iSolisoli Mareqeti Mai Vua na Kalou
Na bula e rawa ni sinai ena vakabauta, reki, marau, inuinui, kei na loloma ni da cakacakataka na tiki lailai ni vakabauta dina na Karisito.
Kemuni na taciqu kei na ganequ, eda se qai vakaitavi oti toka ena dua na soqoni vakalou, e dua na ivakarau e rawa ni raicilesu ki na iVola Tabu ena nodra a soqoni vata na Isireli me ra vakila ni sa tiko na Turaga ka marautaka na Nona veivakalougatataki. Eda kalougata ni da mai bula voli ena gauna sa vakalesui mai kina na ivakarau makawa oqo mai vua na Parofita o Josefa Simici. Au kerea mo ni vola ena nomuni ivolaniveisiga na ka o vakila baleta na soqo tabu bibi o se qai vakaitavi oti ga kina.
Se qai oti toka ga, na noda talaca na noda parofita ka itokani lomani, o Peresitedi Thomas S. Monson. E dina ni da sa nanumi koya vakalevu, eda sa vakavinavinaka vakalevu ni sa kaciva na Turaga e dua na parofita vou, o Peresitedi Russell M. Nelson, me vakatulewa ena Nona Lotu Ena ivakarau dodonu eda sa tekivutaka e dua na sakisaki vou ena itukutuku ni Lotu. Oqo e dua na isolisoli mareqeti mai vua na Kalou.
Oi keda yadua eda sa tokoni Peresitedi Nelson ni da laveliga, ka da sa ivakadinadina e mata ni Kalou ka vakadeitaka ni sa isosomi dina i Peresitedi Monson. Ni da sa laveliga, eda sa yalataka meda na rogoca na domona ni sa ciqoma tiko na veidusimaki mai vua na Turaga.
E kaya kina na Turaga:
“O koya sa kilikili kina ki na [kena ibalebale na Peresitedi ni Lotu] me muria na vosa kei na ivakaro kecega sa vakatakilai vua…;
“Ia mo dou vakabauta ka muria na ka sa tukuna, me vaka ga au sa tukuna vei kemudou”
Au sa veikilai tu mai kei na noda parofita-peresitedi vou ena 60 na yabaki. Au sa veiqaravi vata kei koya ena Kuoramu ni iApositolo Le Tinikarua ena 33 na yabaki, kau sa ivakadinadina bula ni liga ni Turaga sa vakarautaki koya tu mai me mai noda iapositolo ka parofita vakatulewa me veiqaravi ena idola kece ni matabete tabu e vuravura. Oi keda yadua meda sa tokoni koya vakataucoko kei rau na nona daunivakasala ka muria na nodratou veidusimaki. Eda sa veikidavaki talega kivei Elder Gong kei Elder Soares ni rau sa lewe ni Kuoramu ni iApositolo Le Tinikarua.
Ni sa Tucaketale o Jisu, na soqo eda na marautaka tiko ena mua ni Siga ni Mate lagilagi oqo, ni a rairai vei iratou na Nona tisaipeli ka kaya, “Dou vakacegu: me vaka sa talai au mai ko Tamaqu, au sa talai kemudou vaka talega kina.” Raica eke na cakacaka taqai rua—sa tala mai na Kalou na Luvena. Sa talai ira na Nona italai na Luvena—o ira na tagane kei na marama—me ra vakayacora na Nodrau cakacaka.
Meda kakua ni kurabui meda kila ni o ira yadua oqori sa kacivi ki na cakacaka ni Turaga era sega ni tamata uasivi sara. Na italanoa ena ivolanikalou e vakamatatataki kina na tagane kei na yalewa era kacivi mai vua na Kalou mera cakava e dua na cakacaka cecere—ira na luvena tagane kei na yalewa vinaka na Tamada Vakalomalagi—sa kacivi me ra qarava nodra itavi ena Lotu, guta mera cakava nodra vinaka taucoko, ia se bera ni dua me uasivi sara. Oqori e dina tiko nikua.
Me vaka ni tu dina na noda malumalumu kei na caka cala vakatamata, eda natosoya vakacava ki liu na noda veitokoni kei na veitauriliga vakai keda? Ena tekivu ena vakabauta—na vakabauta vakaidina na Turaga o Jisu Karisito. Na vakabauta na iVakabula sa imatai ni ivakavuvuli ni vunau ni kosipeli i Karisito.
