Te hōro’ara’a nō te arata’i i te tamari’i

Na Mary R. Durham

Tei ha’amāuruuruhia iho nei ’ei tauturu piti i roto i te Peresidenira’a Rahi o te Paraimere

Nahea tātou i te ha’api’i i tā tātou mau tamari’i ’ia fa’aru’e i te mau mea o te ao nei ’e ’ia ti’aturi i te Vārua ?

Tē paremo ra te hō’ē metua tāne ’āpī. ’Ua haere atu ’oia, tāna nā tamari’i e piti ’e tōna metua ho’ovai tāne e tere fa’a’ati i te hō’ē roto. ’Ua ha’a’atihia rātou i te mau mou’a nehenehe tei tāpo’ihia e te mau tumu paina, ’e ’ua nīnamu te ra’i, tei ’ī i te mau ata ’uo’uo, ma te hōro’a mai i te nehenehe ’e te hau. I tō te na tamari’i ro’ora’ahia i te ve’ave’a ’e te rohirohi, fa’aoti a’e ra nā tāne e piti ’ia tu’u i te mau tamari’i i ni’a i tō raua tua ’e ’ia ’au i te tahi atu pae o te roto e ’ere i te mea ātea roa.

E au ra e mea ohie---e tae noa atu i te taime ’ua ha’amata te metua tane i te ’ite e te hutihia ra ’oia i raro, ’e te teiaha noa atu ra te mau mea ato’a. ’Ua huti te pape iāna i raro, ’e ’ua ha’amata ’oia i te ri’ari’a. Nahea ’oia ’ia tāmau noa i te ’au---’e tāna tamahine iti here i ni’a i tōna tua ?

’Aita tōna reo i fa’aro’ohia i te ateā a tuō ai ’oia ; ’ua ātea roa tōna metua ho’ovai tāne nō te pāhono atu i tāna pi’ira’a nō te tauturu. ’Ua vai ’oia ’ōna ana’e ma te tauturu-’ore-hia.

E nehenehe ānei tā ’outou e feruri e o ’outou ana’e i taua taime ra mai iāna te huru, ’aita ho’i e tao’a nō te tāpe’a atu i ni’a iho ’e te ’aro ra ’outou i roto i te hō’ē taime hepohepo nō tō ’outou iho ora ’e nō tā ’outou tamari’i ? Te mea oto, te fa’aruru pā’ātoa nei tātou i teie huru ’ia topa ana’e tātou i roto i te mau huru ’ohipa i reira tātou e hina’aro mau ai i te tauturura’a nō te fa’aora ia tātou ’e i te mau ta’ata tei herehia e tātou.

’Ua ’ite a’e ra ’oia ma te ri’ari’a rahi ’e te teiaha noa atu ra tōna mau tīa’a tei ’ī i te pape. A ’aro ai ’oia ’ia ’ore ’ia ’tomo, ’ua ha’amata ’oia i te tāmata i te tātara i tōna mau tīa’a teiaha. E au ra ’ua mau roa te tīa’a. ’Ua ’oru te mau ta’amu tīa’a i te pape ’e ’ua mau maita’i te tīa’a.

I te taime hope’a roa nō te hepohepo, ’ua noa’a iāna i te tātara i te mau tīa’a mai tōna atu nau avae, ’e i muri roa a’e ra, ’ua matara mai te mau tīa’a, ’e ’ua he’e ’oi’oi atu i roto i te hōhonu. Te matarara’a te teiaha tei huti iāna i raro, ’ua ho’i ’oi’oi ’oia e tāna tamahine i ni’a. ’Ua nehenehe atu ra iāna ia ’au atu i mua ’e ’ia tāpae i te vāhi pāpū i te tahi atu pae o te roto.

I te tahi mau taime, e mana’o paha tātou e te paremo ra tātou. E nehenehe te orara’a e riro i te teiaha. Te ora nei tātou i roto i te « hō’ē ao ’ohipa ’e te maniania… Mai te mea e’ita tātou e ha’apa’o maita’i, e nehenehe te mau mea no teie nei ao e [ha’aparemo] i te mau mea o te Vārua ».¹

Nahea tātou ’ia pe’e i te hōho’a o teie metua tane ’e ’ia fa’aru’e atu i te tahi mau mea teiaha nō teie ao tā tātou e amo nei---’ia ’ore tātou iho ’e tā tātou mau tamari’i ’ia paremo i te mau mea no teie ao ? Mai ta Paulo i a’o, nahea e nehenehe ai ia tātou ’ia « ha’apae i te mau mea teimaha atoa ? »² Nahea e nehenehe ai ia tātou ’ia fa’aineine i tā tātou mau tamari’i nō te mahana e ’ore ai rātou e nehenehe e turu’i fa’ahou i ni’a ia tātou ’e tō tātou mau ’itera’a pāpū---te taime e o rātou te feiā ’au ?

