Te mau parau mau faufa’a—Tō tātou hina’aro ’ia fa’a’ohipa
’Ua ’āfa’i mai te ’ōrama mātāmua ’e te peropheta Iosepha Semita i te ’ite ta’a ’ē ’e te parau mau o tei riro ’ei mea faufa’a rahi nō tō tātou ’oa’oa i roto i teie orara’a ’e i tō tātou fa’ateiteira’a.
I te hitura’a o tō’u matahiti, ’ua ui au i tō’u metua vahine, « ’Ia pohe ana’e ’oe ’e o vau ’e e haere tāua i te ra’i, ’o ’oe fa’ahou ānei ra tō’u metua vahine ? » ’Aita ’oia e tīa’i i te reira huru uira’a. Mā te pāhono ma’ita’i roa rā mai tāna i ’ite, ’ua parau ’oia : « aita, i te ra’i e mau tae’ae ’e e mau tuahine tātou. E ’ere fa’ahou vau tō ’oe metua vahine ». E ’ere te reira te pāhonora’a tā’u e tīa’i ra.
I te tahi taime i muri mai i te reira ’āparaura’a, ’ua haere mai nā e piti taure’are’a tāne i te ’ūputa o tō mātou ’utuāfare. Mā te hō’ē temeio, ’ua fāri’i tō’u metua tāne ia rāua ’ia tomo mai. ’Ua parau mai rāua e misiōnare rāua nō te ’Ēkālesia a Iesu Mesia i te Feiā Mo‘a i te Mau Mahana Hope’a Nei.
Teie nā elders, mai tā mātou i ha’api’i ’ia pi’i ia rāua, ’ua ha’amata i te ha’api’i i tō mātou ’utuāfare. Tē ha’amana’o maita’i nei au i tō mātou huru ’oa’oa ’e te ’ana’anatae i te mau taime ato’a ’a haere mai ai rāua i tō mātou ’utuāfare. ’Ua parau mai rāua ia mātou ē, ’ua haere te hō’ē tamaiti ’āpī i roto i te hō’ē uru rā’au nō te ani i te Atua tei hea te ’Ēkālesia mau ’e ’ua ’ite ’oia i te Atua ’e ia Iesu Mesia.1 ’Ua fa’a’ite mai te nā elders ia mātou i te hō’ē hōho’a nō teie ’ōrama ’e i tō’u ’itera’a i te reira, ’ua ’ite au ē ’ua ’ite mau o Iosepha Semita i te Atua, te metua ’e ia Iesu Mesia. ’Ua parau te mau misiōnare ē, nō te reira ’ōrama, tei ni’a fa’ahou te ’Ēkālesia mau a Iesu Mesia i te fenua nei.2
’Ua ha’api’i ato’a mai te mau misiōnare ia mātou i te fa’anahonahora’a a te Atua nō te ’oa’oa ’e ’ua pāhono mai i te mau uira’a a tō mātou ’utuāfare nō ni’a i te ha’apa’ora’a fa’aro’o. ’Ua ha’api’i mai rāua ’ia mātou ē, e nehenehe mau te mau ’utuāfare ’ia tāhō’ēhia i muri iho i teie orara’a, ’ei metua tane, metua vahine ’e mau tamāroa ’e mau tamāhine.
’Ua bapetizohia tō mātou ’utuāfare. Te purumu nō te taui i te mau peu tahito, te fa’aru’era’a i te mau parau tutu’u, ’e te rirora’a ’ei melo itoito nō te ’Ēkālesia, e mea fifi ri’i i te tahi taime. Terā rā, nō te aroha ’e te here o te Atua ’e mā te tauturu a te feiā fa’atere e rave rahi ’e te mau melo, ’ua rave mātou i te reira i te mau matahiti mātamua fifi.
Nō te mau mirioni o tei ’āmui mai i te ’Ēkālesia, ’oia ato’a e rave rahi o tei fa’afāriuhia ’e tei bapetizohia i te hepetoma ato’a, ’ua fāri’i i te hō’ē ’itera’a pāpū nō te ’ōrama mātāmua. E nehenehe te Vārua Maita’i e fa’a’ite pinepine ia tātou tāta’itahi ’a tūtava ai tātou i te ora i te mau parau mau ’ōhie o te ’evanelia a Iesu Mesia.
