Ngeni Chiechiach me Chon Kaeo usun ewe Mwichefen
Ika oupwe fori met mi namwot ami oupwe angei pwarata, oupwe tipetekison, anneani, iotek, me aier, nang epwe suk iwe oupwe sinei pwe Jises I ewe Kraist.
Non ewe neanowasen enimu, September 16, 1988, non ewe imwen fan an ewe Vicente López Wart non Buneos Aires, Argentina, ua papatais me ua winiti emon chon Ewe Mwichefenin Jises Kraist mi Pin non Fansoun Soponon. Chienei, Alin Spannaus, a wisen papataisini ei, me ua pwapwa, me ua mochen kaeo pwan ekkoch.
Ikenai, ua mochen aporousa met ua kaeo non ai siwini netipei—ua apinukunuk pwe ekkei nesen repwe anisikemi ekkewe ouse mo choni ewe Mwichefen. Ua iotek pwe netipemi epwe kun ren ewe Ngun mi Fel, usun chok ren pwusin ngang.
Aewin, Chufengen ren ekkewe Misineri
Pwata emon ese wor an osukosuk, osupwang, are kapas eis iwe epwe mochen chiechi ngeni ekkewe misineri me ausening ngeni ar kewe nesen? Me rei a fis pokiten tong—tongen emon nengin, itan Renee. Ua tongei i, me ua mochen apwupwunu ngeni. A sokono me nongonongun manauan mi sokkono seni ekkewe ekkoch fopun ua sinei. Nge ua tongei i me ua tungorei pwe aipwe pwupwunu—nge a era apw!
Ua fokkun osukosuk. Ua ekieki pwe ngang emon mi aramasoch! Ua pwan mesemeseoch, ieri, a 24 me ua sukunen college me mi wor ai angang. A ereniei usun met an mochen—a era pwe a mochen apwupwuni ngeni emon non ewe tempel, pwe an famini epwe ririfengen feinfeino—iwe ese etiwa ai tungor. Ua mochen sopweno am chiechi fengen, iwe ua fori ew etipeu ai upwe ne ausening ngeni ekkewe misineri. Faniten ei popun mi mwurino ai upwene ne chuchuri ekewe misineri? Me rei mi och.
Nupwen uwa keran poputa ne churi ekkewe misineri, use fokkun weweiti met ra kapas usun, me upwe fokkun kapas ennet ngeni kemi, use fokkun wor ai upwe ausening ngeniir. Use mochen kaeo usun ew namanam mi fo. Ua chok mochen pwarata ngeniir pwe ir mi mwan nge uwa chek achocho ngeni faniten an Renee epwe mwochen famini ngeni ei.
Ikenai nei kewe ir mi fen fori angangen misineri, iwe iei ua weweiti ewe asor an ekewe anuon me fapun rafen fori faniten ar fangeno ar fansoun ne afanafana ewe kapas allimen Jises Kraist. Iei ua annean pwe ua fen ausening ngeni Elter Richardson, Elter Farrell, me Elter Hyland, ekkewe misineri mi aitiei.
Iwe, ewe aewin nessen, Ua apasa ngenikemi chiechiach kewe me ami kewe chon kaeo usun ewe Mwichefen: nupwen oua chufengen me ekkewe misineri, ouse mochen oupwe ennetin ausening ngenir; ra fangano ierin manauer fan itemi.
Oruwan, Feino ngeni Faan
Nupwen ua keran fiti ew mwichen ewe Mwichefen, ua rong chommong kapas nge use weweiti. Ion ekkewe Beehive? Met ewe Pristut seni Aaron? Ewe Mwichen Fin Anisi?
Ika iei ami keran fiti ew mwichen ewe Mwichefen me oua osukosuk ren met ouse weweiti, osap osukosuk! Use pwan weweiti. Nge ua chuwen chechemeni ekkewe memmefin kinamwe me pwapwa. Use sinei non ena fansoun, nge ewe Ngun mi Fel a mwongungu ngeni ei non seningei me netipei, “Ewer ei mi fokkun pung.”
Upwe awewei ei nesen non ew chok wokisin: Ika ouse weweiti, ousap osukosuk—chechemeni ekkewe memef oua mefi; ra feito seni Kot.
Eunungatin, Anneani ewe Puken Mormon
Mwurin ekoch fansoun am chufengen me ekkewe misineri, use fokkun fefeita. Use mefi pwe ua angei pwarata usun ennetin ewe kapas allim.
Ew ran, Renee a kapas eis ngeniei, “En mi anneani ewe Puken Mormon?”
Ua ponuweni, “Apw.” Ua chek ausening ngeni ekkewe misineri—met ese naf?
Iwe a chenuchenuu non mesan usun epwe fen kechiw, Renee a pwon ngeniei pwe a sinei pwe ewe Puken Mormon mi ennet me ika ua mochen sinei ika mi ennet, mi namwot—upwe fet—upwe anneani! Mwurin upwe kapas eis!
