O Lava Ea Lo’u Lelei? Pe O Le A Ou Ausia Ea?
Afai o le a e taumafai moni lava ma o le a e le fai alofaga pe fouvale—o le salamo soo ma le aioi atu mo le alofa tunoa—o le a mautinoa ai le “lava o lou lelei,”
Tuafafine ma uso pele, oka se faamanuiaga mo i tatou le potopoto ai ina ia aoaoina e auauna a le Alii. Pe le matagofie ea le tele o auala o loo taialaina ma faamanuiaina ai i tatou e lo tatou Tama Faalelagi? E finagalo moni lava o Ia ia tatou fo’i atu i le aiga.
E ala i le soloaiga o ni alofa mutimutivale agamalu a o avea ma se fomai talavou ua faatoa faauu mai se aoga faafomai, sa taliaina a’u i le aoga faafomai mo tamaiti i se polokalama e maualuga tele le atamai ma le faigata. Ina ua ou feiloai atu i isi fomai, sa ou lagona o a’u le tagata aupito sili ona vaivai le atamai ma lē saunia. Sa ou manatu e matua leai ma se auala e mafai ai ona ou tutusa ma le toatele o le vaega.
I le amataga o le matou masina lona tolu, sa ou saofai ai i se potu tausimai i le falemai i le leva o le po, sa ou tagi ma tautulemoe a o ou taumafai ai e tusi se lipoti taofia mo se tamaitiiti na aafia i le niumonia. Ou te le’i lagonaina lava se lotovaivai tele faapea i lo’u olaga. Sa ou le iloaina pe faapefea ona togafitia se niumonia i se tamaitiiti e 10 tausaga le matua. Sa amata ona ou tuufesili po o le a la’u mea sa fai iina.
Ae i lena lava taimi, sa pa’i mai ai se fomai sinia i lo’u tauau. Sa ia fesili mai pe o a mai a’u, ma sa ou sasaa atu i ai lo’u mafatiaga ma popolega. O lana tali sa suia ai lo’u olaga. Sa ia ta’u mai ia te a’u lona mitamita faapea ai ma isi fomai sinia ia te a’u ma o latou lagona o le a avea a’u ma se fomai lelei tele. I se faapuupuuga, sa ia talitonu ia te a’u i le taimi sa ou lē talitonuina ai a’u lava ia.
E pei foi o lo’u lava ia aafiaga, e tele ina tatou faalogo i o tatou tagata o fesili, “O lava ea lo’u lelei o se tagata?” po o le “Pe o le a ou ausia ea le malo selesitila?” Ioe, e leai se mea faapea o le “lava o le lelei.” E leai ma se tasi o i tatou e mafai ona “mauaina” pe “agavaa” mo lo tatou faaolataga, ae o se mea masani lava le tomanatu pe faamata e taliaina i tatou i luma o le Alii, ona o le auala lea ou te malamalama ai i nei fesili.
O nisi taimi a tatou auai i le lotu, e faalotovaivaia i tatou e oo lava i ni valaaulia faamaoni ina ia faaleleia i tatou lava. Tatou te mafaufau leleoa, “E le mafai ona ou faia nei mea uma” po o le “O le a ou le lelei lava e pei o nei tagata uma.” Masalo tatou te lagonaina uma lea mea e tasi e pei ona ou lagonaina i le falemai i lena po.
Faamolemole, o’u uso e ma tuafafine pele, e tatau ona tuu lo tatou faatusatusaina o i tatou lava i isi tagata. Tatou te faapologaina i tatou lava e aunoa ma se uiga e ala i le fiatautavā ma le ola faatusatusa. Tatou te faamasino sese lo tatou agavaa faaletagata lava ia i mea tatou te maua pe le maua foi faapea ai ma manatu o isi. Afai e tatau ona tatou ola faatusatusa, ia o tatou faatusatusa lo tatou tulaga i le tuanai i lo tatou tulaga ua i ai i aso nei—faapea ai ma le tulaga tatou te mananao ia avea ai i le lumanai. E na o le pau le manatu e taua ia i tatou o le mea o loo finagalo ai lo tatou Tama Faalelagi ia i tatou. Faamolemole ia ole atu ma le faamaoni ia te Ia po o le a Sona finagalo ia te oe. O le a Ia alofa ma faasa’o mai ae le faalotovaivaia i tatou; o le togafiti lena a Satani.
