O Le Tusi a Mamona: Faamata e Faape’i Lou Olaga e aunoa ma Ia?
I se ala sili ona faavavega ma tutasi, o loo aoao mai e le Tusi a Mamona i tatou e uiga ia Iesu Keriso ma Lana talalelei.
I le 1986, sa valaaulia ai a’u e tuu atu se aoaoga faapitoa i se iunivesite i Accra, Kana. O iina na ou feiloai ai i le toatele o tagata maualuluga, e aofia ai se tupu o se ituaiga o Aferika. A o matou feiloai ai a o lumanai le aoaoga, sa saunoa mai ai le tupu ia te a’u e ala mai i lana faamatalaupu, lea na ia faaliliuina mo a’u. Sa ou tali atu i le faamatalaupu, ona faaliliu atu lea e le faamatalaupu a’u tali i le tupu.
Ina ua maea la’u aoaoga, sa susu sa’o mai lava le tupu ia te a’u, ae o le taimi la lea sa le o i ai lana faamatalaupu. I lo’u te’i, sa ia saunoa mai i se Igilisi lelei atoa—o le Igilisi a le Tupu Tamaitai, ou te faaopoopo atu!
Sa foliga mai na le mautonu le tupu. “O ai ea oe?” sa ia fesili mai ai.
Sa ou tali atu, “O a’u o se Aposetolo faauuina a Iesu Keriso.”
Sa fesili mai le tupu, “O le a se mea e mafai ona e aoaoina ai a’u e uiga ia Iesu Keriso?”
Sa ou tali atu i se fesili: “E mafai ona ou fesili atu po o le a se mea ua e iloaina e uiga ia te Ia?
Sa iloa i le tali a le tupu o ia o se tagata suesue moni o le Tusi Paia ma o se tasi e alofa i le Alii.
Ona ou fesili atu lea i ai pe o ia silafiaina le galuega a Iesu Keriso i tagata i Amerika anamua?
E pei ona ou faamoemoeina, na te lei iloaina.
Sa ou faamalamalama atu i ai i le mavae ai o le Faasatauroga ma le Toetu o le Faaola, sa Ia afio mai i tagata o Amerika anamua, lea na Ia aoaoina i Lana talalelei. Sa Ia faatulagaina Lana Ekalesia ma faatonu Ona soo e tausi se faamaumauga o Lana galuega ia i latou.
“O lena faamaumauga,” sa ou faamatala atu, “o le mea ua matou iloa o le Tusi Mamona. O se tasi molimau ia Iesu Keriso. O se soa o tusitusiga paia i le Tusi Paia.”
I lea taimi, sa oo ina matua naunau mai lava le tupu. Sa ou liliu atu i le peresitene o le misiona na ma toalua ma fesili atu i ai po o i ai se isi ana kopi o le Tusi a Mamona ia te ia. Sa ia aumaia se kopi mai lana atopa’u.
Sa ou susueina i le 3 Nifae mataupu 11, ma sa ma faitaua faatasi ma le tupu le lauga a le Faaola ia sa Nifaē. Ona ou foai atua lea o le kopi o le Tusi a Mamona ia te ia. O lana tali na teufatu i lo’u mafaufau ma lo’u loto e faavavau. “Sa ono mafai ona e foai maia ni taimane ma ni penina, ae e leai ma se mea e sili atu lona taua ia te a’u nai lo lenei malamalama faaopoopo e uiga i le Alii o Iesu Keriso.”
I le mavae ai ona lagonaina o le mana o fetalaiga a le Faaola i le 3 Nifae, sa folafola mai ai e le tupu, “Afai ou te liliu mai ma auai i le Ekalesia, o le a ou aumaia lo’u ituaiga atoa faatasi ma a’u.”
“Oi, lau susuga i le Tupu,” sa ou tali atu ai, “e le faapena le ala e fai ai. O le liuaina o se mataupu faaletagata lava ia. Sa auauna atu le Faaola ia sa Nifaē, e taitoatasi. E tofu maua e tagata taitoatasi se tautinoga ma se molimau o le talalelei a Iesu Keriso.”
O’u uso e ma tuafafine, o le a le taua o le Tusi a Mamona ia te oe? Afai e ofo atu ia te oe ni taimane po o ni penina po o le Tusi a Mamona, o le a le mea e te filifilia? Ma le faamaoni, o le a le mea e sili atu lona taua ia te oe?
