Hō’ē tītaura’a nō te fare
Nō reira, ’a fāriu i tō ’outou vārua i ni’a i te māramarama. ’A ha’amata i tō ’outou tere ho’ira’a nehenehe i te fare. ’Ia nā reira ho’i ’outou, ’e maita’i a’e, ’e ’oa’oa a’e, ’e e faufa’ahia a’e tō ’outou orara’a.
’Aita i maoro a’e nei, ’a fārerei ai mātou i te peresideni Thomas S. Monson, ’ua fa’a’ite mai ’oia, mā te hanahana rahi ’e te mata ’oa’oa, i tōna here rahi i te Fatu ē ’ua ’ite ’oia ’ua here te Fatu iāna. E au mau taea’e ’e mau tuahine here, ’ua ’ite au ē e māuruuru rahi tō te peresideni Monson nō tō ’outou here, tā ’outou mau pure ’e tō ’outou itoito i te Fatu ’e i tāna ’evanelia rahi.
Bobbie te ’ūri māere
Fātata hō’ē tenetere i teie nei, ’ua rātere atu te hō’ē ’utuāfare nā Oregon haere ti’a atu i Indiana nō te hō’ē tau fa’afa’aeara’a—hau i te 2000 maire (3200km) te ātea—i reira, mo’e atura tā rātou ’ūri here rahi, o Bobbie. Mā te pe’ape’a rahi ’ua ’imi te ’utuāfare i te ’ūri nā te mau vāhi ato’a. ’Aita o Bobbie i ’iteahia.
Mā te ’ā’au ’oto, ’ua ho’i rātou i tō rātou ’oire, mā te ātea marū noa i tā rātou ’ūri here ’a ma’iri noa ai te kilometera.
E ono ’āva’e i muri iho, e hitimahuta rahi tō te ’’utuāfare i te ’itera’a ia Bobbie i tō rātou ’ūputa fare i Oregon. « ’Ua hā’iri’iri roa, ’ua pārarai, e ivi noa te toe—’e au ē ’ua haere noa ’oia i terā ’āteara’a tā’āto’a… ’ōna ana’e ».1 ’Ua vai te ’ā’amu o Bobbie i roto i te ferurira’a o te ta’ata ’ati a’e te fenua Marite, ’e ’ua parauhia ’oia o Bobbie te ’ūri māere.
E ’ere o Bobbie ana’e te animara tei fa’atupu i te māere i roto i te mau ’aivāna’a nō ni’a i te fa’ahiahia o tōna ’ite i te ’ē’a nō te ho’i i te fare. Tē vai ra te tahi mau purehua e rere rātou e 3 000 maire (4 800 km) te ātea i te mau matahiti ato’a nō te haere i te mau vāhi e mea tano a’e te anuvera nō rātou. Tē vai ra te mau fāito honu e rātere rātou nā roto i te moana pātifita mai ’Inītōnētia haere atu i te mau pae fenua nō Califonia. Te mau tohorā tua pu’u, e ’au rātou mai te mau pape to’eto’e nō te poro apato’erau ’e te poro apato’a haere atu i te reni ropu o te ao nei ’e fa’aho’i fa’ahou. Penei a’e te mea māere roa atu, ’oia ho’i, te mau hirondelle [e manu] nō te poro to’eto’e, pauroa te matahiti e rere rātou mai te poro to’eto’e haere atu i Antarctique ’e fa’aho’i fa’ahou mai, tei te ārea 60 000 maire (97 000 km) te ātea.
’Ia tuatāpapa ana’e te mau ’aivāna’a i teie huru māere, e ui rātou i te mau uira’a mai teie te huru « nāhea rātou ’ia ’ite e haere i hea ? » ’e « nāhea te mau u’i nō muri mai i te ha’api’i mai i teie huru ? »
’Ia tai’o ana’e au nō ni’a i teie mana’o feruri ’ore i roto i te animara, e ui māere au iā’u iho ē, « tē vai ato’a ra ānei teie huru hina’aro i roto i te ta’ata—te hō’ē fa’anahora’a arata’i roto, e nā reira tātou i te parau—o te ’ume ia rātou i tō rātou fare i te ra’i ra ? »
Tē ti’aturi nei au ē, ’ua fāri’i te tāne, te vahine ’e te tamari’i tāta’itahi i te pi’ira’a o te ra’i i te hō’ē taime i roto i tōna orara’a. Tē vai ra i roto ia tātou te hō’ē hina’aro hōhonu ’ia tomo nā roto i te pāruru ’e ’ia ’āpā i te mau Metua i te Ao ra tā tātou i ’ite nā ’e i here nā.
