Malolo kag Mapainuboson sing Tagipusoon
Sentro sa ugali sang Manunubos ang kalolo kag makit-an ini sa matarong nga pagsunod, pagpasugo, kag pagpugong sa kaugalingon.
Nagakalipay ako sa sagrado nga oportunidad nga suportahan ang aton mga lidir sa Simbahan. Kag ginaabi-abi ko si Elder Gong kag si Elder Soares sa Korum sang Dose ka Apostoles. Ang pagalagad sini nga mga matutom nga lalaki magabugay sa mga tawo kag pamilya sa bilog nga kalibotan, kag excited ako nga magserbisyo kag magtuon upod sa ila.
Ginapangamuyo ko nga ang Espiritu Santo magatudlo kag magapasanag sa aton samtang nagatuon kita parte sa isa ka batasan sang balaan nga kinaugali sang Manluluwas nga dapat naton sundon.
Madamo ako nga igatudlo nga halimbawa nga magapakita sini nga Cristohanon nga batasan antis ko isugid kon ano gid ini nga ugali. Palihog nga pamatian ang kada halimbawa kag pinsaron kon ano ayhan ang sabat sa mga ipamangkot ko.
Halimbawa #1. Ang Manggaranon nga Batan-on kag si Amulek
Sa Bag-o nga Katipan, mabasahan naton ang isa ka manggaranon nga batan-on nga lalaki nga namangkot kay Hesus, “Maayo nga Agalon, ano ang maayo nga buhaton ko para makaangkon sang kabuhi nga wala’y katapusan?” Naglaygay ang Manluluwas sa iya nga tumanon ang mga kasugoan. Dason, may gindugang ang Manluluwas nga isa pa ka tulumanon nga takos sa batan-on nga lalaki.
“Siling ni Hesus sa iya, Kon gusto mo nga mangin mahimpit, lakat ka kag ibaligya ang may ara ka, kag ipanghatag sa mga imol, kag ikaw makaangkon sang manggad sa langit: dayon magkari kag magsunod sa akon.
“Pero sang mabati-an sang batan-on nga lalaki ina nga pulong, naghalin siya sing masubo: kay dako ang iya mga panag-iyahan.”
Ipaanggid niyo ang sabat sang manggaranon nga lalaki sa inagyan ni Amulek, nga ginasaysay sang Libro ni Mormon. Maukod kag manggaranon si Amulek kag madamo siya sang paryente kag abyan. Ginsaysay niya ang iya kaugalingon bilang isa ka tawo nga gintawag sing madamo nga beses pero nagpabungol; isa ka tawo nga nakabalo sang mga butang nga Diyosnon, pero wala magpati. Maayo lang man nga tawo si Amulek, pero nalibang siya sang kalibutanon nga mga butang parehas sa manggaranon nga lalaki sa Bag-o nga Katipan.
Bisan nagpatig-a siya sang iya tagipusoon sang una, si Amulek nagpati sa ginhambal sang anghel, ginbaton niya ang propeta nga si Alma sa iya balay, kag nagpakaon sa iya. Ginpukaw ang iya espiritu sang nagbisita si Alma kag gintawag siya nga magwali sang ebanghelyo. Dayon si Amulek nagbiya sang “tanan nga bulawan kag pilak niya, kag ang mga mahal nga pagkabutang … bangod sa pulong sang Diyos, kag ginsikway [siya] sang mga daan nga abyan niya pati amay niya kag panimalay.”
Para sa inyo, nga-a man lain ang sabat sang manggaranon nga lalaki sang sa kay Amulek?
Halimbawa #2. Pahoran
Sang panahon sang malisod nga gera nga ginsaysay sa Libro ni Mormon, nagsulat-anay sila ni Moroni, nga kapitan sang mga Nefinhon nga soldado, kag Pahoran, nga nagapangulo nga hukom kag gobernador sa pungsod. Ang mga suldado ni Moroni nagantos gid kay kulang ang suporta sang gobierno, gani nagsulat si Moroni kay Pahoran “nga nagabasol” kag nagaakusar sa iya kag ang iya mga isigka-pangulo nga wa’ay sila labot, tamaran sila, nagapabaya sila, kag traidor pa gid sila.