Manatua i le sauniga o le taeao o le Aso Sa o le konafesi aoao ia Aperila 2017, sa aioi mai ai Peresitene Thomas S. Monson ia i “tatou taitoatasi ia suesue ma le agaga tatalo ma mafaufau loloto i le Tusi a Mamona i aso taitasi.” E toatele sa tali atu i le augani a lo tatou perofeta.
Se’i ou fai atu, ou te le’i iloaina pe na iloa foi e Riley e valu tausaga le matua sa pu’eina e se tasi lo ma ata. Ia matau o loo faitauina e Riley lana Tusi a Mamona faatasi ma le fesoasoaniga a se faailogatusi “O A’u o se Atalii o le Atua.”
E tupu se mea mamana pe a saili atu se atalii o le Atua ia iloa atili e uiga ia te Ia ma Lona Alo Pele. E leai ma se isi mea o loo manino ma mamana atili ai le aoaoina o na upumoni nai lo le Tusi a Mamona.
Talu mai lava le lu’i a Peresitene Monson i le ono masina ua mavae, sa ou taumafai ai lava e mulimuli i lana fautuaga. Faatasi ai ma isi mea, ua ou faia ni lisi o mea e uiga i le Tusi a Mamona, o mea na te faamautuina, o mea na te faamaoniaina le sese, o mea na te faataunuuina, o mea na te faamaninoina, ma mea na te faaalia mai. O le suesueina o le Tusi a Mamona i lena auala ua avea ma se faatinoga malamalama ma musuia! Ou te fautuaina atu ia te outou taitoatasi.
I le taimi o nei masina e ono, sa ou valaaulia ai foi ni vaega eseese—e aofia ai le Usoga i le Korama a le Toasefululua, o faifeautalai i Chile, ma peresitene o misiona ma o latou faletua na potopoto i Atenitina—ia mafaufau i ni fesili fesootai se tolu lea ou te uunaia outou e mafaufau i ai i le asō.
Muamua, faamata e faapei lou olaga e aunoa ma le Tusi a Mamona? Lua, o le a se mea o le a e le iloaina? Ma le tolu, o le a se mea o le a e le mauaina?
O tali faagaeetia mai nei vaega sa o mai sa’o mai o latou loto. O nisi nei o o latou manatu faaalia:
“A aunoa ma le Tusi a Mamona, o le a ou le mautonu e uiga i aoaoga ma manatu feteenai e uiga i le tele o mea. O le a pei lava a’u o le taimi ae ou te lei mauaina le Ekalesia, a o ou saili mo le malamalama, faatuatua, ma le faamoemoe.”
Fai mai le isi tagata: “Semanu ou te le iloa e uiga i le matafaioi a le Agaga Paia e mafai ona faia i lo’u olaga.”
O le isi: “Semanu ou te le malamalama manino i lo’u faamoemoega iinei i le lalolagi!”
Fai mai le isi tali: “Semanu ou te le iloa o loo i ai se alualu i luma faifai pea pe a mavae lenei olaga. Ona o le Tusi a Mamona, ua ou iloa ai o loo i ai moni lava se olaga pe a mavae le oti. O le sini laualuga lena lea o loo tatou tausinio nei i ai.”
O le tali mulimuli na ou mafaufau ai i lo’u olaga i le tele o tausaga ua alu a o avea ma se fomai tipitipi talavou. O se tasi o tiutetauave mamafa e tauave e se fomai tipitipi, i nisi taimi, o le faailoa atu lea i le aiga pe a maliu se tasi e pele. I se tasi falemai na ou faigaluega ai, sa fausia ai se potu faapitoa i puipui e utu i momi lea e mafai ai e tagata o aiga ona talia se tala faapea. O iina, e faailoa ai e nisi tagata lo latou faavauvau i le tatu’iina o o latou ulu i na puipui momi. Oka so’u faanaunau e aoao atu i na tagata o le oti, e ui e faigata mo e pele o loo ola, ae o se vaega talafeagai o lo tatou ola pe a mavae le oti. E faataga e le oti i tatou ia agai atu i le isi lalolagi.
Sa fai mai le isi tali i la’u fesili: “Sa leai so’u olaga seia oo ina ou faitauina le Tusi a Mamona. E ui sa ou tatalo ma alu i la’u lotu i lo’u olaga atoa, ae sa fesoasoani le Tusi a Mamona ia te a’u e fesootai moni ai lava ma le Tama Faalelagi mo le taimi muamua.”
Fai mai le isi tagata: “Ana leai le Tusi a Mamona, semanu ou te le malamalama sa lei gata na puapuaga le Faaola mo a’u agasala, ae e mafai foi ona Ia faamaloloina o’u tiga ma faanoanoaga.”
