Faasoaina Atu o le Talalelei Toefuataiina

Saunia e Elder Dallin H. Oaks

O Le Korama a Aposetolo e Toasefululua

O le mea ua tatou ta’ua o le “galuega faafaifeautalai a tagata o le au paia” e le o se polokalama ae o se uiga o le alofa ma le aapa atu e fesoasoani ia i latou o siomiaina i tatou.

I.

E latalata atu i le faaiuga o Lana misiona faalelalolagi, sa poloaiina ai e lo tatou Faaola, o Iesu Keriso Ona soo: “O lenei, ia outou o atu e fai nuu uma lava ma soo” (Mataio 28:19) ma “O atu ia outou i le lalolagi uma, ina tala’i atu ai le tala lelei i tagata uma lava” (Mareko 16:15). Ua noatia Kerisiano uma i lalo o nei poloaiga e faasoa atu le talalelei i tagata uma. E ta’ua e le toatele lenei mea “O Le Tiute Sili.”

Ua aoao i tatou e le Faaola ia alolofa atu

E pei ona faamatalaina e Elder Neil L. Andersen i le sauniga i le taeao, e mautinoa lava o le Au Paia o Aso e Gata Ai o loo i ai faatasi ma i latou ua sili ona tuuto atu i lenei tiutetauave sili. Ma ua tatau ai ia i tatou, ona ua tatou iloa e alofa le Atua i Ana fanau uma ma i nei aso e gata ai ua Ia toefuatai mai ai isi malamalama taua ma le mana e manuia ai i latou uma. Na aoao i tatou e le Faaola ia alolofa atu i tagata uma o ni o tatou uso ma tuafafine, ma e tatou te faamamaluina lena aoaoga e ala i le faasoa atu o le molimau ma le savali o le talalelei toefuataiina “i totonu o atunuu uma, ituaiga, gagana, ma nuu” (MF&F 112:1). O se vaega taua lenei o le uiga o le avea ma se tasi o le Au Paia o Aso e Gata Ai. Tatou te vaai i lenei mea o se avanoa fiafia. O le a se mea e sili atu ona faafiafiaina nai lo le faasoa atu o upumoni o le faavavau i fanau a le Atua?

Ua tele punaoa i aso nei e faasoa atu ai le talalelei sa lei maua i tupulaga na muamua atu. Ua ia i tatou le TV, le Initoneti, ma alaleo o faasalalauga faaagafesootai. E tele a tatou savali taua e faalauiloa atu ai le talalelei toefuataiina. Ua lauiloa le Ekalesia i le tele o malo. Ua faatoateleina naua le aofai o a tatou faifeautalai. Ae o tatou faaaogaina ea nei punaoa uma i le mea silisili e gata ai? Ou te talitonu o le toatele o i tatou o le a fai mai e leai. Tatou te mananao ia mataalia atili i le faataunuuina o la tatou tiutetauave na tofia mai le lagi e folafola atu le talalelei toefuataiina i le lalolagi uma.

E tele manatu lelei mo le faasoaina atu o le talalelei o le a aoga i siteki taitasi po o atunuu. Peitai, ona o i tatou o se Ekalesia i le lalolagi atoa, ou te fia talanoa atu ai i ni manatu o le a aoga i soo se mea, mai lava i iunite sili ona fou e oo atu i iunite ua sili ona mautu, mai aganuu ua taliaina le talalelei a Iesu Keriso i aganuu ma malo ua faateleina pea le tetee i tapuaiga. Ou te fia talanoa atu i manatu e mafai ona e faasoaina atu i tagata ua talitonu ma tuuto atu ia Iesu Keriso, faapea ai foi ma tagata e lei faalogo muamua lava i Lona suafa, faatasi ai ma tagata ua faamalieina i o latou olaga o loo i ai i le taimi nei faapea ai ma tagata o loo matua saili ma le naunau ia faaleleia i latou lava.

O le a se mea e mafai ona ou ta’u atu o le a aoga i lou faasoaina atu o le talalelei, po o a lava ou tulaga o i ai? Tatou te manaomiaina le fesoasoani a tagata uma o le au paia, ma e mafai ona fesoasoani tagata uma, talu ai ua matua anoanoai ni galuega e faatino a o tatou faasoa atua le talalelei toefuataiina i malo uma, ituaiga, gagana, ma nuu.