Hapos lang tani si Pahoran magdumot kay Moroni kag sa iya pagakusar nga indi intsakto, pero wala gid siya magdumot. Nagsabat siya sing maluluy-on kag nageksplicar nga may nagarebelde sa gobierno, nga wala nabal-an ni Moroni. Tapos, siling ni Pahoran—
“Tan-aw, siling ko sa imo, Moroni, wala ako nagakalipay sa imo dako nga pagantos, gani ginapabug-at ang akon kalag. …
“Ginbasol mo ako sa imo sulat, pero wa’ay sapayan, indi ako akig, kondi nagakalipay ako sa kabaskog sang imo tagipusoon.”
Para sa inyo, paano maexplicar ang takos nga sabat ni Pahoran sa pagakusar ni Moroni?
Halimbawa #3. Si Presidente Russell M. Nelson kag si Presidente Henry B. Eyring
Sang anum ka bulan, sang pangkabilogan nga komperensya, ginsaysay ni Presidente Russell M. Nelson sang iya sabat sa imbitasyon ni Presiente Thomas S. Monson nga basahon, pinsaron, kag i-aplikar ang mga kamatuoran nga ara sa Libro ni Mormon. Siling niya, “Nagtinguha ako nga sundon ang iya laygay. Luwas sa iban nga mga ginhimo ko, ginlista ko kon ano ang Libro ni Mormon, ang ginapamatud-an sini, ang ginapanginsala sini, ang ginapatuman sini, ang ginapaklaro sini, kag ang ginapahayag sini. Ang amo sini nga paglantaw sa Libro ni Mormon makahatag sang kaalam kag inspirasyon! Ginatugyan ko ini sa inyo tanan.”
Si Presidente Henry B. Eyring nagmono man sang importansya sang imbitasyon ni Presidente Monson sa iya kabuhi. Natandaan niya—
“Sang nagligad nga 50 ka tuig, adlaw-adlaw ako nagbasa sang Libro ni Mormon. Siguro pwede ako tani magbalibad nga para sa iban lang ang pulong ni Presidente Monson. Pero, parehas sa madamo sa inyo, nabatyagan ko ang pagpaisog kag promisa sang propeta nga nagahagad sa akon nga mas magtinguha. …
“Nagbunga ini sang kalipayan para sa akon kag para sa madamo sa inyo, suno sa ginpromisa sang propeta.”
Para sa inyo, paano maeksplikar ang hinali kag matutom nga sabat sa imbitasyon ni Presidente Monson sang sining duha ka lider sa Simbahan sang Ginuo?
Wala ko ginatumod nga ang espiritual nga mabaskog nga sabat nanday Amulek, Pahoran, Presidente Nelson, kag Presidente Eyring maeksplikar sang isa lang ka Cristohanon nga pamatasan. Sigurado gid nga madamo nga pamatasan kag inagyan ang naghatag sang espiritualnga kalig-on nga ginapakita sa kabuhi sining apat ka matinuhoron nga alagad. Pero ang Manluluwas kag ang Iya mga propeta may ginpatanda nga isa gid ka pamatasan nga kinahanglan naton tanan nga mas maintyendehan kag ipangabuhi.
Kalolo
Palihog tandaan ang pamatasan sang Ginuo nga ginmono parte sa Iya kaugalingon sa sunod nga berso: “Kapyot kamo sa akon singkaw, kag magtuon sa akon; kay malolo ako kag mapainuboson sing tagipusoon: kag makapahuway ang inyo kalag.”
Sa tanan nga pamatasan kag kinaugali nga pwede niya ipatanda, ginpili sang Manluluwas ang kalolo bilang leksyon.
Makit-an ang isa ka anggid nga modelo sa pahayag nga nabaton ni Propeta Joseph Smith sang 1829. Ginpahayag sang Ginuo, “Magtuon sa akon, kag magpamati sa akon mga pulong; maglakat sa kalolo sang akon Espiritu, kag makaangkon ka sang paghidaet sa akon.”
Sentro sa ugali sang Manunubos ang kalolo, kag makit-an ini sa matarong nga pagsunod, pagpasugo, kag pagpugong sa kaugalingon. Sa sining pamatasan, mas maintyendehan gid naton ang mga sabat ni Amulek, Pahoran, Presidente Nelson, kag Presidente Eyring.
