eita vau e faahiti i te parau no te hoê peresideni amaa e te hoê episekopo i to’u apîraa. Ua riro mai au ei diakono i te 12raa o to’u matahiti i roto i te hoê amaa iti i te pae hitiaa-o-te râ no te fenua Marite. E mea naʻinaʻi roa te amaa e o maua anaʻe to’u tuaana tei mau i te Autahuʻaraa a Aarona e tae noa’tu i te taime ua ani to’u metua tane, te peresideni amaa, i te hoê taata paari ia amui mai i te Ekalesia.
Ua farii teie melo faafariu apî i te Autahuʻaraa a Aarona, e te hoê piiraa atoa ia ara i te feia tei mau i te Autahuʻaraa a Aarona. Te haamanaʻo noa nei â vau mai te mea no inanahi ra. E nehenehe ia’u ia haamanaʻo i te mau rauʻere nehenehe no te tau ʻauhune a apee ai taua melo faafariu apî ra ia maua to’u tuaana ia rave i te tahi mea no te hoê vahine ivi. Aita vau i haamanaʻo e aha taua ohipa ra, ua haamanaʻo râ vau i to’u iteraa e ua tauturu te mana autahuʻaraa ia rave i te mea ta’u i haapii mai i muri iho, ta te Fatu i parau e tiʻa ia tatou paatoa ia rave ia faaorehia ta tatou mau hara no te faaineine ia ite atu Ia’na.
Ia haamanaʻo anaʻe au i teie nei, te mauruuru nei au i te hoê peresideni amaa tei pii i te hoê melo faafariu apî no te tauturu i te Fatu ia faaineine e piti na tamaroa o te riro mai i te hoê mahana ei mau episekopo ma te faaueraa ia atuatu i te feia vêvê e tei navaʻi ore e no te peresideni atoa i te autahuʻaraa faaineine.
E diakono noa â vau a haere atu ai to matou utuafare i roto i te hoê paroisa rahi i Utaha. Tera te taime matamua i ite ai au i te mana no te hoê pŭpŭ taatoa i roto i te Autahuʻaraa a Aarona. E tera atoa ïa te taime matamua a ite ai i te hoê pŭpŭ. E i muri mai o te taime matamua ïa a ite ai au i te mana e te haamaitairaa o te hoê episekopo e peresideni ra i roto i te hoê pŭpŭ tahuʻa.
Ua pii te episekopo ia’u ei tauturu matamua i roto i te pŭpŭ tahuʻa. Te haamanaʻo nei au e ua haapii oia iho i te pŭpŭ―noa’tu ta’na ohipa rahi e te tahi atu mau tane aravihi ta’na e nehenehe e pii no te haapii mai ia matou. Ua faanaho oia i te mau parahiraa i roto i te piha haapiiraa i roto i te hoê haamenemeneraa. Ua haaparahi oia ia’u i niʻa i te parahiraa, i to’na pae atau.
Ua nehenehe ia’u ia hiʻo na niʻa’tu i to’na tapono a haapii ai oia. Ua hiʻo oia i te tahi mau taime i te mau nota tei patapata-maitai-hia i roto i te buka iri puaa i niʻa i to’na turi e i te mau papaʻiraa moʻa tei faaohipa e tei tapaʻo-rahi-hia ta’na i iriti i niʻa i te tahi atu turi avae. E nehenehe ia’u ia haamanaʻo i te anaanatae rahi ia faatiʻa oia i te mau aamu no te itoito mai roto mai i te buka a Daniela e to’na iteraa papû no niʻa i te Faaora, te Fatu ra Iesu Mesia.
E haamanaʻo noa â vau e nahea to te Fatu piiraa i te mau hoa, tei maʻiti-maitai-hia, no ta’na feia autahuʻaraa i roto i te faaineineraa.
E na tauturu puai to to’u nei episekopo, e no te tahi tumu aita vau i taa i taua tau ra, ua taniuniu mai oia ia’u i te fare, hau atu i te hoê taime, no te parau e, « Hal, ua hinaaro vau ia oe ia haere na muri ia’u ei hoa, no te tahi mau tere hahaereraa ». I te hoê taime, no te afaʻiraa ïa ia’u na muri ia’na i te fare o te hoê vahine ivi e ora ra oia anaʻe e ma te maa ore. A tere ai maua no te hoʻi i te fare, ua tapeʻa oia i to’na pereoo uira, ua tatara i ta’na mau papaʻiraa moʻa, e ua parau mai ia’u no te aha oia i na reira ai i taua vahine ivi ra, mai te mea e mana to teie vahine no te atuatu ia’na iho, e hau atu, no te tauturu ia vetahi ê arauaʻe.