Ua uunaia e Peresitene Monson le au paia ma faifeautalai ia galulue faatasi

Ua tatou iloa uma o le auai ai o tagata o le au paia i le galuega faafaifeautalai e taua tele i le ausiaina uma o le liuaina ma le faatumauina. Sa saunoa Peresitene Thomas S. Monson e faapea: “O le taimi lenei mo tagata uma ma faifeautalai e o mai faatasi ai … [ma] galulue i le tovine a le Alii ina ia aumai agaga ia te Ia. Ua Ia saunia auala mo i tatou e faasoa atu ai le talalelei i le anoanoai o ala, ma o le a Ia fesoasoani mai ia i tatou i la tatou galuega pe afai o le a tatou galulue i le faatuatua e faataunuu Lana galuega.”

O le galuega faafaifeautalai e le na o se ki se tasi

O le faasoaina atu o le talalelei toefuataiina o lo tatou tiute FaaKerisiano ma le avanoa i le olaga atoa. Ua faamanatu mai e Elder Quentin L. Cook ia i tatou, “O le galuega faafaifeautalai e le na o se tasi o ki e 88 o se piano e seāseā taina; o se ki autu i se fati faagaeetia lea e tatau ona taina pea i o tatou olaga pe afai o le a tatou tumau i le ogatasi ma o tatou tautinoga i le faa-Kerisiano ma le talalelei a Iesu Keriso.”

II.

E tolu ni mea e mafai ona fai e tagata uma o le ekalesia e fesoasoani ai e faasoa atu le talalelei, e tusa lava po o a tulaga o loo latou ola ma galulue ai. E tatau ia i tatou uma ona faia mea uma nei.

Muamua, e mafai ona tatou tatalo uma mo le manao e fesoasoani atu i lenei vaega taua o le galuega o le faaolataga. O taumafaiga uma e amata i le manao.

Lua, e mafai e i tatou lava ona tausia poloaiga. O tagata o le ekalesia faamaoni ma usiusitai o molimau sili ia ona faatosina o le upumoni ma le taua o le talalelei toefuataiina. E sili atu foi ona taua, o tagata faamaoni o le ekalesia o le a maua pea Lona Agaga e faatasi ma i latou, e taiala i latou a o latou saili atu e auai i le galuega tele o le faasoaina atu o le talalelei toefuataiina a Iesu Keriso.

Tolu, e mafai ona tatou tatalo mo musumusuga i mea e mafai ona tatou faia i o tatou tulaga patino e faasoa atu ai le talalelei i isi. E ese atu lenei mea nai lo le tatalo mo faifeautalai pe tatalo mo mea e mafai ona faia e isi. E tatau ona tatou tatalo mo mea e mafai ona tatou faia, e i tatou lava ia. A tatou tatalo, e tatau ona tatou manatua o tatalo mo lenei ituaiga o musumusuga o le a taliina pe afai e o faatasi ma se tautinoga—le mea lea e ta’ua e tusitusiga paia o le “manatu moni” po o le “faamoemoe atoa o le loto.” Tatalo faatasi ma se tautinoga ia faatino le musumusuga e te mauaina, ma folafola atu i le Alii afai o le a Ia musuiaina oe e tautala atu i se tasi e uiga i le talalelei, o le a e faia lava.

Tatou te manaomiaina le taitaiga a le Alii ona i soo se taimi patino lava, e i ai lava nisi—pe leai foi nisi—ua saunia mo upumoni faaopoopo o le talalelei toefuataiina. E le tatau lava ona tatou faatuina i tatou lava o ni faamasino po o ai ua saunia ae po o ai foi e lei saunia. Ua silafia e le Alii loto o Ana fanau uma, ma afai tatou te tatalo mo musumusuga, o le a Ia fesoasoani mai ia i tatou ia saili ni tagata ua Ia silafia “ua saunia e faalogo i le afioga” (Alema 32:6).

