Mga Batan-on nga Babayi sa Obra
Dapat mabatyagan sang kada batan-on nga babayi sa Simbahan nga dalayawon siya, may mga oportunidad siya nga magserbisyo, kag may ara siya dako nga pulos sa sining obra.
Sang nagligad nga tuig, sa priesthood seyson sang komperensya, si Bishop Gerald Causse nagistorya sa kalalakihan sang Simbahan kag ginsaysay niya nga dungan gid ang mga may Aaronic kag ang mga may Melchizedek Priesthood sa obra sang kaluwasan. Dako ang bulig sina nga mensahe para makit-an sang mga batan-on nga lalaki nga may Aaronic Priesthood ang parte nila sa pagpatindog sang ginharian sang Diyos sa kalibutan. Ang dungan nga serbisyo nila nagapabakod sa Simbahan kag mas nagapahaylo kag nagapaisog sa mga batan-on nga lalaki kay dira nila makit-an ang dako nga pulos sang ila ginahimo kag kon ano gid kanami ang obra nga ini.
Subong gusto ko sugpongan ina nga mensahe samtang ginaistoryahan ko ang mga batan-on nga babayi sa Simbahan. parehas sila ka importante sa pagbuhat sang obra sang Ginuo sa ila pamilya kag sa Iya Simbahan.
Parehas kay Bishop Causse, nagtambong ako sa gamay nga branch sang Simbahan sang teenager pa ako, kag permi ako ginpangayo-an nga tumanon ang mga calling nga kalabanan ginahimo sang mga may idad na. Halimbawa, kami sang mga youth pirme nagpangulo sa paghiwat sang mga aktibiti, kag nagpartisipar gid sa kada miting. Gintawag ako nga mangin music lider sa branch kag kag gin-lead ko ang pagkanta sa sakramento kada simana. Bilang 16 anyos, maayo gid ini nga experiensya nga magtindog sa atubangan kada simana kag mag-lead sang pagkanta sang mga himno. Nabatyagan ko nga kinahanglanon ako kag nabal-an ko man nga may mapuslan gid ako. Nakasandig ang mga tawo sa akon, kag kanami sang balatyagon nga mapuslanon ako. Nagpadako ina nga eksperiensya sa pagtuo ko kay Hesu Cristo, kag parehas sa natabo kay Bishop Causse, naanklahan ang kabuhi ko sa serbisyo sa ebanghelyo.
Dapat makabalo ang kada miembro nga kinahanglanon gid siya. Ang tagsa-tagsa may ihatag nga importante kag may pinasahi nga mga talento nga nagapadayon sining obra. Ang aton mga batan-on nga lalaki may mga palangakoan nga ginasaysay sa D&C nga hapos makit-an. Siguro indi pirme makit-an sang mga batan-on nga babayi sa Simbahan kag ila ginikanan, kag mga lider, nga halin sang pagkatugmaw, ang mga batan-on nga babayi may kasugtanan kag palangakoan nga “mangasubo upod ang mga nagapangasubo; huo, kag magpaumpaw sang mga tawo nga kinahanglan sing kaumpawan, kag magtindog bilang saksi sang Diyos sa kada tinion kag kada lugar kag tanan nga pagadayonan nila hasta sa kamatayon.” May oportunidad ang mga batan-on nga babayi nga himuon ini nga mga obligasyon sa ward kag branch nila pati kon ara sila sa class presidency, sa youth council, kag sa iban nga mga calling. Dapat mabatyagan sang kada batan-on nga babayi sa Simbahan nga dalayawon siya, may mga oportunidad siya nga magserbisyo, kag may ara siya dako nga pulos sa sining obra.
Sa Handbook 2, matun-an naton nga ang obra sang kaluwasan sa aton mga ward nagasakop sang “obra sang misyonero bilang miembro, paghalong sa mga bag-o nga miembro, paghagad sa wala na nagasimba, obra sang templo kag historia sang katigulangan, kag pagtudlo sang ebanghelyo.” Ining obra ginadirekta sang mga matutom nga bishop naton, nga may mga yabi sa priesthood para sa ila ward. Pila na ka tuig nagpamangkot ang amon presidency, “Sa diin bala sa sining mga nasambitan indi dapat magupod ang aton mga batan-on nga babayi?” Ang sabat: may ara gid sila sang mapuslan sa tanan nga mga olobrahon diri.
