’Ia ha’aputuputuhia to’opiti ’e ’aore rā to’otoru
Mai te peu e fa’aro’o ’outou ma te Vārua, e ’ite ’outou i tō ’outou ’ā’au i te tāmarūhia, tō ’outou fa’aro’o i te ha’apūaihia ’e tō ’outou ’aravihi nō te here i te Fatu i te fa’arahihia mai.
E au mau taea’e here, e au mau tuahine here, maeva i te 186ra’a o te ’āmuira’a rahi a Te ’Ēkālesia a Iesu Mesia i te Feiā Mo’a i te Mau Mahana Hope’a Nei. Tē ’oa’oa nei au ’ia ti’a i rotopū ia ’outou, ’e tē maeva nei au ia ’outou ma tō’u ’ā’au ato’a.
’Ua māuruuru roa vau ’ua haere mai ’outou i te ’āmuira’a nō te fāri’i i te fa’aurura’a o te ra’i ’e nō te ha’afātata atu i tō tātou Metua i te Ao ra ’e i tō tātou Fatu.
I roto i teie putuputura’a ’ati a’e te ao nei, tau milioni pipi nā Iesu Mesia tei fafau ’ia ha’amana’o noa Iāna ’e ’ia tāvini Iāna. Maoti te semeio o te rāve’a ’āpī, ’ua ’ore te mau hora ’e te mau kilometera e fa’ata’a ’ē ra ia tātou. Tē farerei nei tātou mai te mea ra ē, tei roto tātou pā’āto’a i te hō’ē piha rahi.
Te mea hau atu rā, ta’a ’ē noa atu teie putuputura’a, ’o te i’oa ïa tā tātou e nā reira nei. ’Ua parau fafau te Fatu ē, noa atu te numera rahi o Tāna mau pipi i ni’a i te fenua nei i teie mahana, e vai noa ’Oia i pīha’i iho ia tātou. ’Ua parau ’Oia i te pupu pipi iti Nōna i te matahiti 1829 ra, « ’Oia mau, ’oia mau, tē parau atu nei au ’ia [’outou] na… ’ia ha’aputuputuhia to’opiti ’e ’aore rā to’otoru mai tō’u nei i’oa… inaha ’ei reira ïa vau i rotopū ia rātou—mai te reira ato’a tei rotopū ïa vau ia [’outou] na » (PH&PF 6:32).
I teienei, ’ua hau tātou i te piti ’e te toru, e naho’a rahi pipi Nāna tei putuputu mai i roto i teie ’āmuira’a, ’e mai tei parau-fafau-hia mai, tei rotopū te Fatu ia tātou. Nō te mea ’ua ti’a fa’ahou mai ’Oia ’ei tino hanahana, ’aita ’Oia e ti’a tino nei i te mau vāhi ato’a e putuputu te feiā mo’a. Nā roto rā i te mana o te Vārua, e ti’a ia tātou ’ia ’ite ē, tei rotopū ’Oia ia tātou nei i teie mahana.
Te vāhi ’e te taime e putapū tātou i te fātatara’a ’e te Fa’aora, tei te huru ïa i te ta’ata tāta’itahi. ’Ua hōro’a ’Oia i teie ha’api’ira’a :
« ’E teie fa’ahou ā, ’oia mau tē parau atu nei au ia ’outou, ’o ta’u mau hoa, tē vaiiho atu nei au i teie mau parau nei ia ’outou na ’ia feruri i roto i tō ’outou mau ’ā’au na, mai teie fa’auera’a tā’u e hōro’a atu nei ia ’outou, ’ia ti’aoro mai ’outou iā’u nei ’oi [vai] fātata mai ai au— »
« ’A ha’afātata mai iā’u nei e ha’afātata atu ïa vau ia ’outou na ; ’a ’imi itoito noa mai iā’u nei ’e e ’ite mai ho’i outou iā’u ’a ani mai, ’e e fāri’i ïa outou ; ’a pātoto mai ’e e ’īritihia atu ïa ia ’outou na » (PH&PF 88:62–63).
E piti a’e ta’ata tā’u i ’ite e fa’aro’o ra i teie mahana tei hina’aro i teie ha’amaita’ira’a mā tō rāua ’ā’au ato’a. E tāmata pāpū rāua i te ha’afātata atu i te Fatu i roto i teie ’āmuira’a. ’Ua pāpa’i rāua to’opiti iā’u—’ua tae mai tā rāua rata i te hō’ē ā hepetoma—hō’ē ā tāparura’a nō te tauturu.