Te tahi atu tere hahaere, i te hoê ïa taata tei faaea maoro i te haere mai i te pureraa. Ua ani to’u episekopo ia hoʻi mai oia i pihaʻiho i te Feia Moʻa. Ua ite au i te here o to’u episekopo no te hoê taata e au ra ia’u mai te hoê enemi eita e ti‘a ia herehia e e mea orurehau.
E i te tahi atu taime ua hahaere maua i te hoê utuafare, e na na tamahine iti e piti tei tonohia mai i farii ia maua i te uputa e to raua na metua inu ava. Ua parau mai te mau tamahine iti na roto i te paruru opani e te taoto ra to raua metua vahine e metua tane. Ua parau noa te episekopo ia raua, ma te ataata e ma te haapopou i to raua maitai e to raua itoito, e au ra ia’u e 10 minuti aore râ hau atu. A faaatea atu ai maua i taua fare ra, ua parau mărû mai oia, « E tere hahaere maitai teie. E ore roa e moʻe i teie na tamahine e ua haere mai taua ».
Na haamaitairaa e piti ta te hoê hoa paari no te autahuʻaraa e nehenehe e horoʻa, o te tiʻaturiraa ïa e te hoê hiʻoraa no te atuaturaa. Ua ite au i te reira i te taime ua horoʻahia i ta’u nei tamaiti i te hoê hoa hahaere tei hau atu i te aravihi ia’na i roto i te autahuʻaraa. I riro na to’na hoa matahiapo ei peresideni misioni e piti taime e ua tavini i roto i te tahi atu mau tiʻaraa faatere.
Hou raua a hahaere ai i te hoê o ta raua mau utuafare i faataahia, ua ani taua faatere autahuʻaraa aravihi ra e haere mai oia na mua e farerei i ta’u tamaiti i to matou fare. Ua faatiʻa raua ia’u ia faaroo. Ua haamata oia na roto i te pure, no te ani i te tautururaa. I muri iho ua parau oia mai teie te huru i ta’u tamaiti : « Te manaʻo nei au e tiʻa ia taua ia haapii i teie utuafare i te hoê haapiiraa e riro ei hoê piiraa ia tatarahapa. Te manaʻo nei au e farii maitai aʻe ratou i te poroʻi na roto mai ia oe eiaha râ na roto mai ia’u. Eaha to oe manaʻo no te reira ? »
Te haamana‘o nei au i te mataʻu rahi i roto i te mata o ta’u tamaiti. E nehenehe noa â ta’u e ite i te oaoa o taua taime ra a farii ai ta’u tamaiti i te tiʻaturiraa.
Aita te episekopo i tuu apiti ia raua ma te feruri ore. E mea na roto i te faaineineraa maitai i ite ai te hoa paari no niʻa i te mau manaʻo no taua utuafare ra ta raua e fatata i te haapii. E mea na roto i te faaurûraa i manaʻo ai oia ia otohe mai oia, ia tiʻaturi i te hoê taureʻareʻa aravihi ore no te pii i te mau tamarii paari a‘e a te Atua ia tatarahapa e ia hoʻi mai i te vahi papû.
Aita vau i ite e aha te hopearaa no ta raua hahaereraa, ua ite râ vau e, ua faaineine te hoê episekopo, te hoê taata tei mau i te Autahuʻaraa a Melehizedeka, e te Fatu, i te hoê tamaiti ia riro ei taata no te autahuʻaraa e i te hoê mahana ei hoê episekopo.
Teie, ua mâtau outou i taua mau aamu manuïa ra no niʻa i te faaineineraa i roto i te autahuʻaraa na roto i te mea ta outou i ite mata e te mau ohipa ta outou i ite i roto i to outou iho oraraa. Ua ite outou e i riro na outou ei mau episekopo, ei mau hoa, e ei mau metua hoʻi mai teie te huru. Ua ite outou i te rima o te Fatu i roto i ta outou faaineineraa no te mau ohipa a te autahuʻaraa Ta’na i ite e vai nei i mua ia outou.
E hopoia na tatou paatoa i roto i te autahuʻaraa ia faaineine ia vetahi ê. Te vai ra te tahi mau mea ta tatou e nehenehe e rave ei mea faufaa rahi hoʻi. Te mana hau atu i te faaohiparaa i te mau parau no te haapiiraa i te haapiiraa tumu, o to tatou ïa hiʻoraa maitai, te oraraa i te haapiiraa tumu.