’Ua ’āfa’i mai te ’ōrama mātāmua ’e te peropheta Iosepha Semita i te ’ite ta’a ’ē ’e te parau mau o tei riro ’ei mea faufa’a rahi nō tō tātou ’oa’oa i roto i teie orara’a ’e i tō tātou fa’ateiteira’a i piha’i iho i te Atua. E fa’a’ite atu vau e toru o te mau parau mau tei noa’a ia tātou o te tītauhia ’ia fa’a’ohipa nō te mea ’ua tūturi te hō’ē tamaiti ’āpī mā te pure ha’eha’a.
’Ua pi’i te Atua i te mau peropheta nō te fa’atere ’e nō te arata’i ia tātou
Te hō’ē parau mau faufa’a roa tā tātou i ha’api’i mai nā roto i te ’ōrama mātāmua ’e te peropheta Iosepha Semita ’oia ho’i ’ua pi’i te Atua i te mau peropheta,3 te mau hi’o, e te mau heheu parau nō te ha’api’i, nō te arata’i, nō te fa’aara ’e nō te fa’atere ia tātou.4 Teie mau tāne e mau auvaha parau nō te Atua i ni’a i te fenua nei,5 mā te mana nō te parau ’e te ’ohipa i te i’oa a te Fatu.6 Mā te pe’e-māite-ra’a i tā rātou mau a’o e pāruruhia tātou ’e e fāri’i i te mau ha’amaitaira’a i mā’itihia i roto i tō tātou rāterera’a i te fenua nei.
’A haere ai au i te ha’api’ira’a tuatoru Brigham Young ’ei misiōnare ’āpī o tei fa’aoti, ’aita i fa’aipoipohia, ’ua haere atu vau i te hō’ē tuha’a purera’a autahu’ara’a nō te ’āmuira’a rahi i te fare menehenehe nō Temple Square. ’Ua a’o te peresideni Ezra Taft Benson, ’o ’oia te peresideni nō te ’Ēkālesia i te reira taime, i te misionare tāta’itahi tei fa’aoti i tāna misiōni, ’ia hi’o pāpū i te parau nō te fa’aipoipora’a ’e ’ia rave ’ei ’ohipa mātāmua roa i roto i tōna orara’a.7 I muri a’e te tuha’a purera’a, ’ua ’ite au e ti’a iā’u ’ia tātarahapa ’e te hina’aro ’ia rave i te a’o a te peropheta.
Nō reira, ’ua fa’aoti au e ho’i i tō’u fenua ’āi’a, i Peretīria, nō te ’imi i te hō’ē vahine fa’aipoipo. Nā mua i te ho’i atu i Peretīria nō te tau tāmatara’a ’ohipa e piti ’āva’e, ’ua niuniu vau i tō’u metua vahine ’e te tahi mau hoa ’e ’ua hāmani i te hō’ē tapura nō e 10 ti’ahapa tamāhine ’āpī—o rātou tāta’itahi e nehenehe e riro mai ’ei vahine fa’aipoipo.
I Peretīria, i muri a’e e rave rahi mau ferurira’a ’e mau pure, ’ua fārerei, ’ua mōmo’a ’e ’ua fa’ata’a vau i te hō’ē tai’o mahana nō te fa’aipoipo hō’ē o te mau tamāhine ’āpī i ni’a te tāpura. E ’ere i te taime nō te tūpa’i i te numera nō te mau pīahi i Provo, Utah, ’ia fārerei ’e ’ia mōmo’a, are’a rā, nō Peretīria, e mea ’ōhie roa ïa.
Tau ’āva’e i muri mai, ’ua fa’aipoipo vau ia Elaine O ’oia te here o tō’u ora ’e te hō’ē ha’amaita’ira’a mā’itihia.
’Aita vau e parau nei, ’ia hāmani te tā’āto’ara’a i te hō’e tāpura, te parau nei rā vau—hau atu i te parau noa—’ia rave noa tātou ’ia parau ana’e mai tō tātou mau peropheta ora.
Te peropheta a te Atua i teie mahana ’o te peresideni Thomas S. Monson, ’e e ha’amaita’ihia tātou ’ia pe’e ana’e i tāna a’o mā te ha’apa’o maita’i.
Te ’itera’a i te natura mau ’o te Atua.