Rāua to’opiti e melo fa’afāriuhia i roto i te ’Ēkālesia ’e e ’itera’a pāpū mau tā rāua i fāri’i a’enei nō ni’a i te here o te Atua te Metua ’e o Tāna Tamaiti Iesu Mesia, te Fa’aora o te ao. ’Ua ’ite rāua nā te peropheta Iosepha Semita i fa’ati’a i te ’Ēkālesia nā roto i te heheura’a ’āfaro nō ’ō mai i te Atua ra, ’e ’ua fa’aho’i-fa’ahou-hia mai te mau tāviri o te autahu’ara’a mo’a. To’opiti tei fāri’i i te ’itera’a ē, tei roto te mau tāviri i te ’Ēkālesia i teie mahana. ’Ua fa’a’ite mai rāua i tō rāua ’itera’a pāpū tura i roto i te rata.
To’opiti ato’a rā tei ’oto ē, tē iti noa mai ra tō rāua mana’o here i te Fatu ’e nō Tōna here ia rāua. To’opiti tei hina’aro, ma te ’ā’au tae, ’ia tauturu vau ia rāua ’ia ’ite fa’ahou mai i te ’oa’oa ’e te mana’o ē, ’ua herehia rāua, ’o tā rāua ïa i fāri’i ’a tomo ai i roto i te basileiā o te Atua. To’opiti tei parau i tō rāua mata’u ē, ’ia ’ore taua mau mana’o ra e ’ite-pauroa-fa’ahou-hia mai, te here i te Fa’aora ’e i Tāna ’Ēkālesia, e riro paha te mau ha’afifira’a ’e te mau tāmatara’a i te upo’oti’a i ni’a i tō rāua fa’aro’o i te hope’a.
E ’ere ’o rāua ana’e i roto i te reira fifi, e ’ere ato’a te reira tāmatara’a i te ’ohipa ’āpī. I te tau nō Tāna tāvinira’a i te tāhuti nei, ’ua hōro’a te Fa’aora i te parabole nō te ueue huero. Te huero, ’o te parau ïa a te Atua. Te ta’ata ueue, ’o te Fatu ïa. Tei te huru te ’ōteora’a o te huero ’e tōna tupura’a i te huru o te repo. Tē ha’amana’o ra ’outou i Tāna mau parau :
« ’E tei te ueuera’a ra ma’iri ihora e tahi pae i te pae arati’a, ma’ue mai ra te manu pau ihora.
« Ma’iri ihora e tahi pae i te vāhi papa ’aita re’a e repo ra ; tupu ihora ïa i reira ra, nō te mea ’aore i mo’e re’a i raro i te repo :
« ’Ia mahanahia rā, ’ōriorio ihora, pohe atu ra nō te mea ’aore i a’ahia.
« Ma’iri ihora ho’i e tahi pae i roto i te ’aihere, tupu a’era te ’aihere apiapi ihora.
« Ma’iri ihora vetahi i te vāhi repo maita’i, tupu a’era hotu ihora, ta’i hō’ē hānere i te huero hō’ē, ta’i ono ’ahuru i te hō’ē, ta’i toru ’ahuru i te hō’ē.
« E tāri’a tōna ’ei fa’aro’ora’a ra, e fa’aro’o ’oia » (Mataio 13:4–9).
Fa’ahou ā, te huero, ’o te parau ïa a te Atua. Te repo, ’o te ’ā’au ïa o te ta’ata e fāri’i i te huero.
E mau vāhi rahi e tū’ati tātou pā’āto’a i ni’a i teie nā ta’ata fa’ahiahia tei pāpa’i mai iā’u nō te tauturu ’e te tāmarūra’a ’ā’au. Tātou pā’āto’a tei fāri’i i te mau huero, ’oia ho’i te parau a te Atua, tei tanuhia i roto i tō tātou ’ā’au i te hō’ē ra taime. Nō vetahi, i tō tātou vai-tamari’i-ra’a, i te anira’a tō tātou nau metua ’ia bāpetizohia ’e ’ia ha’amauhia e te feiā tei mau i te mana. Nō vetahi o tātou, ’ua ha’api’ihia ïa e nau tāvini tei pi’ihia e te Atua. Tātou tāta’itahi tei putapū i te maita’i o te huero, ’ua ’ite ato’a tātou i te ’orura’a i roto i tō tātou ’ā’au ’e ’ua ’ite tātou i te ’oa’oa mai te huru ra ē, tē tupu rahi ra tō tātou ’ā’au ’e tō tātou feurira’a.
