2:3

Ang Dapat Hangpon sang Tagsa ka Aaronic Priesthood Holder

Ni Douglas D. Holmes

Unang Manuglaygay sa Pangkabilogan nga Pangulohan sang Young Men

Ang inyo ordinasyon sa Aaronic Priesthood importante sa pagbulig sa mga anak sang Dios nga makabaton sang nagapasag-uli nga gahum ni Cristo.

Mga kauturan, makalilipay nga makaupod kamo sa sining importante nga komperensya.Sang bag-o pa lang ako nga mission president, nakunyag ako sa pagbaton sang amon una nga grupo sang bag-o nga mga misyonero.Ang pila sang amon mas batid nga mga misyonero nagahanda sa pagsapol sa ila. Nakita ko nga gin-areglar nila ang pang-bata nga mga siya nga daw patipulon.

“Ngaa naggamit kamo sing gagmay nga siya?”akon pamangkot.

Ang mga misyonero nga daw nahuya nagsiling, “Para sa bag-o nga mga misyonero.”

Nagapati ako nga ang aton pagtan-aw sa iban nagaapekto sa ila panan-aw sa ila kaugalingon kag sa ila sarang nga mangin. Ang amon bag-o nga mga misyonero nagpungko sa pangdalagko nga siya sinang adlaw.

Kon kaisa, daw ginapapungko naton ang aton young men sang Aaronic Priesthood sa siya sang kabataan sangsa magbulig sa ila nga makita nga ginhatagan sila sang Dios sing sagrado nga responsibilidad kag importante nga buluhaton nga himuon.

Si Pangulong Thomas S. Monson naglaygay sa aton nga kinahanglan mahangpan sang young men “kon ano ang kahulugan … nga mangin manugkapot sang priesthood sang Dios.Kinahanglan sila giyahan sa espiritwal nga paghibalo sang kasagrado sang ila gin-ordin nga tawag.”

Karon nga adlaw, ginapangamuyo ko nga ang Balaan nga Espiritu maggiya sa aton sa mas dako nga paghangop sang gahum kag kasagrado sang Aaronic Priesthood kag mag-inspirar sa aton sa pagtutok sing mas matutum sa aton mga tulumanon sa priesthood.Ang akon mensahe para sa tanan nga Aaronic Priesthood holder lakip inang nagakapot man sang Melchizedek Priesthood.

Si Elder Dale G. Renlund nagtudlo nga ang katuyuan sang priesthood amo nga buligan ang mga anak sang Dios nga makabaton sang nagapasag-uli nga gahum ni Jesucristo. Agud makabaton sang nagapasag-uli nga gahum ni Cristo sa aton kabuhi, kinahanglan kita magpati sa Iya, maghinulsol sang aton mga sala, maghimo kag magtuman sang sagrado nga mga kasugtanan paagi sa mga ordinansa, kag magbaton sang Balaan nga Espiritu. Indi ini mga prinsipyo nga kis-a lang naton himuon; kundi, ulolupod ini sila, nga nagapabakod kag nagapasanyog sang kada isa sa nagapadayon nga proseso sang pagsulong tubtob nga “magkari kay Cristo, kag magmangin himpit sa iya.”

Gani, ano ang papel sang Aaronic Priesthood sa sini? Paano ini nagabulig sa aton nga makabaton sang nagapasag-uli nga gahum ni Cristo? Nagapati ako nga ang sabat makita sa mga yabi sang Aaronic Priesthood—ang mga yabi sang nagaalagad nga mga anghel kag sang nagapanghanda nga ebanghelyo.

Ang Pag-alagad sang mga Anghel

Magsugod kita sa isa ka aspeto sang pag-alagad sang mga anghel. Antes may pagtuo ang mga anak sang Dios kay Jesucristo, kinahanglan makilala nila Sia kag matudloan sang Iya ebanghelyo. Subong sang ginsiling ni Apostoles Pablo:

“Paano bala ang pagtuo nila sa iya nga wala nila mabatii? kag paano bala ang pagkabati nila kon wala’y manugwali?

“Kag paano bala ang pagwali nila, kon indi sila pag-ipadala? …

“Gani ang pagtuo nagaabot gikan sa ginapamatian, kag ang ginapamatian paagi sa pulong ni Cristo.”

Halin sa ginsuguran sang panahon, ang Dios “nagpadala sang mga anghel sa pag-alagad sa mga anak sang tawo, sa pagpahayag … nahanungod sa pagkari ni Cristo.” Ang mga anghel langitnon nga mga tinuga nga nagadala sang mensahe sang Dios. Alangay sa Hebreo kag Greco, ang ugat nga pulong sang anghel amo ang “mensahero.”