Halimbawa, matarong kag madasig si Presidente Nelson kag si Presidente Eyring nagsunod sa laygay ni Presidente Monson nga basahon kag tun-an ang Libro ni Mormon. Bisan dugay na sila nga duha nagalagad sa importante kag bantog nga palangakoan sa Simbahan kag dugay man nagtuon sang mga balaan nga kasulatan, wala sila magpabuyan-buyan o magpabugal sa ila pagsunod.
Handa si Amulek nga nagpasugo sa Ginuo, nagbaton sang tawag nga magwali sang ebanghelyo, kag nagbaya sang iya nami nga kahamtangan kag mga relasyon. Kag ginbendisyonan si Pahoran sang paghangop kag pagpugong sa kaugalingon para maghulag kag indi magsunggod sang ginsaysay niya kay Moroni ang pagrebelde sang mga tawo sa gobierno.
Ang Cristohanon nga pamatasan nga kalolo pirme ginasal-an sa aton kalibotan sa karon nga panahon. Ang kalolo mabakod, indi maluya; Mapagsik, indi tamaran; maisog, indi mahuya; tsaktohan lang, indi sobra; nagapaubos, wala nagapabugal; kag maloloy-on, indi mapintas. Ang malolo nga tawo indi dali mangakig, wala nagapataas-taas, o nagahambog kag pirme niya ginadayaw ang maayo nga buluhaton sang mga iban.
Kalabanan ang buot silingon sang pagpaubos amo ang pagsandig sa Diyos kag pagkakinahanglan sang Iya dalayon nga paggiya kag suporta, pero ang buot silingon sang kalolo amo nga handa ang kalag naton nga magtuon sa Espiritu Santo pati sa mga isigkatawo naton nga daw indi gid masyado sagad, anad, o alam, wala sang dako nga palangakoan, o sa pagtan-aw lang sa ila daw wala man sila may mapuslan. Panumdumon niyo si Naaman, ang kapitan sang kasuldadohan sang hari sang Syria. Nalampuasan niya ang iya bugal kag malolo siya nga nagsugot sa laygay sang iya mga alagad nga patihon si Propeta Elisha kag maligo sa suba nga Jordan pito ka beses. Ang kalolo amo ang una nga panagang sa makabulag nga bugal nga nagahalin sa pagkabantog, palangakoan, gahum, manggad, kag pagkadayaw.
Kalolo—Isa ka Cristohanon nga Pamatasan kag Regalo nga Espiritual
Maangkon naton ang kalolo paagi sa paghandum, pagpili sang maayo, kag pagpabilin sang katubosan sang aton mga sala. Regalo man ini nga espiritual nga pwede naton pangitaan. Pero dapat naton tandaan nga ang rason nga ihatag ini nga bendisyon sa aton amo para magbulig kag magserbisyo sa mga anak sang Diyos.
Samtang nagapalapit kita kag nagasunod sa Manluluwas, amat-amat kita mas mangin anggid sa iya. Ang Espiritu magahatag sa aton sang pagpugong sa kaugalingon kag mabuot nga batasan. Gani indi lang hilimuon naton ang kalolo kondi ang kalolo mangin kinaugali naton bilang mga sumulunod sang Agalon.
“Si Moises may alam sa tanan nga tinun-an sang mga taga-Egypt, kag gamhanan siya sa pagpamulong kag pagbuhat.” Wa’ay sapayan, “malolo gid siya, labaw pa sa tanan nga tawo sa duta.” Tani mangin bugalon siya kay alam kag sagad. Pero sa hamtang sini, ang pamatasan kag espiritual nga regalo sang kalolo nagbuhin sa bugal sa iya kabuhi kag nagpabaskog kay Moises bilang instrumento para matuman ang pagbuot sang Diyos.
Ang Agalon Isa ka Halimbawa sang Kalolo
Ang pinakanami kag dako sing kahulogan nga mga ihemplo sang kalolo makit-an sa kabuhi mimso sang Manluluwas.
Ang Dako nga Manunubos, nga “nagpanaog sa idalom sang tanan nga butang” kag nagantos, nagdugo, kag napatay “para limpyohan kita sang tanan nga kalainan,”naghugas siya sang tiil sang mga sumulunod Niya. Amo sina nga kalolo ang pamatasan nga nagapamatuod nga alagad kag pangulo ang Ginuo.
