“Tiko Vata kei Ira ka Vakaukauwataki Ira”

Mai vei Elder Jeffrey R. Holland

Ena Kuoramu ni iApositolo Le Tinikarua

Na neimami masu nikua sai koya mo ni na biuta yani na koniferedi raraba oqo ko ni sa soli kemuni vakatitobu cake na tagane kei na yalewa yadua me da veikauwaitaki mai vuniyaloda.

Meu tomana mada na vosa nei Ralph Waldo Emerson, “Na veigauna guilecavi dredre ena noda bula sai koya na gauna eda vakila kina na veidrigiti totolo ni vakatakila. Peresitedi Nelson, au sega ni kila e vica na “veidrigiti totolo” keimami rawa ni taura rawa na mua ni macawa oqo.Eso vei keimami e uto malumalumu. Ia, au kila o na rawa ni veivuke ena kena qaravi. Sa dua dina na parofita, o kemuni!

Ena yalo ni nona veivakaroti kei na ivakadinadina vakasakiti o Peresitedi Russell M. Nelson ena bogi kei na mataka oqo, au wasea na noqu ivakadinadina ni veisau era mai yaco oqo e ivakaraitaki ni vakatakila ka sa dusimaki tiko kina na Lotu oqo mai nai vakatekivu ni gauna. Era sa ivakadinadina ni sa vakusakusataka tiko na Turaga na Nona cakacaka ena gauna oqo.

Vei ira kece era gadreva me ra vulica na ivakamatailalai ni veika oqo, mo ni kila tiko ni oti saraga na soqoni ni koniferedi oqo, ena tekivutaki ena kena vakauyani na ivola mai na Mataveiliutaki Taumada vei ira na lewe ni Lotu yadua, ka tiko vei keitou na nodra itikotiko ni imeli. Nai tukutuku ka 7 na kena draunipepa me baleta na taro kei na isaunitaro era na sema vata tiko yani me baleti ira na iliiuliu ni matabete kei na veimataisoqosoqo. Kena iotioti, era sa tabaki toka nai matalalai ni veika oqori ena gauna saraga oqo ena ministering.lds.org. “Dou kerekere, ka na soli vei kemudou; dou vakasaqara ka dou na kunea.”

Sa da na raica yani na gauna oqo na ilesilesi totoka sa solia o Peresitedi Russell M. Nelson vei keirau kei Sister Jean B. Bingham. Kemuni na Taciqu kei na ganequ, me vaka sa matata tiko ni sa matua cake mai na cakacaka ni veimataisoqosoqo ena Lotu, e muria talega mai ni sa dodonu me da sa matua cake talega o keda na tamata yadua—me da ulabaleta na tamata yadua na itovo ni veiqaravi vakamisini sega na yalona ki na veiqaravi vakatisaipeli mai vuniyaloda ka kena ivakaraitaki na iVakabula ni mai cava Nona veiqaravi e vuravura. Ni vakarau me biuta na ilala lailai sega ni matua, ka se veilecayaki tu, era dau muri Koya, a sega ni biuta vei iratou e dua na iwiliwili ni ikalawa ni veiqaravi vakaveiliutaki me ra muria, se solia vei ira e dua na binibini ripote tolu na ilavelave me vakaleweni.E sega, a umana o Koya na nodratou itavi ena dua ga na ivakaro bibi: “Dou veilomani; me vaka au sa lomani kemudou. … “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”

Ena sasaga me da volekata yani na vakasama vakosipeli oya, na iwalewale kacivaki vou ni veiqaravi ni matabete kei na iSoqosoqo ni Veivukei na veika oqo, eso vei ira eratou sa qarava tiko ena iwalewale vakasakiti na iSoqosoqo ni Veivukei.

