Te aupurura’a
E faa’ohipahia te hō’ē arata’iraa ’āpī ’e te mo’a a’e nō te haapa’o ’e nō te aupuru ia vetahi ’ē.
Māuruuru e Elder Gong ’e e Elder Soares, nō te fa’a’itera’a mai i te fa’aro’o o tō ’ōrua ’ā’au. Tē māuruuru roa nei mātou ia ’ōrua ’e i tō ’ōrua hoa here.
Te mau taea’e e te mau tuahine here, tē ’imi tāmau nei mātou i te arata’ira’a a te Fatu nō ni’a i te rāve’a nō te tauturu i tā tātou mau melo ’ia ha’apa’o i te mau fa’auera’a a te Atua, nā ture rahi iho ā rā e piti, e here i te Atua ’e i tō tātou ta’ata tupu.1
E rave rahi ’āva’e tō mātou ’imira’a i te rāve’a maita’i a’e nō te aupuru i te ta’ata ’e tō rātou mau hina’aro pae vārua ’e pae tino, mai tā te Fa’aora e rave.
’Ua rave mātou i te fa’aotira’a e fa’a’ore i te hāhaerera’a ’utuāfare ’e te hāhaerera’a a te mau tuahine mai tā tātou i mātau. Nō te mono i te reira, e fa’a’ohipahia te hō’ē arata’ira’a ’āpī ’e te mo’a a’e nō te ha’apa’o ’e nō te aupuru ia vetahi ’ē. E parau ’ōhie tātou i teie tauto’ora’a, te « aupurura’a ».
E tupu te manuiara’a i roto i te tauto’ora’a aupurura’a nā roto i te mau hōro’a e vai ra i roto i te mau tuahine ’e te mana fāito ’ore o te ’autahu’ara’a. Tātou pā’āto’a tē hina’aro nei i te reira pāruru i mua i te rāmā a te ’enemi.
I teienei, e fa’ata’a mai Elder Jeffrey R. Holland nō te pupu nō te Tino ’Ahuru Ma Piti ’āpōsetolo ’e ’o Jean B. Bingham, te peresideni rahi o te Sōtaiete Tauturu, i te huru te mau taea’e o te autahu’ara’a ’e te mau tuahine o te Sōtaiete Tauturu ’e te Feiā ’Āpī Tamāhine e ’ohipa nō te tāvini ’e nō te ha’apa’o i te mau melo nō te ’Ēkālesia ’ati a’e te ao nei.
’Ua tāhō’ē te Peresidenira’a Mātāmua ’e te Tino ’Ahuru Ma Piti i te pāturura’a i tā rāua poro’i. Tē ’īriti nei mātou i teie pene ’āpī o te ’ā’ai o te ’Ēkālesia ma te māuruuru ’e te ’ā’au pure. I te i’oa o Iesu Mesia, ’āmene.