Sa mga Higala ug mga Investigator sa Simbahan
Kon bayaran ninyo ang bugti alang sa pagpadayag, magpaubos sa inyong kaugalingon, magbasa, mag-ampo, ug maghinulsol, maabli ang kalangitan ug inyong masayran nga si Jesus mao ang Kristo.
Biyernes sa hapon, Septyembre16, 1988, sa Vicente López Ward meetinghouse sa Buenos Aires, Argentina, gibunyagan ko sa Simbahan ni Jesukristo sa mga Santos sa Ulahing mga Adlaw. Ang buotan kaayo nakong higala, si Alin Spannaus, ang mibunyag nako, ug gibati nako ang kalipay, kagaan, ug kahinam pa nga magkat-on.
Karon, gusto nakong ipakigbahin ang pipila ka leksyon nga akong nakat-unan sa akong pagpabunyag—mga leksyon nga gipanghinaut nakong makatabang ninyo nga mga dili miyembro sa Simbahan nga naminaw. Mag-ampo ko nga ang inyong kasingkasing matandog sa Espiritu, sama nako.
Una, Pakigtagbo sa mga Misyonaryo
Ngano kaha nga ang tawo nga wala kaayoy makapugos nga mga hagit, mga panginahanglan, o mga pangutana mainteresado man sa pakigtagbo sa mga misyonaryo ug maminaw sa ilang mga leksyon? Ah, sa akong bahin kini tungod sa gugma—paghigugma sa babaye, nga ginganlan og Renee. Nahigugma ko kaniya, ug gusto nako siyang pakaslan. Lahi siya ug dunay mga sumbanan nga lahi sa kadaghanang mga babaye nga akong nailhan. Apan nadani ko niya ug gihangyo nga magpakasal siya nako—ug siya miingon nga dili!
Naglibug ko. Abi nako’g swerte ang makaangkon nako! Gwapo ko, 24 anyos, gradwado sa kolehiyo ug nindot kaayo’g trabaho. Gisulti niya ang iyang mga tumong—nga magminyo lang og tawo nga makadala niya sa templo, nga magbaton og mahangturong pamilya—ug mibalibad siya sa akong tanyag. Gusto nakong ipadayon ang relasyon, mao nga miuyon kong maminaw sa mga misyonaryo. Maayo ba ning rason sa pakigtagbo og mga misyonaryo? Ah, para nako oo.
Sa una nakong pakigtagbo sa mga misyonaryo, wala kaayo ko kasabut sa ilang gipanulti, ug sa tinuod lang, wala kaayo ko maminaw nila. Sarado ang akong kasingkasing sa bag-ong relihiyon. Gusto lang nakong pruwebahan nga sayop sila ug makakumbinsir ni Renee nga makigminyo nako.
Karon ang akong mga anak nakaserbisyo ug nanagserbisyo og misyon, ug akong nasabtan ang mga sakripisyo nga gihimo niining mga batan-ong lalaki ug babaye sa pagtudlo sa ebanghelyo ni Jesukristo. Karon nakapanghinaut ko nga unta gitagad nakog tarung sila si Elder Richardson, Elder Farrell, ug Elder Hyland, ang talagsaong mga misyonaryo nga nagtudlo nako.
Busa, gikan sa una nakong leksyon, mosulti lang ko ninyo mga higala ug mga investigator sa Simbahan: kon makatagbo kamo og mga misyonaryo, palihug seryusoha ninyo sila; gibiyaan nila ang importante nga mga tuig sa ilang kinabuhi para lang ninyo.
Ikaduha, Pagsimba
Sa una nakong pagtambong og miting sa Simbahan, daghan kog pulong nga nadungog apan kanako wala kini kahulugan. Kinsa man ning mga Beehive? Unsa ang Aaronic Priesthood? ang Relief Society?
Kon primero ninyo kining pagtambong og miting sa Simbahan ug naglibug mo sa butang nga wala ninyo hisabti, ayaw kabalaka! Ako ingon ana sab. Apan mahinumduman gihapon nako ang mga impresyon, ang bag-ong mga pagbati sa kalinaw ug kalipay nga akong nasinati. Niadtong higayuna wala ko masayud niini, apan mihunghong ang Espritu Santo sa akong mga dalunggan ug sa akong kasingkasing, “Husto kini.”
Busa tuguti ko nga ibutang kini nga leksyon sa usa ka sentence: kon naglibug mo, ayaw kabalaka—hinumdumi ang mga pagbati nga inyong nasinati; naggikan kana sa Dios.
Ikatulo, Pagbasa sa Basahon ni Mormon
Human sa pipila ka pakigtagbo sa mga misyonaryo, dili kaayo maayo ang akong pag-uswag. Gibati nako nga wala makadawat og kumpirmasyon sa katinuod sa ebanghelyo.
Usa ka adlaw, nangutana si Renee nako, “Gibasa ba nimo ang Basahon ni Mormon?”
Mitubag ko, “Wala.” Nanimaw man ko sa mga misyonaryo—dili pa ba na igo?
Nga may luha sa iyang mga mata, gipaniguro ni Renee kanako nga nasayud siya nga tinuod ang Basahon ni Mormon ug mipasabut nga kon gusto kong masayud kon tinuod kini, ang bugtong paagi mao—tag-ana unsa—basahon kini! Ug dayon mangutana!
Basaha, pamalandungi sa inyong kasingkasing, ug “mangutana sa Dios, ang Amahan sa Kahangturan, sa ngalan ni Kristo, … sa kinasingkasing, uban sa tinuod nga katuyoan, nga may hugot nga pagtuo kang Kristo” (Moroni 10:4) kon tinuod ba ang Basahon ni Mormon, kon kini ba ang tinuod nga Simbahan.
