E mau hōro’a faufa’a rahi nō ’ō mai i te Atua ra
E nehenehe te orara’a e ’ī i te fa’aro’o, te ’oa’oa, te poupou, te tīa’ira’a, ’e te here mai te mea ē, e fa’a’ohipa tātou i te hō’ē fāito ha’iha’i roa a’e ’o te fa’aro’o mau i te Mesia.
Te mau taea’e ’e te mau tuahine, ’ua ’āmui iho nei tātou i roto i te hō’ē ’āmuira’a hanahana, ’o te hō’ē peu ’o te nehenehe e tuatāpapa e tae roa atu i te ’anotau o te Bibilia, ’a putuputu ai ’Īserā’ela i tahito ra nō te fāri’i i te fa’aurura’a a te Fatu ’e nō te fa’ahanahana i tāna mau ha’amaita’ira’a.1 ’Ua ha’amaita’ihia tātou ’ia ora i te hō’ē ’anotau ’ua fa’aho’i-fa’ahou-hia mai taua peu tahito ra nā roto i te peropheta Iosepha Semita.2 Tē fa’aitoito atu nei au ia ’outou ’ia tāpa’o i roto i tā ’outou buka ’ā’amu i te mau mea tā ’outou i fāri’i i roto i te ’ā’au nō ni’a i teie taime mo’a roa tā ’outou i fāri’i iho nei.
’Aita i maoro a’e nei ’ua aroha tātou nō te ta’a-’ē-ra’a tō tātou hoa here ’e peropheta ato’a, te peresideni Thomas S. Monson. Noa atu ē, tē mihi nei tātou iāna, e ’oa’oa rahi rā tō tātou i te mea ē, ’ua pi’i te Fatu i te hō’ē peropheta ’āpī, te peresideni Russell M. Nelson, nō te fa’atere i tāna ’Ēkālesia.I roto i te hō’ē fa’anahonahora’a nahonaho maita’i, ’ua ha’amata tātou i teienei i te hō’ē pene ’āpī i roto i tō tātou ’ā’amu nō te ’Ēkālesia.E hōro’a faufa’a rahi teie nō ’ō mai i te Atua ra.
’A pāturu ai tātou tāta’itahi i te peresideni Nelson nā roto i te ’āfa’ira’a i tō tātou rima i ni’a, ’ua ti’a tātou ’ei mau ’ite i mua i te Atua ma te fa’a’ite ē, ’o ’oia te mono ti’a mau o te peresideni Monson.Nā roto i te ’āfa’ira’a i tō tātou rima i ni’a, ’ua fafau tātou e fa’aro’o i tōna reo ’a fāri’i ai ’oia i te arata’ira’a nō ’ō mai i te Fatu ra.
I parau mai te Fatu ē :
« E ha’apa’o ’outou i tāna (’oia ho’i te peresideni o te ’Ēkālesia) mau parau ’e i tāna mau fa’auera’a ato’a ’o tāna e hōro’a atu ia ’outou mai te noa’a iāna ra, i te haerera’a mo’a i mua iā‘u nei … ;
« E fāri’i ho’i ’outou i tāna parau mai te mea ra ē nō roto i tō’u iho nei vaha, ma te fa’a’oroma’i ’e te fa’aro’o ato’a ».3
’Ua mātau vau i tō tātou peropheta-peresideni ’āpī hau atu i te 60 matahiti.’Ua tāvini au i pīha’i iho iāna i roto i te Pupu nō te Tino ’Ahuru Ma Piti e 33 matahiti te maoro, ’e ’o vau te hō’ē ’ite ē, ’ua fa’aineine te rima o te Fatu iāna nō tē riro mai ’ei ’āpōsetolo fa’atere ’e ’ei peropheta nō tātou nō te fa’atere i te mau tāviri ato’a o te autahu’ara’a mo’a i ni’a i te fenua nei. E mata na tātou tāta’itahi i te pāturu hope roa iāna ’e i tōna nā tauturu ’e ’ia pe’e i tā rātou arata’ira’a.Tē fāriʼi poupou ato’a nei mātou ia Elder Gong ʼe ia Elder Soares ’ei melo nō te Pupu nō te Tino ʼAhuru ma Piti ʼāpōsetolo.
