Ang Bilidhon nga mga Dulot Halin sa Dios
Ang kabuhi sarang mapuno sang pagtuo, kasadya, kalipayan, paglaum, kag gugma kon kita nagagamit sang bisan pinakadiutay nga bahin sang tunay nga pagtuo kay Cristo.
Mga kautoran ko, bag-o lang kita nagpartisipar sa isa ka solemn assembly, isa ka buhat nga sarang makit-an sa Biblia sang ang dumaan nga Israel nagtililipon agud mabatyagan ang presensya sang Dios kag magsaulog sang Iya mga bugay. Pribilihiyo naton ang mabuhi sa tion nga ining dumaan nga buhat ginpanumbalik paagi sa Propetang si Joseph Smith. Ginasugo ko kamo nga magsulat sa inyo journal parte sa inyo nabatyagan sa sining labing sagradong okasyon kon diin kamo kabahin.
Bag-o lang kita nagpaalam sa pinalangga naton nga abyan kag propeta, si Presidente Thomas S. Monson. Bisan nga kita tanan nahidlaw sa iya, daku ang aton pagpasalamat nga ang Ginuo nagtawag sang isa ka bag-o nga propeta, si Presidente Russell M. Nelson, nga magpangulo sa Iya Simbahan. Sa matawhay nga paagi, karon nagasugod kita sa isa ka bag-o nga kapitulo sa kasaysayan sang aton Simbahan. Ini bilidhon nga dulot sang Dios.
Samtang ginsakdag naton si Presidente Nelson paagi sa pagbayaw sang aton mga kamot, nagtindog kita bilang mga saksi sa atubang sang Dios kag nagkilala nga sia ang may kinamatarung nga magbulos kay Presidente Monson. Sa pagbayaw sang aton mga kamot, nagpromisa kita nga magpamati sa iya tingog samtang sia nagabaton sang direksyon halin sa Ginuo.
Ang Ginuo nagasiling:
“Magpamati kag magsunod kamo sa tanan niya [buot silingon ang Presidente sang Simbahan] nga mga pulong kag sugo nga igahatag niya sa inyo samtang ginabaton niya ang mga ini… ;
“Kay ang pulong niya pagabatunon ninyo, subong nga ang ini naghalin sa kaugalingon ko nga baba, upod ang tanan nga pagpaumod kag pagtuo.”
Nakilal-an ko ang aton bag-o nga propeta-presidente sa kapin sa saisiyenta anyos. Kaupod kami nga nag-alagad sa Korum sang Napulogduha sa 33 anyos, kag saksi ako nga ang kamot sang Ginuo naghanda sa iya nga mangin pangulong apostoles kag propeta sa paggamit sa tanan nga mga yabi sang balaan nga priesthood diri sa kalibutan. Kabay nga ang kada isa sa aton lubos nga magsakdag sa iya kag sa iya mga manuglaygay kag magsunod sa iya direksyon. Ginaabiabi man naton sing maayo sanday Elder Gong kag Elder Soares bilang mga miyembro sang Korum sang Napulogduha ka Mga Apostoles.
Pagkatapos sang pagkabanhaw ni Jesus, nga ginasaulog naton sining mahimayaon nga simana santa, Sia nagpakita sa Iya mga disipulo kag nagsiling, “Paghidaet ginahatag ko sa inyo: subong nga ako ginpadala sang akon Amay, ako man nagapadala sa inyo.” Tandai ang duha ka buhat—ang Dios nagapadala sa Iya Anak. Ang Anak nagapadala sang Iya mga alagad—mortal nga mga lalaki kag mga babayi—agud maghimo sang Ila buluhaton.