E riro te tahi pae i te fa’a’ore i teie hina’aro ’e ’ia tāmarū i tō rātou vārua i tāna pi’ira’a. Terā rā, te feiā o te ’ore e tūpohe i teie māramarama i roto ia rātou iho, e nehenehe ïa rātou e ha’amata i te hō’ē tere fa’ahiahia—hō’ē tauira’a vāhi haere atu i te mau anuvera nō te ra’i ra.
Tē pi’i nei te Atua ia ’outou
Te poro’i fa’ahiahia a te ’Ēkālesia a Iesu Mesia i te Feiā Mo’a i te mau Mahana Hope’a nei ’oia ho’i o te Atua tō tātou Metua, ē ha’apa’o ’oia ia tātou, ’e tē vai ra hō’ē rāve’a nō te ho’i atu iāna ra.
Tē pi’i nei te Atua ia ’outou
’Ua ’ite te Atua i tō ’outou mau ferurira’a ato’a, tō ’outou mau ’oto, ’e tā ’outou tīa’ira’a rahi a’e. ’Ua ’ite te Atua i te rahira’a taime tō ’outou ’imira’a iāna. Te rahira’a taime tō ’outou fāri’ira’a i te ’oa’oa fāito ’ore. Te rahira’a taime tō ’outou ta’ira’a ’outou ana’e iho. Te rahira’a taime ’a ’ite ai ’outou i te tauturu ’ore, te ’āehuehu, ’aore rā te riri.
Terā rā, noa atu te huru o tō ’outou ’ā’amu—mai te mea ē, ’aita ’outou i manuia, ’ua paruparu, ’ua ’ino’ino, ’ua tāvirihia, ’aore rā, ’ua pau—’ia ’ite mai ’outou ē, ’aita ’outou i vai ’ōtahi noa. Tē pi’i tāmau mai nei te Atua ia ’outou.
Tē fa’atoro mai nei te Fa’aora i tōna rima ia ’outou. ’E, mai tāna i nā reira i te feiā tāi’a tei ti’a noa i te pae nō te miti nō Galilea e rā ’ē te tau, tē parau mai nei ’oia ia ’outou ma te here hope ’ore:, « ’a pe’e mai iā’u ».2
Mai te mea, e fa’aro’o ’outou iāna, e paraparau mai ’oia ia ’outou i teie iho mahana.
’Ia haere ana’e ’outou nā te ’ē’a o te pipi—’ia haere ana’e ’outou i mua i te Metua i te Ao ra—tē vai ra hō’ē mea i roto ia ’outou o te ha’apāpū mai ē, ’ua fa’aro’o ’outou i te pi’ira’a a te Fa’aora ’e e fa’afāriu ’outou i tō ’outou ’ā’au i ni’a i te māramarama. E parau mai te reira ia ’outou ē, tei ni’a ’outou i te ’ē’a ti’a, ’e tē ho’i ra ’outou i te fare.
Mai te ’ōmuara’a o te tau, ’ua fa’aitoito te mau peropheta a te Atua i te ta’ata o tō rātou ra tau ’ia « fa’aro’o ’oe i te reo o tō Atua ra ’o Iehova… ’ia ha’apa’o i tāna ra mau parau, ’e tāna ra mau ha’apa’ora’a… [’e] ’ia fāriu ’oe [iāna] ra mā tō ’ā’au ato’a, ’e mā tō vārua ato’a ».3
Tē ha’api’i mai nei te mau pāpa’ira’a mo’a ia tātou tauatini rahira’a tumu i tītauhia ia tātou ’ia rave i te reira.
I teie mahana, tē hina’aro nei au e hōro’a atu e piti tumu i tītauhia ia tātou ’ia fāriu i te Fatu ra.
’A tahi : E maita’i a’e tō ’outou orara’a.