Tātou pā’āto’a tei tāmatahia te fa’aro’o e te mau ha’amaitaira’a i fa’ataimehia, te mau ’arora’a huna a rātou tei hina’aro e ha’amou i tō tātou fa’aro’o, te mau fa’ahemara’a ’ia hara ’e te mau hia’ai pipiri, tei fa’aiti ho’i i tā tātou mau tauto’ora’a ’ia ’ūtaru ’e tei ha’amarū i te pūai pae vārua o tō tātou ’ā’au.
Rātou e ’oto ra i te mo’era’a te ’oa’oa i nā mua a’e, rātou te mea ha’amaita’ihia. Tē vai nei ho’i te ta’ata ’aita e ’ite ra tē ’ōriorio ra te fa’aro’o i roto ia rātou. E mea feruri Sātane. Tē parau nei ’oia i te ta’ata tāna e hina’aro ’ia ahoaho ē, terā ’oa’oa tā rātou i putapū nā mua a’e, e ’ohipa ha’avarera’a tamari’i ïa.
I teie mahana, tā’u nei poro’i ia tātou pā’āto’a, ’oia ho’i, e mātara mai te rāve’a faufa’a rahi i roto i te mau mahana i muri nei, nō te mā’iti i te tāmarūra’a o te ’ā’au ’e te fāri’ira’a ’e te fa’a’apura’a i te huero. Te huero, ’o te parau ïa a te Atua, ’e e mani’ihia te reira i ni’a ia tātou pā’āto’a e fa’aro’o nei, e māta’ita’i nei ’e e tai’o nei i te mau parau o teie ’āmuira’a. ’Ua fa’aineinehia te pehe, te mau a’ora’a ’e te mau ’itera’a pāpū e te mau tāvini a te Atua tei ’imi itoito i te Vārua Maita’i nō te arata’i ia rātou i roto i tā rātou fa’aineinera’a. ’Ua pure maoro atu ā rātou ma te ha’eha’a rahi atu ’a fātata noa mai ai teie mau mahana ’āmuira’a.
’Ua pure rātou ’ia roa’a ia rātou te mana nō te fa’aitoito ia ’outou ’ia rave i te mau mā’itira’a e fa’aineine i roto i tō ’outou ’ā’au i te repo maita’i a’e ’ia tupu te parau maita’i a te Atua ’e ’ia hotu rahi ho’i. Mai te peu e fa’aro’o ’outou ma te Vārua, e ’ite ’outou i tō ’outou ’ā’au i te tāmarūhia, tō ’outou fa’aro’o i te ha’apūaihia ’e tō ’outou ’aravihi nō te here i te Fatu i te fa’arahihia mai.
Nā te mā’itira’a ’outou ’ia pure ma tō ’ā’au tae roa e taui i te mea e tupu nō ’outou i roto i te mau tuha’a purera’a o te ’āmuira’a ’e i roto i te mau mahana ’e te mau ’āva’e i muri mai.
E rave rahi o ’outou tei ha’amata a’ena. I te ha’amatara’a teie tuha’a purera’a, ’ua hau atu tā ’outou i rave i te fa’aro’o-noa-ra’a i te pure ; ’ua ’āmui ’outou i tō ’outou fa’aro’o i te tāparura’a ’ia ’oa’oa tātou i te ha’amaita’ira’a ’ia mani’ihia te Vārua Maita’i i ni’a ia tātou. ’E ’a ’āmui ai ’outou i tā ’outou tāparura’a muhu ’ore nā roto i te i’oa o Iesu Mesia, ’ua ha’afātata atu ā ’outou Iāna. ’O Tāna ’āmuira’a teie. Nā te Vārua Maita’i ana’e e nehenehe e fa’atae mai i te mau ha’amaita’ira’a tā te Fatu i hina’aro nō tātou. Nō Tōna here ia tātou, ’ua parau fafau mai ’Oia e nehenehe tā tātou e putapū i te reira :
« ’E te mau mea ato’a tā rātou e parau ra ’ia uruhia ra e te Vārua Maita’i e riro ïa ’ei parau mo’a, e riro ïa te hina’aro o te Fatu, e riro ïa te mana’o o te Fatu, e riro ïa te parau a te Fatu, e riro ïa te reo o te Fatu, ’e te mana ho’i o te Atua ē tae noa atu i te ora.
« Inaha ’o teie ho’i te parau a te Fatu ia ’outou, ’O ’outou ’o tā’u mau tāvini nei.