Eda sa na sega tale ni vakayagataka na ivosavosa ni veituberi kei na siko vuvale. Oqori e vuna vakatikina ni levu na sasaga ni veituberi ena vakayacori ena vanua tale eso ka sega ena vuvale vakakina na noda veitaratara ena sega ni vakavulici kina na lesoni vakarautaki, e dina ni na dau wasei e dua na lesoni kevaka e gadrevi me vakakina. Na veitikina matailalai, na inaki taumada ni nodra tuberi o ira eda veitaratara kina sai koya, me vaka a tukuni me baleti ira na tamata ena gauna nei Alama, “me ra qaravi ira kina na nodra tamata, ka vakani ira ena veika ni buladodonu.”
Eda na ia tikoga ena siko vuvale ena gauna e rawa kina, ia na ituvaki eso ena veivanua me vaka na iwiliwili levu, na yawa ni vanua, na taqomaki ni tamata yadua, kei na bolebole tale eso e rawa ni tarova na sikovi ni vuvale yadua e veivula. Me vaka e veivakasalataki kina na Mataveiliutaki Taumada ena vica na yabaki sa oti, mo cakava na kena vinaka duadua o rawa ni rawata. Me ikuri ni ituvatuva cava ga o vakarautaka me baleta na veisiko, e rawa ni veivuke ena ituvatuva oqori na talevoni, itukutuku volai, tukutuku vakau ena talevoni, imeli, veivosaki ena vidio, veitalanoa mai valenilotu, cakacaka vata ena veiqaravi, itaviqaravi ni veimaliwai kei na veika tale e rawa ni caka mai na tabana vakaitukutuku raraba rabailevu. Ia, e dodonu meu vakabibitaka ni rai rabailevu oqo ni veitaratara e segani okati kina na ivakarau vakamadua au a raica ena dua na gauna lekaleka sa oti ena muaimuri ni dua na motoka. E vaqo, “Keu vakatagi sici, e vale o sa vakavulici.” Yalovinaka, yalovinaka sara, kemuni na taciqu tagane (o ira na marama era na sega ni vakayacora na veika oqo—au vosa tiko vei kemuni na tagane kei na turaga ena Lotu), mai na veisau eso oqo keitou gadreva me vakalevutaki cake na kauwai kei na veikaroni, me kua ni lailai.
Ena iwalewale vou ni veituberi yavutaki ena kosipeli oqo, au vakila ni sa tekivu me lomaleqataki na veika me na wili ena ripote. Vakacegu, baleta sa sega ni dua na ripote—o koya mada ga ena ika 31 ni siga, na ripote ni “Oisou! voleka sara niu calata” Eda saga tale tiko ga eke meda sa matua cake sara. Na ripote ga ena caka sai koya na iwiliwili ni veivakatarogi era vakayacora na iliuliu vei ira na veitokani ni veiqaravi ena tabanalevu ena vulatolu oya. Ena rogorogo rawa beka oqori, ia vei kemuni noqu itokani, na veivakatarogi oqo era tiki bibi sara. Kevaka e sega na veitukutuku oqori ena sega vei bisopi na sala me ciqoma kina na itukutuku me baleta na nodrai tuvaki vakayalo ka vakayago talega na nona tamata. Nanuma oqo: na turaga veiqaravi era matataka na Matabisopi kei na mataveiliutaki ni talatala qase; era sega ni sosomitaki ira. Na idola ni bisopi kei na peresitedi ni dua na kuoramu e lako sivita sara na parokaramu ni veiqaravi oqo.
Baleta na ripote oqo e duidui mai na veiripote o sa solia yani ena veigauna sa oti, meu vakabibitaka mada ni o keimami ena itikotiko liu ni Lotu keimami sega ni gadreva me keimami kila na sala cava se vanua cava se gauna cava o ni veitaratara tiko kina kei na nomuni tamata, keimami kauwaitaka tiko mo ni cakava ka o ni vakalougatataki ira ena veisala cava ga o rawata.

Kemuni na taciqu kei na ganequ, e dua noda madigi soli mai lomalagi eke me vakaraitaki na lotu savasava ka sega ni cala ena mata ni Kalou”—“me da qaravi ira na yada kei na sega ni vakatamani,” o ira na vakawati kei ira e sega, o ira era kaukauwa kei ira na lomaleqa, o ira na malumalumu kei ira na waribariba, na marau kei ira era rarawa—kena lekaleka ga, o keda kece, baleta eda gadreva kece na liga raragi ni veitokani ka rogoca na itukutuku dei ni vakabauta. Ia, mo ni qaqarauni kina, e dua na yaca vou, na veisau vou, na lailai sobu ni ripote ena sega ni kauta mai e dua na onisi na veisau ena noda veiqaravi vakavo kevaka eda raica oqo me dua na veisureti me da veikauwaitaki ena dua na ivakarau qaqa vou savasava cake. Ni da laveta na matada vakayalo me bulataki vakararaba na lawa ni loloma, eda sa vakananumi ira na itabatamata era a veiqaravi vaqori ena veiyabaki. Meu cavuta mada e dua na ivakaraitaki wale toka ga oqo ni yalodina vakaoqo ena vakanuinui ni na lewevuqa era na kukuva na ivunau ni Turaga “me ra dau vukei ira ka vakaukauwataki ira” na tacida kei na ganeda.

Ena dua na Sigatabu, ena ika 14 ni Janueri sa oti, ni oti toka vakalailai na 5 ena yakavi, erau veitalanoa tiko ena nodrau itikotiko mai Tempe, Arizona, na noqu itokani gone o Brett kei Kristin Hamblin, ni oti mai nona veiqaravi ena matabisopi o Brett kei na nona veiqaravi o Kristin vei iratou na lima na luvedrau.

Vakasauri nona bale sobu ka sega tale ni qai yavala o Kristin, e dua ka vaka ni sa bula rawa mai na kenisa ni sucu ena yabaki i liu. Na qiri ki na 911 e kauta mai e dua na timi ni veiqaravi ena leqa vakasauri ka tovolei me ratou vakabulai koya. Ni masu ena vakatakekere o Brett, a qirita vakatotolo e rua tale na naba ni talevoni: dua vei tinana ka kerea kina nona veivuke vei iratou na gone, kena ikarua vei Edwin Potter, nona dauveituberi vakavuvale. Na taucoko ni veitalanoa e muri e vaqo:

O Edwin, ni sa raica na ivakatakilakila nei koya e qiri mai, e kaya, “Io, Brett, sa vakacava?”