Se’i ou tuu sa’o atu ma le manino. O tali i fesili “O lava ea lo’u lelei?” ma le “Pe o le a ou ausiaina ea?” o le “Ioe! O le a oo ina lava lo outou lelei” ma “Ioe, o le a outou ausiaina pe afai tou te salamo pea ma aua le fai ‘alofaga ma fouvale.” O le Atua o le lagi e le o se laufalī le alofa o loo saili i soo se ‘alofaga e lafoai ese ai i tatou mai le taaloga. O Ia o lo tatou Tama e alofa atoatoa, ua naunau atili mai i lo se isi lava mea ia toe foi uma atu Lana fanau i le aiga ma mau faatasi ma Ia o ni aiga e faavavau. Na Ia foai moni mai lava Lona Alo e Toatasi na Fanaua ina ia le fano i tatou ae maua le ola e faavavau! Faamolemole ia talitonu, ma faamolemole ia faamoemoe ma faamafanafanaina, mai lenei upumoni e faavavau. Ua faamoemoe lo tatou Tama Faalelagi mo i tatou ia ausiaina! O Lana galuega ma Lona mamalu lena.
Ou te fiafia i le auala e masani ona aoao mai ai e Peresitene Gordon B. Hinckley lenei mataupu faavae. Sa ou faalogo o ia saunoa i nisi o sauniga, “Uso e ma tuafafine, o mea uma ua faamoemoeina e le Alii mai ia i tatou, o le taumafai, ae e ao ona e taumafai moni lava!”
O le “taumafai moni lava” o lona uiga o le faia o le mea sili tatou te mafaia, iloaina o vaega e manaomia ona tatou faaleleia, ona toe taumafai lea. E ala i le faia soo o lenei mea, tatou te latalata atili atu ai pea lava pea i le Alii, tatou te lagonaina atili ai pea Lona Agaga, ma tatou maua atili ai pea Lona alofa tunoa, po o le fesoasoani.
O nisi taimi ou te manatu ai, tatou te le o iloaina le tele o le manao o le Alii e fesoasoani mai ia i tatou. Ou te fiafia i upu a Elder David A. Bednar, lea na saunoa:
“O le toatele o i tatou ua malamalama lelei o le Togiola e mo tagata agasala. Peitai, ou te le o mautinoa pe ua tatou iloaina ma malamalama o le Togiola foi e mo tagata o le au paia. …
“ … Ma o le Togiola ua tuuina mai ai le fesoasoani mo i tatou e faatoilalo ma aloese ai i mea leaga ae ia faia le lelei ma avea ma tagata lelei. …
“‘… E … ala i le alofa tunoa o le Alii … e maua ai e tagata taitoatasi le malosi ma le fesoasoaniga e fai ai galuega lelei ia e le mafai ona latou [faia]. … O lenei alofatunoa o se mana gafatia …’ [Bible Dictionary, “Grace”; faaopoopo le faamamafa] … po o le fesoasoani faalelagi lea e matuai manaomia lava e i tatou taitoatasi e agavaa ai mo le malo selesitila.”
Ma e na o le pau le mea tatou te faia e maua ai lenei fesoasoaniga faalelagi o le ōle atu lea, ona faatino lea i uunaiga amiotonu tatou te maua.
O le talafou sili e faapea, afai tatou te salamo faamaoni, o le a le taofia e a tatou agasala ua te’a i tatou mai le faaeaina. Na faamatala mai e Moronae ia i tatou tagata solitulafono i ona aso: “Ae o soo se taimi sa latou salamo ai ma saili le faamagaloga, ma le faamoemoe faamaoni, sa faamagaloina i latou.”
Ma sa fetalai le Alii lava Ia e uiga i ē agasala:
“Ma afai e taʼutino mai e ia ana agasala i luma o oe ma aʼu, ma salamo ma le faamaoni o lona loto, ia e faamagaloina o ia, ma o le a Ou faamagaloina foi o ia.
“Ioe, ma o le tele o taimi e salamo ai loʼu nuu ʼOu te faamagalo ai i latou ia latou solitulafono faasaga mai ia te aʼu.”
Afai o le a tatou salamo faamaoni, o le a faamagalo moni lava i tatou e le Atua, e tusa lava pe na tatou solia pea lava pea le agasala lava e tasi. E pei ona aoao mai Elder Jeffrey R. Holland: “Pe o le a lava le tele o avanoa e te manatu ua e misia, pe o le a foi le tele o mea sese e te lagona sa e faia, … , ou te molimau atu e te le i malaga lava i se mamao o le a le mafai ona aapa atu i ai le alofa faalelagi. E le mafai ona e magoto maualalo ifo nai lo le mea e suluia e le malamalama le i’u o le Togiola a Keriso.”