Te hau atu i te faufaa rahi i roto i ta tatou taviniraa i roto i te autahuʻaraa o te ani-manihini-raa ïa i te taata ia haere mai i te Mesia ra na roto i te faaroo, te tatarahaparaa, te bapetizoraa, e te fariiraa i te Varua Maitai. Ei hiʻoraa, ua horoʻa te peresideni Thomas S. Monson i te mau aʻoraa no te faaûru i te aau no niʻa i taua mau haapiiraa tumu ra. Na te mau mea râ ta’u i ite ta’na i rave i te mau taata e te mau misionare e te mau hoa o te Ekalesia a peresideni ai oia i te misioni i Toronto i turaʻi ia’u ia rave i te ohipa.
I roto i te faaineineraa autahuʻaraa, e mea hau aʻe te « faaʻite mai » i te « parau mai ».
No reira te mau papaʻiraa moʻa e riro ai ei mea faufaa rahi no te faaineineraa ia tatou i roto i te autahuʻaraa. Ua î ratou i te mau hohoʻa. Te feruri nei au mai te mea ra e nehenehe ia’u ia ite atu ia Alama i te peeraa’tu i te faaue a te melahi e i to’na rûraa i te hoʻi e haapii i te mau taata ino i Ammoniha tei patoʻi ia’na. E nehenehe ia’u ia ite i te toʻetoʻe i roto i te fare tapeʻaraa i reira hoʻi to te peropheta Iosepha parauraahia e te Atua ia itoito e te tiaʻihia ra oia. No taua hohoʻa papaʻiraa ra i roto i te feruriraa e nehenehe ai ia tatou ia vai ineine i te faaoromaʻi i roto i ta tatou taviniraa ia fifi anaʻe.
Te hoê metua tane aore râ te hoê episekopo aore râ te hoê hoa hahaere paari o te faaʻite e e nehenehe ta’na e tiʻaturi i te hoê taeaʻe apî tei mau i te autahuʻaraa, e nehenehe ta ratou e faataui i to teie taea‘e apî oraraa. Ua anihia to’u metua tane i te hoê taime e te hoê melo no te pŭpŭ no te Tino Ahuru ma Piti Aposetolo ia papaʻi i te hoê parau poto no niʻa i te ihi e te faaroo. E aivanaa tui roo e e taeaʻe autahuʻaraa haapao maitai to’u metua tane. Noa’tu râ, te haamanaʻo noa ra vau i te taime a horoʻa mai ai oia i te api parau ta’na i papaʻi ma te parau mai, « Tera, hou vau a haapono ai i te Tino Ahuru Ma Piti, te hinaaro nei au ia taiʻo oe i te reira. E ite ihoa oe mai te mea e mea tiʻa ». Ua 32 matahiti paari aʻe oia ia’u, e ua hau roa’tu to’na paari e to’na maramarama.
Te ite noa ra vau i te puai i noaa ia’u na roto i teie tiʻaturiraa a te hoê metua tane faahiahia e te hoê taeaʻe autahuʻaraa. Ua ite au e aita oia i tiʻaturi ia’u, moari râ i te Atua o te nehenehe e parau mai ia’u e aha te parau mau. Outou te mau hoa aravihi e nehenehe ta outou e haamaitai i te hoê taeaʻe apî no te autahuʻaraa i roto i te faaineineraa i te mau taime atoa, e nehenehe ia outou ia faaʻite atu ia’na taua huru tiʻaturiraa ra. Na te reira ïa e tauturu ia’na ia tiʻaturi i te manaʻo mărû no te faaûruraa no’na iho ia tae mai te reira ia’na, a tuu ai oia i te hoê mahana i to’na rima no te haamau i te haamaitairaa no te faaora i te hoê tamarii ta te mau taote hoʻi i parau e e pohe oia. Ua tauturu mai taua tiʻaturiraa ra ia’u hau atu i te hoê taime.
E noaa to tatou manuïaraa i te faaineineraa ia vetahi ê i roto i te autahuʻaraa mai te au i te rahi o to tatou here ia ratou. E parau mau ihoa râ ia faatitiaifaro anaʻe tatou ia ratou. A haamanaʻo i te taime, peneiaʻe i te airaamaa o te oro‘a mo‘a, a hape ai teie hoê taeaʻe no te Autahuʻaraa a Aarona i te raveraa i te hoê oroʻa. E ohipa fifi teie. I te tahi taime e titauhia ia faatitiaifarohia te hape i mua i te taata e e tupu mai paha te inoino, te haamâ e aore râ te manaʻo e aita oe e auhia.