Sa amo man nga paagi nga ang mga anghel awtorisado nga mga mensahero nga ginpadala sang Dios agud magpahayag sang Iya pulong kag gani magpatubo sang pagtuo, kita nga nagakapot sang Aaronic Priesthood gin-ordinan agud “magtudlo, kag mag-agda sa tanan nga magkari kay Cristo.” Ang pagwali sang ebanghelyo isa ka tulumanon sang priesthood.Kag ang gahum nga naangot sa sining tulumanon indi lamang para sa mga propeta ukon sa mga misyonero.Ini para sa inyo!

Gani paano naton maangkon ining gahum? Paano bala ang isa ka 12-ka-tuig nga deacono—ukon bisan sin-o sa aton—makadala sang pagtuo kay Cristo sa mga tagipusuon sang mga anak sang Dios? Magsugod kita paagi sa pagpakamahal sang Iya pulong agud nga ang gahum sini yara sa sulod naton. Ginpromisa niya nga kon himuon naton ini, maangkon naton “ang gahum sang Dios sa pagpapati sang katawhan.” Ayhan ini isa ka oportunidad nga makatudlo sa miting sang korum ukon makabisita sa balay sang isa ka miyembro. Ayhan ini butang nga di-gawa pormal pareho sang pagsugilanon sa isa ka abyan ukon miyembro sang pamilya. Sa bisan diin lang sini, kon nakahanda kita, makatudlo kita sang ebanghelyo pareho sang mga anghel; paagi sa gahum sang Balaan nga Espiritu.

Sang sini lang nabatian ko si Jacob, isa ka Aaronic Priesthood holder sa Papua New Guinea, nga nagpamatuod sang gahum sang Libro ni Mormon kag kon paano ini nagbulig sa iya sa pagbato sang kalainan kag pagsunod sa Espiritu. Ang iya mga pulong nagpadako sang akon pagtuo kag sang pagtuo sang iban.Nagtubo man ang akon pagtuo sa pagkabati ko sang mga Aaronic Priesthood holder nga nagatudlo kag nagapamatuod sa ila mga miting sa korum.

Young men, awtorisado kamo nga mga mensahero. Paagi sa inyo mga pulong kag buhat, makadala kamo sang pagtuo kay Cristo sa mga tagipusuon sang mga anak sang Dios. Subong nga ginsiling ni Pangulong Russell M. Nelson, “Sa ila mangin pareho kamo sang nagaalagad nga anghel.”

Ang Nagapanghanda nga Ebanghelyo

Ang dugang nga pagtuo kay Cristo pirme nagapadulong sa handum nga magliwat ukon maghinulsol. Gani rasonable nga ang yabi sang nagaalagad nga mga anghel pagaupdan sang yabi sang nagapanghanda nga ebanghelyo, “ang ebanghelyo sang paghinulsol kag sang bunyag, kag sang kapatawaran sang mga sala.”

Sa inyo pagtuon sang inyo mga tulumanon sa Aaronic Priesthood, makita ninyo ang maathag nga mando nga agdahon ang iban sa paghinulsol kag pagmaayo. Indi buot silingon nga matindog kita sa kalye nga nagasinggit, “Maghinulsol kamo!” Sa masami, ang buot silingon sini nga nagahinulsol kita, nagapatawad kita, kag samtang nagaalagad kita sa iban, nagahatag kita sang paglaum kag paghidaet nga dala sang paghinulsol—bangod naeksperiyensya naton ini sa aton mga kaugalingon.

Nakaupod ko ang mga Aaronic Priesthood holder sang nagbisita sila sa mga miyembro sang korum.Nakita ko ang ila pagtatap nga nagpahumok sang mga tagipusuon kag nagbulig sa ila mga kauturan nga mabatyagan ang gugma sang Dios. Nabatian ko ang isa ka pamatan-on nga nagpamatuod sa iya mga abyan parte sa gahum sang paghinulsol. Dayon napahumok ang mga tagipusuon, nahimo ang mga pangako, kag nabatyagan ang nagapaayo nga gahum ni Cristo.

Si Pangulong Gordon B. Hinckley nagtudlo: “Isa ka butang ang maghinulsol.Lain naman ang mapatawad sang aton mga sala. Ang gahum nga magpahanabo sini yara sa Aaronic Priesthood.” Ang mga ordinansa sang Aaronic Priesthood sang bunyag kag sang sakramento nagasaksi kag nagahuman sang aton paghinulsol para sa kapatawaran sang mga sala. Si Pangulong Dallin H. Oaks nagpaathag sa sini nga paagi: “Ginasugo kita nga maghinulsol sang aton mga sala kag magkari sa Ginuo nga may isa ka buong nga tagipusuon kag isa ka mahinulsulon nga espiritu kag mag-ambit sang sakramento. … Kon bag-ohon naton ang aton mga kasugtanan sa bunyag sa sini nga paagi, ginabag-o sang Ginuo ang makapatinlo nga epekto sang aton bunyag.”

Mga kauturan, isa ka sagrado nga prebilihiyo ang maghikot sang mga ordinansa nga nagadala sang kapatawaran sang mga sala sa mahinulsulon nga mga tagipusuon paagi sa nagapasag-uli nga gahum sang Manluluwas.