Ena vica na yabaki sa oti au a gole ki Vanua Tabu. Ni keitou draiva tikiva yani e dua na vu ni musita, a taroga o dairekita ni Vale ni BYU e Jerusalemi keu sa raica beka e dua na soreni musita. E se bera, ka mani keitou kele sara. A vakaraitaka vei au na sore ni vu ni musita. E kurabuitaki ni ra ka lalai.
Au nanuma kina na ivakavuvuli i Jisu, “Niu sa kaya vakaidina vei kemudou, Kevaka e tu vei kemudou na vakabauta e vaka na sore ni musita, dou na kaya ki na ulunivanua oqo, Lako tani ki kea; ka na lako tani; a sa sega na ka ena dredre vei kemudou.”
Kevaka sa lailai na noda vakabauta me vaka na sore ni musita, sa rawa ni vukei keda na Turaga meda tosoya tani na ulunivanua ni yalolailai kei na vakatitiqa sa tu e matada ni da qaravi ira na luve ni Kalou, kei na lewe ni matavuvale, lewe ni Lotu, kei ira se bera ni ra lewe ni Lotu.
Taciqu kei na ganequ, na bula e rawa ni sinai ena vakabauta, reki, marau, inuinui, kei na loloma ni da cakacakataka na tiki lailai ni vakabauta dina na Karisito—me vaka na vakabauta sore ni musita.
E nanuma lesu o Elder George A. Smith na ivakasala nei Parofita Josefa Simici ki vua: “A kaya vei au meu kakua vakadua ni yalolailai, se cava sara na dredre era vakavoliti au. Keu sa lutudromu beka ki na qara titobu sara kei Nova Scotia ka ra buluti au na Rocky Mountain, meu kakua sara ni yalolailai ia meu ququmi matua tikoga, vakabauta tikoga, ka yaloqaqa tiko, kau na lamata vakaidina mai na veika sa ubi au.”
Meda nanuma na vosa nei Paula, “Au sa rawata na ka kecega ena vukui Karisito o koya sa vakaukauwataki au.” Na kila oqo sa dua tale na isolisoli mareqeti mai vua na Kalou.
Me ikuri ni isolisoli au sa vakamacalataka, e vuqa tale e tu. Au na tukuna e vica ga—na isolisoli ni Siga ni Vakacecegu, na sakaramede, nodra qaravi na tamata, kei na isolisoli tawa vakatauvatani rawa ni Kalou sai Koya na iVakabula.
Na kaukauwa ni Siga ni Vakacecegu o ya meda vakila ena lotu vakakina e vale na malaude, reki, kei na vinaka ni kena vakilai na Yalo ni Turaga e sega kina na veivakataotaki cava ga.
E vuqa era sa vakatara kivei ira mera sa voleka ni bula ga kei na nodra talevoni veikauyakina sikirini e ramasetaka na matadra e veisiga kei na bogi kei na irogorogo e daligadra me tarova na vosa malua, rogo vinaka ni Yalo.Kevaka e sega na gauna meda cavuta laivi, eda na rawa ni calata na madigi meda rogoca kina na domoi Koya a kaya, “Dou tiko lo, mo dou kila niu sa Kalou.” Ia, e sega ni ca meda na vakayagataka na veika vou ni tekinolaji e vakauqeta mai na Turaga, ia meda na vuku sara ena kena vakayagataki. Nanuma tiko na isolisoli ni Siga ni Vakacecegu.
Na veivakalougatataki ni ciqoma na sakaramede ena soqoni ni sakaramede me kakua ni yaco me dua na ka e dau yaco tu ga se me dua tale na ka eda dau vakayacora tu ga. E 70 walega na miniti ena macawa taucoko meda tu vakadua ka kunea na vakacegu, reki, ka marau ena noda bula.
Ni da kania na sakaramede ka vakavouia na noda veiyalayalati sa noda ivakatakilakila vua na Turaga meda na daunanumi Koya tiko. Na Nona Veisorovaki sa isolisoli ni loloma mai vua na Kalou.
Na madigi ni qaravi ira na luvena na Tamada Vakalomalagi sa gauna donu meda muria na ivakaraitaki nei Luvena Daulomani ena veiqaravi vakai keda.
Eso na madigi ni veiqaravi era sa ilesilesi—ena noda matavuvale, veikacivi ena Lotu, kei na noda vakaitavi ena isoqosoqo ni veiqaravi raraba.
