![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe0%2F70%2Fe070da20fdab19967a290378d387503426133c52%2Fe070da20fdab19967a290378d387503426133c52.jpeg/full/!250,/0/default)
Pagkahimong usa ka Disipulo sa Atong Ginoong Jesukristo
Ang nagkadaiyang kinaiya nga miresulta gumikan sa pagtuo kang Kristo tanan gikinahanglan sa atong pagbarug nga lig-on niining katapusang mga adlaw.
Unsa man ang buot ipasabut nga mahimong usa ka disipulo sa atong Ginoong Jesukristo? Ang usa ka disipulo mao ang tawo nga nabunyagan ug andam modala diha kaniya sa ngalan sa Manluluwas ug mosunod Kaniya. Ang usa ka disipulo naningkamot nga mahisama Kaniya pinaagi sa pagtuman sa Iyang mga sugo dinhi sa mortalidad, sama sa usa ka apprentice nga naninguha nga mahisama sa iyang agalon.
Daghang tawo ang nakadungog sa pulong nga disipulo ug naghunahuna nga nagpasabut lamang kini og “sumusunod.” Apan ang tinuod nga pagkadisipulo usa ka kahimtang sa pagkatawo. Nagsugyot kini labaw pa sa pagtuon ug paggamit sa lista sa indibidwal nga mga hiyas. Ang mga disipulo nagpakabuhi aron ang mga kinaiya ni Kristo mamahimong lig-on nga bahin sa ilang pagkatawo, sama sa usa ka espirituhanon nga kalig-on.
Paminaw sa pagdapit ni Apostol Pedro aron mahimong usa ka disipulo sa Manluluwas:
“Himoa ninyo ang tanang paningkamot, aron nga sa inyong pagtuo ipuno ninyo ang maligdong nga batasan, ug sa maligdong nga batasan ipuno ang kahibalo;
“Ug sa kahibalo ang pagpugong sa kaugalingon; ug sa pagpugong sa kaugalingon ipuno ang pagkamainantuson; ug sa pagkamainantuson ipuno ang pagkadiosnon;
“Ug sa pagkadiosnon ipuno ang pagbati nga inigsoon; ug sa pagbati nga inigsoon ipuno ang gugma.”1
Sama sa inyong makita, ang pagpalig-on sa inyong espirituhanon nga personal nga pagkadisipulo nagkinahanglan og labaw pa kay sa nag-inusarang hilo nga pangtahi. Sa panahon sa Manluluwas, dunay daghang nangangkon nga matarung sa usa o sa laing aspeto sa ilang kinabuhi. Mibuhat sila sa unsay gitawag nako nga pinili nga pagkamasulundon. Pananglitan, mituman sila sa sugo nga dili motrabaho sa Igpapahulay apan mitamay sa Manluluwas tungod sa pagpang-ayo nianang baalan nga adlaw.2 Mihatag sila og limos sa mga kabus apan mihatag lamang sa unsay ilang sobra—kon unsay wala na nila kinahanglana.3 Nagpuasa sila apan magpadaut-daut lang sa ilang nawong.4 Nag-ampo sila apan aron lang makita sa mga tawo.5 Si Jesus miingon, “Sila nagpaduol ngari kanako uban sa ilang mga ngabil, apan ang ilang mga kasingkasing layo gikan kanako.”6 Ang maong mga tawo tingali magtutok sa pagpahanas og piho nga hiyas o lihok apan wala magpasabut nga mahisama Kaniya diha sa ilang kasingkasing.
Kalabut niini, si Jesukristo namahayag:
“Daghan unya ang magaingon kanako niadtong adlawa, Ginoo, Ginoo, dili ba nanaghimo man kamig mga propesiya tungod sa imong ngalan? ug nanagpagula sa mga yawa tungod sa imong ngalan? ug nakahimo sa daghang mga milagro tungod sa imong ngalan?
“Ug unya magaingon ako kanila, Wala ko gayud kamo igkaila; pahawa kanako, kamong mga mamumuhat og dautan.”7
Ang mga hiyas sa Manluluwas, sama sa atong pagsabut niini, dili usa ka sinulat nga sundon o lista nga himoon. Nahiusa kini nga mga kinaiya, nadugang ngadto sa usag usa, nga milambo diha kanato sa makaimpluwensya nga pamaagi. Sa laing pagkasulti, dili kita makabaton og usa ka Kristohanong kinaiya nga dili usab maimpluwensyahan ang uban. Samtang ang usa ka kinaiya mahimong lig-on, mao usab ang daghan pa.