E e haamanaʻo outou i te aʻo a te Fatu : « Ma te faahaparaa’tu i te tahi mau taime na roto i te parau papu roa, ia faaûruhia ra e te Varua Maitai ; e i reira e faaʻite mai ai i te rahiraa no te here ia’na o ta oe i faahapa na, oi manaʻo mai ai oia e ei enemi oe no’na ra ».
E auraa taa ê to te parau [faa]rahiraa i roto i te faaineineraa i te feia tei mau i te autahuʻaraa ia faatitiaifaro-anaʻe-hia ratou. Te tuu ra teie parau i te mana‘o no te [faa]rahiraa i te hoê here i vai na. O te « faaʻiteraa’tu » te tuʻati i te [faa]rahiraa. O outou o te faaineine nei i te feia tei mau i te autahuʻaraa, e ite mai outou ia ratou i te raveraa i te hape. Na mua ratou i te farii i ta outou faatitiaifaroraa, e mea tiʻa ia ite ratou na mua roa i to outou here mau e te tamau. E mea tiʻa ia ratou ia ite i ta outou mau faateiteiraa na mua aʻe i ta outou faatitiaifaroraa.
Te hiʻo nei te Fatu iho i te mau taeaʻe no te autahuʻaraa iti ma te hoê hiʻoraa o te faahanahana nei i to ratou faito puai e to ratou faufaa i mua Ia’na. A faaroo mai i teie mau parau, tei parauhia e Ioane Bapetizo a faaho‘i faahou mai ai oia i te Autahu‘araa a Aarona : « I ni‘a iho ia orua e ta’u na tavini taeae nei, i te iʻoa o te Mesia ra te horoa’tu nei au i te Autahuʻaraa a Aarona ra, o tei mau i te mau taviri no te utuuturaa a te mau melahi, e no te evanelia no te tatarahapa, e no te bapetizo na roto i te utuhuriraa no te haamatararaa i te hara; e e ore roa te reira e iriti-faahou-hia’tu mai nia i te ao nei, e tae noa’tu i te taime e e pûpû faahou atu ai te mau tamarii tamaroa o Levi i te hoe tusia i te Fatu na roto i te parau tia ra ».
E tuʻatiraa te Autahuʻaraa a Aarona no te Autahuʻaraa teitei aʻe a Melehizedeka. Ei peresideni no te autahuʻaraa taatoa, te peresideni atoa nei ïa te peresideni o te Ekalesia i niʻa i te autahuʻaraa faaineine. E tano maitai ta’na mau poroʻi e rave rahi mau matahiti no te haereraa e faaora, i niʻa i te faaueraa ia afaʻi i te evanelia tatarahapa e te bapetizoraa i roto i te oraraa o vetahi ê.
E tauʻaparau tamau te mau pŭpŭ diakono, haapii e tahuʻa no te haafatata’tu te mau melo atoa o te pŭpŭ i te Fatu. E faataa te mau persideniraa i te mau melo no te toro atu i te rima ma te faaroo e te here. E opere te mau diakono i te oroʻa ma te tura e te faaroo ia putapu te mau melo i te maitai o te Taraehara e ia faaoti ratou ia haapaʻo i te mau faaueraa a rave ai ratou i taua mau tapaʻo moʻa ra.
E pure te mau haapii e te mau tahuʻa e to ratou mau hoa no te faatupu i te faaueraa ia tiaʻi hoʻi i te Ekalesia, e hoê taata i te taime hoê. E e pure amui taua mau hoa hahaere ra a haapii mai ai ratou i te mau hinaaro e te mau tiʻaturiraa o te mau upoo utuafare. Ia na reira ratou, te faaineine nei ïa ratou no te mahana rahi e peresideni ai ratou mai te hoê metua tane, ma te faaroo, i to ratou iho utuafare.
Te faaʻite papû nei au e, te faaineine nei te feia atoa o te tavini amui nei i roto i te autahuʻaraa i te hoê nunaa no te taeraa mai te Fatu i Ta’na Ekalesia. Te ora nei te Atua te Metua. Ua ite au―Ua ite au e―o Iesu te Mesia e ua here Oia ia tatou. O te peresideni Thomas S. Monson te peropheta ora a te Fatu. Te faaʻite papû nei au i te reira i te iʻoa mo‘a o Iesu Mesia, amene.