Halimbawa, may mga bag-o ako nga kilala sa Las Vegas nga batan-on nga babayi nga gintawag nga mangin ward temple kag family history consultants. Tam-an sila kalipay nga pwede sila magtudlo kag magbulig sa mga miembro sang ila ward nga pangitaon ang mga katigulangan nila. Sagad sila sa mga komputer, kabalo sila maggamit sang FamilySearch, kag nagakasadya sila sa pagtudlo sang nabal-an nila sa iban. Makit-an gid nga may testimonyo sila kag naintyendehan nila nga importante gid pangitaon ang ngalan sang mga himata naton nga nagtaliwan na para mahimoan sila sang mga makaluluwas nga ordinansa sa templo.
Sang pila ka bulan, may oportunidad ako nga ipatesting ang isa ka idea sa duha ka 14-anyos nga babayi. Nagkuha ako sang kopya sang duha ka programa sa ward council kag ginhatag ko kay Emma kag Maggie. Ginpangayo-an ko sila nga basahon ang mga programa kag tan-awon kon may ibulig sila sa mga ginlista nga hilimuon sang ward council. Nabasa ni Emma nga may magasaylo sa ward nga bag-o nga pamilya, kag pwede niya sila kono buligan nga magsaylo kag maghusay sang ila mga butang. Napinsar niya nga pwede siya mangin abyan sang mga tinager sa pamilya kag ilagaw sila sa ila bag-o nga iskwelahan. Nakit-an man niya nga may ward dinner dugay-dugay kag may lain-lain nga pamaagi nga makabulig siya.
Nakit-an ni Maggie nga madamo gali tigulang sa ward nga kinahanglan bisitahan kag i-fellowship. Manamian gid siya tani kono nga magbisita kag magbulig sa sining mga mabuot nga miembro nga may edad na. Nabatyagan man niya nga matudloan niya ang mga miembro sa ward nga maghimo kag magusar sang social media. Kon sa bagay, wala gid sang hilimuon sa sina nga programa kon sa diin indi sila makabulig!
Ang mga miembro sang ward council ukon bisan sin-o nga may calling sa ward, ginakabig bala ninyo ang mga batan-on nga babayi bilang sagad nga bulig para sa mga kinahanglanon sang ward? Kalabanan kinahanglan naton sang madamo nga tawo nga magserbisyo, pero mga mahamtong lang ang ginapinsar naton para magbulig. Parehas nga ginhagad ang mga may Aaronic Priesthood nga magobra upod ang ila amay kag iban pa nga mga lalaki nga may Melchizedek Priesthood, amo man ang aton mga batan-on nga babayi; pwede sila tawgon nga magserbisyo kag magalagad sa mga ka-ward nila upod ang ila nanay ukon iban nga mga dalayawon nga sister. Sagad, eksayted, kag handa sila nga maghimo sang madamo, indi lang magsimba sa Dominggo!
Samtang ginapinsar naton ang mga papel nga mabaton sang aton mga batan-on nga babayi sa palaaboton, siguro mamangkot kita kon ano ayhan ang mga eksperiensya nga pwede naton ihatag sa ila subong para makapreparar sila nga mangin mga misyonero, estudyante sang ebanghelyo, lider sa Simbahan, boluntaryo sa templo, asawa, iloy, manugtudlo, ihemplo, kag abyan. Makasugod sila subong nga magbulig sa amo sina nga mga papel. Ginaayo-an ang mga batan-on nga magtudlo sa mga klase kon Dominggo. Samtang nagabulig sa pagtugmaw para sa mga patay, ang aton mga batan-on nga babayi may oportunidad na nga maghimo sang mga hilikoton sa templo nga sang una ginhimo lang sang mga manugobra sa templo. Ginahagad na ang mga babayi sa Primary nga magtambong sa mga miting sang Paghanda sa Templo kag Priesthood, kon sa diin mas maintyendehan nila ang ila importante nga parte sa obra nga ginadirekta sang priesthood. Nagatuon sila nga ang tanan pati lalaki, babayi, kag mga bata makabaton sang mga bugay sang priesthood kag may papel sila nga aktibo sa pagpadayon sang obra sang Ginuo.
