Oupwe chok fori minne upwe ureni kemi
Nupwen sia finata pwe “sipwe fori minne Kot a apasa” kich, sia pwon ach sipwe awena mwokutukutuch iteiten ran ngeni mochenin Kot.
Ewe Chon Amanau a fori an ewe aewin manaman mi mak atun ewe kametipen apupunu me non Cana non Galilee. Sises; Mary, Inan we; me noun kewe chon kuno ir mi nom. Mary a mefi pwe wisan ne fori fetanochun ewe kametip. Fansoun ewe apwapwa, a wor ew osukosuk—ekkewe chon efisi ewe apupunu a itesenir wain. Mary a aureki me feino ren Jises. Ra kapas iwe Mary a kun ngeni ekkewe chon angang me apasa:
“Oupwe fori minne ua apasa ngeni kemi.
“a wor wonu rume fau ikewe ie… [Ekkei rume rese aea ne isois konikin un nge ra fis ar epwe nimetir usun annukun Moses.]
“Sises a apasa ngeni [ekkewe chon angang], Oupwe anonou konik non ekkei rume.” Iwe, ra anonou tori ra ureta.
“Iwe a apasa ngenir, “Iei oupwe etifi och ena konik o oua wano ren ewe chon nemeni ei fetannap.”
Iwe ewe samonun ewe kametip a neni ewe konik pwe a winiti wain me apasa ren an mairu pwe ina ewe wain a kon och ra mang ne eineti me non ewe kametip.
Sia kan chemeni ei porous pokiten siwinin konik ngeni wain a ew angangen an Kot—ew manaman. Ew porous mi auchea, nge mi pwan wor ew porous mi auchea non uruon John. Mary “emon mi auchea me mi wor wisan mi auchea a fen kefinita,” a koko me ren Kot pwe epwe aupwatiw, tumunu, me amari ewe Noun Kot. I a sineiochu usun Sises nap seni pwan emon won fonufan. A sinei usun ennetin uputiwan mi amwarar. Mi sinei pwe ese wor tipisin me I ese kapas usun ekkoch mwan, ese wor emon a tongeni aiti; pun ese auchea an emon mwan epwe aiti i.Mary a sinei usun an tufich ne awesi osukosuk, mi pachenong an we pwisin awora wain ngeni ewe kametipen apupunu. A wor an apinukunuk mi nukuchar non I me non an manaman. An we aurour mi mecheres me wenechar ngeni ekkewe chon angang ese wor apungupungun, ese wor amwochun, ese wor aukukun: “Opwe chok fori minne epwe ereni kemi.”
Mary a fen emon serafo nupwen ewe chon nang Gabriel a pwato ngeni. Akkom a “osukosuk” ren an ewe chon nang kor ngeni pwe a unusen chen me feioch me nein fefin me a resin ekieki met wewen anon we. Gabriel a ureni pwe ese wor mettoch epwe nuokusiti—ewe porous a wato mi och. Neminewe epwe “pwopwo” ren… ewe Noun God mi fokkun Tekia … o oupwatiw emon at … I epwe kingen murimurin Jacob kewe feinfeino chok.”
Mary a ekieki, “Ngang emon fopun mi nimenimoch. Nge ifa ussun an epwe fis ei sokkun?”
Ewe chon nang a chok ekis awewei, nge affata ngeni pwe “ese wor och mettoch God ese tongeni fori.”
Mary a ponueni non tekison pwe I epwe fori met Kot a tingor, ese pwan pesei an epwe sinei tichikin me ese tipemwaramwar inamo ika mi chommong an kapas eis usun met epwe fis ngeni manauan. A pwonei inisin me nukun an weweiti pwata I a tingorei ika ifa usun mettoch epwe pwonuta. A etiwa an Kot kapas me mwan, nge ese kon unusen miriti met epwe fis mwirin. Ren chok nuku non Kot, Mary a apasa, “Ngang noun ewe Samol chon angang, epwe chok fis ngeni ei ussun minne ka fen apasa.”
Nupwen sia finata ne “fori mettoch meinisin minne Kot a apasa” kich, sia pwon ne ennetin awena mwokutukutuch iteiten ran ngeni mochenin Kot. Ekkewe fofforun nuku usun ach kaeo ekkewe pukefel iteiten ran, echikifel fansoun meinisin, me ennetin iotek a awatteno tufichin pekin ngun ne churi ekkewe mochenin manauach. Ekkoch fansoun mwirin, orenien nuku a efisata pungun manaman. Ra siwini ach nuku seni och mettoch mi kukkun ngeni ew mettoch mi pochokun mi och non manauach. Iwe, nupwen osukosuk repwe feito rech, ena nongonong non Kraist a awora nukuchar ngeni ngunuch. Kot a apochokuna ach apwangapwang, anapano ach pwapwa, me “fori fanasengesin mi murinno.”
Ekkoch ier a no, ua kapas ngeni emon kukkun pisop ewe a angang chommong awa iteiten wik ne auroura chon an ewe wart. A apareni och mettoch mi amwarar. A apasa pwe ekkewe osukosuk chon an we wart ra weri, ina ekkewe chon Mwichefen ekis meinisin ra weri—osukosuk usun ifa usun repwe fori ew pupunu mi pwapwa; osukosuken aukuochu angang, famini, me wisen Mwichefen; osukosuken apwonueta ewe Kapasen Emirit, angang, ika sasingin aramas mi seneno; ika angei kinamwe usun ew annukun Mwichefen ika kapaseis rese weweiti.