’A piti : E fa’a’ohipa te Atua ia ’outou nō te ha’amaita’i atu ā i te orara’a o vetahi ’ē.
E maita’i a’e tō ’outou orara’a
Tē fa’a’ite pāpū nei au ē, mai te mea e rātere tātou ’aore rā ’e tāmau noa i roto i te tere fa’ahiahia o te arata’i atu i te Atua ra, e maita’i atu ā tō tātou orara’a.
’Aita te reira e parau nei ē, e’ita tātou e fārerei i te ’oto i roto i tō tātou orara’a. ’Ua ’ite pā’āto’a tātou i te mau pipi ha’apa’o maita’i a te Mesia tei fāri’i i te ’ati ’e i te hāmani-’ino-ra’a—o Iesu Mesia iho tei mamae hau atu i te tahi atu ta’ata. Mai tā te Atua e « fa’ahiti nei… i tāna mahana i ni’a i te ’ino ’e te maita’i, » te fa’ati’a ato’a nei ’oia i te ’ati ’ia tāmata i te ta’ata parau ti’a ’e te ta’ata parau ti’a ’ore.4 Teie rā, i te tahi taime e au ra ē, e mea fifi a’e tō tātou ’orara’a nō te mea tē tāmata nei tātou i te ora i tō tātou fa’aro’o.
E’ita te pe’era’a i te Fa’aora e fa’a’ore i tō tātou mau tāmatara’a ato’a. E fa’a’ore rā te reira i te mau pāruru i rotopū ia ’outou ’e te tauturu tā tō ’outou Metua i te Ao ra e hina’aro e hōro’a mai ia ’outou. E pārahi ’oia i piha’i iho ia ’outou. E arata’i ’oia i tō ’outou mau ta’ahira’a ’āvae. E haere ’oia nā piha’i iho ia ’outou, ’e e amo ’oia ia ’outou ’ia rahi roa ana’e tō ’outou mau tītaura’a.
’Ei reira ’outou e ’ite ai i te hotu nehenehe o te Vārua : « te ’oa’oa, te hau, te fa’a’oroma’i, te marū , te maita’i, [’e] te fa’aro’o ».5
E ’ere teie mau hotu o te vārua i te hotu o te ruperupe pae tino, te manuia, ’aore rā, te tao’a rahi. E tae mai te reira nā roto i te pe’era’a i te Fa’aora, ’e e nehenehe te reira e riro ’ei mau tauturu pāpū nō tātou i roto i te mau vero rārahi.
E riro paha te auahi ’e te mau ’ārepurepura’a o te orara’a tāhuti nei i te ha’ape’ape’a ’e i te fa’ari’ari’a, terā rā te feiā e fāriu i tō rātou vārua i te Atua ra, e ha’atihia rātou i tōna ra hau. E’ita tō tātou ’oa’oa e fa’aitihia. E’ita rātou e vai ’ōtahi noa ’aore rā, e ha’amo’ehia.
Tē ha’api’i mai nei te mau pāpa’ira’a mo’a ē, « E ti’aturi ia Iehova ma tō ’ā’au ato’a ra ; ’eiaha rā e ti’aturi i tō ’oe iho ra ha’apa’o. ’Eiaha e ha’amo’e iāna i tō ’oe ato’a ra mau haere’a, e nāna e fa’a’ite ia ’oe i tō ’oe ra mau haere’a ».6
Te feiā e ha’apa’o i te pi’ira’a nō roto roa mai ’e o te ’imi i te Atua, te feiā e pure, e ti’aturi, ’e e haere nā te ’ē’a o te Fa’aora i fa’aineinehia—noa atu ē, e hi’a rātou i ni’a i te ’ē’a i te tahi taime—e fāri’i rātou i ha’apāpūra’a ē, « e ’ohipa ’āmui mai te mau mea ato’a ’ei maita’i nō [rātou] ».7
Tē hōro’a nei te Atua « i te itoito nō te matapōuri, ’e te fa’arahi nei i te ’eta’eta nō tei paruparu ra ».8
« E hi’a te parau ti’a ’e ’ia tā’ihitu noa atu i te hi’ara’a, ’e e ti’a fa’ahou mai ».9
’E nā roto i tōna maita’i, tē ani nei te Fatu :
Hina’aro ānei ’outou e ora i te hō’ē ’oa’oa tāmau ? »
Hina’aro ānei ’outou e fāri’i i roto i tō ’outou ’ā’au i te hau tei nā ni’a atu i te hāro’aro’ara’a ?10
Nō reira, ’a fāriu i tō ’outou vārua i ni’a i te māramarama.