Dapat indi kita matingala nga mahibal-an nga ang yadtong mga tawo nga gintawag agud maghimo sang buluhaton sang Dios indi tawhanon nga perpekto. Ang mga istorya sa mga kasulatan nagaasoy sang mga hitabo parte sa mga lalaki kag mga babayi nga gintawag sang Dios agud maghimo sang isa ka dakung buluhaton—maayo nga mga anak sang aton Langitnon nga Amay gintawag agud mag-alagad sa ila mga buluhaton sa Simbahan, nagatinguha sa paghimo sang ila pinakamaayo, apang wala pa gid sa ila ang perpekto. Ang amo nga butang matuod man sa aton karon nga adlaw
Bangud matuod nga kita may mga kahuyangan kag kakulangan, paano kita nga magpadayon sa pagsuporta kag pagsakdag sa kada isa? Ini nagasugod sa pagtuo—tunay, sinsero nga pagtuo sa kay Ginuong JesuCristo. Ang pagtuo sa Manluluwas amo ang unang prinsipyo sang doktrina kag ebanghelyo ni Cristo.
Sang pila ka tuig nga nagligad ako nagbisita sa Israel. Samtang nagmaneho kami kag nag-agi sa isa ka tanom nga mustasa, ang direktor sang BYU Jerusalem Center nagpamangkot kon bala ako nakakita na sang binhi sang mustasa. Wala pa gani kami nagdulog. Ginpakita niya sa akon ang mga binhi halin sa mustasa. Tuman gid ka magagmay ang mga ini.
Nadumdoman ko dayon ang mga panudlo ni Jesus: “Sa pagkamatuod, kon may pagtuo kamo nga bisan pareho lang kagamay sa binhi sang mustasa, makasiling kamo sa sining bukid, Saylo ka didto; kag ang bukid magasaylo; kag wala sang butang nga indi ninyo mahimo.”
Kon kita may pagtuo pareho kagamay sa isa ka binhi sang mustasa, ang Ginuo sarang magbulig sa aton nga magsaylo sang mga bukid sang pagkawalay gana kag pagduhaduha sa mga buluhaton nga ara sa aton atubang samtang nagaalagad kita sa mga anak sang Dios, kalakip ang mga miyembro sang pamilya, mga miyembro sang Simbahan, kag yadtong indi pa mga miyembro sang Simbahan.
Mga kautoran, ang kabuhi sarang mapuno sang pagtuo, kasadya, kalipayan, paglaum, kag gugma kon maggamit kita sang pinakadiutay nga bahin sang tunay nga pagtuo kay Cristo—bisan daw isa ka binhi sang mustasa nga pagtuo.
Si Elder George A. Smith nagdumdom sang pila ka laygay nga ginhatag sa iya sang Propetang si Joseph Smith: “Nagsiling sia sa akon nga ako indi gid dapat madulaan sang paglaum, bisan ano pa ang mga kabudlay nga matabo sa akon. Bisan ako mahulog sa pinakamadalom nga buho sang Nova Scotia kag ang tanan nga bukid sang Rocky Mountains magtabon sa ibabaw ko, indi ako dapat madulaan sang paglaum apang magpadayon, maggamit sang pagtuo, kag magpadayon nga may maayo nga kaisog kag sa ulihi makasaka ako sa ibabaw sang tampok.”
Dapat naton dumdomon ang pahayag ni Paul: “Masarangan ko nga buhaton ang tanan nga mga butang paagi kay Cristo nga nagapabakod sa akon.” Ining pagpamatuod isa pa ka bilidhon nga dulot halin sa Dios.
Dugang pa sa mga dulot nga ginhinambitan ko, may ara pa sang mas madamo. Hambalan ko karon ang pila sa mga ini—ang dulot sang Adlaw nga Inugpahuway, ang sacramento, pag-alagad sa iban, kag ang di-matupongan nga dulot halin sa Dios, ang aton Manluluwas.
Ang gahum sang Adlaw nga Inugpahuway amo ang magbatyag sa simbahan kag sa puluy-an sang pagkahamuot, sang kasadya, kag kainit sang pag-upod sang Espiritu sang Ginuo nga wala sang bisan ano nga sablag.