Anneani, ekieki usun non netipemi, me “tingor ren Kot, ewe Sam Esemuch, non iten Kraist, … ren ew ennetin netip, ren ennetin popun, fiti nuku non Kraist” ((Moronai 10:4) ika ewe Puken Mormon mi ennet, me ika mi ennet iwe ewe Mwichefen mi ennet.
So the third lesson, in one sentence: when you receive these things—the Book of Mormon—and you are exhorted to read and ask God if they are true, please just do it!
Saingon, Aier
Ewe saingon mettoch upwe aporausa mi usun aier. Mwurin ua wes ren ekkewe nessen seni ekkewe misineri, use nuku pwe mi wor met mi namwot ai upwe siwini non manauei. Elter Cutler, emon mi kukkun ierin, mi tipepochokun nge ese kon sinei kapasen Mexico, a apasa, “Joaquin, sipwe annea fengen Alma 42, me sipwe wanong itom nupwen sia anneani.”
Ua ekieki pwe mi umwes, nge ua fori met Elter Cutler a tingor non wokisin 1: “Iwe iei, nei anuon [Joaquin], ua weweiti pwe mi wor pwan ekis met a aureki om ekiek, minne kose tongeni weweiti.” O! Ewe puk a kapas ngeniei.
Nupwen aua anneani wokisin 2: “Iei nengeni, nei anuon [Joaquin], upwe awewei ek mettoch ngonuk,” iwe mwirin a awewe usun ewe Forutan fonufan me an Atan turutiw
Iwe non wokisin 4: “Iwe iei sia kuna, pwe mi wor ew fansoun a kawor ngeni [Joaquin] pwe epwe aier.”
Aua sopweni ne anneani, ew wokisin mwirin pwan ew, tori aua tori ekkewe saingon wokisin. Iwe ua ku ren och manaman mi pochokun. Ewe puka kapas ngeniei, me ua kechu nupwen ua anneani, “Iwe iei, [Joaquin] nei anuon, ua mochen pwe kosap chiwen mut ngeni ekkei mettoch repwe aosukosukok, iwe kopwe chok mut ngeni om kewe tipis repwe aosukosukok, ren ena osukosuk … ngeni aier” (wokisin 29).
Iei ua weweiti pwe ua mochen angei pwarata me use mochen fori met me namwot ai upwe angei. Tori ena fansoun use mo kapas ngeni Kot, me ua ekieki ach kapas ngeni emon ese nom mi umwes. Mi namwot upwe tipetekison me fori met ra tingorei ai upwe fori, ina mwo pwe me rei ua ekieki pwe mi umwes.
Ena ran ua suki netipei ngeni ewe Ngun, ua mochen aier, me papatais! Me mwen ena fansoun, ua ekieki pwe aier mi ew mettoch mi ngau, pwe a chok fiti tipis me mwan, nge ua keran weweiti non och napanap—pwe ew mettoch mi murrino a ammonata ewe an ngeni fefeita me pwapwa.
Elter Cutler a nom ikei ikenai, me ua mochen apasa ai kinisou ren an suki mesei. Iteiten mettoch ua fori non manauei seni ena fansoun mi fis pokiten ewe fansoun ua tipetekison, iotek ai upwe angei omusomus, me ewe Achesefanin Jises Kraist a winiti ew kinikinin manauei.
Iwe ewe saingon nessen non ew wokisin: Oupwe aier; ese wor met epwe ochufengeni kemi ren ewe Samon Jises Kraist nap seni ami mochen siwin.
Ami chon kaeo, chienen ewe Mwichefen, ika oua ausening ikenai, oua karap oupwe mefi pwapwa chapur. Oua fokkn karap!
Upwe tingorekemi, ren unusen netipei seni anonon nguni: feino me opwe papatais! Epwe och nap seni mettoch meinisin oua tongeni fori. Epwe siwini manauemi pwan manauen noumi kewe me noun noumi kewe.
Ewe Samon a fen efeiochuei ren ai famini. Ia pupunu ngeni Renee, me mi wor fumon noum kewe semirit. Iwe pokiten ai papatais, ua tongei fori met ewe soufos Liai a fori me nom, ua pesengeniir repwe mongo seni ewe iran manau, minne ewe tongeni Kot (nengeni 1 Nifai 8:15;11:25). Ua tongeni anisir ar repwe feito ren Kraist.
Iwe ouse mochen chechemeni porausei, me (1) ennetin ausening ngeni ekkewe misineri, (2) fiti fan me chechemeni ekkewe memmefin ewe ngun, (3) anneani ewe Puken Mormon me eiseni ewe Samon ika mi ennet, me (4) oupwe aier me papatais.
Ua pwarata pwe ika oupwe fori met mi namwot ami oupwe angei pwarata, oupwe tipetekison, anneani, iotek, me aier, nang epwe suk me oupwe sinei, usun chok ua sinei, pwe Jises I ewe Kraist, pwe I ai Chon Amanau me pwan ami. Non iten Jises Kraist, amen.