Saba Ezali Mokolo ya Esengo

Na Mpaka Russell M. Nelson

Ya Lisanga Likoki ya Bapostolo Zomi na Mibale

Lolenge nini okoki koyeba malamu ete ezaleli nay o na mokolo ya Saba ekomema yon a esengo mpe bosepeli?

Bandeko mibali mpe basi, mikolo mibale oyo ya likita ezalaki ya nkembo. Totombwami na miziki ya kofula mpe nsambo kitoko. Milimo na biso milendisami na bitinda ya pole mpe ya bosolo. Na Eyenga ya Pasika oyo, mpe lisusu totondi Nzambe na bomoko mpe bosembo mpo na profeta!

Motuna mpo na moko na moko na biso ezali: Mpo na maye nayoki na matoyi mpe na nzoto na likita oyo, nakobongwana ndenge nini? Atako eyano na yo ekokaki kozala nini, tika nabengisa yo lisusu mpo na kotala malamu mayoki na yo na ntina ya, mpe ezaleli na ntina ya, mokolo ya Saba.

Nasepeli na maloba ya Yisaya, oyo abengaki Saba “esengo.”¹ Atako bongo namituni, Saba ezali mpenza mokolo ya esengo mpo na yo mpe mpo na ngai?

Namonaki esengo mbala ya yambo kati na Saba mibu mingi eleki mingi ntango, wana ezalaki ngai lokola munganga ya lopaso ya misala mingi, nayebaki ete Saba ekomaki mokolo ya kobikisa bato. Na nsuka ya poso nionso, maboko na ngai ezalaki kosala mpasi mpo na kosukolaka yango mbala na mbala na sabuni, mai, mpe bolosi. Nasengelaki lisusu na bopemi nsima ya makumba ya mosala makasi. Mokolo ya eyenga ezalaki kopesa lisungi oyo nasengelaki na yango mingi.

Nini Mobikisi alingaki koloba ntango alobaki ete “saba esalami mpo na bato; bato basalami mpo na saba te,”?² Nandimi ete Alingaki biso tososola ete Saba ezalaki likabo na Ye epai na biso, kopesaka bopemi ya solo nsima na makambo ya mpasi ya bomoi ya mokolo na mokolo mpe libaku ya kozongisa sika molimo mpe nzoto. Nzambe apesaki biso mokolo ya kafukafu oyo, mpo na kosepelisa nzoto to mosala ya mokolo na mokolo te kasi mpo na kopema nsima ya mokumba, na lisungi ya nzoto mpe molimo.

Na Ebeleo, liloba Saba elingi koloba “bopemi.” Ntina ya Saba ebandi uta na Bokeli ya mokili, ntango nsima ya mikolo motoba ya mosala Nkolo apemaki uta na mosala ye.³ Nsima abimisaki Mitindo zomi epai ya Mose, Nzambe atindaki biso “kanisa mokolo na saba ete obulisa yango.”⁴ Nsima, Saba esalelamaki lokola bokundolisi ya libikisi ya Yisalaele na boombo na mokili ya Ezipito.⁵ Ntango mosusu ya ntina mingi koleka, Saba epesamaki lokola liyokani ya seko, bokundolisi ya ntango nionso ete Nkolo akoki kobulisa bato na Ye.⁶

Na bobakisi, sikawa tokabolaka elambo na mokolo ya Saba mpo na kokanisa Bomikabi ya Yesu Klisto.⁷ Lisusu, tosalaka boyokani ete tozali na bolingi ya kozwa likolo na biso nkombo esantu na Ye.⁸

Mobikisi amiyebisaki Yemei lokola Nkolo ya Saba.⁹ Ezali mokolo na Ye! Mbala na mbala, Atuni biso tobatela Saba¹⁰ to mpo na kobulisa mokolo ya Saba.¹¹ Tozali na nse ya liyokani ya kosala yango.

Lolenge nini tosantisaka mokolo ya Saba? Na mibu na ngai ya bolenge mingi, nayekolaki mosala ya basusu oyo basangisaki milongo ya makambo ya kosala mpe makambo ya kosala te na Saba. Ezalaki kino nayekolaki na makomi ete etamboli mpe ezalela na ngai na Saba ezalaki elembo katikati na ngai mpe Tata na ngai na Lola. ¹² Na bososoli wana, nazalaki lisusu na mposa ya molongo ya makambo ya kosala mpe oyo ya kosala te. Ntango nasengelaki kozwa mokano soki to te mosala ebongaki mpo na Saba, nazalaki komituna, “elembo nini elingi ngai kopesa na Nzambe?” Motuna wana ekomisaki maponi na ngai oyo etali mokolo ya Saba polele mpenza.