Tuman ka madamo ang nagtugot sa ila mga kaugalingon nga halos mabuhi sa internet upod ang ila maalam nga mga galamiton—ang mga screen nagapasanag sang ila mga guya sa adlaw kag gab-i kag nangin mga pasak sa ila mga dalunggan nga indi na nila mabatian ang malinong, kag diutay nga tingog sang Espiritu. Kon indi kita magkuha sang tion nga kuhaon ang pasak sa mga dalunggan, basi madulaan kita sang oportunidad nga mabatian ang tingog Niya nga nagsiling, “Magpahimunong, kag kilalaha nga Ako amo ang Dios.” Ti wala sang malain sa paggamit sang mga pag-uswag sa mga teknolohiya nga gin-inspirar sang Ginuo, apang dapat nga mangin maalam kita sa paggamit sang mga ini. Dumdoma ang dulot sang Adlaw nga Inugpahuway.
Ang bugay sang pagbaton sang sacramento sa sacramento nga miting indi gid dapat nga mangin kinaandan ukon ginahimo lamang. Ini sitenta minutos lamang sa bilog nga simana kon diin kita sarang magpahuway kag makasapo sang dugang nga kalinong, kasadya, kag kalipayan sa aton mga kabuhi.
Ang pag-ambit sang sacramento kag pagbag-o liwat sang aton mga kasugtanan amo ang tanda naton sa pagpahibalo sa Ginuo nga dalayon naton Sia nga ginadumdom. Ang Pagpasag-uli Niya isa ka maalwan nga dulot halin sa Dios.
Ang pribilihiyo sang pag-alagad sa mga anak sang Langitnon nga Amay isa pa ka oportunidad sa pagsunod sa halimbawa sang Iya Pinalangga nga Anak paagi sa pag-alagad sa isa kag isa.
Ang pila ka mga oportunidad sa pag-alagad pormal—sa aton pamilya, sa mga katungdanan sa Simbahan, kag sa pagpartisipar sa mga organisasyon sang pag-alagad sa komunidad.
Ang mga miyembro sang Simbahan—angay mga lalaki kag mga babayi—indi dapat magduhaduha, kon luyag nila, ang magpadalagan para sa publiko nga opisina sa bisan ano nga andana sang gobyerno bisan diin man sila nagaistar. Ang aton mga tingog ginakinahanglan karon nga panahon kag importante sa aton mga eskwelahan, sa aton mga siyudad, kag sa aton mga pungsod. Kon diin may demokrasya, katungdanan naton bilang mga miyembro ang magboto sa mga dungganon nga mga lalaki kag mga babayi nga luyag mag-alagad.
Madamo nga mga oportunidad sa pag-alagad indi pormal—wala ginhatag—kag nagaabot samtang kita nagatabang sa iban nga aton nasugata sa aton pagpangabuhi. Dumdoma nga si Jesus nagtudlo sa manunudlo sang Kasuguan nga dapat naton palanggaon ang Dios kag ang aton kasilingan subong sa aton mga kaugalingon, ginhalimbawa Niya ang maayo nga Samaritano.
Ang pag-alagad nagahatag sang paagi agud mahangpan naton ang kabuhi kag pagpangalagad ni Cristo. Nagkari Sia agud mag-alagad, subong sa gintudlo sang mga kasulatan, “bisan subong sa Anak sang tawo nga nagkari indi agud alagaran, kondi ang mag-alagad, kag maghatag sang iya kabuhi bilang pagtubos para sa kadam-an.”
Si Peter siguro ang naghatag sang pinakamaayo nga paglaragway parte sa mortal nga pagpangalagad sang Manluluwas sa lima ka mga tinaga sang sia nagtumod kay Jesus nga, “nagpanglakaton sa paghimo sang kaayohan.”
Ang Ginuong JesuCristo amo ang aton pinakabilidhon nga dulot sa tanan nga mga dulot sang Dios. Si Jesus nagsiling, “Ako amo ang dalan, ang kamatuoran, kag ang kabuhi: wala sing may makakadto sa Amay, kon indi paagi sa akon.”
