Ol Man blong Difendem Ofisol Toktok
I Kam long Boni L. Oscarson
Yang Woman Jeneral Presiden
Letem yumi help blong bildimap kingdom blong God wetem strong tingting mo stap ol man blong difendem mared, stap olsem mama mo papa, mo hom.
I wan naesfala blesing blong stap pat blong bigfala mo gudfala asembli blong ol gel mo woman. Yumi, olsem ol woman, i gat blesing blong joen tugeta long tedei long yuniti mo lav.
I no longtaem i pas, mi bin ridim stori blong Marie Madeline Cardon, we, wetem famli blong hem, i kasem mesej blong gospel blong Jisas Kraes we i kambak tru long ol fas misinari we oli singaotem hem blong go givim seves long Itali long 1850. Hem i wan yang woman we i gat 17 o 18 yia taem oli baptaes. Wan Sandei, taem oli stap long wan wosip seves long haos blong olgeta long ol hil blong Not Itali, wan grup blong ol man we oli kros oli kam, mo i gat sam lokol minista, we oli kam raon long haos mo stat singaot, singaot strong, mo askem se oli tekem ol misinari oli kam aotsaed. Mi no ting se oli wantem harem gospel—oli wantem kilim man. Yangfala Meri nao i maj i go aotsaed long haos blong fesem ol man ia.
Oli gohed blong singaot mo askem ol misinari. Meri i holem Baebol long han mo i leftemap antap mo givim oda long olgeta blong oli aot. Hem i talem long olgeta se ol elda oli stap anda long proteksen blong hem mo oli no save tajem wan hea blong hed blong olgeta. Lisin long stret toktok blong hem: “Evriwan i stanap, i sek. … God i stap wetem mi. Hem i putum ol toktok ia long maot blong mi, from miwan, mi no save talem ol toktok ia. Evri samting i kwaet wantaem. Bigfala grup blong ol man ia oli stanap, oli no save mekem wan samting long fored blong wan gel we i no strong, i seksek, be yet, i no fraet.” Ol minista oli askem grup blong oli aot, mo oli mekem wetem sem, fraet mo harem nogud. Smol grup blong sipsip i finisim miting blong olgeta long pis.1
?Yu save gat pikja blong yang woman ia wetem strong paoa long tingting, we i gat semmak yia olsem plante long yufala, mo i stanap long fored blong wan grup blong man we i kros, mo i difendem niu bilif we hem i jes faenem wetem strong paoa long tingting mo strong toktok?
Ol sista. Sam nomo long yumi bae i fesem wan grup blong ol man we oli kros, be i gat wan wo we i stap gohed long wol ia, mo ol stamba doktrin blong yumi oli stap anda long atak. Mi stap toktok speseli long saed blong doktrin blong famli. Hom i mas tabu, mo ol stamba tingting blong famli, oli stap kwestinim, oli tokbaot nogud, mo oli atakem long evri saed.
Fas taem we Presiden Godon B. Hinkli i ridim “Famli: Wan Ofisol Toktok I Go long Wol” 20 yia i pas nao long yia ia, yumi bin talem tangkyu from mo glad se toktok ia i klia, i simpol, mo trutok i stap long pepa ia. Long tetaem ia, yumi no bin luksave olsem wanem nao bae yumi nidim tumas stamba toktok ia long wol blong tedei olsem mak ia we bae yumi yusum blong jajem wan niu win blong wol ia we i kam tru long yumi long media, Intanet, man blong skul, Tivi mo muvi, mo iven, loa. Ofisol Toktok long saed blong famli i mak blong jajem ol tingting blong wol, mo mi testifae se ol prinsipol we i stap long hem oli tru tedei, semmak olsem oli bin tru taem profet i bin givim 20 yia i pas.
?Bae mi save poenemaot wan klia samting? Laef i no gohed olsem wan i plan from, mo mifala i save gud se i no evri woman we i gotru long wanem ofisol toktok i tokbaot. Yet, i impoten blong andastanem mo tijim paten blong Lod, mo traehad blong luksave paten blong toktok ia long bes wei we yumi save mekem.
