Era Vosa na Parofita ena Kaukauwa ni Yalo Tabu
Ni tiko na parofita sa ivakatakilakila ni loloma ni Kalou vei ira na Luvena. Era na vakatakila na yalayala kei na kena ituvaki dina na Kalou kei Jisu Karisito.
Kemuni na taciqu kei na ganequ lomani, ena vanua cava ga o ni tu kina, au vinakata meu vakaraitaka na noqu vakavinavinaka dina sara ka titobu ena nomuni laveliga ni veitokoni ena noa.E dina ga niu vakila ni sega soti ni daumaka ka berabera noqu vosa vakai Mosese, au kunea na vakacegu ena vosa ni Turaga vei Mosese:
“Ko cei sa cakava na gusu ni tamata? se ko cei sa cakava na galu, kei na didivara, kei na matarai, se na mataboko? koi au ko Jiova, se segai?
“Ia oqo, mo lako, kau na tiko kei na gusumu, ka vakavulici iko ena ka mo kaya” (Lako Yani 4:11–12; raica talega na tikina e 10).
Au kunea talega na vakacegu ena nona loloma kei na veitokoni na watiqu lomani. Sa ivakaraitaki ni yalovinaka, loloma, kei na yalodina e taucoko vua na Turaga vei au kei na noqu matavuvale o koya.Au lomani koya mai na veitiki kece sara ni utoqu, kau vakavinavinakataka na nona veivakauqeti vinaka vei keitou.
Kemuni na taciqu kei na ganequ, au vakadinadinataka vei kemuni ni o Peresitedi Russell M. Nelson na parofita ni Kalou e vuravura. Au sega mada ni se bau raica e dua na yalovinaka kei na dauloloma vakataki koya. E dina niu vakila ni sega ni ganiti au na veikacivi tabu oqo, na nona vosa kei na yalomalumalumu e matana ena nona vakadewataka mai na itavi oqo au vakila kina ni ovigi au na nona loloma na iVakabula. Vinaka vakalevu, Peresitedi Nelson. Au tokoni kemuni ka’u lomani kemuni.
E sega beka ni veivakalougatataki me tiko na noda parofita, daurairai, ka dauvakatakila e vuravura ena veisiga eda bula kina oqo, o keda eda dau segata me da kila na loma ni Turaga ka muria? Eda vakacegu ni da kila ni sega ni da tu duadua e vuravura, dina ni tu na bolebole eda sotava ena bula.Ni tiko na parofita sa ivakatakilakila ni loloma ni Kalou vei irana Luvena. Era na vakatakila na yalayala kei na kedrau ituvaki dina na Kalou kei Jisu Karisito vei ira Nodrau tamata. Au sa vulica mai na veika au sa sotava.
Ena tinikawalu na yabaki sa oti, keirau ciqoma kei watiqu na qiri mai vei Peresitedi James E. Faust, na iKarua ni Daunivakasala ena Mataveiliutaki Taumada ena gauna oya.A kacivi keirau me keirau peresitedi ni kaulotu ka itokani e Potukali. A tukuna vei keirau ni sa vo ga e ono na macawa ni bera ni tekivu neirau kaulotu. E dina ni keirau nanuma ni keirau sega ni vakarau ka sega ni ganiti keirau, keirau a ciqoma na kaci. Na neirau kauwai bibi duadua ena gauna oya me keirau rawata na ivolatara ni curuvanua e gadrevi me keirau veiqaravi ena vanua oya baleta, me vaka na veigauna sa oti, dau taura e ono ki na walu na vula na kena cakacakataki.
Qai taroga o Peresitedi Faust kevaka keirau vakabauta ni na cakacaka mana na Turaga ka na rawa ni keirau walia vakatotolo na leqa ni ivolatara ni curuvanua. Na neirau isaunitaro e dua na io levu ka tekivu sara ena gauna vata ga me keirau tuvatuvanaki ena gauna totolo duadua.Keirau vakarautaka na ivolatukutuku e gadrevi me baleta na ivolatara ni curuvanua, kauta neirau matavuvale gone, ka lako ki na valenivolavola ni mata e veivakatarogi me baleta na curu vanua ena kena totolo duadua keitou rawata. A sotavi keitou mai kea e dua na marama vinaka. Ena nona dikeva neitou pepa ka vulica na ka keitou na laki cakava e Potukali, a tarogi keitou, “Dou na lako ka vukei ira dina na tamata mai noqu vanua?”Keitou sauma ena yalodei io ka vakamacalataka ni keitou na matataki Jisu Karisito ka vakadinadinataki Koya kei na Nona itavi vakalou e vuravura. Keitou lesu tale kina ni oti e va na macawa, taura neitou ivolatara ni curuvanua, ka tau yani ki na buturara ni kaulotu ena loma ni ono na macawa, me vaka e kerea vei keitou na parofita ni Turaga.
Kemuni na taciqu kei na ganequ, au vakadinadinataka ni o ira na parofita era vosa ena kaukauwa ni Yalo Tabu. Era vakadinadinataki Karisito kei na Nona itavi vakalou e vuravura. Era matataka na nanuma kei na yalo ni Turaga ka ra kacivi me ra matataki Koya ka vakavulici keda ena veika me da cakava me da lesu kina ka bula ena iserau ni Kalou kei na Luvena, o Jisu Karisito Eda vakalougatataki ni da cakacakataka noda vakabauta ka muria nodra ivakavuvuli. Ni da muri ira, ena mamarau cake noda bula ka lailai na kena dredre, ena rawarawa cake ni da sotava na drakidrakita kei na leqa, ka da bulia e dua na isasabai vakayalo me wavoliti keda ka maroroi keda mai na sasaga ni meca ena noda gauna.
Ena siga ni Mate oqo au vakadinadinataka vakabibi ni sa tucake tale o Jisu Karisito, ka sa bula tiko ko Koya, ka liutaka tiko na Nona Lotu e vuravura mai vei ira na Nona parofita, daurairai, ka dauvakatakila. Au vakadinadinataka ni o Koya na iVakabula ka Dauveivueti ni vuravura ena Vukuna eda na vakabulai ka vakacerecerei ena iserau ni Kalou. Au lomani Koya; au dokai Koya. Au vinakata meu muri Koya ka cakava na Lomana ka yaco me vakataki Koya vakalevu cake. Au tukuna ena yalomalumalumu na veika oqo ena yaca tabu ni Turaga o Jisu Karisito, emeni.