Tē paraparau nei te mau peropheta nā roto i te mana o te Vārua Maita’i
Tē vai nei te mau peropheta, e tāpa’o ïa nō te here o te Atua i tāna mau tamari’i. Nā rātou e fa’a’ite i te mau parau fafau ’e te nātura mau o te Atua ’e o Iesu Mesia.
E au mau taea’e, e au mau tuahine, i terā vāhi ’e terā vāhi, tē hina’aro nei au e fa’a’ite atu i tō’u māuruuru rahi mau nō tō ’outou pāturura’a mai inanahi ra. Noa atu tē hi’o ra vau iā’u ’ei ta’ata ’aravihi ’ore i te parau ’e te reo maromaroā mai ia Mose, tē ’ite nei rā vau i te tāmāhanahanara’a i roto i te parau a te Fatu iāna :
« ’O vai tei hōro’a mai i te vaha nō te ta’ata nei ? ’E ’o vai tei fa’ariro iāna ’ei vāvā, ’e ’ei turi, ’e ’ei mata ara, ’e ’ei mata pō ? E ’ere ānei ’o vau, ’o Iehova ?
« ’E teienei, e haere ’oe, ’e ’ei pīha’i ato’a iho vau i tō vaha, ’e nā’u e fa’a’ite ia ’oe i te parau ’ia parau ’oe ra » (Exodo 4:11-12 ; hi’o ato’a i te ’īrava 10).
Tē ’ite ato’a nei au i te tāmāhanahanara’a i roto i te here ’e te pāturura’a a tō’u hoa here. ’Ua riro noa ’oia ’ei hi’ora’a nō te maita’i ’e te here ’e te pūpūra’a hope iāna i te Fatu ’e nō’u ’e nō tō’u ’utuāfare. ’Ua here au iāna mā tō’u ’ā’au ato’a, ’e ’ua māuruuru vau nō tōna mana au i ni’a ia mātou.
Te mau taea’e ’e te mau tuahine, tē hina’aro nei au e fa’a’ite pāpū ia ’outou ē, ’o te peresideni Russell M. Nelson te peropheta o te Atua i ni’a i te fenua nei. ’Aita vau i mātau a’enei i te ta’ata marū ’e te here mai iāna. Noa atu tō’u mana’o fāito rahi roa ’ino o teie pi’ira’a mo’a nō’u, ’ua ’ite au i te here o te Fa’aora i ni’a iā’u nā roto i tāna mau parau ’e tōna mata aroha, ’a tu’u mai ai ’oia i teie hōpoi’a iā’u nei. Māuruuru e te peresideni Nelson. Tē pāturu nei au ia ’oe ’e ’ua here au ia ’oe.
E ’ere ānei i te ha’amaita’ira’a tē vai ra te mau peropheta, te mau hi’o ’e te mau heheu parau i ni’a i te fenua i te tau tā tātou e ora nei, ’o tē ’imi nei ho’i ’ia ’ite i te hina’aro o te Fatu ’e ’ia pe’e i te reira ? E mana’o tāmāhanahana te ’itera’a ē, e ’ere tātou i te ’ōtahi i roto i te ao, noa atu ā te mau tāmātara’a o te orara’a. Tē vai ra te mau peropheta, e tāpa’o ïa nō te here o te Atua i tāna mau tamari’i. Nā rātou e fa’a’ite i te mau parau fafau ’e te nātura mau o te Atua ’e o Iesu Mesia i tōna mau ta’ata ra. E ha’api’ira’a tā’u i ’apo mai i roto i te mau ’ohipa i tupu nō’u iho nei.
’A ’ahuru ma va’u matahiti i teienei, ’ua niuniuhia mai māua tā’u vahine e te peresideni James E. Faust, tauturu piti i roto i te Peresidenira’a Mātāmua i terā tau. ’Ua pi’i ’oia ia māua ’ia tāvini ’ei peresideni misiōni i te fenua Pōtītī. ’Ua nā ’ō mai ’oia ē, e ono noa hepetoma e ha’amata ai te misiōni. Noa atu ā te mana’o ineine ’ore ’e te fāito rahi roa o te reira nō māua, ’ua fāri’i māua i te pi’ira’a. Te māna’ona’ora’a rahi nō māua i terā tau, ’o te noa’ara’a ïa te mau visa tītauhia nō te tāvini i roto i terā fenua, inaha, tei mātauhia, e ono ’aore rā e va’u ’āva’e tītauhia nō te fa’aoti i te reira.
