Tong mi Unusoch a Tongeni Asueno Sokkun Nuokus Meinisin
Sisap chiwen nuokus nge sipwe chechemeni non pwapwa, apinukunuk, me non pochokun pwe ewe Samon mi nom rech.
Pwi me fefinei, chienei, sia feioch me pwapwa pwe meinisin kich chon Mwichefen mi tongeni mwich fengen non nuku me tong ngeni Kot.
Ukan ennetin kinisou pwe Preseten Thomas S. Monson, nouch soufos mi achengicheng, mi nom rech. Preseten, aupwe aucheani om kewe kapasen emwen, aurur, me tipachem fansoun meinisin. Aua tongeok me etiwok, me aua iotek fan itom fansoun meinisin.
Fitu ier ano, nupwen ua emon presetenin steik non Frankfurt, Germany, emon fefin mi achengicheng me netipechou a feito rei nesoponon am we mwichen steik.
A apasa, “Met ese och? Ai nuku pwe a wor fuemon ika nimon ra kan mour nupwen ka afanafan!”
Me mwen ua ponueni ua ekieki ekkis o ua apasa, “Ai nuku pwe emon mour non fan epwe pochokun seni an emon mour non pwan ew neni.”
Punuei we, Harriet, a rong ai fos me ekkis fansoun mwirin a era pwe ai ponueni an ewe fefin kapas mi murinno o kirekiroch.
Ewe Fansoun Annenenon mi Nap
Fitepuku ier ano non Merika, a wor ew angang a fis ra iteni ewe “Annenenon mi Nap” o a choufetan won ewe fonu. Ew popun ei angang pwe chon mwichefen repwe anneneno aramas mi kan mour non pekin ngun.
Neanuon, Joseph Smith a ekieki usun ekkewe mettoch a rong seni ekkewe chon afanafan ir mi fiti ei angangen anneneno aramas non pekin ngun non an kewe ran. Ina ew popun a fini an epwe feino ngeni ewe Samon non iotek.
Ekkei chon afanafan a wor style mi apwapwaiti aramas nupwen ra fos, me ar kewe afanafan ra kan poraus usun ewe ekkei non enn mi witi ekkewe chon tipis. Ekkei afanafan ese amoura aramas—nge menni ir mi ewe popun aramas ra anuso. Ar popun me napanapan afanafan mi eniweniwa aramas ar fiti ar mwichefen.
An nuokus
Me nom, chommong mi aea ewe memefen nuokus pwe repwe owesi aramas ne fori angang. Sam me in ra aea nuokus ngeni nour kewe, meinapen angang ra aea ngeni chon angang, me chon government ra aea ngeni chon uttut.
Chon angoch non pekin amomo ra weweiti pochokunen nuokus o ra aea ei memef ne otupu aramas. Ina pwata a wor chommong minen amomo ra aiti kich ika sise moni ar we cereal are sise angei ewe video game ika cell phone minefo, sipwe netipechou unusen manauach o sisap pwapwa.
Sia emenimen pokiten ekkei o sia ekieki pwe sisap tup ren ekkei sokkun, nge fan ekkoch a fis ngeni kich. Met mi ngau, fan ekkoch sia pwan fori iei usun pwe aramas ra fori met sia mochen
Ai poraus ikenai a wor ru popun: Akkom upwe pesei kich ne ekieki ifa usun sia anuokusiti aramas we pwe repwe fori ach mochen—mi pachenong kich pwisin. Oruan upwe pwari ew napanapan fofor mi och seni.
Ewe Osukosuk mi fiti noninen
Akkom sipwe fos usun ewe osukosuk mi fis nupwen sia anuokisiti aramas. Ennetin, ion me neich ese mongo och, aea seat belt non taraku, taiso, isoni moni, are aier seni tipis pokiten sia nuokus?
Ennetin ewe memefen nuokus a tongeni pochokun ne siwini foforuch me napanapach kewe. Nge ei siwin esap feinfeino. Memefen nuokus ese wor ewe pochokun ne siwini netipach, o esap siwini kich ngeni ewe sokkun aramas mi mochen fori pung are mi mochen anneasochisi Semach won Nang.
Aramas mi nuokus repwe say me fori mi pung, nge rese mefi ekkewe feel mi murinno. Fan chommong ra mefi akanaemon, oput, are song. Ekkei memef mi tongeni siwin ngeni memefen nukunukungau, anneasonap, me ungeni mettoch mi pung.
Nge, ach manaueni me emweni non ei sokkun napanap ese chok fis ngeni chon fonufan. A kan achou netipei ne rong usun chon Mwichefen mi aeangau ar manaman ne nemeni ekkoch—ese nifinifin ika a fis non imwer, non ar apwonueta wiser, are a fis nupwen ra fos ngeni ekkoch.
Fan chommong, aramas ra ungeni an emon eriaffoua pwan emon, nge rese tongeni kuna nupwen ra pwisin fori iei usun. Ra annuk pwe aramas repwe ausening ngeniir nge nupwen aramas rese anneasochisir, ra apungu ir non pekin fos, memef, me fan ekkoch ra wichir.