« Nō reira, ’ia ’oa’oa, ’e ’eiaha e mata’u, nō te mea tei pīha’i iho ïa vau, ’o te Fatu, ia ’outou na, ’e e ti’a noa ho’i i pīha’i iho ia ’outou na ; ’e e fa’a’ite atu ’outou i te parau nō’u nei, ’oia ’o Iesu Mesia, ’oia te Tamaiti a te Atua Ora, ’e i vai na ho’i Au, ’e tē vai nei ā Vau, ’e e riro ho’i Au i te tae mai ra » (PH&PF 68:4–6).
E nehenehe tā ’outou e pure ’e e ’āmui i tō ’outou fa’aro’o i te mau taime ato’a e ti’a te tahi tāvini nā te Atua i te terono, ’ia tupu te parau fafau a te Fatu i roto i Te Parau Ha’api’ira’a ’e te mau Parau Fafau 50 :
« ’Oia mau tā’u e parau atu nei ia ’outou, ’o ’oia ’o tei fa’atōro’ahia nō’u nei ’e ’ua tonohia atu ho’i e te Fa’aa’o ’ia poro haere i te parau nō te parau mau nā roto i te Vārua o te parau mau, e a’o ānei ’oia i te reira nā roto i te Vārua o te parau mau ’e ’aore rā i te tahi ’ē ānei ?
« ’E mai te mea i te tahi rāve’a ’ē atu rā e ’ere ïa i tā te Atua.
« ’E teie fa’ahou ā, ’o ’oia ’o te fāri’i i te parau nō te parau mau ra, e fāri’i ānei ’oia i te reira nā roto i te Vārua nō te parau mau ’e ’aore rā nā te tahi rāve’a ’ē atu ānei ?
« Mai te mea i te tahi rāve’a ’ē atu rā e ’ere ïa i tā te Atua.
« Nō reira, e aha ho’i te tumu e ’ore e ti’a ai ia ’outou ’ia ’ite ’e ’ia ’ite pāpū ho’i ē, ’o ’oia ’o te fāri’i i te parau nā roto i te Vārua o te parau mau ra ’ua fāri’i ïa ’oia i te reira mai te au i tei a’ohia e te Vārua o te parau mau ?
« Nō reira, ’o ’oia ’o te a’o atu ’e ’o te fāri’i mai, ’ua ’ite ïa rāua te tahi i te tahi, ’e e ha’amaita’ihia rāua to’opiti ’e e ’oa’oa ’āpipiti ho’i rāua » (PH&PF 50:17–22).
E nehenehe tā ’outou ’ia pure ’a hīmene ai te pupu hīmene. ’Ua pure te ta’ata fa’atere pupu himene, te mau fa’ata’i hāmonia ’e te pupu hīmene, ’e ’ua ha’api’ipi’i rātou ma te pure i te ’ā’au ’e ma te fa’aro’o ē, e tāmarū te pehe ’e te mau parau i te mau ’ā’au ma te fa’arahi i tō rātou mana nō te patu i tō vetahi ’ē fa’aro’o. E hīmene mai rātou nō te Fatu mai te mea ra ē tei mua rātou Iāna, ’e e ’ite rātou ē, tē fa’aro’o mai nei te Metua i te Ao ra ia rātou mai Tāna e fa’aro’o pāpū nei i tā te ta’ata hō’ē pure. ’Ua ’āmui rātou ’e ’ua ha’a ho’i nā roto i te here ’ia fa’atupuhia te parau fafau a te Fa’aora ia Emma Smith : « Nō te mea ē e ’oa’oa tō tō’u nei vārua i te hīmene o te ’ā’au ; ’oia ïa, ’ua riro te hīmene o te feiā parau ti’a ra ’ei pure iā’u nei, ’e e pāhonohia te reira nā roto i te ha’ama’itaira’a i ni’a iho i tō rātou ra mau upo’o » (PH&PF 25:12).
’E mai te peu e’ita ’outou e fa’aro’o noa, e pure ato’a rā ’ia hīmene mai rātou, e riro tā ’outou pure ’e tā rātou ho’i i te pāhonohia e te hō’ē ha’amaita’ira’a i ni’a i tō ’outou upo’o ’e tō rātou. E putapū ’outou i te ha’amaita’ira’a nō te here o te Fa’aora ’e Tāna fāri’ira’a. Te ta’ata ato’a e ’āmui mai i roto i te reira ’āruera’a te ’ite i tō rātou here Nōna i te tupu-rahi-ra’a.
E mā’iti paha ’outou ’ia pure ’a fātata ai te ta’ata a’o i te fa’aoti i tāna a’ora’a. E pure teie ta’ata i te Metua i roto iāna, nō te hōro’a mai te Vārua Maita’i iāna i te mau parau ’itera’a pāpū e fa’ateitei i te ’ā’au, te mau tia’ira’a ’e te tapitapi ’ore o te feiā e fa’aro’o mai, ’ia ha’amana’o noa rātou i te Fa’aora ma te ha’apa’o ato’a i te mau fa’auera’a Tāna i hōro’a.