Wanwan i gat wan pat blong mekem insaed long plan ia, mo wanwan long yumi i semmak long ae blong Lod. Yumi mas tingbaot se Papa long Heven we i gat lav i save gud ol stret samting we yumi wantem mo bae i mekem ol promes blong Hem se bae i no gat wan samting we bae Hem i holemtaet long olgeta we oli fetful blong folem ol kavenan blong olgeta. Papa long Heven i gat wan misin mo wan plan long wanwan long yumi, be tu, Hem i gat taem blong Hem. Wan long ol jalenj long laef we i had moa, i blong gat fet long taem blong Lod. Hem i wan gud tingting blong gat wan nara plan i stap, we i helpem yumi blong kipim kavenan, gat lav we i neva sot, mo stap stret mo gud, mo yumi bildimap kingdom nomata laef i go olsem wanem. Yumi nidim blong tijim ol gel blong yumi blong go from samting we i gud moa, be tu, blong plan from taem we samting i no go stret.
Long namba 20 aniveseri blong ofisol toktok, mi wantem givim wan jalenj long yumi evriwan, ol woman blong Jos, blong yumi stap woman blong difendem “Famli: Wan Ofisol Toktok i go long Wol.” Olsem we Marie Madeline Cardon i stanap wetem paoa long tinting blong difendem ol misinari mo ol niu bilif blong hem, yumi tu, yumi nid blong stanap mo difendem ol doktrin we Lod i talemaot long saed blong mared, famli, ol tabu rol blong ol man mo ol woman, mo hao hom i wan tabu ples—iven taem wol i stap singaot long sora blong yumi se hemia taem blong bifo, i sot tingting, mo i nomo blong tedei. Evriwan, i nomata se i mared o no, o i gat hamas pikinini, i save difendem plan blong Lod we i stap long ofisol toktok. Sapos i plan blong Lod, !nao i mas kam plan blong yumi!
I gat trifala prinsipol we ofisol toktok ia i tijim, we mi ting se i gat bigfala nid blong gat ol strong woman blong difendem. Faswan, mared bitwin wan man mo wan woman. Skripja i tijim yumi: “Long Kristin laef, woman i no save mekem samting hemwan, mo tu, man i no save mekem samting hemwan.”2 Blong eniwan i kasem ful prishud blesing, i mas gat wan hasban mo wan waef we tufala i sil insaed long haos blong Lod, mo tufala i wok long stret mo gud fasin, mo tufala i gohed blong stap fetful long kavenan blong tufala. Hemia nao plan we Lod i gat long ol pikinini blong Hem, mo hamas toktok i save kamaot long pablik i no save jenisim wanem we Lod i talemaot. Yumi nid blong gohed blong stap eksampol blong stret mo gud mared, yumi mas lukaotem blesing ia long laef blong yumi, mo gat fet sapos i slo blong kam. Bae yumi ol woman blong difendem mared olsem we Lod i odenem, mo semtaem, gohed blong soem lav mo sore long olgeta we tingting i defren.
Nekis poen we voes blong yumi i mas difendem i blong leftemap tabu rol blong ol mama mo papa. Yumi traem strong blong tijim ol pikinini blong yumi blong mekem gud tumas long laef ia. Speseli yumi mas mekemsua se ol gel blong yumi oli mas save se oli gat paoa blong kasem samting long laef mo kam wanem we oli wantem kam. Mifala i hop se bae oli laekem tumas blong lanem samting, skul gud, gat talen, mo maet kam nekis Marie Curie o Eliza R. Snow.
?Yumi stap tijim ol boe mo ol gel blong yumi se i no gat wan ona we i bigwan moa, i no gat wan taetol we i hae moa, mo i no gat wan wok we i impoten moa long laef ia bitim blong stap olsem wan papa mo wan mama? Mi hop se taem yumi stap toktok long ol pikinini blong yumi blong kasem bes samting long laef, bae yumi tijim olgeta tu blong givim ona mo kam antap long rol we ol mama mo ol papa oli gat insaed long plan blong Papa long Heven.