I muri a’e i te ti’afa’ahoura’a o Iesu, hō’ē ’ohipa tā tātou e fa’ahanahana nei i teie hope’a hepetoma Pāsa hanahana, ’ua fā mai ’oia i tāna mau pipi ’e nā ’ō mai ra, « ’ia ora nā ’outou : Mai tā’u Metua ho’i i tono mai iā’u nei ra, e tono ato’a ho’i au ia ’outou nā ».4 ’A hi’o na i nā ’ohipa e piti—’Ua tono mai te Atua i tāna Tamaiti.’Ua tono mai te Tamaiti i tāna mau tāvini—e mau tāne ’e e mau vahine tāhuti—nō te rave i tā rāua ’ohipa.
Eiaha tātou e māere ’ia ’ite ē, teie mau ta’ata i pi’ihia nō te rave i te ’ohipa a te Fatu, e ’ere ïa i te mau ta’ata maita’i hope roa i te tino nei. Tē fa’ata’a mai nei te mau ’ā’amu i roto i te mau pāpa’ira’a mo’a i te mau fifi nō ni’a i te mau tāne ’e te mau vahine tei pi’ihia e te Atua nō te rave i te hō’ē ’ohipa rahi—e mau tamaiti ’e e mau tamāhine maita’i nā tō tātou Metua i te Ao ra, tei pi’ihia ’ia tāvini i roto i tā rāua mau ’ohipa i roto i te ’Ēkālesia, ma te fa’aitoito ’ia rave ma tō rātou maita’i roa, ’aita rā hō’ē ’o rātou i hope i te maita’i roa.Mai te reira ato’a tātou.
’Ia hi’ohia te huru mau o tō tātou mau paruparu ta’ata ’e te mau hapehape, nāhea tātou i te haere i mua i roto i te fa’aitoitora’a ’e te pāturura’a te tahi i te tahi. E ha’amata nā roto i te fa’aro’o—te fa’aro’o mau ’e te ha’avare ’ore i te Fatu ia Iesu Mesia. Te fa’aro’o i te Fa’aora ’o te parau tumu mātāmua ïa o te ha’api’ira’a tumu o te ’evanelia a te Mesia.
E rave rahi matahiti i ma’iri a’enei, ’ua tere au i te Fenua Mo’a. ’A tere ai mātou nā pīha’i iho i te hō’ē tumu sinapi, ’ua ui mai ra te ra’atira nō te pū BYU nō Ierusalema ē, ’ua ’ite a’ena ānei au i te hō’ē huero sinapi.’Aita ā, nō reira ’ua tāpe’a mātou.’Ua fa’a’ite mai ra ’oia iā’u i te mau huero o te rā’au sinapi.E mea na’ina’i mau.
Ha’amana’o atura vau i te mau ha’api’ira’a a Iesu : ’Āhiri e fa’aro’o tō ’outou, mai te hō’ē huero sinapi noa iho te rahi, e ti’a ïa ia ’outou ’ia parau noa atu i teie nei mou’a, a haere i’ō atu, e nāna ïa e haere noa, e ’aita roa e mea e ’ore e ti’a ia ’outou ».5
’Āhiri e fa’aro’o tō tātou mai te hō’ē huero sinapi, e nehenehe ïa te Fatu e tauturu ia tātou ’ia ’īriti i te mau mou’a o te mana’o paruparu ’e te fē’a’a i roto i te mau ’ohipa i mua ia tātou ’a tāvini ai tātou i te mau tamari’i a te Atua, te mau melo o te ’utuāfare, te mau melo o te ’Ēkālesia, e te feiā ’aita ā i riro ’ei melo nō te ’Ēkālesia.
Te mau taea’e ’e te mau tuahine, e nehenehe te orara’a e ’ī i te fa’aro’o, te ’oa’oa, te poupou, te tīa’ira’a, ’e te here mai te mea ē, e fa’a’ohipa tātou i te hō’ē fāito ha’iha’i roa a’e o te fa’aro’o mau i te Mesia—noa atu e fa’aro’o mai te huero sinapi.