Ginpakita ni Hesus ang pinakadako nga ihemplo sang matarong nga pagsunod kag pagpasugo sang nagantos gid siya sa Gethsemane.
“Kag sang ara siya sa lugar, siling niya sa [Iya mga sumulunod], Magpangamuyo kamo agud indi kamo madala sa temptasyon.
“Kag nagluhod siya, kag nagpangamuyo,
“Kag nagsiling, Amay, kon buot mo, kuhaon mo ini nga kupa halin sa akon: apang wala’y sapayan ang akon pagbuot, kondi ang imo madayon.”
Ang kalolo sang Manluluwas sang sining kinahanglanon kag malisod nga eksperiensya nagapakita sa aton nga dapat gid itaas ang kaalam sang Ginuo sa aton kaugalingon nga kaalam.
Makatingala kag may ikatudlo sa aton ang pagsige-sige sang Ginuo sa pagsunod kag pagpugong sang Iya kaugalingon. Sang nagabot ang mga gwardya sang templo kag Roman nga suldado sa Gethsemane para dakpon si Hesus, Si Pedro nagkuha sang espada niya kag ginutod ang too nga dulunggan sang alagad sang mataas nga pari. Dayon ginhikap sang Manluluwas ang dulunggan sang alagad kag ginpaayo siya. Palihog tandaan nga naglab-ot siya kag nagpaayo sang manugdakop Niya gamit ang pareho nga langitnon nga gahum nga kontani nakapugong sang iya pagkadakop kag pagkalansang sa krus.
Pinsaron niyo man sang ginakusar ang Agalon kag ginhukman siya ni Pilate nga ilansang sa krus. Sang ginluiban si Hesus, hambal niya “Nagahunahuna bala kamo nga indi ako makapangamuyo sa akon Amay, kag sa gilayon padal-an niya ako sang labaw sang dose ka libo nga anghel?” Pero amo man gihapon, wa’ay katarungan nga ginhukman sang temporaryo nga gintugyanan nga politiko ang “Wala’y Kapatusan nga Hukom sang mga buhi kag patay”.. “Kag wala magsabat [si Hesus] bisan isa lang ka tinaga; gani nagtingala gid ang gobernador.” Makit-an gid ang kalolo sang Manluluwas kay disiplinado ang iya sabat, nagpugong siya sang iya kaugalingon, kag wala siya maggamit sang Iya wala’y ubos nga gahum para sa personal nga interes.
Promisa kag Pamatuod
Gintudlo ni Mormon nga ang kalolo amo ang sadsaran kon sa diin ang tanan nga espiritual nga ikasarang kag talento nagahalin.
“Gani, kon ang isa ka tawo may pagtuo, kinahanglan nga may pagla-um siya; kay kon wa’ay pagtuo, wa’ay man pagla-um.
“Kag sa liwat, tan-awa ginasiling ko sa inyo nga wa’ay siya pagtuo kag paglaum, luwas nga malolo siya, kag mapainuboson sing tagipusoon.
“Kon amo, wala’y pulos ang iya pagtuo kag pagla-um, kay wala sing may ginabaton ang Diyos, luwas sa mga malolo kag mapainuboson sing tagipusoon; kag kon malolo kag mapainuboson sing tagipusoon ang isa ka tawo, kag akoon niya paagi sa gahum sang Espiritu Santo nga si Hesus amo si Cristo, kinahanglan nga may paghigugma siya; kay kon wa’ay siya paghigugma, wala siya sing pulos; gani kinahanglan niya sang paghigugma.
Hambal sang Manluluwas, “Bulahan ang mga malolo: kay sila magapanubli sang kalibotan.” Ang kalolo isa ka kinahanglanon nga parte sang balaan nga kinaugali kag pwede ini mabaton kag magdako sa aton kabuhi tungod kag paagi sa pagbayad-sala sang Manluluwas.
Ginapamatud-an ko nga si Hesu Cristo amo ang Manunubos naton nga nabanhaw kag nagakabuhi. Kag ginapromisa ko nga magagiya siya, magabantay kag magapabakod sa aton kon malakat kita sa kalolo sang Iya espiritu. Ginapahayag ko ang akon sigurado nga saksi sining mga kamatuoran kag mga promisa sa sagrado nga ngalan ni Ginoong Hesu Cristo, amen.