Kena isau voleka ni kailavaki mai vei Brett: “Au gadrevi iko eke—ena gauna oqo!”

Ena vica ga na miniti e rawa ni wilika o Brett, sa tu e yasana nona itokani matabete, veivuke vei iratou na gone ka draivataki Baraca Hamblin ki valenibula e daku ni lorinibula e kauti watina tiko. E kea, ni voleka ni 40 na miniti mai na imatai ni gauna e bobo kina na matana ena imatai ni gauna, sa tukuna mai o vuniwai ni sa mate o Kristin.

Ni tagi o Brett, a tauri koya toka e ligana o Edwin ka tagi vata kei koya—ena dua na gauna balavu. Oti, ni laivi Brett toka me lolosi vata kei ira na vo ni lewe ni matavuvale, a lako o Edwin ki na vale nei Bisopi me tukuna na veika sa yaco. A lako ena gauna vata ga o bisopi ki valenibula ni gole yani o Edwin ki na nodratou vale na Hamblin. E vakaga ni rau cici mai, o koya kei watina, o Charlotte, erau mai qito tu kei iratou na 5 na gone ena matavuvale na Hamblin, ka sa takali o tinadratou, eratou yabaki 12 sobu mai ki na 3. Erau vakani iratou na gone ena yakavi oya, ka vakatara me ratou taba piano me rau vakarogoca, ka qai vakarautaki iratou me ratou sa moce.

Qai tukuna malua vei au e muri o Brett, “na tikina vakurabuitaki ena italanoa oqo e sega ni nona lako mai o Edwin niu qiri yani. Ena dua na leqa tubukoso, era tu na tamata era sa vakarau tu me ra veivuke. Sega, na ka vakurabui ena italanoa oya ni o koya na tamata au nanuma mai. Era tu tale eso na tamata. Erau tiko e dua na ganei Kristin kei tacina voleka ga ni tolu na maile. E dua tiko neitou bisopi talei, ka tamata totoka sara. Ia na keirau isema voleka kei Edwin e vakavuna meu nanumi koya ga mai liu meu qirita ena gauna au gadreva kina na veivuke. E vakarautaka vei keda na Lotu e dua na ivakarau tuvai matau me da bulataka vakavinaka cake kina na ikarua ni ivunau—me da loloma, veiqaravi, ka tara cake na isema vei ira na tacida kei na ganeda ka na vukea me da voleka cake yani vua na Kalou.”

E kaya kina o Edwin baleta na ka a yaco oqo, “Na itukutuku ena veika kece oqo ni balavu cake nona dauveituberi tu mai ni neitou matavuvale o Brett mai na noqu a tubera tiko na nona. Ena veigauna kece oqori, e levu cake nona sikovi keitou vakaitokani mai na itavilesi. E dua na ivakaraitaki cecere o koya, na ivakaraitaki ni ivakarau e dodonu me tu vua e dua na matabete bulabula ka ogaoga. Na watiqu, o rau na neirau gonetagane, kei au keitou sega ni raici koya me dua e vakaitavitaki me kauta mai e dua na itukutuku ena mua ni vula yadua; keitou dau raici koya ni dua na itokani ka vakaitikotiko mai mua ni sala kei na iwavoki, ka na cakava e dua ga na ka e vuravura oqo me vakalougatataki keitou. Au marau ni rawa meu bau sauma lesu vakalailai na noqu dinau vua.”

Kemuni na taciqu kei na ganequ, au duavata kei kemuni ena nodra vakacaucautaki na dauveituberi kei na dausiko vuvale era a loloma ka veiqaravi ena yalodina ena ivakarau oqo ena kena itukutuku kece sara. Sa noda masu nikua me ra na biuta yani na koniferedi raraba oqo na tagane kei na yalewa—kei ira na noda cauravou kei na goneyalewa itabaqase—era sa yalataka vakatitobu cake me ra dau veikauwaitaki mai vuniyalodra, ena vakayarayarataki walega ni loloma savasava i Karisito. E dina ga ni tu na noda veimalumalumu kei na ivakarau sega ni veiganiti, meda qai veiqaravi veitikivi tiko kei na Turaga ena nona were ni vaini, ena noda solia tiko vua na Kalou na Tamada kece na liga ni veivuke ena Nona itavi veivakaocai ni sauma tiko noda masu, vakarautaka na vakacegu, vakamamacataka na wai ni mata, ka vakaukauwataka na duru sa malumalumu. Kevaka eda sa vakayacora oqori, eda sa na vaka dina na tisaipeli nei Karisito e nakiti meda vakakina. Me da veilomani me vaka sa lomani keda ko Koya, Au masuta ena yaca i Jisu Karisito, emeni.