’Ua ha’amana’o ’o Elder George A. Smith i te tahi mau a’ora’a tā te peropheta Iosepha Semita i hōro’a iāna : « ’Ua parau mai ’oia iā’u ’eiaha roa vau e ha’aparuparu te mana’o, noa atu te huru ’o te mau fifi e hā’ati mai iā’u.Mai te mea ē, e pāremo vau i roto i te ’āpo’o pape hōhonu roa ae nō Nova Scotia (Nouvelle Écosse) ’e e tāpo’ihia vau i te mou’a nō Rocky Mountains, ’eiaha roa vau e ha’aparuparu te manao, e fa’a’ohipa i te fa’aro’o, ’ia tāpe’a noa te ’itoito, ’e ’ia matara mai au nā ni’a i te mou’a i te hope’a ra ».6
E ha’amana’o tātou i tā Paulo i parau ra, « e ti’a iā’u te mau mea ato’a nei i te Mesia, tei tauturu mai iā’u ra ».7 Teie ā te tahi atu hōro’a faufa’a rahi nō ’ō mai i te Atua ra.
Ta’a ’ē atu te mau hōro’a tā’u i fa’ahiti atu na, e rave rahi atu ā tē vai ra.E paraparau atu vau i te tahi noa i teienei—te hōro’a o te mahana sābati, te ’ōro’a mo’a, te tāvinira’a ia vetahi ’ē, ’e te hōro’a fāito ’ore o tō tātou Fa’aora nō ’ō mai i te Atua ra.
Te mana o te mahana sābati o te ’itera’a ïa i roto i te ’Ēkālesia ’e i te fare, te ’oa’oa, te poupou, ’e te māhanahana nō te fāri’ira’a i te Vārua o te Fatu ma te fa’anevanevara’a ’ore.
’Ua rahi roa te ta’ata e vaiiho nei ia rātou fātata e ora roa i ni’a i te natirara e tā rātou mau tāo’a rorouira—te mau paruai ’ia tūrama i tō rātou hōho’a mata i te pō ’e te ao, ’e te mau fa’aro’o tari’a i roto i te tari’a, aore atura rātou e fa’aro’o fa’ahou i te reo iti ha’iha’i o te Vārua.Mai te mea ē, ’aita tātou e ’imi i te taime nō te ’īriti, e riro tātou i te ’ere i te mau rāve’a nō te fa’aro’o i tōna reo tei nā ’ō mai ē, « ’a fa’atupua na, ’ia ’ite mai ē, ’o vau te Atua ».8 Teienei, ’aita hō’ē fifi ’ia fa’a’ohipa i te mau tupura’a o te mau rāve’a rorouira ’aravihi fa’auruhia mai e te Fatu, terā rā, ’ia fa’a’ohipa tātou i te reira ma te pa’ari ’e ti’a.Ha’amana’o i te hōro’a o te mahana sābati.
’Eiaha roa atu te ha’amaita’ira’a nō te fāri’ira’a i te ’ōro’a mo’a ’ia riro ’ei peu mātaro-noa-hia ’e aore rā te tahi noa ’ohipa tā tātou e rave i roto i te purera’a ’ōro’a noa. E 70 ana’e minuti i roto i te hepetoma tā’āto’a e nehenehe ai tātou e fa’afa’aea, ’e e fāri’i i te tahi atu hau, te ’oa’oa ’e te poupou i roto i tō tātou orara’a.
Te ravera’a i te ’ōro’a mo’a ’e te fa’a’āpīra’a i tā tātou mau fafaura’a, ’o te hō’ē ïa tāpa’o nā tātou i te Fatu ē, e ha’amana’o noa tātou iāna. Tōna tāra’ehara, e hōro’a maita’i rahi ïa nō ’ō mai i te Atua ra.
Te ha’amaita’ira’a ’ia tāvini i te mau tamari’i a te Metua i te Ao ra, e rāve’a ïa nō te pe’e i te hi’ora’a o tāna Tamaiti Here nā roto i te tāvinira’a te tahi ’e te tahi.