A ha’amata i tō ’outou tere ho’ira’a fa’ahiahia i te fare.
’A nā reira ai ’outou, e maita’i a’e, e ’oa’oa a’e, ’e e faufa’ahia a’e tō ’outou orara’a.
E fa’a’ohipa te Atua ia ’outou
I ni’a i tō ’outou tere ho’ira’a i te Metua i te Ao ra, e ’ite ’outou ’āraua’e ē, e ’ere teie tere nō te ora noa i tō ’outou iho orara’a. ’Aita, e arata’i teie ’ē’a ia ’outou ’ia riro ’ei ha’amaita’ira’a i roto i te orara’a o te tahi atu mau tamari’i a te Atua—tō ’outou mau taea’e ’e mau tuahine. ’E te vāhi fa’ahiahia nō teie tere maori rā, ’a tāvini ai ’outou i te Atua, ’e ’a aupuru ai ’outou ’e ’a tauturu ai i tō ’outou mau ta’ata tupu, e ’ite ’outou i te haerera’a rahi i mua i roto i tō ’outou iho orara’a, mai te huru ra e’ita roa e roa’a ia ’outou ’ia feruri.
’Aita paha ’outou e feruri ra ē, e mea faufa’a ’outou ; ’aita paha ’outou e feruri ra ē, e ha’amaita’ira’a ’outou i roto i te orara’a o te hō’ē ta’ata. Pinepine, ’ia hi’o ana’e tātou ia tātou iho, e ’ite noa tātou i tō tātou mau ’ōti’a ’e mau vāhi paruparu. E feruri paha tātou ē, tītauhia ia tātou ’ia « hau a’e » te fāito i roto i te hō’ē mea e ti’a ai i te Atua ’ia fa’a’ohipa ia tātou—māramarama hau a’e, tino hau a’e i te maita’i, auhia a’e, rahi a’e te tāreni, rahi a’e te huru pae vārua. E ’ere nō tō ’outou ’aravihi e tae mai ai te mau ha’amaita’ira’a, nō tā ’outou rā mau mā’itira’a. ’Ei reira te Atua nō te ra’i nui ātea e ha’a ai i roto ’e nā roto ia ’outou, mā te fa’ananea i tā ’outou mau tauto’ora’a ha’eha’a nō tāna mau ’ōpuara’a.
’Ua tāmau noa tāna ’ohipa i te haere i mua i ni’a i teie parau tumu faufa’a : « e nā roto i te mau mea iti nei e tupu mai ai tei rahi roa ra ».11
’A pāpa’i ai ’oia i te feiā mo’a nō Korinetia, ’ua hi’o Paulo ē, ’aita i rahi i rotopū ia rātou i fa’arirohia ’ei feiā pa’ari ’ia au i te mau ture a tō te ao. ’Aita rā e fifi i te reira, nō te mea « ’ua mā’iti ho’i te Atua i te mau mea paruparu o te ao nei, ’ei fa’aha’amā atu i te feiā pūai ».12
’Ua ’ī te ’ā’amu o te ’ohipa a te Atua i te ta’ata tei fa’ariro ia rātou iho ’ei mea tano ’ore. ’Ua tāvini rā rātou mā te ha’eha’a, mā te ti’aturi i ni’a i te aroha o te Atua ’e tāna fafaura’a: « E riro tō rātou rima ra o tō’u ïa rima i reira, ’e riro vau tō rātou ra pāruru ’e… 13 e ’aro pūai roa rātou nā’u ».