Mga Bishop, kabalo kami nga damo kamo obligasyon, pero parehas nga isa sa mga dapat niyo nga unahon ang pagpangulo sa mga korum sang Aaronic Priesthood, ginasaysay sang Handbook 2 nga “ang bishop kag ang iya mga konselor amo ang nagapangulo nga priesthood para sa mga Young Women. Nagaangot sila sa mga ginikanan kag lider sa Young Women sa pagbantay kag pagpabakod sa mga batan-on nga babayi.” Ginasaysay man dira nga “dapat masunsun nga magpartisipar ang mga bishop kag iya mga konselor sa mga miting, serbisyo, kag aktibti sang Young Women.” Nagapasalamat kami sa mga bishop nga nagahatag sang tiempo para magbisita sa Young Women kag maghatag sang mga oportunidad para sa mga batan-on nga babayi nga magupod sa obra, indi lang maglantaw. Salamat gid kay ginapiho niyo nga nagapartisipar gid ang mga batan-on nga babayi sa pagbulig sa mga miembro sa ward. Ini nga mga oportunidad nga magserbisyo mas magabugay sa ila kaysa sa mga aktibiti nga masadya lang.
Kamo nga mga batan-on nga babayi sa Simbahan, mabudlay kag sako ang inyo pagkatinager. Natalupangdan namon nga madamo sa inyo ang may manubo nga pagtan-aw sa kaugalingon, nagakabalaka kamo, ginastress kamo, kag may depresyon ang mga iban. Ang pagpinsar sa mga iban imbis nga pinsaron ang inyo mga problema, siguro indi makasolvar ang tanan nga mga problema, pero ang pagserbisyo makapamag-an sang inyo mga palas-anon kag buhinan ang kabudlayan niyo. Paagi sa paghalong kag pagserbisyo sa mga iban, mapakita naton nga madamo kita may mapuslan, kag isa ini sa pinakaepektibo nga pamaagi nga itaas ang panulok naton sa kaugalingon. Ginapaisog ta kamo nga mga batan-on nga babayi nga magboluntaryo kag pahulagon ang inyo mga kamot kon makit-an niyo ang mga nagakinahanglan sa palibot niyo. Samtang ginatuman niyo ang inyo mga kusugtanan kag nagaupod sa pagpatindog sang ginharian sang Diyos, may mga bugay nga magailig sa inyo kabuhi kag madiskobrehan niyo ang madalum kag dalayon nga kalipayan sang pagkadisipulo.
Mga kautoran, sagad kaayo ang aton mga batan-on nga babayi. May ara sila mga talento, wala’y ubos nga kapagsik, kag malolo sila kag mapinalanggaon. Gusto gid nila nga magserbisyo. Kinahanglan nila mabal-an nga dalayawon sila kag importante sa obra sang kaluwasan. Parehas sang mga batan-on nga lalaki nga may Aaronic Priesthood nga nagapreparar sa mas dako nga serbisyo pagkabaton nila sang Melchizedek Priesthood, ang aton mga batan-on nga babayi nagapreparar nga mangin miembro sa pinakadako nga organisasyon sang kababayihan sa kalibotan--ang Relief Society. Dungan ini nga mga maanyag, mabaskog, kag matutom nga mga batan-on nga babayi kag lalaki sa pagpreparar nga mangin mga asawa kag bana, kag mga iloy kag amay nga magpadako sang mga pamilya nga takos sa selestyal nga ginharian sang Diyos.
Nagapamatuod ako nga ang obra sang aton Langitnon nga Amay amo ang pagpadayon sang wala’y katapusan nga kabuhi sang Iya mga anak. Ang aton mga mahal nga batan-on nga babayi may importante nga papel sa pagtuman sini nga obra. Sa ngalan ni Hesu Cristo, amen.