Hi’o mai i te nu’u
’Auē ïa ’oa’oa te fāna’ora’a te mau taea’e ato’a e mau nei i te autahu’ara’a a Melehizedeka ’ia ha’api’i, ’ia ’apo mai ’e ’ia tāvini te tahi i pīha’i iho i te tahi.
E au mau taea’e here o te autahu’ara’a, tē ti’a nei au i mua ia ’outou ma te ha’eha’a rahi i teie taime rahi i roto i te ’ā’ai, ma te tonohia e tō tātou peropheta here, te peresideni Russell M. Nelson. ’Ua here roa vau ’e tē pāturu nei au i teie ta’ata rahi nā te Atua, ’e tae noa atu i tō tātou Peresidenira’a Mātāmua ’āpī. Tē ’āmui ato’a nei au i tō’u ’itera’a pāpū i tō Elder D. Todd Christofferson ’e tō tō’u mau taea’e nō te pupu nō te Tino ’Ahuru Ma Piti ’āpōsetolo ē, te mau tauira’a i fa’aarahia i teie pō, ’o te hina’aro ïa o te Fatu.
Mai tei fa’ahitihia e te peresideni Nelson, e tumu parau teie tei paraparauhia nā roto i te pure ’e tei ferurihia e te mau taea’e matahiapo o te ’Ēkālesia, e mea maoro i teienei. Te hia’ai, ’o te ’imira’a ïa i te hina’aro o te Fatu ’e te ha’apūaira’a i te mau pupu o te Autahu‘ara’a a Melehizedeka. ’Ua tae mai te fa’aurura’a ’e i teie pō, ’ua fa’a’ite atu tō tātou peropheta i te hina’aro o te Fatu. « ’Aita a te Fatu ra a Iehova e peu i rave, maori rā ’ia fa’a’ite i tāna parau i mo’e i tāna ra mau tāvini i te mau peropheta » !1 ’Auē ïa ha’amaita’ira’a tē vai ra te hō’ē peropheta ora i teie tau !
I roto i tō māua orara’a, ’ua rātere māua te tuahine Rasband nā te ao, nō te ’Ēkālesia ānei ’aore rā nō te ’ohipa. Fātata vau i te ’ite i te mau huru pupu ato’a i roto i te ’Ēkālesia : te mea na’ina’i i Rusia, i reira e tai’o-noa-hia te mau taea’e tei mau i te autahu’ara’a a Melehizedeka i ni’a i te hō’ē rima, te pāroita ’āpī ’e te tupu rahi i Afirika, i reira e putuputu ’āmui te mau tahu’a rahi ’e te mau peresibutero ’ei pupu hō’ē nō te mea ’aita i rahi roa te mau taea’e tei mau i te autahu’ara’a a Melehizedeka; ’e te mau pāroita pa’ari maita’i i reira te mau peresibutero e fa’ata’ahia ’ei piti pupu nō te rahi !
I te mau vāhi ato’a ’ua haere mātou, ’ua ’ite mātou i te rima o te Fatu i te haerera’a nā mua i tāna mau tāvini, nō te fa’aineinera’a i te ta’ata ’e te ’ē’a ’ia ha’amaita’ihia tāna mau tamari’i ato’a mai te au i tō rātou mau hina’aro ato’a.’Aita ānei ’oia i parau ē e haere [’oia] nā mua i tō [tātou] mata » ’e e vai ho’i ’oia « i tō [tātou] pae ’atau ’e i tō [tātou] pae ’āui » ’e « ’ei roto ho’i [tōna] Vārua i tō [tātou] mau ’ā’au, ’e [tōna] mau melahi ho’i e ’ati noa a’e ia [tātou] »2
I tō’u ferurira’a ia ’outou pā’āto’a, ’ua ha’amana’o vau i te hīmene « Hi’o mai I te nu’u ».
Hi’o mai i te nu’u,
Ma tōna reva, tāna ’o’e ’e tāna pāruru,
Tē haere ra e ’aro
I ni’a i te mahora tama’i o te orara’a.
’Ua ’āpapa te mau fa’ehau,
ma te tāhō’ē, te itoito ’e te pūai,
Tē pe’e nei i tō rātou Tōmānā
’A hīmene ai ma te ’oa’oa.3
’Ua pāhono mai Elder Christofferson i te mau uira’a e rave rahi e hiti mai iho ā nō te fa’aarara’ahia ē, e riro te mau pupu tahu’a rahi ’e te mau pupu peresibutero o te pāroita i te ’āmui ’ei hō’ē nu’u tāhō’ē ’e te pūai o te mau taea’e o te autahu’ara’a a Melehizedeka.