Ata malongi etali mokolo ya Saba ezali ya kala, ezongisami sika na mikolo ya nsuka lokola eteni ya boyokani ya sika elongo na elaka moko. Boyokamela nguya ya meko ya bonzambe oyo:

“Ete omibatela mobimba na mbindo ya mokili, okokende na ndakonzambe mpe okosala makuli na mokolo na ngai;

Mpo solo oyo ezali mokolo naponi mpo ete opema na misala na yo, mpe opesa nsambo na yo epai Oyo Aleki Likolo. …

“Mpe na mokolo oyo … tika bilei elambama na motema ya komikitisa ete kokila na yo ekoka kozala malamu,, … ete esengo na yo ekoka kozala mobimba. …

“Mpe soki osali makambo oyo na bopesi matondi, na motema mpe elongi ya esengo, …litondi ya mabele ezali ya yo.”¹³

Kanisa ndelo ya esakola wana! Litondi ya mabele elakelami na baoyo babateli mokolo ya Saba ezala esantu.¹⁴ Kokamwa moko te ete Yisaya abengaki Saba “esengo.”

Lolenge nini okoki kosala ete ezalela na yo na mokolo ya Saba ekokamba na esengo mpe bosepeli? Na kobakisa na kokende na yo na eklezia, kolia elambo, mpe kozalaka na etingia na libiangi na yomei songolo mpo na kosala, milulu nini mosusu ekosalisa mpo na kosala Saba ezala ya esengo mpo na yo? Elembo nini ekopesa yo na Nkolo mpo na kolakisa bolingo na yo mpo na Yo?

Saba epesaka libaku moko ya kitoko mpo na kolendisa mikangano ya libota. Nsima na nionso, Nzambe alingi moko na moko na biso, lokola bana na Ye, azonga epai na Ye lokola Basantu bazwa dotasio, baangisama na tempelo lokola mabota, na bankoko na biso, mpe bana na biso.¹⁵

Tosalaka Saba ezala esengo ntango toteyi nsango malamu na bana na biso. Mokumba na biso lokola baboti ezali polele makasi. Nkolo alobaki ete, “Ntango nionso oyo baboti bazali na bana na Siona … oyo bazali koteya bango te kososola malongi ya koyambola, bondimi na Klisto Mwana ya Nzambe na bomoi, mpe ya libatisi mpe likabo ya Molimo Mosantu na kotiaka maboko likolo ya moto, ntango bazali na mibu mwambe, lisumu ekozala likolo ya mito ya baboti.”¹⁶

Mibu mileki Bakambi ya Yambo babetaki nsete likolo ya ntina ya bolamu ya ntango ya libota. Bakomaki ete:

“Tosengi baboti bapesa makasi na bango ya malamu mingi na mateya mpe kobokola bana bango kati na mibeko ya nsango malamu oyo ekobomba bango pene na Eklezia. Ndako ezali moboko ya bomoi ya bosembo, mpe esalele moko mosusu te ekoki kozwa esika na yango mpo na kokokisa misala na yango na komemaka liboso mokumba oyo epesama na Nzambe.

“Topesi toli na baboti mpe bana bapesa esika ya yambo mingi na losambo na libota, na likita ya mpokwa na libota, na boyekoli nsango malamu mpe malako, milulu ya malamu na libota. Atako babosenga to milulu misusu ekoki kozala ya kolongobana mpe ebongi, esengeli te epesama nzela ya kozwa bisika ya mikumba epesama ya bonzambe oyo bobele baboti mpe mabota ekoki kosala malamu mpenza.”¹⁷

Ntango nazali komaniola toli oyo, nazali pene ya kolinga kozala elenge tata mbala moko lisusu. Sikawa baboti bazali na banzela ya kitoko mpenza na maboko mpo na kosalisa bango bakomisa ntango ya libota na ntina mingi koleka, na Saba mpe mikolo mosusu mpe lokola. Bazali na LDS.org, Mormon.org, bavideo ya Biblia, Lolaka ya Mormon, Media Library, the Friend, the New Era, the Ensign, the Liahona, mpe mingi—mingi koleka. Maziba oyo esalisaka mpenza baboti na kokokisaka mokumba na bango ya bule mpo na bana na bango. Mosala moko te eleki oyo moboti ya bosembo, ya bokebi!