E mea mana te tahi mau rāve’a tāvinira’a—i roto i tō tātou ’utuāfare, tō tātou mau pi’ira’a i roto i te ’Ēkālesia, ’e te ’āmuira’a i roto i te mau pupu tāvinira’a nō te ’oire.
’Eiaha te mau melo o te ’Ēkālesia—te tāne ’e te vahine—e ’ōti’ati’a, mai te mea ē, e hina’aro rātou, nō te tītau i te mau ti’ara’a i roto i te hau i te mau fāito ato’a o te fa’aterera’a hau i te vāhi tā rātou e ora ra.E mea faufa’a tō tātou reo i teie mahana ’e e mea faufa’a i roto i tā tātou mau fare ha’api’ira’a, tō tātou mau ’oire, ’e tō tātou mau fenua.I te vāhi tē vai ra te fa’aterera’a hau manahune, e hōpoi’a nā tātou te mau melo ’ia mā’iti i te mau tāne ’e i te mau vahine tura ’o te hina’aro ’ia tāvini.
E rave rahi rāve’a tāvinira’a ōpua-’ore-hia—’aita e fa’auera’a ’ohipa—’e e tae mai te reira ’ia toro ana’e tātou i te rima ia vetahi ’ē o tā tātou e fārerei nei i roto i te terera’a o te orara’a.’A ha’amana’o ē ’ua ha’api’i mai Iesu ē, e ti’a ia tātou ’ia aroha i te Atua ’e i tō tātou ta’ata tupu mai ia tātou iho, ma te fa’a’ohipa i te ta’ata Sāmāria maita’i ’ei hi’ora’a.9
E ’īriti te tāvinira’a i te hō’ē māramarama nā reira ho’i tātou e hāro’aro’a ai i te orara’a ’e i te aupurura’a a te Mesia.’Ua haere mai ’oia nō te tāvini, mai tā te mau pāpa’ira’a mo’a e ha’api’i mai nei, « ’aita ato’a ho’i te Tamaiti a te ta’ata nei i haere mai ’ia tāvinihia ōna, ’ei tāvini rā, ’e ’ia hōro’a i tōna ora ’ei ho’o nō te ta’ata e rave rahi ».10
Nā Petero i hōro’a mai i te fa’ata’ara’a maita’i a’e o te tau tāvinira’a a te Fa’aora i te tāhuti nei i roto e ono ta’o, ’a parau ai ’oia nō Iesu ē, « ’o tei hāmani maita’i haere ra ».11
’O te Fatu ’oIesu Mesia tā tātou hōro’a faufa’a roa a’e i te mau hōro’a ato’a nō ’ō mai i te Atua ra. « Nā ’ō atura Iesu… ʼo vau te ’e’ā, te parau mau, ʼe te ora : ʼAore roa ʼe ta’ata e tae i te Metua ra, maori rā ’ei iāʼu ».12
’Ua tāpe’a mai ’o Nephi i te faufa’a o tō tātou Fa’aora ’a parau ai ’oia ē, « te paraparau nei tātou i te Mesia, ’e tē ’oa’oa nei tātou i te Mesia, ’e tē a’o nei tātou i te parau a te Mesia, ’e tē tohu nei hoʻi tātou i te Mesia, ’e te pāpa’i nei ho’i tātou i tā tātou mau tohu, ’ia ’ite tā tātou mau tamari’i i te tumu e hi’ohia atu e rātou nō te matarara’a i tā rātou mau hara ».13 Tītauhia ia tātou ’ia tāpe’a i te Mesia ’ei pū nō tō tātou orara’a i te mau taime ato’a ’e i te mau vāhi ato’a.