I teie pu’e tau mahanahana i ma’iri iho nei, ’ua fāri’i tō mātou ’utuāfare i te hō’ē taime fa’ahiahia roa nō te haere e māta’ita’i i te tahi mau vāhi nō te ’[ā’amu o te ’Ēkālesia i te pae hiti’a o te rā o te fenua Marite. ’Ua ora fa’ahou mātou i te ’ā’amu o taua tau ra, i te hō’ē huru ta’a ’ē mau. Te mau ta’ata tā’u i tai’o i tō rātou parau—te mau ta’ata mai ia Martin Harris, Oliver Cowdery, ’e o Thomas B. Marsh—’ua hau atu tō rātou rirora’a ’ei mau ta’ata mau ’a haere ai mātou nā te vāhi i haerehia ’e rātou, ’e ’a feruri ai i te mau tusia i ravehia e rātou nō te patu i te bāsileia o te Atua.
E rave rahi mau huru fa’ahiahia tō rātou tei fa’ati’a ia rātou ’ia tauturu pāpū i te fa’aho’ifa’ahoura’a mai i te ’Ēkālesia a Iesu Mesia. E huru ta’ata ato’a rā tō rātou, te ’ino ’e te hi’a—mai ia ’outou ’e o vau nei. ’Ua pāto’ito’i te tahi pae i te peropheta Iosepha Semita ’e ’ua fa’aru’e i te ’Ēkālesia. I muri a’e, e rave rahi o te reira iho mau ta’ata tei taui te ’ā’au, ’ua fa’aha’eha’a ia rātou iho, ’e ’ua ’imi fa’ahou ’ia ’āmuihia i te feiā mo’a.
E riro paha tātou i te ha’ava i teie mau taea’e ’e i te tahi atu mai ia rātou. E parau paha tātou ē, « e’ita roa atu vau e fa’aru’e i te peropheta Iosepha ».
E parau mau paha te reira, e’ita rā tātou e ’ite pāpū ē, e aha mau te huru ’ia ora i taua taime ra, i roto i taua mau huru ra. ’Aita, e ’ere rātou i te feiā parau ti’a roa, noa atu rā i te reira, e mea au mau ’ia ’ite ē, ’ua ti’a i te Atua ’ia fa’a’ohipa ia rātou. ’Ua ’ite ’oia i tō rātou pūai ’e tō rātou mau paruparu, ’e ’ua hōro’a ’oia ia rātou i te rāve’a fa’ahiahia ’ia tauturu i te hō’ē ’īrava ’e ’aore rā, i te hō’ē hīmene nō te pehe hanahana o te fa’aho’ifa’ahoura’a mai.
Auē te ’oa’oa ’ia ’ite ē, noa atu ē, ’aita tātou i parau ti’a roa, mai te mea e fāriu tō tātou ’ā’au i te Atua ra, e ’ā’au hōro’a tōna ’e te maita’i, ’e e fa’a’ohipa ’oia ia tātou nō tāna mau ’ōpuara’a.
Te feiā e here ’e e tāvini i te Atua ’e i te ta’ata tupu, ’e e rave mā te ha’eha’a ’e te itoito i tāna ’ohipa, e ’ite ïa rātou i te mau mea māere e tupu mai i roto i tō rātou orara’a ’e i roto i te orara’a o te feiā tā rātou i here.
Te mau ’ūputa tei mana’ohia ē, ’ua piri, e matara ïa.
E haere te mau melahi nā mua ia rātou nō te fa’aineine i te ’ē’a.
Noa atu te huru o tō ’outou ti’ara’a i roto i tō ’outou ’oire ’aore rā i roto i te ’Ēkālesia, e fa’a’ohipa te Atua ia ’outou mai te mea e hina’aro ’outou. E fa’arahi ’oia i tō ’outou mau hina’aro ti’a, ’e e huri ’oia i te mau ’ohipa maita’i tā ’outou i ueue ’ei ’ō’otira’a maita’i rahi.
E’ita tātou e tāpae i reira nā roto i te pairatira’a automatic.
Tātou tāta’itahi, « e ta’ata ’ē’ē [tātou] ’e te purutia »14 i roto i teie nei ao. I roto i te mau hi’ora’a e rave rahi, tei te ātea ’ē roa tātou i te fare. ’Eiaha rā tātou e mana’o ē, ’ua mo’e tātou ’aore ra, ’ua vai ’ōtahi noa tātou.