E tae mai te hō’ē pāhonora’a ’ia ’ite ana’e tātou i teie tumu hanahana nō te pūai. O te hō’ē ïa tumu o te ha’afaufa’a-pinepine-ore-hia, ’e o te nehenehe ho’i e fa’aohipahia i te mau mahana ato’a nō te ha’amāmā i tā tātou hōpoi’a ’e nō te arata’i i tā tātou mau tamari’i. Taua tumu ra o te hōro’a ïa nō te arata’ira’a a te Vārua Maita’i.

I te va’u o te matahiti, e nehenehe te mau tamari’i e bāpetizohia. E ha’api’i mai rātou ’e e rave i te hō’ē fafaura’a e te Atua. E ha’atihia rātou e te mau ta’ata tā rātou i here a utuhihia ai ’e a ti’a mai ai rātou mai raro mai i te pape ma te ’oa’oa rahi. I muri iho e fāri’i rātou i te horo’a parau-ore-hia a te Vārua Maita’i, te hō’ē horo’a o te nehenehe e arata’i tāmau noa ia rātou ’ia ora parau ti’a rātou nō taua ha’amaita’ira’a ra.

’Ua parau Elder David A. Bednar : « Nō te ’ōhie o te [ha’amaura’a] i ’ore ai tātou e tāu‘a roa i te faufa’a o te reira. E ’ere teie nau reta parau e ono---« A fāri’i i te Vārua Maita’i »---i te hō’ē fa’ahitira’a ’ana’anatae-ore-noa ; e fa’auera’a rā na te autahu‘ara’a---e fa’auera’a mana ia na-reira-hia, ’eiaha rā ia rave-noa-hia ».³

Te vaira i roto i te natura o te mau tamari’i te hina’aro ’ia rave i te mea maita’i ’e ’ia riro ’ei tamari’i maita’i. E nehenehe tā tātou e ’ite i tō rātou huru hara ’ore, tō rātou vi’ivi’i ’ore. Te vai ato’a ra tō rātou ’ite rahi i te fa’aro’o i te reo iti marū.

I roto i te 3 Nephi 26, ’ua fa’a’ite te Fa’aora ia tātou i te ’aravihi vārua o te mau tamari’i :

« E ’ua matara tō rātou arero Iāna ’e na rātou i fa’a’ite i te mau mea rarahi ’e te maere i tā rātou mau metua ra, e mau mea ïa te hau ē i te fa’a’itehia mai i te taata …

« … E na rātou i hi’o ’e i fa’aro’o ho’i i taua mau tamari’i ra ; ’oia mau, ’ua parau tō te mau ’aiū ra vaha, e na rātou i fa’a’ite i te mau mea maere ».⁴

Nahea tātou e te mau metua e fa’arahi ai i te aravihi vārua o tā tātou mau tamari’i ? Nahea tātou e ha’api’i ai ia rātou ’ia fa’aru’e i te mau mea o te ao nei ’e ’ia ti’aturi i te Vārua ’ia ore ana’e tātou i piha’i iho ia rātou ’e ’ia vai rātou ana’e ra i roto i te mau tau fifi o tō rātou orara’a ?

E fa’a’ite atu vau i te tahi mau mana’o.

A tahi, e nehenehe tā tātou e fa’aara i tā tātou mau tamari’i ia fa’aro’o ’ia ite ana’e rātou i te Vārua. E ho’i na tātou i te tau o te Faufa’a Tahito ’e ’ia hi’o e nahea tō Elia fa’aohipara’a i te reira i ni’a ia Samuela.

’Ua fa’aro’o te tamaiti ra o Samuela e piti taime i te hō’ē reo ’e ’ua horo atu ia Elia ra, ma te parau ē, « teie au ».

’Ua parau mai ra Elia « ’aita vau i ti’aoro atu ia ’oe »,

« ’Aita ho’i o Samuela i ’ite ia Iehova, ’aore ā ho’i te parau a Iehova i fa’a’itehia mai iāna ra ».

I te toru râ o te taime, ’ua ’ite Elia e o te Fatu te pi’i ra ia Samuela ’e ’ua parau atu ia Samuela ia parau, « e parau mai ’oe, e Iehova, te fa’aro’o nei ho’i tō tāvini ».⁵

’Ua ha’amata Samuela i te ’ite, i te ta’a, ’e i te fa’aro’o i te reo o te Fatu. ’Aita rā teie tamaiti iti i ha’amata i te ta’a maita’i e tae noa atu i te taime ’ua tauturu Elia iāna ’ia ’ite i te reira. E i tōna ha’api’ira’ahia, ’ua nehenehe ia Samuela ’ia mātau rahi a’e ā i te reo iti marû.