Te tahi atu parau mau tā tātou e ha’api’i mai nō roto mai i te ’ōrama mātāmua ’e te peropheta Iosepha Semita o te natura mau ïa o te Atua. ’A feruri nā nāhea tātou i ha’amaita’ihia i te ’itera’a ē, e tino ’i’o ’e te ’ivi tō te Atua mai te au i tō te ta’ata nei te huru,8 o tā tātou nehenehe e ha’amori i te hō’ē Atua mau, o tā tātou e nehenehe e ta’a, ’e o tei fa’a’ite mai ’e o te heheu mai iāna iho ’e tāna tamaiti i te mau peropheta—te mau peropheta o te tau tahito ’e i teie ato’a tau hope’a nei.9 E Atua ’oia o te fa’aro’o ’e o te pāhono mai i tā tātou mau pure ;10 te hō’ē Atua o te hi’o mai nei ia tātou nā ni’a mai i te ra’i11 ’e o te ha’ape’ape’a noa nei nō tō tātou huru pae vārua ’e pae tino ; te hō’ē Atua o tei hōro’a ia tātou i te ti’amāra’a ’ia mā’iti tātou iho ’ia pe’e iāna ’e ’ia ha’apa’o i tāna mau fa’auera’a mā te fa’ahepo ’ore ;12 te hō’ē Atua o te hōro’a ia tātou i te mau ha’amaita’ira’a ’e o te fa’ati’a ia tātou ’ia tāmatahia ’ia nehenehe ia tātou ’ia ha’ere i mua ’e ’ia riro mai iāna te huru.
E Atua here ’oia o tei hōro’a mai i te hō’ē fa’anahora’a e nā reira tātou e nehenehe ai e fāri’i i te ’oa’oa i roto i teie orara’a ’e a muri noa atu.
’O Iesu Mesia tō tātou Fa’aora
Nā roto i te ’ōrama mātāmua ’e te peropheta Iosepha Semita, e fāri’i tātou i te ’ite nō nō te misiōni mau ’e te mo’a a te Fatu o Iesu Mesia, ’o ’oia te ’ōfa’i tihi nō tā tātou ha’apa’ora’a fa’aro’o.
Nō te mea ’ua fa’aōhia mai te pohe i te ao nei, e mea pāpū maita’i mai tā tātou e ora nei, e pohe pā’āto’a tātou i te hō’ē mahana. Hō’ē o te mau hope’a o te pohe, ’oia ho’i te fa’aru’era’a i tō tātou tino tāhuti, e’ita roa tātou e nehenehe e rave fa’ahou mai te reira. Hau atu, nō te mea ’ua hara pā’āto’a tātou i roto i tō tātou tere i te fenua nei, e’ita roa tātou e nehenehe fa’ahou e ho’i i mua i te aro o tō tātou Metua i te ao ra.
E nehenehe ānei ’outou e feruri i te mau hope’ara’a ’ia ’ore roa atu e ho’i i mua i te ’aro o te Atua ’e mā te ’ore roa e fāri’i i te hō’ē tino ?
E hina’aro-mau-hia te hō’ē Fa’aora ’e te hō’ē Ora nō te fa’aora ia tātou i te pohe ’e te hara. I raro a’e i te fa’aterera’a a te Metua i te ao ra, ’ua haere mai Iesu Mesia i ni’a i te fenua nei, ’ia mamae, ’ia pohe i ni’a i te sātauro ’e ’ua ti’afa’ahou mai ’ia nehenehe ia tātou ’ia ti’afa’ahou ato’a ’e mā te tātarahapa mau ’e te ravera’a ’e te ha’apa’ora’a i te mau fafaura’a mo’a, ’e ’ia ho’i fa’ahou i mua i te ’aro o te Atua.
’Ua fa’ata’a mai o Iakoba, « E te rahi o te maita’i o tō tātou Atua ē, o tei fa’atupu i te rāve’a e ora ai tātou i te harura’a a taua mea rahi ri’ari’a ra ; ’oia ia, taua mea rahi ra, o te pohe, ’e o hade, tei parauhia e au i te pohe o te tino, ’e te pohe ato’a ho’i o te vārua ».13
O Iesu te Mesia i fafauhia, te Horo’a Ture, te Mo’a i ’Īsera’ela, tō tātou Fatu, tō tātou Fa’aora, tō tātou Ora, tō tātou Ari’i, tō tātou Tā’āto’a.
’A tāmau ā tātou i te ’ohipa i ni’a i teie mau parau mau ’e mau ’ite faufa’a, mā te hōro’ara’a i tō tātou ha’apa’o i te Atua ’e i tāna Tamaiti here. I te i‘oa o Iesu Mesia, ’āmene.