E’ita te ’itera’a pāpū e riro i te hō’ē noa parau fa’ahiti. E riro mai rā te reira ’ei fa’a’ite-pāpū-ra’a i te tahi parau mau tā te Vārua e nehenehe e hōpoi i roto i te ’ā’au o te feiā e pure ra nō te tauturu ’e te arata’ira’a o te ra’i, nō te fāri’i i te here mau o te Mesia.
E hōro’ahia mai te ’itera’a pāpū mau i te mau ta’ata a’o. Ma’a parau ri’i noa paha, e hōpoihia rā te reira i roto i te ’ā’au o tei ha’eha’a, tei haere mai i te ’āmuira’a ma te po’ia i te parau maita’i a te Atua.
’Ua ’ite au e aha tā te fa’aro’o o te ta’ata maita’i e nehenehe e rave nō te fa’atae mai i te mau parau a te Vārua i te hope’a o te hō’ē a’ora’a, i ora na vau i te reira. Hau i te hō’ē taime, ’ua parau mai te tahi ta’ata i muri mai i tō’u ’itera’a pāpū ē, « Nāhea ’oe i te ’itera’a i te mea e ti’a roa iā’u ’ia fa’aro’o ? » ’Ua ha’api’i au ’eiaha e māere mai te peu ’aita vau e ha’amana’o ra i te paraura’a atu i terā mau parau. ’Ua reo vau i te mau parau ’itera’a pāpū, tei reira rā te Fatu, nō te hōro’a mai i te reira iā’u i terā iho taime. E tano ta’a ’ē teie parau fafau nō te ’itera’a pāpū, e hōro’a mai te Fatu i te mau parau i terā iho taime (hi’o PH&PF 24:6). ’A fa’aro’o maite i te mau ’itera’a pāpū e hōro’ahia atu i roto i teie ’āmuira’a rahi—e ha’afātata atu ā ’outou i te Fatu.
Tē ’ite ra paha ’outou ē, ’ua fātata te taime nō’u nō te pū’ohu i te poro’i tā’u i tāmata i te vauvau atu, nā roto i te hō’ē ’itera’a pāpū nō te parau mau. E tauturu mai tā ’outou mau pure iā’u, ’ia hōro’ahia mai te mau parau ’itera’a pāpū e tauturu i te tahi ta’ata e hia’ai noa ra i te pāhonora’a i tāna uira’a.
Tē vaiiho nei au i tō’u ’itera’a pāpū roa ē, ’ua here ’e ’ua ’ite tō tātou Metua i te Ao ra, te Elohima rahi, ia tātou, tātou tāta’itahi. I raro a’e i Tāna fa’aterera’a, ’ua riro Tāna Tamaiti ’o Iehova i te Hāmani. Tē fa’a’ite pāpū nei au ē, ’ua fānauhia Iesu nō Nazareta ’ei Tamaiti nā te Atua. ’Ua fa’aora ’Oia i te ta’ata ma’i, ’ua ’ite mai tei matapō ’e ’ua ti’a mai tei pohe. ’Ua ’aufau ’Oia i te ho’o nō te mau hara ato’a a te mau tamari’i a te Metua i te Ao ra tei fānauhia i te tāhuti nei. ’Ua mutu Iāna te mau tāpe’a o te pohe ’a ti’a fa’ahou mai ai ’Oia mai te mēnema i taua sābati Pāsa mātāmua ra. Tē ora nei ’Oia i teie mahana, ’ei Atua—tei ti’a fa’ahou mai ma te hanahana.
’O teie ana’e te ’Ēkālesia mau, ’e ’o ’Oia te’ōfa’i tihi rahi o te reira. ’O Thomas S. Monson Tāna peropheta nō te ao tā’āto’a nei. Te mau peropheta ’e te mau ’āpōsetolo e fa’aro’o mai ’outou i roto i teie ’āmuira’a, e ti’a mai ïa rātou nō te Fatu. E mau tāvini rātou Nōna, tei ha’amanahia ’ia ’ohipa Nōna. Tē nā mua nei ’Oia i Tāna mau tāvini nā te ao nei. ’Ua ’ite au i te reira. ’O tā’u ïa e fa’a’ite pāpū nei nā roto i Tōna i’oa, te i’oa mo’a o Iesu Mesia, ’āmene.