Diha sa 2 Pedro ug sa Doktrina ug mga Pakigsaad seksyon 4, atong nakat-unan nga ang hugot nga pagtuo kang Jesukristo mao ang pundasyon. Masukod nato ang atong hugot nga pagtuo kon unsay napabuhat niini kanato—pinaagi sa atong kamasulundon. “Kon kamo adunay hugot nga pagtuo kanako,” misaad ang Ginoo, “kamo makabaton sa gahum sa pagbuhat sa bisan unsa nga butang nga maayo ngari kanako.”8 Ang hugot nga pagtuo usa ka butang nga modasig og talagsaong kausaban. Kon walay binuhatan, kon walay mahiyason nga pagpuyo, ang atong hugot nga pagtuo walay gahum sa pagpaaktibo sa pagkadisipulo. Sa pagkatinuod, ang hugot nga pagtuo walay kapuslanan.9
Ug sa ingon, si Pedro mipasabut, “ipuno ninyo ang maligdong nga batasan [hiyas].” Kini nga hiyas mas labaw pa kay sa sekswal nga kaputli. Kalimpyo ug kabalaan kini sa hunahuna ug sa lawas. Ang hiyas gahum usab. Samtang matinud-anon kitang mosunod sa ebanghelyo, makabaton kita og gahum nga mahimong mahiyason diha sa matag hunahuna, pagbati, ug lihok. Ang atong hunahuna mas modawat sa mga pag-aghat sa Espiritu Santo ug sa Kahayag ni Kristo.10 Nagrepresentar kita kang Kristo dili lang sa unsay atong gisulti ug gibuhat apan kon si kinsa kita.
Nagpadayon si Pedro, “ipuno ninyo ang kahibalo.” Samtang magpuyo kita og mahiyason nga kinabuhi, makaila kita sa atong Langitnong Amahan ug sa Iyang Anak sa espesyal nga paagi. “Kon tuyoon ni bisan kinsa ang pagbuhat sa kabubut-on [sa Amahan], nan iyang mahibaloan ang akong gitudlo.”11 Kini nga kahibalo usa ka personal nga pagpamatuod, nga naggikan sa personal nga kasinatian. Kahibalo kini nga makapausab kanato aron nga ang atong “kahayag mounong ngadto sa [Iyang] kahayag” ug ang atong “hiyas mohigugma sa [Iyang] hiyas.”12 Pinaagi sa atong mahiyasong pagpakabuhi, mobiyahe kita gikan sa “mituo ko” ngadto sa mahimayaong destinasyon nga “nasayud ko.”
Giawhag kita ni Pedro nga “sa kahibalo ipuno ang pagpugong sa kaugalingon; ug sa pagpugong sa kaugalingon ipuno ang pagkamainantuson.” Isip mapugnganon sa kaugalingon nga mga disipulo, sundon nato ang ebanghelyo sa usa ka balanse ug makanunayong paagi. Dili kita “modagan nga labaw pa kay sa [atong] kusog.”13 Matag adlaw magpadayon kita, nga dili mabalda sa makapahinlo nga mga hagit sa mortalidad.
Sa pagkahimong mapugnganon sa kaugalingon niining paagiha, mapalambo nato ang pagpailub ug pagsalig sa Ginoo. Makasalig kita sa Iyang plano sa atong kinabuhi, bisan kon dili nato kini makita sa kinaiyanhon natong mga mata.14 Busa, mahimo kita nga “[m]agmalinawon ug [ma]hibalo nga [Siya] mao ang Dios.”15 Kon mag-atubang og mga unos sa kalisdanan, mangutana kita, “Unsa may gusto Nimo nga akong makat-unan gikan niini nga kasinatian?” Uban sa Iyang plano ug katuyoan sa atong kasingkasing, magpadayon kita dili lamang sa paglahutay sa tanang butang apan sa paglahutay niini sa mapailubong paagi ug molahutay pag-ayo.16
Kini nga pagpailub, sa gitudlo ni Pedro, modala kanato sa pagkadiosnon. Ingon nga ang Amahan mapailubon kanato, ang Iyang mga anak, mahimo kitang mapailubon sa usag usa ug sa atong kaugalingon. Magmaya kita sa kabubut-on sa uban ug sa oportunidad nga nahatag niini aron molambo sila sa “pagtulun-an ngadto sa lain nga pagtulun-an,”17 “labaw nga kahayag ug labaw sa kahayag hangtud sa hingpit nga adlaw.”18
Gikan sa pagpugong sa kaugalingon ngadto sa pagpailub, ug gikan sa pagpailub ngadto sa pagkadiosnon, ang atong kinaiya mausab. Mabatunan nato ang inigsoong pagkamabination nga maoy timailhan sa tanang tinuod nga mga disipulo. Sama sa Maayong Samarianhon, motabok kita sa dalan aron mangalagad ni bisan kinsa nga nanginahanglan, bisan kon wala sila masakop sa pundok sa atong mga higala.19 Atong panalanginan ang nagtunglo kanato. Atong buhatan og maayo kadtong nag-amung-among kanato.20 Duna pa bay mas diosnon o Kristohanon nga hiyas?