E tauturu teie mau fa’atanora’a i te pupu peresibutero ’e te Sōtaiete Tauturu e fa’aau i tā rātou ’ohipa. E fa’a’ōhie ato’a te reira i te fa’aaura’a te pupu autahu’ara’a ’e te ’episekōpora’a ’e te ’āpo’ora’a pāroita. E fa’ati’a ato’a te reira i te ’episekōpo ’ia tono i te mau hōpoi’a rahi atu ā i ni’a i te mau peresideni pupu peresibutero ’e Sōtaiete Tauturu, ’ia ti’a i te ’episekōpo ’e tōna nā tauturu ’ia rōtahi i ni’a i tā rātou mau hōpoi’a mātāmua—te peresidenira’a iho ā rā i ni’a i te feiā ’āpī tamāhine ’e te feiā ’āpī tamāroa e mau nei i te Autahu’ara’a a Aarona.
E ’ere te mau tauira’a i roto i te mau fa’anahora’a ’e te mau tōro’a o te ’Ēkālesia i te mea mātau-’ore-hia. I te matahiti 1883 ra, ’ua parau te Fatu i te peresideni John Taylor : « Nō ni’a i te fa’aterera’a ’e te fa’anahora’a o tō’u ’Ēkālesia ’e tō’u Autahu’ara’a… e heheu atu vau ia ’oe, i terā taime ’e terā taime, nā roto i te mau rēni tā’u i fa’ata’a, i te mau mea ato’a e tītauhia nō te fa’atupura’a ananahi ’e te ha’amaita’i-roa-ra’a i tā’u nei ’Ēkālesia, nō te fa’atanora’a ’e te ’ohura’a o tō’u nei bāsileia ».4
Te tahi parau i teienei ia ’outou te mau tahu’a rahi—’ia ’ite ’outou ē, ’ua here mātou ia ’outou ! ’Ua here tō tātou Metua i te Ra’i ia ’outou ! E tuha’a rahi ’outou nō te nu’u ari’i o te autahu’ara’a, ’e e’ita tā mātou e nehenehe e fa’ahaere i teie ’ohipa i mua ’āhani ’aita tō ’outou maita’i, tā ’outou tāvinira’a, tō ’outou ’ite ’e tō ’outou parau ti’a. ’Ua ha’api’i Alama ē, ’ua pi’ihia te mau tāne ’ei tahu’a rahi nō tō rātou fa’aro’o rahi ’e tā rātou mau ’ohipa maita’i i te ha’api’ira’a ’e i te aupurura’a ia vetahi ’ē.5 Tītauhia teie ’ite, hau atu paha i tei mātāmua ra.
I roto i te mau pāroita e rave rahi, e riro paha te tahi mau tahu’a rahi i te peresidenihia ’e te hō’ē peresibutero ’ei peresideni pupu nō rātou. ’Ua ’itehia a’enei te mau peresibutero i te peresidenira’a i te mau tahu’a rahi : tē vai nei te tahi mau peresibutero e tāvini nei ’ei peresideni ’āma’a i te mau vāhi o te ao tē vai ra te tahi mau tahu’a rahi e noho ra i reira, ’e tē vai nei te tahi mau ’āma’a, e pupu peresibutero ana’e ’e tei reira ato’a te mau tahu’a rahi.
’Auē ïa ’oa’oa te fāna’ora’a te mau taea’e ato’a e mau nei i te autahu’ara’a a Melehizedeka ’ia ha’api’i, ’ia ’apo mai ’e ’ia tāvini te tahi i pīha’i iho i te tahi ’e te mau melo ato’a o te pāroita. Noa atu te vāhi tei reira ’outou, noa atu tō ’outou orara’a, tē ani nei mātou ia ’outou ’ia fāri’i nā roto i te pure ’e ma te fa’aro’o ’e ma te ’oa’oa i te mau rāve’a ’āpī ’ia fa’atere ’e ’ia fa’aterehia ’e ’ia tāvini ma te tāhō’ē ’ei tino taea’e o te autahu’ara’a.
I teienei, e paraparau vau i te tahi atu tumu parau e ti’a paha ’ia ha’apāpūhia, ’a haere ai tātou i mua i roto i te ha’amaura’a i te hina’aro o te Fatu nō ni’a i te fa’anahora’a i tāna mau pupu o te autahu’ara’a mo’a.