Sang sini lang ginsugiran ako parte sa isa ka priest nga nabudlayan sa paghambal samtang nagapakamaayo sang sakramento sa una nga tion. Sang ginahimo niya ini, ang gamhanan nga espiritu nagtandog sa iya kag sa kongregasyon.Sa pagkaulihi sa miting, nagpamatuod sia sing simple pero maathag nga testimonya parte sa gahum sang Dios nga iya nabatyagan sa sinang ordinansa.

Ang korum sang mga priest sa pamilya-Mbuelongo

Sa Sydney, Australia, apat ka miyembro sang korum sang mga priest nagbunyag sang mga miyembro sang pamilya- Mbuelongo. Ang iloy sang isa sining mga priest nagsaysay sa akon kon paano ining eksperiyensya mabaskog nga nag-impluwensya sa iya anak. Ining mga priest nakahangop kon ano ang kahulugan sang “mahatagan sang awtoridad ni Jesucristo.”

Bal-an n’yo, ang mga prist makapamuno na karon sa paghikot sang tal-os nga mga bunyag sa templo. Ang akon 17 anyos nga anak nga lalaki sang sini lang nagbunyag sa akon para sa pila sang amon mga minatay. Dako ang amon pagpasalamat para sa Aaronic Priesthood kag sa prebilihiyo sa paghikot para sa kaluwasan sang mga anak sang Dios.

Young men, sa inyo matutum nga paghikot sang inyo mga tulumanon sa priesthood, nagapartisipar kamo upod sa Dios sa Iya buluhaton “sa pagpahanabo sang pagkawala’y kamatayon kag wala’y katapusan nga kabuhi sang tawo.” Ang mga eksperiyensya subong sini nagadugang sang inyo kaluyag kag nagahanda sa inyo sa pagtudlo sang paghinulsol kag pagbunyag sang mga hinaylo bilang mga misyonero. Ang mga ini nagahanda man sa inyo para sa dalayon nga pag-alagad sa Melchizedek Priesthood.

Si Juan nga Manugbautiso, Aton Ehemplo

Mga Aaronic Priesthood holder, may prebilihiyo kita kag tulumanon nga mangin subong nga mga alagad kay Juan nga Manugbautiso. Ginpadala si Juan bilang awtorisado nga mensahero agud magpamatuod kay Cristo kag mag-agda sa tanan nga maghinulsol kag mabunyagan—gingamit niya ang mga yabi sang Aaronic Priesthood nga aton ginhambalan. Si Juan dayon nagpahayag, “Ako nagabautiso sa inyo sa tubig nga sa paghinulsol: apang ang nagasunod sa akon gamhanan pa sa akon … : magabautiso [sia] sa inyo sa Espiritu Santo, kag sa kalayo.”

Gani, ang Aaronic Priesthood nga may mga yabi sang nagaalagad nga mga anghel kag nagapanghanda nga ebanghelyo, nagahanda sang alagyan nga batonon sang mga anak sang Dios paagi sa Melchizedek Priesthood, ang dulot sang Balaan nga Espiritu, ang pinakadako nga dulot nga mabaton naton sa sining kabuhi.

Daw ano ka dako nga responsibilidad nga ginhatag sang Dios sa mga Aaronic Priesthood holder!

Pangagda kag Promisa

Mga ginikanan kag priesthood leader, mabatyagan bala ninyo ang kaimportante sang laygay ni Pangulong Monson agud buligan ang young men nga mahangpan “kon ano ang kahulugan … nga mangin manugkapot sang priesthood sang Dios”? Ang paghangop kag pagpadako sang Aaronic Priesthood magahanda sa ila nga mangin matutum nga mga Melchizedek Priesthood holder, gamhanan nga mga misyonero, kag matarong nga mga bana kag amay. Paagi sa ila pag-alagad, mahangpan nila kag mabatyagan ang realidad sang gahum sang priesthood, ang gahum nga maghikot sa ngalan ni Cristo para sa kaluwasan sang mga anak sang Dios.

Young men, ang Dios may ipahimo nga buluhaton sa inyo. Ang inyo ordinasyon sa Aaronic Priesthood importante kaayo sa pagbulig sa Iya mga anak nga mabaton ang nagapasag-uli nga gahum ni Cristo. Ginapromisa ko nga sa inyo pagsentro sining sagrado nga mga tulumanon sa inyo kabuhi, mabatyagan ninyo ang gahum sang Dios nga wala pa ninyo nabatyagan sang una. Mahangpan ninyo ang inyo kinaugali bilang anak sang Dios nga gintawag nga may balaan nga tawag sa paghimo sang Iya buluhaton. Kag pareho kay Juan nga Manugbautiso, magabulig kamo sa paghanda sang alagyan para sa pagkari sang Iya Anak. Nagasaksi ako sining mga kamatuoran sa ngalan ni Jesucristo, amen.