Ae fai mai foi le isi: “Semanu ou te le iloaina o loo i ai ni perofeta o loo taitaia i tatou.”
O le faatofuina soo o i tatou i upumoni o le Tusi a Mamona e mafai ona avea ma aafiaga e suia ai le olaga. O se tasi o afafine o le ma atalii o loo faamisiona, o Sister Olivia Nelson, sa folafola atu i se tagata sailiili afai na te faitauina le Tusi a Mamona i aso taitasi, o le a faaleleia ana togi o suega i le iunivesite. Sa ia faitaua, ma sa lelei ona togi.
O’u uso e ma tuafafine pele, ou te molimau atu o le Tusi a Mamona o le afioga moni lava a le Atua. O loo i ai tali i fesili sili ona taua o le olaga. O loo aoaoina ai le mataupu faavae a Keriso. O loo faalauteleina ma faamanino ai le tele o upumoni “faigofie ma taua” ia na leiloloa i le tele o seneturi o taimi ma le anoanoai o faaliliuga o le Tusi Paia.
Ua tuuina mai e le Tusi a Mamona le atoatoaga ma le malamalama sili ona mausali o le Togiola a Iesu Keriso e maua i soo se mea. O loo aoao mai ai le uiga moni o le toe fanauina. Mai le Tusi a Mamona tatou te aoao ai e uiga i le faapotopotoina o Isaraelu ua faataapeapeina. Ua tatou iloa le mafuaaga ua tatou i ai iinei i le lalolagi. O upumoni nei ma isi upumoni e sili ona aoao atu ma le mamana ma le faatauanau i le Tusi a Mamona nai lo se isi lava tusi. O le mana atoa o le talalelei a Iesu Keriso o loo i ai i totonu o le Tusi a Mamona. Periota.
O loo faamanino uma e le Tusi a Mamona aoaoga a le Matai ma faailoa atu ai togafiti a le fili. O loo aoao e le Tusi a Mamona le aoaoga faavae moni e soloia ai uputuu faalelotu sese—e pei o faiga masani sese o le faatinoina o le papatisoga o tamaiti. Ua maua i le Tusi a Mamona le faamoemoega i le olaga e ala i le uunaiaina o i tatou e mafaufau loloto i le gafatia o le ola e faavavau ma le “fiafia e le gata.” Ua talepeina e le Tusi a Mamona talitonuga sese e faapea e mafai ona maua le fiafia i le amioleaga ma o le lelei o le tagata lava ia na o le pau lena o le mea e manaomia e toefoi atu ai i le afioaga o le Atua. Ua nutipalaina ai e faavavau ia manatu sese e faapea na muta faaaliga i le Tusi Paia ma o loo tapunia le lagi i aso nei.
A ou mafaufau i le Tusi a Mamona, ou te mafaufau i le upu mana. O upumoni o le Tusi a Mamona ua i ai le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga.
O’u uso e ma tuafafine pele, ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—i aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu ua punitia ai le mafaufau i mea faaleagaga.
Soo se taimi lava ou te faalogo ai i se tasi, e aofia ai ma a’u lava ia, o faapea, “Ou te iloa e moni le Tusi a Mamona,” e oso lava lo’u fia alaga atu, “E manaia tele, ae le lava lena!” E manaomia ona tatou lagonaina, i le loloto i le “taele” o o tatou loto, o le Tusi a Mamona e manino lava o le afioga a le Atua. E tatau ona tatou lagonaina le o’oo’o lea tatou te le mananao ai lava e ola i se aso e aunoa ma le tusi. Ou te toe fia faaupuina le saunoaga a Peresitene Polika Iaga, ina ua saunoa, “Ou te manao i laulaufaiva o faititili e fitu, ina ia fafaguina i luga tagata” i le upumoni ma le mana o le Tusi a Mamona.
E manaomia ona tatou pei o lenei faifeautalai talavou o loo auauna i Europa lea sa lagonaina tele le loloto o le moni o le Tusi a Mamona lea na ia tamoe sa’o atu ai ma se kopi o lenei faamaumauga paia i se alii i se paka lea faatoa la mauaina ma lana soa.
Ou te molimau atu o Iosefa Samita sa avea, ma o le perofeta o lenei tisipenisione. O ia lava lea, e ala i le meaalofa ma le mana o le Atua, sa faaliliuina lenei tusi paia. O le tusi lenei o le a fesoasoani i le sauniaina o le lalolagi mo le Afio Mai Faalua o le Alii.