Smol gel blong mitufala, Abby, i luk wan janis blong stanap blong difendem rol blong wan mama. Wan dei, hem i kasem wan notis long skul blong pikinini blong hem se bae oli gat Wok Dei presentesen long skul. Oli invaetem ol papa mo mama blong sendem wan fom sapos oli wantem kam long skul blong tijim ol pikinini long saed blong wok blong olgeta. Abby i filim se i mas fulumap wan fom blong go tijim ol pikinini blong kam wan mama. Skul i nomo ringim hem, mo taem Wok Dei i stap kam kolosap, hem i ringim skul, hem i ting se oli lusum pepa blong hem. Olgeta we oli oganaesem oli toktok mo faenem 2 tija we tufala i agri blong Ebi i kam toktok long klas blong tufala long en blong Wok Dei.
Long presentesen blong hem we i olsem pleiplei,Abby i tijim olgeta se olsem wan mama, hem i mas gat save long saed blong helt blong bodi, blong tingting, relijin, tijing, miusik, rid, art, faenens, dekoretem ples, mekem hea, draeva, spot, kuk, mo plante moa samting. Ol pikinini oli openem ae bigwan. Long en, hem i mekem wanwan pikinini i tingbaot mama blong olgeta mo raetem wan tangkyu leta blong talem tangkyu from ol aksen blong seves we mama i mekem evri dei. Abby i filim se oli luk mama blong olgeta long wan niu wei mo blong stap olsem wan mama mo papa i impoten tumas. Hem i fulumap wan pepa blong tij bakegen long yia ia mo oli invaetem hem blong mekem presentesen long sikis klas.
Abby i tokbaot eksperiens blong hem: “Mi filim se bae hem i isi, long wol ia, blong wan pikinini i luksave se blong stap olsem papa o mama i wan seken wok, o i no wan samting we i nid. Mi wantem evri pikinini blong oli filim se olgeta oli faswan long lis blong papa mo mama blong olgeta, mo talem olgeta olsem wanem papa mo mama i impoten long mi, mo hemia i mekem oli luksave evri samting we papa mo mama i mekem blong olgeta mo from wanem.”
Profet we yumi lavem, Presiden Thomas S. Monson, i wan gudfala eksampol blong givim ona long woman mo mama, speseli wetem mama blong hemwan. Taem i tokbaot mama blong yumi long wol ia, hem i se: “Bae yumi holemtaet trutok ia; wan i no save fogetem mama blong hem mo tingbaot God. Wan i no save tingbaot mama mo fogetem God. ?From wanem? From se tufala i tabu; God mo mama blong yumi long wol ia, tufala i patna long kriesen, long lav, long sakrifaes, tufala i wan.”3
Las prinsipol we yumi nidim blong difendem i we hom i wan tabu ples. Yumi nidim blong stretem tingting long wan toktok we oltaem oli daonem, mo yumi mas leftemap. Toktok ia i hom meka. Yumi evriwan ol—woman, man, yut mo pikinini, singgel o mared—i save wok blong stap olsem ol hom meka. Yumi mas “mekem hom blong yumi” i wan ples blong haed, i tabu, i sef. Hom blong yumi i mas wan ples we Spirit blong Lod i mas stap mo yumi filim i bigwan, mo ples we oli stadi, tijim mo laef folem ol skripja. Bae ol samting i defren bigwan long wol sapos evri pipol i luk olgeta olsem ol pipol blong mekem ol stret mo gud hom. Bae yumi difendem hom olsem wan ples we nambatu afta long tempol.
Ol sista. Mi glad tumas blong stap wan woman long ol las dei ia. Yumi gat ol janis mo wei we ol narafala jeneresen blong ol woman oli no bin gat long wol ia. Letem yumi help blong bildimap kingdom blong God wetem strong tingting mo stap ol man blong difendem mared, stap olsem mama mo papa, mo hom. Lod i nidim yumi blong stap ol soldia we i gat strong paoa long tingting, stap strong mo tingting i no muvmuv we bae yumi difendem plan blong Hem mo tijim ol jeneresen we oli stap kam long ol trutok blong Hem.
Mi talem witnes blong mi se Papa long Heven i stap laef mo i lavem wanwan long yumi. Pikinini blong Hem, Jisas Kraes, i Sevya mo Ridima blong yumi. Mi livim testemoni ia wetem yufala long nem blong Jisas Kraes, amen.