I le avea ai ma se Aposetolo a le Alii, ou te uunaia tagata uma ma aiga i le Ekalesia ia tatalo mo le Alii e fesoasoani mai ia i tatou ia saili tagata ua saunia e talia le savali o le talalelei toefuataiina a Iesu Keriso. Sa tuuina mai e Elder M. Russell Ballard lenei fautuaga taua, lea ou te ioe foi i ai: “Ia faalagolago i le Alii. O Ia o le Leoleo Mamoe Lelei. Na te silafia Ana mamoe. … Afai tatou te le auai, o le toatele o ē o le a faalogo i le savali o le Toefuataiga o le a misia. … E faigofie lava ia mataupu faavae—tatalo, faaletagata lava ia ma i lou aiga, mo ni avanoa faafaifeautalai.” A o tatou faailoa atu lo tatou faatuatua, o le a oo mai nei avanoa e aunoa ma se “tali fai faamalosi pe … ua leva ona fuafua. O le a oo mai o se taunuuga masani o lo tatou alolofa mo o tatou uso ma tuafafine.”

Ou te iloa e moni. Ou te faaopoopo atu la’u folafolaga e faapea, faatasi ma le faatuatua i le fesoasoaniga a le Alii, o le a taialaina i tatou, musuiaina, ma maua le olioli tele i lenei galuega taua e faavavau o le alofa. O le a tatou malamalama o le manuia i le faasoaina atu o le talalelei o le valaauliaina lea o tagata i le alofa ma le manatu faamaoni e fesoasoani ia i latou, e tusa lava po o le a sa latou tali.

III.

O nisi nei o mea e mafai ona tatou faia e faasoa atu ai le talalelei ma le mataalia.

Ave taavale la’u pasese i le Olimipeka i Pasila

E manaomia ona tatou manatuaina “e aoao tagata pe a latou saunia e aoao, ae le o le taimi ua tatou saunia ai e aoao atu i latou.” O le mea ua tatou naunau i ai, e pei o aoaoga taua faaopoopo o aoaoga faavae i le Ekalesia toefuataiina, e masani lava e le o le mea ua naunau i ai isi. O isi e masani lava e mananao i taunuuga o le aoaoga faavae, ae le o le aoaoga faavae. A o latou matauina pe oo foi i aafiaga o le talalelei toefuataiina a Iesu Keriso i o tatou olaga, latou te lagonaina le Agaga ma amata ai ona naunau i le aoaoga faavae. Atonu foi latou te fia naunau pe a latou saili atili i le fiafia, latalata atu i le Atua, po o se malamalama sili atu e uiga i le faamoemoega o le olaga. O le mea lea, e tatau ona tatou saili ma le faaeteete ma le agaga tatalo ia iloatino pe faapefea ona fesili atu i isi tagata i mea latou te naunau e aoao atili ai. O le a faalagolago lenei mea i nisi mea se tele, e pei o tulaga o loo i ai se tagata ma lo tatou sootaga ma ia. O se mataupu lelei lenei e talanoaina i aufono, korama, ma Aualofa.
A tatou talanoa atu i isi, e manaomia ona tatou manatua o se valaaulia ia aoao atili e uiga ia Iesu Keriso ma Lana talalelei e sili atu i lo se valaaulia ia aoao atili e uiga i la tatou Ekalesia. Tatou te mananao i tagata ia liua i le talalelei. O le matafaioi tele lena a le Tusi a Mamona. O lagona e uiga i la tatou Ekalesia e sosoo ma le liuaina ia Iesu Keriso, e le tatau ona muamua. E ui e toatele e le talitonuina ia lotu, ae e i ai lava so [latou] alofa mo le Faaola. Faamuamua mea e tatau ona faamuamua.
A tatou saili e faailoa atu i tagata le talalelei toefuataiina, e tatau ona tatou faia lenei mea i auala e faamaoni ma popole ma le alofa mo le tagata. E tupu lenei mea pe a tatou taumafai e fesoasoani atu i isi i faafitauli ua latou faailoaina pe o taimi foi tatou te galulue faatasi ai ma i latou i auauanga ma gaoioiga faalenuu, e pei o le faamāmāina o mafatiaga, tausiaina o ē matitiva ma lē tagolima, po o le faaleleia o le tulaga o le olaga o isi.
O a tatou taumafaiga e faasoa atu le talalelei e le tatau ona faatapulaaina i a tatou li’o o uo ma paaga. I le taimi o le Olimipeka na tatou iloa ai se avetaavale la’u pasese Mamona i Rio de Janeiro na feaveaia ni kopi o le Tusi a Mamona i gagana eseese se fitu ma tuu atu i soo se tasi lava e taliaina. Sa ia ta’ua ia lava o le “faifeautalai ave taavale la’u pasese.” Sa ia fai mai, “O alatele o Rio de Janeiro … o [la’u] eria o le misiona lena.”