Te piti, e nehenehe tā tātou e fa’aineine i tō tātou ’utuāfare ’e tā tātou mau tamari’i ’ia ’ite i te reo iti marû. « E rave rahi mau ’orometua nō te mau reo ’e’ē o te ti’aturi ē e ha’api’i maita’i a’e ā te mau tamari’i i te hō’ē reo ‘na roto i te mau fa’anahora’a ha’amātaura’a,’ i reira rātou e ha’atihia ai e te tahi mau ta’ata e parau i taua reo ra ’e e ti’a ia rātou iho ’ia paraparau i taua reo ra. E ha’api’i rātou ’ia ’ore ’ia parau noa i te mau ta’o parau, ’ia paraparau ohie ra ’e ’ia feruri na roto i te reo ’āpī. Te vāhi maita’i roa a’e nō te ha’amātaura’a i te hō’ē ha’api’ira’a vārua i roto ïa i te ’utuāfare, i reira te mau ture vārua e nehenehe ai e ha’amau i te niu nō te orara’a i te mau mahana atoa ».⁶

« ’E e ha’api’i tāmau māite ’oe i tō mau tamari’i [te mau parau a te Fatu], o tā ’oe ïa e parau ’ia pārahi noa ’oe i roto i te fare, e ’ia haere noa ’oe na te e’a ti’a ra, ’e ’ia ta’oto noa ’oe ra, ’e ’ia ti’a noa ’oe i ni’a ra ».⁷ Te ha’amātaura’a i tō tātou mau ’utuāfare i te Vārua, e tauturu ïa te reira i tā tātou mau tamari’i ’ia fāri’i i Tōna ra mana.

Te toru, e nehenehe tā tātou e tauturu i tā tātou mau tamari’i ’ia ’ite e nahea te Vārua ’ia paraparau ia rātou. ’Ua ha’api’i Iosepha Semita : « Mai te mea e haere mai ’oia i te hō’ē tamari’i ri’i ra, e fa’atano ïa ’Oia iāna iho i te reo ’e i te ’ite o te hō’ē tamari’i ri’i ».⁸ ’Ua ’itehia i te hō’ē metua vahine ē, i tō te mau tamari’i ha’api’ira’a na roto i te mau rave’a ta’a ’ē---na roto ānei i te hi’ora’a, te fa’aro’ora’a, te tāpe’ara’a, ’aore rā te fāfāra’a---e na roto i te hi’opo’ara’a i tāna mau tamari’i, ’ua rahi atu ā ïa tōna ’itera’a ’e e ha’api’i te Vārua Maita’i i tāna mau tamari’i na roto i te mau rave’a e ha’api’i maita’i a’e ai rātou tāta’itahi.⁹

’Ua fa’a’ite mai te tahi atu metua vahine i te tahi mana’o nō te tauturu i tāna mau tamari’i ’ia ha’api’i e nahea ’ia ’ite i te Vārua. ’Ua pāpa’i ’oia, « i te tahi mau taime e’ita [te mau tamari’i] e ’ite ē te hō’ē mana’o o te ho’i noa mai, te hō’ē mana’o tāmāhanahana i muri a’e i tō rātou ta’ira’a, ’aore rā te ha’amana’ora’a i te tahi mea i te taime tano maita’i, e mau rave’a ana’e ïa e paraparau ai te Vārua Maita’i [ia rātou] ». Te na ’ō fa’ahou ra ’oia, « te ha’api’i nei au i ta’u mau [tamari’i] ’ia fa’atumu i ni’a i te mea tā rātou i ’ite ’e [’ia rave i te reira] ».¹⁰

Na te fāri’ira’a ’e te ’itera’a i te Vārua e ’āfa’i mai i te ’aravihi vārua i roto i te orara’a o tā tātou mau tamari’i, ’e te reo tā rātou e mātau i te ’ite e riro mai ïa e mea māramarama a’e nō rātou. E riro ïa mai tā Elder Richard G. Scott i parau : « ’Ia noa’a ana’e ia ‘outou te ’aravihi ’e te manuia na roto i te arata’ira’a a te Vārua, e nehenehe ïa tō ‘outou ti’aturira’a i te mau fa’aurura’a tā ‘outou e ’ite e riro e mea pāpū a’e i tō ‘outou ti’aturira’a i te mea tā ‘outou e ’ite ’aore rā e fa’aro’o ».¹¹

’Eiaha tātou e mata’u a hi’o ai tātou i tā tātou mau tamari’i ’ia tomo atu i roto i te mau pape nō te orara’a, nō te mea ’ua tauturu tātou ia rātou ’ia fa’aru’e i te mau mea teimaha o te ao nei. ’Ua ha’api’i tātou ia rātou ’ia ora nō te hōro’a arata’ira’a a te Vārua. E tāmau noa teie hōro’a i te ha’amāmā i te teimaha tā rātou e amo ’e e fa’aho’i ia rātou i tō rātou ’utuāfare i te ra’i ra, mai te mea e ora rātou nō te reira ’e e pe’e rātou i tāna mau fa’a’itera’a. I te i’oa o Iesu Mesia, amene.