Ewe Samon a apasa pwe nupwen emon chon pristut mi aeangau ar pochokun ne nemeni ngunun ekkoch, ese nifinifin ukukun ngauen ei sokkun napanap, feiochun nang a su seni ir; me Ngunun ewe Samon mi netipechou.”
Menni epwe wor ekkoch fansoun nupwen sia achocho ne apungano ach fofor ren ach ekieki ese nifinifin met sia fori ika ewe popun sia fori ina mi pung. Menni sipwe ekieki pwe a och ika sipwe nemeni, otupu, are foringau ngeni ekkoch pwe epwe och ngeni ekkewe ekkoch. Esap ina, pun ewe Samon a afata pwe, “iei ekkewe uwan Ngunupin: tong, pwapwa, kinamwe, engino, umoumoch, manauoch, nikiitu, tipetekison, me nemeni mochenin netipach.”
Ewe Aan mi Ech
Nupwen ua kaeo usun Semach won Nang, ua tongeni esinna ifa usun a amwokutu me emweni Noun kewe. Ese uren song, oput, me kiringau. An popun—An angang me An ning—pwe epwe aweina kich, ekieta kich, o emweni kich ngeni An we muu.
Kot mi awewe napanapan ngeni Moses pwe a “uren tong me umoumoch, mi songomang o tongotam me nikiitu.”
An Semach won Nang tong ngeni kich, Noun kewe, mi kan nu seni ach tufichin weweiti.
A wewen pwe Kot mi tipew ngeni are ese afanni usun napanapach kewe mi ungeni An kewe annuk? Apw, esap ina!
Nge Ese chok mochen siwini mwokutokutuch. A mochen siwini napanapach. A mochen siwini netipach.
A mochen sipwe ekieta pouch kewe ne komochannuk ngeni ewe woken mecha, sisap chiwen nuokus, o sipwe fetanta won ewe aan mi aukukkun me chokisikis. A mochen ekkei fan itach pokiten A tongei kich pun iei ewe aan epwe emwen ngeni pwapwa.
Iwe, ifa usun Kot mi emweni Noun kewe ne tapweno mwirin I non ach kei ran ikenai?
A tinatiw Noun we At!
Kot a tinatiw Noun we Anaemon, Jises Kraist, ne pwar ngeni kich ewe aan mi pung.
Kot a emweni kich non angangen pesepes, engino, kirekiroch, tipetekison, me tong ese much. Kot epwe anisi kich. A tongei kich, me nupwen sia turuno, A mochen sipwe uta, achocho sefan, pwe sipwe pochokununo.
Ii ach samon.
Ii ach apinikunuk non aninis
A mochen pesei kich ne foforoch non nuku.
A nuku non kich pwe sipwe kaeo seni ach kewe mwan o sipwe pwan fini pung.
Met usun Ngauen ewe Fonufan?
Ew mettoch Setan a mochen sipwe fori ne otupu aramas mi chok pwe sipwe ekiek me tunomong usun mettoch mi ngau an ewe fonufan.
Ennetin manauach won fonufan ese unusoch, o epwe sopweno ina usun. Chommong aramas mi nimoch ra riaffou pun ewe neni ra nom non o pwan pokiten kiringauen aramas. Chofona me foforingau a fis chommong non manauach ikenai.
Nge ese nifinifin ika ekkei mi fis, ua kan kinisou ren ai manau non ei kinikinin fansoun nap seni ai nom pwan ew fansoun non uruon ewe fonufan. Sia kan sereioch ne manau non ei fansoun a wor watten feioch, tipachem, me tufich. Nap seni meinisin, sia feioch pwe a wor rech unusen ewe kapas allimen Jises Kraist, mi anisi kich ne weweiti usun ekkewe feiengauen fonufan o pwar ngeni kich ifa usun sipwe kunnu seni are pworacho ngeniir.
Nupwen ua ekieki usun ekkei feioch, ua mochen fotopukutiw me iotek me apasa kapasen mwareiti me kinisou ngeni Semach won Nang fan itan an tong ngeni meinisin Noun kewe.
Use nuku pwe Kot a mochen Noun kewe ar repwe niweiti are ekieki usun ekkewe mi ngau mi nom won fanufan. “Pwe ewe Ngunupin, ewe God a fen fang ngeni kich, ese fori kich pwe sipwe pireir, nge a fen aurakicheno ren manaman, tong, me nikiitu.”
A awora ngeni kich chommong sokkopatten popun ach sipwe pwapwa. Mi namwot sipwe kutter. Ewe Samon mi achema ngeni kich fan chommong pwe “sisap nuokus,” pwe “[sipwe] chok pwapwa,” me “ami kukku pwiin siip, ousap nuokus”
Ewe Samon Epwe Fiu Fan Itach
Kich Aramas mi Pin non ei fansoun soponon. Mi awewe non itach na pwe sipwe esuku ewe niwinsefaniton ewe Chon Amanau me ammonata chon fonufan ne etiwa I. A wor wisach pwe sipwe kaeo ewe kapasen Kot me ausening ngeni mongungun ewe Ngun mi Fel, pwe sipwe sinei ekkewe esisinin ewe niwinsefaniton ewe Noun Aramas.