Ang ikatulong leksyon, sa usa ka sentence: kon madawat ninyo kining mga butanga—ang Basahon ni Mormon—ug giawhag kamo nga basahon ug mangutana sa Dios kon kini tinuod, palihug buhata lang kini!
Katapusan, Paghinulsol
Ang katapusang kasinatian nga gusto nakong ipaambit mao ang paghinulsol. Pagkahuman nako sa tanang leksyon sa misyonaryo, wala gihapon ko makumbinsir nga dunay angayang usabon sa akong kinabuhi. Si Elder Cutler kadto, usa ka batan-on, masaligong misyonaryo nga kasulti og gamayng Spanish, kinsa usa ka adlaw miingon, “Joaquin, magbasa ta og dungan sa Alma 42, ug iapil nato ang imong ngalan sa atong pagbasa niini.”
Naghunahuna ko nga binuang kini, apan gisunod nako ang gihangyo ni Elder Cutler ug gibasa ang bersikulo 1: “Ug karon, akong anak [Joaquin], ako nakasabut nga ingon og aduna pay nakahasol sa imong hunahuna, diin ikaw dili makasabut.” Ah! Ang libro nakigsulti kanako.
Ug gibasa namo ang bersikulo 2: “Karon tan-awa, akong anak [Joaquin], ako mopasabut niini nga butang nganha kanimo,” ug dayon gihulagway ang Pagkapukan ni Adan.
Ug dayon sa bersikulo 4: “Ug sa ingon kita nakasabut, nga dihay usa ka panahon nga gihatag ngadto [kang Joaquin] sa paghinulsol.”
Padayon mi sa hinay-hinayng pagbasa, bersikulo human sa bersikulo, hangtud miabut mi sa katapusang tulo ka bersikulo. Dayon giigo ko sa usa ka talagsaong pwersa. Ang basahon direktang namulong kanako, ug nagsugod ko og hilak samtang nagbasa ko, “Ug karon, [Joaquin,] akong anak, ako nagtinguha nga ikaw kinahanglan dili motugot niini nga mga butang nga mohasol pa kanimo, ug himoa nga ang imong mga sala mosamok kanimo, uban niana nga paghasol diin modala kanimo … sa paghinulsol” (bersikulo 29).
Karon akong naamguhan nga nagpaabut kong makadawat og pagpadayag apan wala koy gihimo. Wala ko kasulay og tinuorayng pakigsulti sa Dios hangtud nahitabo kadto, ug ang ideya nga makig-istorya sa tawo nga wala diha ingon og binuang. Kinahanglan kong magpaubos ug buhaton ang gipahimo bisan og, sa kalibutanon nakong hunahuna, daw binuang.
Nianang adlawa giablihan nako ang akong kasingkasing ngadto sa Espiritu, nagtinguhang makahinulsol, ug gustong magpabunyag! Sa wala pa kadto, negatibo ang akong hunahuna bahin sa paghinulsol, nga may kalambigitan lang kini sa sala ug binuhatang sayop, apan sa kalit ako kining nakita sa lahi nga kahayag—isip positibong butang nga mihawan sa dalan ngadto sa paglambo ug kalipay.
Nia karon dinhi si Elder Cutler, ug gusto nako siyang pasalamatan sa pag-abli sa akong mga mata. Ang matag desisyon nga akong gihimo sa akong kinabuhi sukad niana naimpluwensyahan niadtong higayuna dihang nagpaubos ko sa akong kaugalingon ug nag-ampo alang sa kapasayloan, ug ang Pag-ula ni Jesukristo alang kanako nahimong kabahin sa akong kinabuhi.
Ang katapusang leksyon, sa usa ka pamahayag: sinatia ang paghinulsol; walay mas makapaduol kaninyo ngadto ni Ginoong Jesukristo kay sa tinguhang mag-usab.
Minahal kong mga investigator, higala sa Simbahan, kon naminaw man kamo karon, hapit na ninyo makab-ot ang talagsaong kalipay. Duol na kaayo kamo!
Dapiton ko kamo, uban sa tanang kusog sa akong kasingkasing ug gikan sa kinahiladman sa akong kalag: lakaw ug pagpabunyag! Pinakamaayo kanang butang nga inyong mahimo. Mousab kini dili lang sa inyong kinabuhi apan sa kinabuhi usab sa inyong mga anak ug mga apo.
Ang Ginoo mipanalangin kanako og usa ka pamilya. Gipakaslan nako si Renee, ug may upat kami ka anak nga matahum. Ug tungod sa akong bunyag, makahimo ko, sama ni propeta Lehi sa karaan, makadapit nila sa pag-ambit sa bunga sa kahoy sa kinabuhi, nga mao ang gugma sa Dios (tan-awa sa 1 Nephi 8:15; 11:25). Matabangan nako sila sa pagduol kang Kristo.
Palihug ikonsiderar ang akong mga kasinatian, ug (1) seryusoha ang pag-atubang sa mga misyonaryo, (2) mosimba ug hinumdumi ang mga pagbati nga espiritwal, (3) basaha ang Basahon ni Mormon ug pangutan-a ang Ginoo kon tinuod ba kini, ug (4) sinatia ang paghinulsol ug magpabunyag.
Mopamatuod ko kaninyo nga kon bayaran ninyo ang bugti alang sa pagpadayag, magpaubos sa inyong kaugalingon, magbasa, mag-ampo, ug maghinulsol, maabli ang kalangitan ug inyong masayran, sama sa akong nasayran, nga si Jesus mao ang Kristo, nga Siya ang ako ug inyong Manluluwas. Sa pangalan ni Jesukristo, amen.