E aha te mau fa’atanora’a nō te pupu tahu’a rahi o te titi ? E tāmau noa te mau pupu tahu’a rahi o te titi i te tere. E tāmau noa te mau peresidenira’a titi i te tāvini ’ei peresidenira’a nō te pupu tahu’a rahi o te titi. Terā rā, mai tei fa’ata’ahia mai e Elder Christofferson, i teienei te mau melo o te pupu tahu’a rahi o te titi, o te mau tahu’a rahi ïa e tāvini ra i roto i te peresidenira’a titi, ’ei melo nō te ’episekōpora’a pāroita, ’ei melo ’āpo’ora’a teitei ’e tae noa atu i te patereareha i ni’a i te ’ohipa. E ’ere te mau pāpa’i parau ’e te mau pāpa’i parau fa’atere, pāroita ’e titi, i te mau melo nō te pupu tahu’a rahi o te titi. ’Ia tere te hō’ē taea’e e tāvini ra ’ei tahu’a rahi, ’ei patereareha, ’ei Hitu ’Ahuru ’aore rā ’ei ’āpōsetolo i roto i te hō’ē pāroita ’e ’ua hina’aro ’oia e haere i te purera’a autahu’ara’a, e ’āmui atu ’oia i te pupu peresibutero.
I te taime e ha’amāuruuruhia te mau taea’e i ni’a i terā pi’ira’a, e ho’i rātou i tō rātou iho ’āmuira’a ’ei melo nō te pupu peresibutero.
E aha te ’ohipa a te pupu tahu’a rahi o te titi ? E ruru te peresidenira’a titi ’e te mau melo o te pupu tahu’a rahi nō te ’āpo’o ’āmui, nō te fa’a’ite pāpū ’e nō te hōro’a i te ha’api’ipi’ira’a. E tāmau noa te mau rurura’a titi mai tei fa’ata’ahia i roto i tā tātou mau buka arata’i ma teie e piti fa’atanora’a.
’A tahi, e’ita te mau pāroisa ’e te mau titi e fa’atupu faahou i te rurura’a tōmite fa’atere autahu’ara’a. Mai te peu e hiti mai te tahi fifi ta’a ’ē i roto i te pāroita, mai te hō’ē fifi rahi ’utuāfare ānei ’aore rā te hō’ē fifi i te pae o te tōtauturu, e paraparauhia te reira i roto i te hō’ē rurura’a ’episekōpora’a fa’a’ā’anohia. Nō te tahi atu mau fifi ri’i, e paraparauhia te reira i roto i te ’āpo’ora’a pāroita. Tei mātauhia i te parau te rurura’a tōmite fa’atere autahu’ara’a o te titi, e parauhia i teienei te « rurura’a ’āpo’ora’a teitei ».
Te piti, e’ita fa’ahou te rurura’a matahiti nō te mau tahu’a rahi i fa’atōro’ahia e fa’atupuhia. Terā rā, e tāmau noa te peresidenira’a titi i te fa’atupu i te rurura’a matahiti nō te pupu tahu’a rahi o te titi, mai tei fa’aarahia i teienei.
E nehenehe ānei e hau atu i te hō’ē pupu peresibutero i roto i te pāroita ? Teie te pāhonora’a, ’ē. Mai te au i te vārua o te Te Parau Ha’api’ira’a ’e te mau Parau Fafau tuha’a 107, te ’īrava 89, ’ia rahi roa ’ino te ta’ata tei mau i te autahu’ara’a a Melehizedeka, e nehenehe te mau feiā fa’atere e fa’anaho hau i te hō’ē noa pupu peresibutero. ’Ia tupu ana’e te reira, e ti’a ’ia fa’a’aifāito maita’i te mau pupu i te parau nō te matahiti, te ’ite ’e te tōro’a autahu’ara’a ’e te pūai.
Tē fa’a’ite pāpū nei au ē, ’a haere ai tātou i mua ’e teie fa’anaho-fa’ahou-ra’a pupu autahu’ara’a i roto i tō tātou mau pāroita ’e mau titi, e ’ite mai tātou i te mau ha’amaita’ira’a e rave rahi roa ’ino. Te hina’aro nei au e fa’a’ite atu i te tahi ma’a hi’ora’a.
I raro a’e i te fa’aterera’a a te ’episekōpo, e rahi atu ā te mau ti’a autahu’ara’a e tauturu i roto i te ’ohipa nō te fa’aorara’a. ’Oia ho’i ïa te putuputura’a ia ’Īserā’ela nā roto i te ’ohipa hiero ’e te ’ohipa ’ā’amu ’utuāfare, te ’ohipara’a ’e te mau ’utuāfare ’e te mau ta’ata i roto i te ’ati ’e te tauturura’a i te mau misiōnare ’ia hōpoi mai i te mau vārua ia Iesu Mesia ra.
’Ia ho’i mai te mau ti’a i peresideni na e fa’a’ite i tō rātou pupu peresibutero i tā rātou i ha’api’i, e pūai mai te mau melo o te pupu.