I ui mai ai te peresideni Faust ē, e fa’aro’o ānei tō māua ē, e fa’atupu te Fatu i te hō’ē semeio ’e e ’āfaro ’oi’oi mai te fifi visa. E ’ē pūai tā māua i pāhono atu, ’e i reira iho māua i te ha’amatara’a i te mau fa’aineinera’a. ’Ua fa’aineine māua i te mau parau nō te tītau i te visa, ’ua ha’aputuputu i tā māua e toru tamari’i ’āpī ’e ’ua haere vitiviti atura i te fare tōnitera (consulat). E vahine maita’i tei fāri’i ia mātou. I te hi’ohi’ora’a ’oia i tā mātou mau parau ’e i te ’ohipa e riro mātou i te rave i te fenua Pōtītī, ’ua fāriu ’oia i ni’a ia mātou ma te ui mai : « E parau mau ānei e haere ’outou e tauturu i te ta’ata o tō’u fenua ? » ’Ua pāhono pāpū atu māua ē ’ē, ’e ’ua fa’a’ite atu māua ē, e ti’a atu mātou nō Iesu Mesia i reira ’e e fa’a’ite pāpū mātou nōna ’e nō tāna misiōni hanahana i roto i te ao. ’Ua ho’i fa’ahou mai mātou e maha hepetoma i muri iho, ’e ’ua fāri’i mātou i tā mātou visa ’e ’ua tau mātou i roto i te ’āua misiōni nā mua a’e i te ono hepetoma, mai tei anihia mai e te hō’ē peropheta a te Fatu.
Te mau taea’e ’e te mau tuahine, mai te hōhonu o tō’u nei ’ā’au, tē fa’a’ite pāpū nei au ē, tē paraparau nei te mau peropheta nā roto i te mana o te Vārua Maita’i. Tē fa’a’ite pāpū nei rātou nō te Mesia ’e nō tāna misiōni hanahana i ni’a i te fenua nei. E fa’a’ite rātou i te mana’o ’e te ’ā’au o te Fatu ’e ’ua pi’ihia rātou nō te ti’a atu nōna ’e nō te ha’api’i ia tātou i tē mea e tītauhia ia tātou ’ia rave nō te ho’i i mua i te aro o te Atua ’e o tāna Tamaiti, ’o Iesu Mesia. E ha’amaita’ihia tātou ’ia fa’a’ohipa ana’e tātou i tō tātou fa’aro’o nō te pe’e i tā rātou mau ha’api’ira’a. Nā roto i te pe’era’a ia rātou, e ’oa’oa a’e tō tātou orara’a ’e e rave ’atā ’ore a’e, e ’ōhie a’e ’ia amo i te mau pe’ape’a ’e te mau fifi, ’e tē hāmani nei tātou i te hō’ē ha’ana tama’i nō tātou nō tē pāruru ia tātou i mua i te mau ’arora’a a te ’enemi, i tō tātou nei tau.
I teie mahana Pāsa, ma te tura rahi, tē fa’a’ite pāpū nei au ē, ’ua ti’a fa’ahou mai Iesu Mesia ’e tē ora nei ’oia ’e nāna e fa’atere nei i tāna ’Ēkālesia i ni’a i te fenua nei, nā roto i te mau peropheta, te mau hi’o ’e te mau heheu parau. Tē fa’a’ite pāpū nei au ē, ’o ’oia te Fa’aora ’e te Tāra’ehara o te ao, ’e nā roto iāna e nehenehe tātou e fa’aorahia ’e e fa’ateiteihia i mua i te aro o te Atua here. ’Ua here au iāna ; tē ha’amori nei au iāna. ’Ua hina’aro vau e pe’e iāna ’e e rave i tōna hina’aro ’e e riro mai iāna te huru. Tē parau nei au i teie mau mea ma te ha’eha’a, i te i’oa mo’a o tō tātou Fatu ia Iesu Mesia, ’āmene.