Na ta’ua e Clayton M. Christensen, o lē na i ai sona aafiaga faagaeetia o se faifeautalai a le au paia e faapea “i le silia ma le luasefulu tausaga talu ai, ua tatou matauina ai e leai se fesootaiga i le va o le loloto o se sootaga [a ni tagata se toalua] ma le ono naunau o le tasi e aoaoina le talalelei mai le isi.”
E mafai e au epikopo a uarota ona fuafuaina se sauniga faamanatuga faapitoa lea e uunaia ai le au paia ia aumai ni tagata e naunau [e fia faalogo]. O le a itiiti se popole o tagata o le uarota e aumai a latou uo i se sauniga faapena ona o le a latou mautinoa atili o le aano o lena sauniga o le a fuafuaina lelei e faaosofia ai le naunau ma faailoa lelei atu ai le Ekalesia.
E tele isi avanoa e faasoa atu ai le talalelei. Mo se faataitaiga, o le taumafanafana lenei na ou maua ai se tusi fiafia mai se tagata fou na aoao e uiga i le talalelei toefuataiina ina ua telefoni atu i ai se uo ua leva e fesili i ai i se gasegase sa ia oo i ai. Sa ia tusia: “Sa faamalamalamaina au i le auala sa ia faailoa mai ai o ia ia te au. I le mavae ai o ni nai masina o le aoaoina e faifeautalai, sa papatiso ai loa au. Ua faaleleia lava lo’u olaga talu mai lena taimi.” Ua tatou iloa uma le toatele o tagata o o latou olaga o le a faaleleia e le talalelei toefuataiina. O tatou aapa atu ea ia i latou?
O le tosina atu ma le atamai o o tatou talavou i alafaasalalau faaagafesootai ua latou maua ai ni avanoa tulagaese e aapa atu ai i isi o loo naunau i le talalelei. I le faamatalaina ai o le faaali atu o le Faaola i sa Nifae, na tusia ai e Mamona, “[Sa] ia aoao atu ma auauna atu i fanau … , ma ia tatala o latou laulaufaiva … ina ia mafai ona latou tautatala mai” (3 Nifae 26:14). O le asō ou te manatu e mafai ona tatou faapea “tatala o latou [limamatua na e tesi ai] ina ia mafai ona latou tautatala atu.” O atu i ai, le autalavou!

Faasoaina atu o le talalelei e ala i feau tusitusia

O le faasoaina atu o le talalelei e le o se avega ae o se fiafiaga. O le mea ua tatou ta’ua o le “galuega faafaifeautalai a tagata o le au paia” e le o se polokalama ae o se uiga o le alofa ma le aapa atu e fesoasoani ia i latou o siomiaina i tatou. O se avanoa foi e molimau atu ai po o a ni o tatou lagona e uiga i le talalelei toefuataiina a lo tatou Faaola. E pei ona aoao mai Elder Ballard, “O se faamaoniga sili ona taua o lo tatou liuaina atoa ai ma o tatou lagona e uiga i le talalelei i o tatou lava olaga, o lo tatou naunautaiga lea e faasoa atu i isi.”

Ou te molimau atu ia Iesu Keriso, o le Malamalama ma le Ola o le Lalolagi (tagai 3 Nifae 11:11). O Lana talalelei toefuataiina ua faamalamalamaina ai lo tatou ala i le olaga faaletino. O Lana Togiola ua tatou maua ai le faamautinoaga o le ola pe a mavae le oti ma le malosi e tumau ai e agai atu i le tino ola pea. Ma o Lana Togiola tatou te maua ai le avanoa e faamagaloina ai a tatou agasala ma, i lalo o le fuafuaga mamalu o le faaolataga a le Atua, e agavaa ai mo le ola e faavavau, le meaalofa sili o meaalofa uma a le Atua” (MF&F 14:7). I le suafa o Iesu Keriso, amene.