Ina minne, kich sisap amam ekkewe osukosuken ewe fonufan me weiresin ach kei ran ikenai. Nge esap wewen pwe sipwe achou kich pwisin are achou ekkoch ren memefin nuokus pokiten ekkei. Nap seni ach ekiekin watten ach kewe osukosuk, mi och ika sipwe ekiekin usun watten, ochun, me unusochun ewe manaman ese much an Kot, nuku non I, me ammonata ngeni ewe niwinsefaniton Jises Kraist ren ew netip mi uren pwapwa?
Pokiten kich Noun kewe aramas mi pwon, sisap nuokus ne angang pokiten sia ekieki mettoch mi ngau epwe fis ngeni kich. Nge, sia tongeni sopweno ne fetan ren nuku, apinukunuk, me ren ew popun, o sipwe nuku Kot nupwen sia tori osukosuk are ekkewe tufich epwe feito rech.
Sisap akanaemon ne fetan won ewe anen chon kunon Kraist. “Ewe Samol ami God epwe pwisin nonnom remi. Esap tongeni nikitikemino.”
“Ewe Samol epwe wisen fiu fan itom nge en kopwe kuna kinamwe.”
Nupwen sia nuokus, amo sipwe pochokun, ionifengen unusen ach nuku, me nuku non ewe pwon pwe “ekkewe pisekin afeiengaw resap afeiengaua kich.”
Met sia manau non ew fansoun mi uren osukosuk me weires? Ewer mi kan pung.
Kot pwisin a era, “Fonufan epwe eriaffou kemi. Nge oupwe chok epinukunuk! Ua fen okkufatiw fonufan!”
Sia tongeni anganga ach nuku ne apinukunuk me fiti ach fofor? Sia tongeni apwonueta ach kewe pwon mi pin? Sia tongeni anneasochisi ekkewe annukun Kot non fansoun osukosuk? Ewer sia tongeni!
Pokiten Kot a pwon, mettoch meinisin epwe tongeni angang fengen fan itach, ika sia anneasochis. Ina minne, sipwe nikitano ach nuokus o sipwe manau non pwapwa, apinukunuk, me nuku pwe ewe Samon epwe nom rech.
Tong mi Unusoch a tongeni Asueno Sokkun Nuokus Meinisin
Chienei kana achengicheng, pwi me fefinei kana non Kraist, ika sia esinna pwe kich mi nuokus are osukosuk, are ika sia esinna pwe ach kapas, napanap, are fofor mi awora nuokus non pwan emon, ua iotek ren unusan pochokunen nguni pwe sipwe ngas seni ei niuokus seni ewe tong an Kraist mi pung, ennet, o wenechar, pwe “tong mi unusoch a tongeni asueno sokkun nuokus meinisin.”
An Kraist Tong ennet mi akukkunutiw ewe mochen ne efeiengaua, anonineni, eriaffoua, are nemeni pwan emon.
An Kraist tong mi unusoch mi anisi kich ne fetan non tipetekison, pwapwa, me apinukunuk pwe kich sia chon kunon ewe Chon Amanau. An Kraist tong mi unusoch a wato rech apinukunuk ne engino non ach nuokus me sipwe anonga ach nuku non ewe manaman me ochun Semach won Nang me Noun we, Jises Kraist.
Non imwach, non ach kewe nenien angang, non wisach kewe non ewe Mwichefen, non netipach kewe, amo sipwe siwini ach nuokus ren an Kraist tong mi unusoch. An Kraist tong epwe siwini ach nuokus pwe epwe winiti ach nuku!
An tong epwe atufichi kich ne esinna me nuku non ochun Semach won Nang, An kokkot mi pin, An kapas allim, me An kewe annuk. Ach tongei Kot me chon unukuch epwe anisi kich ne esinna pwe ach anneasochisi an Kot kewe annuk mi efeiochu kich o esap eriaffouini kich. An Kraist tong epwe anisi kich ne winiti aramas mi kirekiroch, omusano tipisin ekkoch, tong, o pwan aramas mi mochen fori An angang.
Nupwen sia aureno netipach ren ewe tongen Kraist, sipwe neno non pekin ngun ren pochokun o sipwe fetan non pwapwa, me tipepochokun, me sipwe fetan non ewe saram me ning an ach Chon Amanau mi achengicheng, Jises Kraist.
Ua pwarata, fiti ewe Aposel John, “ese wor nuokus non [an Kraist] tong.” Pwi me fefinei kana, Kot mi unusen sinei ami. A unusen tongeikemi. A sinei met epwe fis ngeni kemi non fansoun mwemi. A mochen pwe ousap “nuokus, [oupwe] chok nuku” are “oupwe chok nonnom non [an] tong [mi unusoch].” Iei chok ai iotek me efeioch non itan Jises Kraist, amen.