Ou te molimau atu o Iesu Keriso o le Alo moni ma soifua o lo tatou Atua soifua. O Ia o lo tatou Faaola, lo tatou Togiola, lo tatou Faataitaiga sili, ma lo tatou Puluvaga i le Tama. O Ia le Mesia folafolaina, le Mesia i la le tino, ma o le a avea ma Mesia o le meleniuma. Ou te molimau atu ma lo’u agaga atoa i se ala sili ona faavavega ma tutasi, o loo aoao mai e le Tusi a Mamona i tatou e uiga ia Iesu Keriso ma Lana talalelei.
Ou te iloa o Peresitene Thomas S. Monson o le perofeta a le Atua i le lalolagi i aso nei. Ou te alofa ia te ia ma lagolagoina o ia ma lo’u loto atoa. Ou te molimau atu ai i le suafa o Iesu Keriso, amene.
Lisi o le Tusi a Mamona a Peresitene Nelson
O Le Tusi a Mamona o le:
-
O se tasi o molimau ia Iesu Keriso. O ona tusitala autu o—Nifae, Iakopo, Mamona, Moronae—ma o lana faaliliu upu, o Iosefa Samita, o i latou uma o molimau ola a le Alii.
-
O se faamaumauga o Lana galuega i tagata na nonofo i Amerika anamua.
-
E moni, e pei ona faamaonia e le Alii lava Ia.
O Le Tusi a Mamona ua faamautuina:
-
Le faasinomaga patino o le Tama Faalelagi ma Lona Alo Pele, o Iesu Keriso.
-
O le manaomia o le Pa’u o Atamu ma le poto o Eva, ina ia maua e tagata le olioli.
O Le Tusi a Mamona ua faamaoniaina le sese o manatu e faapea:
-
Na muta faaaliga i le Tusi Paia.
-
E manaomia ona papatisoina tamaiti.
-
E mafai ona maua le fiafia i le amioleaga.
-
Ua lava le lelei o le tagata ia mo le faaeaga (e manaomia sauniga ma feagaiga).
-
O le Pa’ū o Atamu ua leaga ai tagata uma i le “uluai agasala.”
O Le Tusi a Mamona ua faataunuu ai valaoga faatusi paia e faapea:
-
E faalogo foi “isi mamoe” i Lona leo.
-
O le a faia e le Atua “se galuega ofoofogia ma se mea e ofo ai,” i le fetalai “mai le efuefu.”
-
O le “laau a Iuta” ma le “laau a Iosefa” o le a tasi.
-
O le a faapotopotoina Isaraelu ua faataapeapeina “i aso e gata ai” ma le auala o le a faia ai lena mea.
-
O le nuu o le tofi mo le gafa o Iosefa o le Itulagi i Sisifo.
Ua faamanino e le Tusi a Mamona malamalamaaga e uiga:
-
I lo tatou muai olaga.
-
Oti. O se vaega taua o le fuafuaga sili o le fiafia a le Atua.
-
O le olaga pe a oo mai le oti, lea e amata i le parataiso.
-
O le toetu o le tino, toe tuufaatasia ma lona agaga, e avea ai ma agaga ola pea.
-
O le faamasinoina o i tatou e le Alii o le a fua i a tatou galuega ma manaoga o o tatou loto.
-
O le auala e faatino tatau ai sauniga: mo se faataitaiga, papatisoga, faamanatuga, faaeega o le Agaga Paia.
-
O Le Togiola a Iesu Keriso.
-
O Le Toetu.
-
O le matafaioi taua a agelu.
-
O le natura faavavau o le perisitua.
-
O le auala e faatosina atili ai amioga faaletagata soifua e le mana o le upu nai lo le malosi o le pelu.
O le Tusi a Mamona ua faaalia mai faamatalaga sa lei iloaina muamua:
-
Sa faatinoina papatisoga a o lei soifua mai Iesu Keriso.
-
Sa fausiaina malumalu ma faaaogaina e tagata i Amerika anamua.
-
O Iosefa, le atalii lona 11 o Isaraelu, na muai vaaia le matafaioi faaperofeta o Iosefa Samita.
-
Sa muai vaaia e Nifae (i le 600–592 TLM) le mauaina ma le nofoia o Amerika.
-
O vaega faigofie ma taua o le Tusi Paia na leiloloa.
-
O le Malamalama o Keriso e tuu atu i tagata taitoatasi.
-
O le taua o le faitalia o le tagata lava ia ma le manaomia mo se faafeagai o mea uma.
-
O lapataiga e uiga i “pulega faalilolilo.”