Ntango ozali koteya Nsango malamu, okoyekola mingi koleka. Oyo ezali lolenge ya Nkolo ya kosalisaka yo ososola nsango malamu na Ye. Alobaki ete:

“Napesi bino motindo ete bosengeli koteyana malongi ya bokonzi.

“Boteya na etingia … , ete oteyama malamu mingi … kati na malongi, kati na mobeko ya nsango malamu, na makambo manso matali bokonzi ya Nzambe.”¹⁸

Boyekoli ya Nsango malamu esalaka Saba ezala esengo. Elaka oyo ezali ntina atako monene, banani basali to bisika ya libota ezali nini.

Na kobakisa na ntango ya libota okoki kozwa esengo ya solo na Saba uta na mosala ya mambi ya libota. Kolukaka mpe komonaka baye libota oyo bazalaki yambo na yo na mabele—Baoyo bazwaki libaku ya koyamba nsango malamu te ntango bazalaki awa—ekoki komema esengo monene.

Namoni yango ngaimei. Mibu mingi eleki, mwasi na ngai ya bolingo, Wendy, akanaki koyekola lolenge nini kosala boluki ya mambi ya libota. Bokei na ye liboso ezalaki malembe, kasi moke moke, ayekolaki ete ezali pete kosala mosala ya bule oyo. Mpe namoni ye mokolo moko te na esengo koleka. Yo mpe osengeli kokende mobembo na bikolo mosusu to kutu na ndako ya mambi ma libota te. Na ndako, na lisungi ya ordinatele to telefoni, okoki komona milimo oyo ezali na mposa ya makuli na bango. Sala ete Saba ezala ya esengo na komonaka bankoko na yo mpe kokangolaka bango uta na boloko ya molimo!¹⁹

Sala ete Saba ezala ya esengo na kosalisaka basusu, mingimingi baoyo bazali komiyoka malamu te to baoyo bazali bango moko to bakeleli.²⁰ Kotombolaka milimo na bango ekotomola oyo ya yo lokola.

Ntango Yisaya alimbolaki Saba lokola “esengo,” ateyaki lisusu biso lolenge nini kosala yango ezala ya esengo. Al;obaki ete:

“Soki okoboya … kosala esengo na mokolo na ngai ya bule; mpe okobenga saba ete ya esengo,… mpe mokolo ya bule ya [Nkolo] ete ezali ya lokumu, kotambola na nzela na yo moko te, mpe koluka bisengo na yo te, mpe kolobaloba mpamba te:

“Mpe okomisepelisa kati na Nkolo”²¹

Kozanga koluka “esengo na yomei” na Saba esengi botosi ya moto ye moko. Okoki koluka komipimela eloko moko olingaka. Soki oponi komisepelisakati na Nkolo, Okomitika te ya kozwa yango lokola mokolo kani mosusu. Momesano mpe milulu ya masano ekoki kosalama ntango mosusu.

Kanisa oyo: Na kofutaka moko na zomi, tozongisaka eteni moko likolo na zomi ya bozwi na biso epai ya Nkolo. Na kobatelaka Saba esantu, tobombaka mokolo moko kati na nsambo lokola ya Ye. Yango wana ezali litomba na biso ya kobulisa mosolo mpe ntango lokola. Epai na Ye oyo adefisaka biso bomoi mokolo na mokolo.²²

Bondimbi Nzambe ebotaka bolingo mpo Saba; bondimi Saba ebotaka bolingo ya Nzambe. Saba ya bule ezali solo ya esengo.

Sikawa, lokola likita ekomi na nsuka, toyebi ete bisika nionso tozali tosengeli kozala bandakisa ya bandimi kati na mabota, bato ya nzinganzinga, mpe baninga na biso.²³ Bandimi ya solo babatelaka mokolo ya Saba ezala esantu.

Nasukisi na bosenga ya Moloni, oyo asalaki ntango asukisaki Buku ya Mormon. Akomaki ete, “Yaka epai ya Klisto, mpe zala bobongi nie na ye, mpe bomiwangana na bozangi bonzambe bonso; mpe soki bowangani na bozangi bonzambe bonso, mpe bolingi Nzambe na bokasi, mayele mpe makasi na bino manso, nde … bobulisami na Klisto.”²⁴

Na bolingo na motema na ngai, nasukisi lisikulu oyo, yango ezali losambo, litatoli, mpe lipamboli na ngai na nkombo ya yesu Klisto, amane.