Ako mopamatuod nga ang mga paningkamot nga atong gibuhat aron mahimong mga disipulo sa atong Manluluwas tinuod nga madugangan hangtud nga kita “makaplagan” nga aduna sa Iyang gugma.21 Kini nga gugma maoy motino nga kinaiya sa usa ka disipulo ni Kristo:
“Kon ako tigpanultig mga dila sa mga tawo ug sa mga anghel, apan walay gugma, ako usa lamang ka masaba nga agong, o piyangpiyang nga nagatagingting.
“Ug kon ako may mga gahum sa paghimog propesiya, ug makasabut sa tanang mga tinago, ug sa tanang kahibalo; ug kon ako nakabaton sa hingpit nga pagtuo, nga tungod niana arang ko mabalhin ang mga bukid, apan walay gugma, ako walay kapuslanan.”22
Ang pagtuo, paglaum, ug gugma [nga putli] ang makapahimo nato nga takus alang sa buhat sa Dios.23 “Ug karon magapabilin … kining tulo; apan ang labing dako niini mao ang gugma.”24
Mga kaigsoonan, karon labaw sa tanan, dili kita mahimong usa ka “taphaw nga disipulo”! Dili kita mahimong disipulo sa usa lamang ka punto sa doktrina o sa lain. Ang nagkadaiyang kinaiya nga miresulta gumikan sa pagtuo kang Kristo—lakip na ang atong gihisgutan karon—tanan gikinahanglan sa atong pagbarug nga lig-on niining katapusang mga adlaw.
Samtang matinguhaon kitang naningkamot nga mahimong tinuod nga mga disipulo ni Jesukristo, kining mga kinaiya mahiusa, madugangan, ug malig-on diha kanato. Walay mahimong kalainan tali sa pagkamabination nga atong mapakita sa atong mga kaaway ug sa pagkamabination nga atong mapakita sa atong mga higala. Mahimo kitang magmatinuoron bisan walay magtan-aw sama sa higayon nga dunay magtan-aw. Mahimo kitang magmapahinunguron ngadto sa Dios atubangan sa mga tawo mao usab sa pribadong dapit.
Mopamatuod nga ang tanan mamahimong disipulo sa Manluluwas. Ang edad, pagkalalaki o pagkababaye, kaliwatan o calling dili maoy magpugong sa pagkadisipulo. Pinaagi sa atong indibidwal nga pagkadisipulo, kita, isip mga Santos sa Ulahing mga Adlaw, mag-ugmad og hinugpong nga kalig-on sa pagpanalangin sa atong mga kaigsoonan sa tibuok kalibutan. Karon ang panahon sa pagpasalig pag-usab sa atong kaugalingon nga mahimo Niyang mga disipulo diha sa tanang kakugi.
Mga kaigsoonan, gitawag kitang tanan nga mahimong mga disipulo sa atong Manluluwas. Himoa nga kining komperensya maoy inyong oportunidad sa “pagsugod sama sa karaan nga mga panahon, ug duol ngadto [Kaniya] uban sa tibuok ninyo nga kasingkasing.”25 Kini ang Iyang Simbahan. Ako mohatag sa akong linain nga pagsaksi nga Siya buhi. Hinaut nga Siya mopanalangin kanato sa atong mahangturong paningkamot nga mahimong mapahinunguron ug banggiitan nga mga disipulo. Sa pangalan ni Jesukristo, amen.