Nahangpan ni Nephi ang importansya sang aton Manluluwas sang sia nagpahayag, “Kami nagahambal parte kay Cristo, nagakasadya kami kay Cristo, nagawali kami parte kay Cristo, nagapanagna kami parte kay Cristo, kag kami nagasulat suno sa amon mga panagna, agud nga ang amon mga kabataan pwede makahibalo kon kay sin-o sila maglaum para sa kapatawaran sang ila mga sala.” Dapat naton ipabilin si Cristo bilang sentro sang aton mga kabuhi sa tanan nga tion kag sa tanan nga lugar.
Dapat naton dumdomon nga ang Iya ngalan amo ang ara sa mga lugar kon diin kita nagasimba; ginbunyagan kita sa Iya ngalan; kag kita ginkumpirmahan, gin-ordinan, gindulotan, kag ginhugpong sa pag-asawahay sa Iya ngalan. Nagaambit kita sang sacramento kag nagapromisa nga akuon naton sa aton mga kaugalingon sang Iya ngalan—kag mangin matuod nga mga Kristiyano. Sa ulihi, ginpangabay kita sa pangamuyo sang sacramento nga “dalayon nga magdumdom sa iya.”
Samtang nagahanda kita para sa Domingo sang simana santa buas, dumdomon naton nga si Cristo amo ang supremo. Sia ang matarong nga Hukom, ang himpit naton nga Manugpatunga, bulahan nga Manunubos, maayo nga Manugbantay, ginsaad nga Messias, matuod nga Abyan, kag mas tuman pa ka madamo. Sia matuod gid nga pinakabilidhon nga dulot sa aton sang aton Amay.
Sa aton pagkasumulunod, may madamo nga ginapangayo sa aton, mga kabalak-an, kag ginhatag nga mga buluhaton. Bisan paano, ang pila ka mga buluhaton dalayon nga dapat ara sa tunga sang aton pagkamiyembro. “Gani,” ang Ginuo nagasugo, “mangin masinulundon; tumanon mo ang katungdanan nga ginhatag ko sa imo; tabangi ang mahuyang, ibayaw ang mga kamot nga nagaluyloy, kag pabakuron ang mga tuhod nga maluya.”
Ini ang Simbahan nga nagabuhat! Ini ang puro nga relihiyon! Ini amo ang ebanghelyo sa matuod nga kahulogan sini samtang kita nagatabang, nagatib-ong, kag nagapabakod sa yadtong mga nagakinahanglan sa espiritu kag sa lawas! Ang paghimo sini nagapangayo nga kita dapat magbisita kag magbulig sa ila agud nga ang ila mga pagpamatuod sang pagtuo parte sa Langitnon nga Amay kag kay JesuCristo kag sa Iya Pagpasag-uli magapabilin sa ila mga tagipusuon.
Kabay nga ang Ginuo magbulig kag magbugay sa aton sa pagpakabahandi sang aton madamong bilidhon nga mga dulot halin sa Dios, kalakip ang aton pagkamiyembro sa Iya ginpanumbalik nga Simbahan. Ginapangamuyo ko nga kita mapuno sang pagpalangga para sa mga anak sang Langitnon nga Amay kag sarang makakita sang ila mga pagkinahanglan kag luyag nga magsabat sang ila mga pamangkot parte sa ebanghelyo sa maathag kag maayo nga mga paagi nga magadugang sa paghinangpanay kag pagpasalamat para sa kada isa.
Nagapamatuod ako nga si JesuCristo amo ang Manluluwas. Ang ano man nga igatudlo sa sining kabilogan nga konperensya nagaabot sa aton paagi sa inspirasyon halin sa mga apostoles kag mga propeta, halin sa mga General Authority, kag kababayin-an nga mga lider nga Pangkabilogan nga Mga Opisyales sang Simbahan. Kabay nga ang kasadya kag paghidaet sang Ginuo mangin ara sa tanan amo ang kubos ko nga pangamuyo sa ngalan ni Ginuong JesuCristo, amen.