An aurour ngeni chon ewe wart mi soun pachenong ar repwe anonga aea nuku, usun kaeo seni ewe Puken Mormon, moni asoren ew ne engon, me Thomas S. Monson angang non ewe Mwichefen ren nikitu. Fan chommong ar ponueni I mi tipemwaramwar: “Use tipew ngonuk, Pisop. Kich meinisin mi sinei pwe ekkena ir mettoch mi och sipwe fori. Sia kakapas usun ekkei mettoch fansoun meinisin non ewe Mwichefen. Nge use sinei ika en mi weweiti ei. Met ekkena mettoch repwe fori ngeni ekkewe osukosuk ua weri iei?”
Ina ew kapas eis mi pungoch. Mwirin ekkoch fansoun, ua fen apareni pwe ekkewe ir ennetin fori “mettoch mi kukkun me mecheres”6—ra aneasochis non kukkun foffor—ra feioch ren nuku me pochokun pwe repwe pwisin fori nap seni chok ewe fofforun aneasochis, ennetin, epwe fen usun ese och ngenir. Eni epwe fen weires ne esinna nefinen ekkewe auchean fofforun aneasochis sia fori iteiten ran me pungun ekkewe watten osukosuk sia weri. Nge ir mi wewefengen. Non ai sinei, ach fori ekkewe kukkun oreni ika apungu nuku, ina ewe aanen ach sipwe apochokuna kich seni sokopaten osukosuken manau. Kukkunun fofforun nuku, pwan mwo nupwen usun rese auchea ika rese wewe ngeni ekkewe osukosuk ra aweiresi kich, ra afeiochu kich non meinisin sia fori.
Ekieki Naaman, emon “meinapen ewe mwichen sounfiu Syria” me “I emon sounfiu mi pochokun” me a wiri ewe semwenin keinapan. Emon nengin chon angang a ureni usun emon soufos non Israel a tongeni echikara, iwe a sai ren emwenien chon angang, sounfiu, me niffang ngeni Israel, iwe a tori imwen Elisha we. Noun Elisha we chon angang, esap Elisha pwisin, a ureni Naaman pwe an ewe Samon annuk pwe epwe chok “feinno tutu non ewe Chonupupu Jordan fan fisu.” Eni ei mecheresin aurour me ren ewe soufiu mi pochokun ese fatoch, mi mecheres, ika kis seni an sufon iwe a kuna pwe met ra ureni mi turunufas. An Elisha aurour ese weweoch ngeni Neeman, iwe a “suno non an song.”
Nge noun Naaman kewe chon angang ra feito ren me kuna pwe I ita epwe fen fori mettoch mi napapap ika Elisha a eisini epwe fori. Ra awewei pwe nupwen a emmwir pwe epwe chok fori och angang mi kukkun, met esap fori, pwan mwo ika ese weweiti pwata? Naaman e ekieki usun fofforun me mi tipemwaramwar, nge a aneasochisi, “feinno non ewe Chonuppupu Jordan o a tonong fan fisu” iwe a chikareta.
Ekkoch niwinin aneasochis ra mwitir; ekkoch ra chok fis mwirin ach sossot. Non ewe Pearl of Great Price, sia anneani usun an Adam achocho ne aneasochisi ewe annuk ne fangeno. Adam a ureni ewe chon nang pwe ese sinei pwata, tiwenon chok ewe Samon a annuku ngeni. Ewe chon nang a awewei pwe ei fangeno a esisinen ewe fangeno an Noun ewe Sam we Anamon. Nge ena awewe a fis chok mwirin an Adam a fen aneasochisi ewe annuk ne aneasochisi ewe Samon non chommong ran me nukun an sineiwhyI epwe fori ekkena fangeno.”
Kot epwe afeiochu kich fansoun meinisn ren ach nukuchar ne aneasochisi An kapas allim me sufonu An Mwichefen, nge ese kon pwari ngenikich akkom An kokkot ren ach fori. I ese pwar ngenikich unusan seni nepoputan. Ina minne mi auchea nuku, anean, me apinukunuku ewe Samon
Kot a tingor sipwe engino ngeni I—ne nuku I me tapweeno I. A sio ngeni kich pwe “ousap tipemwaramwar pokiten ouse kuna.” A fonou kich pwe sisap esuku ponuwan mi mecheres ika forun mettoch mi mwitir seni nang. Mettoch repwe fisioch nupwen sia nukuchar fansoun sossotun ach nuku, inamo ika ach sossot epwe weires ne engino ngeni ika ponuwan epwe mang. Use kapas usun “anasochis me nukun sinei” nge apinukunuk och non ewe tong me an ewe samon fansoun.
Sossotun ach nuku mi chok fifiti ach tupwon ngeni mecheresin aean nuku. Iwe, mwirin, I a pwonei pwe sipwe angei ponuwan we sia fen awitiwiti seni nang: ngaseno seni ew osukosuk, pochokun, pochokun ne engino, ew ponuwen kapaseis, sinei, mirit, omusomus. Nupwen chok sia pwarano ach mochen fori met a tingor ngeni kich me nukun ach echimwa ika witi ach sipwe sinei inet, me pwata, me ifa usun ina sia mumuta ne “angei niwinin [ach] nuku, me [ach] achocho, me tipepos, me engino.” Ennetin aneasochis a etiwa an Kot annuk me akkomwan.
Ika kich mi sinei ika apw, kich meinisin sia finata “ion [sipwe] angang ngeni” iteiten ran. Sia pwarano ach mochenin angang ngeni ewe Samon ren non fofforun sufon iteiten ran. Ewe Samon a pwonei pwe epwe pwar ngenikich ewe aan, nge ren an epwe fori ena, sipwe feino, nuku pwe I mi sinei ewe aan pokiten I ewe “ewe aan.” Nupwen sia nuku me tapweeno I, manauach epwe siwin, usun konik a siwin ngeni wain. Sia winiti och mettoch nap seni met mi tufich ngeni.