’Ua hōro’a mai tō tātou Metua here i te Ao ra i te māramarama o te Mesia ia tātou nei. ’E i roto ia tātou tāta’itahi, tē tura’i nei te hō’ē ’āehuehura’a nō te ra’i mai ia tātou ’ia fāriu i tō tātou mata ’e tō tātou ’ā’au i ni’a iāna i roto i tō tātou tere nō te ho’i atu i tō tātou fare i te ra’i ra.
E tītau te reira i te ’ohipa. E’ita ’outou e tāpae i reira ma te ’ore e rohi nō te ha’api’i mai nō ni’a iāna, ’ia hāro’aro’a i tāna mau ha’api’ira’a, ’ia fa’a’ohipa māite i te reira, ’e ’ia tu’u i te hō’ē ’āvae i mua i te tahi.
’Aita, e ’ere te orara’a mai te hō’ē pere’o’o e tere noa ’ōna ana’e. E ’ere i te hō’ē manureva nāna iho e pairati iāna.
E’ita tā ’outou e nehenehe e painu noa i ni’a i te mau pape o te orara’a ’e ’a ti’aturi ai ē, nā te ’ōpape e ’āfa’i ia ’outou i te vāhi tā ’outou e hina’aro e haere. E tītau te ti’ara’a pipi ’ia ’au i ni’a i te tahera’a pape mai te mea e tītauhia.
E ’ere i te hōpoi’a nā te hō’ē ta’ata tō ’outou iho tere. E tauturu te Fa’aora ia ’outou ’e e fa’aineine i te ’ē’a i mua ia ’outou, te fafaura’a rā ’ia pe’e iāna ’e ’ia ha’apa’o i tāna mau fa’auera’a, nō roto mai ïa te reira ia ’outou. Nā ’outou ana’e te reira hōpoi’a, nō ’outou ana’e te ha’amaita’ira’a.
E tere rahi teie nō ’outou
’A ’ara i te pi’ira’a a tō ’outou Fa’aora.
’A pe’e iāna.
’Ua ha’amau te Fatu i Te Ekalesia ’a Iesu Mesia i te Feiā Mo’a i te mau Mahana Hōpe’a nei nō te tauturu ia ’outou i roto i teie fafaura’a ’ia tāvini i te Atua ’e i te ta’ata tupu. Tāna ’ohipa o te fa’aitoitora’a ïa, te ha’api’ira’a, te fa’ateiteira’a ’e te fa’aurura’a. E hōro’a mai te reira i te mau rāve’a ia ’outou ’ia fa’a’ohipa i te aroha, ’ia fa’atoro i te rima ia vetahi ’ē, ’e ’ia fa’a’āpī ’e ’ia ha’apa’o i te mau fafaura’a mo’a. ’Ua fa’ata’ahia te reira nō te ha’amaita’i i tō ’outou orara’a ’e ’ia ha’amaita’i i tō ’outou fare, tō ’outou oire ’e tō ’outou fenua.
Haere mai, ’a ’āmui mai ia mātou ’e ’a ti’aturi i te Fatu. Hōro’a i tō ’outou mau tāreni nō tāna ’ohipa fa’ahiahia. ’A fa’atoro i te rima, ’a fa’aitoito, ’a fa’aora ’e ’a pāturu i te mau ta’ata ato’a e hina’aro ’ia fāri’i ’e ’ia ha’apa’o i te hina’aro o tō tātou fare fa’ahiahia. E ’āmui ana’e i roto i teie tere hanahana nō te mau anuvera o te ra’i.
’Ua riro te ’evanelia ’ei poro’i fa’ahiahia nō te tīa’ira’a ’e te ’oa’oa. O te ’ē’a ïa ’e tae atu ai i te fare.
Mai te mea ’e fāri’i tātou i te ’evanelia mā te fa’aro’o ’e te ’ohipa, i te mahana tāta’itahi ’e i te mau hora ato’a, e ha’afātata marū noa atu ïa tātou i tō tātou Atua ra. E maita’i atu ā tō tātou orara’a, ’e e fa’a’ohipa te Fatu ia tātou mā te fa’ahiahia nō te ha’amaita’i i te feiā e ha’ati ra ia tātou, ’e nō te fa’atupu i tāna mau ’ōpuara’a mure ’ore. O teie to’u iteraa papû e te vaiiho nei au ia outou i ta’u haamaitairaa, na roto i te i‘oa o Iesu Mesia, amene.