E le faapea la o le uiga o lenei mea i soo se ala e lelei le agasala. E i ai pea taunuuga o le agasala. O taimi uma e faamanualia ma faatiga ai e le agasala le tagata agasala ma i latou e aafia i ana agasala. Ma o le salamo moni e lē taitai faigofie. Ma le isi, faamolemole ia malamalama e ui lava e aveesea e le Atua le ta’usalaina ma pisipisia o a tatou agasala pe a tatou salamo faamaoni, ae Na te le vave aveesea ia taunuuga uma o a tatou agasala. O nisi taimi e tumau ai lava ia i tatou i o tatou olaga atoa. Ma o le ituaiga sili ona leaga o le agasala o le agasala ma le faamoemoe i ai lea e faapea ai se tasi, “E mafai ona ou agasala i le taimi nei ae salamo mulimuli.” Ou te talitonu o se faatauemu moni lea i le taulaga ma puapuaga o Iesu Keriso.
Sa tautino mai e le Alii Lava Ia, “Ona o Aʼu o le Alii e lē mafai ona Ou vaai i luga o le agasala ma sina tikeri itiiti o le faatagaina.”
Ma sa folafola mai e Alema, “Faauta, ou te fai atu ia te oe, e lei avea lava le amioleaga ma fiafia.”
O se tasi o mafuaaga e patino ai le moni o le saunoaga a Alema e faapea o le faisoo o le agasala, tatou te faamamao ai i tatou lava mai le Agaga, ma oo ai ina faalotovaivaia, ona tuu ai lea o le salamo. Ae ou te toe fai atu, ona o le Togiola a le Faaola, ua mafai ai ona tatou salamo ma faamagaloina atoa ai, i le vave tatou te salamo faamaoni ai.
O le mea e le mafai ona tatou faia o le fai ‘alofaga nai lo le salamo E le fetaui foi le tauamiotonuina o i tatou lava i a tatou agasala i le faapea, “Ua silafia e le Atua ua faigata tele mo a’u, o lea Na te taliaina ai a’u e pei ona i ai a’u.” O le “taumafai moni” o lona uiga o le tumau ai pea a o tatou ausia atoatoa tulaga faatonuina a le Alii, lea e manino le faauigaina i fesili e fesiligia ai i tatou ina ia maua se pepa faataga o le malumalu.
O le isi mea o le a mautinoa lava e taofia i tatou mai le lagi ma aveesea i tatou mai le fesoasoani tatou te manaomia i le taimi nei, o le fouvale. Mai le tusi a Mose, ua tatou aoao ai na tuliesea Satani mai le lagi ona o le fouvale. Tatou te fouvale i soo se taimi lava tatou te faapea ifo ai i o tatou loto, “Ou te le manaomia le Atua, ma ou te le tau salamo.”
I le avea ai ma se fomai i le potu tigaina o tamaiti, ou te iloa afai e teena ma le le tatau ai e se tasi se togafitiga e laveai ai le soifua, e mafai ona oo atu i le oti faaletino e le manaomia. E faapena foi, a tatou fouvale e faasaga i le Atua, ua tatou teenaina le tatou fesoasoaniga lava e tasi ma le faamoemoe, o Iesu Keriso lea, lea e tau atu ai i le oti faaleagaga. E leai ma se tasi o i tatou e mafai ona faia lenei mea i lo tatou lava malosi. E leai ma se tasi o i tatou o le a “lava le lelei,” vagana ai e ala i le alofa ma le alofa mutimutivale o Iesu Keriso, ae ona e faaaloalogia e le Atua lo tatou faitalia, e le mafai ai foi ona laveaiina i tatou e aunoa ma lo tatou taumafai. O le auala lena e galue ai le paleni i le va o le alofatunoa ma galuega. E mafai ona tatou maua le faamoemoe ia Keriso ona e finagalo o Ia e fesoasoani mai ma suia i tatou. O le mea moni, ua leva lava ona fesoasoani atu o Ia ia te oe. Tau lava ina e taofi ma mafaufau ma iloa Lana fesoasoani i lou olaga.
Ou te molimau atu afai o le a e taumafai moni lava ma o le a e le fai alofaga pe fouvale—o le salamo soo ma le aioi atu mo le alofa tunoa, po o le fesoasoani, a Keriso—o le a mautinoa lava le “lava o lou lelei,” o lona uiga, taliaina i luma o le Alii; o le a e ausia ai le malo selesitila ua atoatoa ia Keriso; ma o le a e mauaina ai faamanuiaga ma le mamalu ma le olioli e finagalo ai le Atua mo Ana fanau pele taitoatasi—e aofia patino ai oe ma a’u. Ou te molimau atu o loo soifua le Atua ma e finagalo o Ia ia tatou foi atu i le aiga. Ou te molimau atu o loo soifua Iesu. I le suafa paia o Iesu Keriso, amene.