Na lewe ni Lotu—tagane kei na yalewa—me ra kua ni lomalomarua, ke ra gadreva, me ra veiqatitaka na itutu cava ga ena matanitu ena vanua era tiko kina. Na domoda sa ka yaga ena gauna oqo ka bibi ena noda koronivuli, noda siti, kei na noda matanitu. Na vanua e tiko kina na demokarasi, sa noda itavi na lewenilotu meda digitaki ira na tagane kei na yalewa cecere era gadreva na veiqaravi.
E vuqa na madigi ni veiqaravi e sega ni tuvai—sega ni ilesilesi—ka yaco ga ni da dodoliga yani vei ira eda sotava ena bula oqo.Nanuma tiko ni a vakavulica na loya o Jisu meda lomana na Kalou kei na kai noda me vakataki keda ni a vakayagataka na Kai Samaria Vinaka me ivakaraitaki.
Na veiqaravi e dolava na katuba meda kila vinaka na bula kei na cakacaka vakalotu i Karisito. A tadu mai me veiqaravi, me vaka e vakavulica na ivolanikalou, “me vaka sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedra ivoli e lewe vuqa.”
A vakamacalataka beka vakavinaka o Pita na cakacaka vakalotu ni iVakabula e vuravura ena lima na vosa ni a vakamacalataki Jisu, “lako voli ka daucaka vinaka.”
Na Turaga o Jisu Karisito sa noda isolisoli mareqeti duadua mai vua na Kalou. A kaya o Jisu, “Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga.”
A kila o Nifai na bibi ni noda iVakabula ena nona kaya, “Ia eda veivosakitaki Karisito, eda reki ena vukui Karisito, eda vunautaki Karisito, eda parofisaitaki Karisito, ka eda sa volavola me vaka na noda parofisai, me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.” Meda na tauri Karisito me iusutu ni noda bula ena veigauna kei na veivanua kecega.
Meda nanuma tiko ni Yacana ga sa vakaraitaki tu ena noda vanua ni sokalou; eda sa papitaisotaki ena Yacana; ka da sa vakadeitaki, tabaki, vakaedaumeni, ka vauci ena vakamau ena Yacana. Eda sa kania na sakaramede ka yalataka meda taura vei keda na Yacana—ka yaco meda vakai Karisito dina. Kena iotioti, eda sa kerei ena masu ni sakaramede meda sa “daunanumi koya tiko ga.”
Ni da vakavakarau ki na Siga ni Mate e ni mataka, meda nanuma tiko ni Karisito sa cecere duadua. Sai Koya na Daunilewa dodonu, na noda Dautataro yalodina , Dauveivueti veivakalougatataki, iVakatawa vinaka, Mesaia yalataki, iTokani dina, kei na vuqa, ka vuqa tale.Sai Koya dina na isolisoli mareqeti duadua maivei Tamana.
Ni da sa bula vakatisaipeli, sa tu e vuqa na gagadre, kauwai, kei na ilesilesi. Ia, eso na itaviqaravi e dodonu me tiko ena uto ni noda lewena na Lotu. “Ia” a vakarota na Turaga, “mo yalodina tiko ga; mo tudei ena ilesilesi au sa kacivi iko kina; mo vukei ira sa malumalumu, laveta cake na liga sa wadamele, ka vakaukauwataka na duru sa malumalumu.”
Oqo na Lotu sa cakacaka tikoga! Oqo na lotu savasava! Oqo na kosipeli ena kena inaki donu ni da vukea, laveta, ka vakaukauwataki ira sa vakaleqai tu vakayalo ka vakayago! Ni caka oqo sa na gadrevi meda sikovi ira ka vukei ira me yaco na nodra ivakadinadina ni vakabauta na Tamada Vakalomalagi kei Jisu Karisito kei na Nona Veisorovaki me teivaki e yalodra.
Ni sa veivuke ka lomani keda na Turaga meda taleitaka noda lewena na Nona Lotu vakalesuimai. Sa noqu masu ni da na vakasinaiti ena lomani ira na luvena na Tamada Vakalomalagi meda raica rawa na nodra leqa ka lomada meda sauma nodra taro kei na kauwai baleta na kosipeli ena sala matata ka vinaka me tubu cake noda veikilai ka veimarautaki.
Au vakadinadinataka ni o Jisu Karisito na noda iVakabula. Na veika eda na vakavulici kina ena koniferedi raraba oqo e tadu mai ena nodra vakauqeti na iapositolo kei na parofita, mai na Vakaitutu Raraba, kei ira na marama iliuliu era sa Vakailesilesi Raraba ena Lotu.Sa noqu masu me tikoga kei kemuni yadua na reki kei na vakacegu ni Turaga ena yaca i Jisu Karisito, emeni.