E ti’a ia tātou ’ia ha’amana’o ē, tōna i’oa te ’itehia i ni’a i tō tātou mau vāhi ha’amorira’a, te bāpetizohia nei tātou i tōna i’oa ’e e ha’amauhia tātou, e fa’atōro’ahia, e fāri’i i te ’ōro’a hiero, ’e e tā’atihia i roto i te fa’aipoipora’a nā roto i tōna i’oa.Tē rave nei tātou i te ’ōro’a mo’a ma te fafau ’ia rave i tōna i’oa i ni’a ia tātou iho—’e ’ia riro ’ei mau kerisetiano mau.I te hope’a, ’ua anihia ia tātou nā roto i te pure ’ōro’a ’ia « ha’amana’o ā iāna ».14
’A fa’aineine ai tātou nō te sābati Pāsa ananahi, e ha’amana’o tātou ē, o te Mesia tei hope i te teitei.’O ’oia te ha’avā parau ti’a, tō tātou pāruru ha’apa’o maita’i, te Fa’aora ha’amaita’ihia, te Tīa’i Māmoe Maita’i, te Mesia i fafauhia mai, te Hoa mau, ’e e rave rahi atu ā.E hōro’a faufa’a rahi mau ’oia nō tātou nō ’ō mai i te Metua ra.
I roto i tō tātou ti’ara’a pipi, ’ua rau tā tātou mau anira’a, mau mana’ona’ora’a, ’e te mau tītaura’a. Terā rā, e mea ti’a i te tahi mau ’ohipara’a ’ia riro ’ei mau mea tumu nō tō tātou ti’ara’a melo nō te ’Ēkālesia.« Nō reira », ’ua fa’aue mai te Fatu ē, « ’a ha’apa’o maita’i ; ’a ti’a noa mai i roto i te tōro’a tā’u i fa’ata’a nō ’oe na ; ’a aupuru i te feiā paruparu, ’a fa’ateitei mai i te rima tautau ra i ni’a, ’e ’a fa’a’eta’eta i te mau turi ’āvae paruparu ra ».15
Teie te ’Ēkālesia e ’ohipa nei ! Teie te ha’apa’ora’a fa’aro’o mau ! Teie te ’evanelia i roto i tōna aura’a mau, ’a tauturu ai tātou, ’a fa’ateitei ai ’e ’a ha’apūai ai i te feiā tē hepohepo nei i te pae vārua ’e i te pae tino ! Nō te rave i te reira, tītauhia ia tātou ’ia fārerei ia rātou ’e ’ia tauturu ia rātou16 ’ia ti’a i tō rātou ’itera’a pāpū nō ni’a i te fa’aro’o i te Metua i te Ao ra ’e ia Iesu Mesia ’e i tōna tāra’ehara, ’ia mau pāpū i roto i tō rātou māfatu.
’Ia tauturu mai ’e ’ia ha’amaita’i mai te Fatu ia tātou i te fa’ahereherera’a i tō tātou mau hōro’ara’a e rave rahi a te Atua, ’oia ato’a i tō tātou ti’ara’a melo i roto i tāna ’Ēkālesia i fa’aho’ihia mai. Tē pure nei au ’ia ’ī tātou i te here nō te mau tamari’i pā’āto’a a te Metua i te Ao ra, ’e ’ia ti’a ia tātou ’ia ’ite i tō rātou mau hina’aro, ’e ’ia hina’aro e pāhono i tā rātou mau uira’a e tō rātou mau mana’o nō ni’a i te ’evanelia ma te māramarama ’e te marū, ’o te fa’arahi i te māramarama ’e te here nō te tahi ’e te tahi.
Tē fa’a’ite pāpū nei au ē, ’o Iesu Mesia tō tātou Fa’aora. Te mau mea tei ha’api’ihia ia tātou i roto i teie ’āmuira’a rahi ’ua hōro’ahia mai ïa ia tātou nā roto i te fa’aurura’a mai roto mai i te mau ’āpōsetolo ’e te mau peropheta, mai roto mai i te mau huimana fa’atere rahi, ’e te mau tuahine fa’atere e mau ti’a fa’atere rahi nō te ’Ēkālesia.’Ia vai mai te ’oa’oa ’e te hau o te Fatu i roto i te ta’ata tāta’itahi, tā’u ïa pure nā roto i te i’oa o Iesu Mesia ra, ’āmene.