E rau atu ā te mau hōro’a ’e te ’aravihi i rotopū i te pupu.
E rahi atu ā te rāve’a fa’atanotanora’a ’e te vatara’a nō te pāhono i te mau hina’aro rū e vai ra i roto i te pāroita ’e te pupu, ’e i roto i te ravera’a i tā tātou mau ’ohipa aupurura’a rau.
E rahi atu ā te a’o tauturu ’e te tāhō’ē ’ia fa’a’ite haere te hō’ē peresibutero ’āpī ’e te hō’ē tahu’a rahi pa’ari i tāna i ’ite, te hō’ē i pīha’i iho i te tahi, i roto i te mau rurura’a pupu ’e te mau ’ohipa i fa’ata’ahia.
’E te mea e tīa’ihia ra, e vata mai te mau ’episekōpo ’e te mau peresideni ’āma’a nō te fa’arahi i tō rātou pi’ira’a i te tīa’ira’a i te nana ’e te aupurura’a i te feiā i roto i te ’ati.
’Ua ta’a ia mātou ē, e mea ta’a ’ē terā pāroita ’e terā titi. Noa atu rā, tē vai nei tō mātou tīa’i rahi ē, e pe’e ’oi’oi ’outou i teie mau tauira’a i muri mai i teie ’āmuira’a rahi. E arata’ira’a tei hōro’ahia mai ia tātou e te hō’ē peropheta a te Atua ! ’Auē ïa ha’amaita’ira’a rahi ’e te hōpoi’a. Rave ana’e tātou i te reira ma te parau ti’a roa ’e te itoito !
Tē fa’aha’amana’o nei au ia ’outou ē, e tae mai te mana o te autahu’ara’a nā roto i te fa’ata’a ’e te fa’atōro’ara’a, tē mana autahu’ara’a rā, te mana nō te rave nā roto i te i’oa o te Fatu Iesu Mesia, e mea nā roto noa ïa i te orara’a parau ti’a.
’Ua parau te Fatu i te peropheta Iosepha Semita, te peropheta o te Fa’aho’i-fa’ahou-ra’a :
« Inaha, ’e ’a hi’o na, nā’u e ha’apa’o i tā ’outou mau nana, ’e e fa’ati’a mai au i te mau peresibutero ’a tono atu ai i’ō ia rātou ra.
« Inaha, e rave ’oi’oi au i ta’u ’ohipa i roto i te tau mau nō te reira ».6
’Oia mau, e tau teie nō te ha’ape’epe’era’a te Fatu i tāna ’ohipa.
Fa’a’ohipa ana’e tātou tāta’itahi i teie taime nō te feruri ’e nō te ha’amaita’i i tō tātou orara’a nō te fa’atano maita’i a’e i ni’a i tōna hina’aro ’ia fāna’o tātou i te mau ha’amaita’ira’a e rave rahi tāna i parau i tei vai mau ’e tei ha’apa’o maita’i.
E te mau taea’e ē, māuruuru nō te mau mea ato’a tā ’outou e rave ra ’ei tuha’a nō teie ’ohipa fa’ahiahia. ’Ia haere tātou i mua i roto i teie ’ohipa rahi ’e te tura.
’E ’ia hope te tama’i,
’Ia fa’aea te mārōra’a ’e te ’arora’a,
’Ia putuputu māite te tā’āto’ara’a
I roto i te ’āfa’afa’a o te hau,
I mua i te Ari’i mure ’ore,
E riro te pupu ta’ata rahi ’e te pūai
I te ha’amori i tōna i’oa ē a muri noa atu,
’E teie atura ïa tā rātou hīmene :
’Ua rē, ’ua rē,
iāna tei fa’aora ia tātou !
’Ua rē, ’ua rē,
ia Iesu Mesia, tō tātou Fatu !
’Ua rē, ’ua rē, ’ua rē,
ia Iesu Mesia, tō tātou Fatu !7
I teie nei mahana tē ti’a pauroa nei tātou ’ei ’ite nō te heheura’a mai te Fatu i tōna hina’aro nā roto i tāna peropheta, te peresideni Russell M. Nelson. Tē fa’a’ite pāpū nei au ē, ’o ’oia te peropheta a te Atua i ni’a i te fenua nei. Tē hōro’a nei au i tō’u ’itera’a pāpū nō te Fatu Iesu Mesia, ’oia tō tātou Tāra’ehara rahi ’e tō tātou Fa’aora. ’O tāna ’ohipa teie ’e ’o tōna hina’aro teie, ’o tā’u ïa e fa’a’ite pāpū nei ma te tura, i te i’oa o Iesu Mesia, ’āmene.