Edinam Iko Abasi Eyeda Akamba Unwana Osok Nyin
Nte inamde mme edinam iko Abasi inyung inimde mme ediomo ekesangade do eyeda akamba unwana ye ukpeme osok nyin ke idiok ererimbot emi.
Ndito-eka irenowo ye iban, mmenem esit ye mbufo ke iko Abasi, ye ke mme ikpo ukpebnkpo eke Christ.
Ufan kiet okobup Elder Neil L. Andersen, ke ini oro ekedide eke Seventy, nte eketiede enye ke idem ndida nting iko ke iso owo Tosin Edip-ye-kiet ke Ebiet Mbono. Elder Andersen oboro ete, “Ikam idige tosin owo Edip-ye-kiet enyek fi idem; edi Ndito-ete Efut emi etiede ke edem fo.” Ami nsak sung-sung imam, idahaemi ke ami nditi. Ami menehede mma nyung nsongo irenowo Efut emi nte mme prophet, oku-nkukut, ye asiak-uduak.
Abasi odoho Abraham ete ke edi-to ke ubon esie ye odudu itie oku, ke edi-diong ofuri ufokemana ke isong “ye edidiong eke iko Abasi, … kpa eke nsinsi uwem.” (Abraham 2:11; nko se ke mme ufang 2–10).
Ema efiak eno mme edidiong iko Abasi ye eke itie oku emi ekenwongke edi ke isong, ndien, ekem ke isua 1842, Prophet Joseph Smith ama anam endowment ono esisit ibat irenowo ye iban. Mercy Fielding Thompson ekedi kiet kotu mmo. Prophet odoho enyen ete, “[Endowment] emi eyesio fi ke ekim esin ke akwa unwana.”
Mfin nyom nditing iko mbanga edinam iko Abasi, emi edidade akamba unwana isok ami ye mbufo.
Edinam iko Abasi ye Ediomo
Ke Nwed True to the Faith nyin ikoot ke: “Edinam iko Abasi edi edisana, nnen-nnen edinam emi edade odudu itie oku enam. Edinam iko Abasi [oro] edi akpan-nkpo ono edimenede nyin … emi ekotde edinam erinyanga. Mmo edi uduok-mmong, ndot-ubok, ndibo Itie oku Melchizedek (nno irenowo), endowment eke temple, ye edidian ndo.”
Elder David A. Bednar ekpeb ete ke, “Edinam erinyanga ye edimenede emi enamde ke Ufok Abasi Christ … onono usung unyime emi edidiong ye odudu heaven ekemede ndifioro ndisim uwem nyin kiet-kiet.”
Nte okuk emi enyenede iso iba, ofuri edinam erinyanga asanga ke ediomo ye Abasi. Abasi onwongo ndino nyin edidiong edieke nyin inimde mme ediomo oro.
Prophet Amulek okofiori ke, “Emi … edi ini … man ibenge idem ndisobo ye Abasi” (Alma 34:32). Didie ke ibenge idem? Ke ndidot ndibo mme edinam emi. Ke iko President Russell M.Nelson, nko ana nyin, “idu ke usung ediomo.” President Nelson aka iso ete, “Nsin-ifik nyin nditiene Andinyanga ke ndinam ediomo ye Enye nyung nim mme ediomo oro eyeberede ofuri usung edidiong spirit ye unen emi odude ono irenowo, iban, ye ndito-nwong ke ofuri ebiet.”
John ye Bonnie Newman, ukem nte nyin, edi mme andibo edidiong spirit emi President Nelson okonwongde. Usen Ederi kiet, ke ama okonyong Ufok Abasi ye ndito esie ita edi, Bonnie odoho John emi mikedighe owo Ufok Abasi nyin ete, “Nkemeke ndinam emi ikpong. Nam ubiere ndidi Ufok Abasi nyin, mme ndimek Ufok Abasi emi ofuri nyin idikade, edi ndito enyene ndifiok nte ke ete mmo ama Abasi nko.” Ke Ederi efen ye ofuri usen Ederi, John ikaha Ufok Abasi ikpong, anwam ke ndibre piano nno ediwak wards, branches, ye mkpri ndito ke ediwak isua. Mma nyene ufang ndisobo ye John ke Ofiong April 2015, ke mbono oro ndoho nte nkokure usung ndiwut ima nno Bonnie edi ndimen enye nka Temple, edi nkemeke ibohoke enye oduok mmong.
Ke ama ekedi Ufok Abasi Jesus Christ eke Latter-day Saints ke isua Edip-ye-efurenang, John ama oduok mmong ke isua 2015. Isua kiet ebe, John ye Bonnie ema edian ndo ke Memphis Tennessee Temple, isua Edip ke Bonnie ama ekebo endowment esie. Robert, eyeneren mmo emi edide isua Aba-ye-itiaba, eting emi abanga ete esie ete, “Ete mi eye eti-eti tongo nte ekeno enye odudu itie oku.” Bonnie adian ete, “Ofuri ini John esidi owo inemesit, edi ndibo nyung mkpono edinam emi osongo nsuhore idem esie.”
Erisio-isop Christ ye Uwutnkpo Esie
Ediwak isua emi ekebede, President Boyd K. Packer akakpan ete ke, “Nti edu uwem ke munamke edinam iko Abasi idifakke inyung imenekede ubon owo.” Ke akpaniko, nyin iyomke edinam ye ediomo kpot man ifiak inyong ibine Ete, edi nyin nko imoyom Eyen Esie, Jesus Christ, ye Erisio-isop Esie.
King Benjamin ekekpeb ete ke oto ke ye ke enying Christ kpot ke erinyanga edisim ndito owo (se ke Mosiah 3:17; se nko ke Articles of Faith 1:3).
Otode ke Erisio-isop Esie, Jesus Christ eyefak nyin osio ke ufen Iduo Adam onyung anam editua-mkpofiok ye erinyanga esim nyin ke akpatre. Oto ke uwem Esie, Enye ono nyin uwutnkpo man ibo edinam erinyanga, emi “ayarare odudu Abasi” (D&C 84:20).
Ke Andinyanga ama okoduok mmong man “ekekem ye edinen-ido” (se ke 2 Nephi 31:5–6), Satan edidomo Enye. Ukem oro, idomo nyin ikureke ke ima ikoduok mmong mme ke ima ikanam sealing, edi ndibo ndisana edinam emi nyung nim ediomo emi asangade do eyeyoho nyin ye akamba unwana onyung ono nyin odudu ndikan idomo.
Ikpan
Isaiah eketing ete ke ekpere edem ini ke, “eyesabare isong emi nko … koro mmo ema … ekpuhode edinam iko Abasi” (Isaiah 24:5; se nko ke D&C 1:15).
Ukem ikpan oro, emi ekeyarare eno Prophet Joseph Smith, ekedi ke ubak owo “esanga ekpere [Christ] ke mkpok-inua mmo, … mmo eda item owo ekpeb iko Abasi, enyene enyong-enyong ido utenge Abasi, edi ekang odudu Abasi” (Joseph Smith—History 1:19).
Paul nko ono ikpan ete ke ediwak eyenyene “enyong-enyong ido utenge Abasi, edi [ekang] odudu Abasi: wongore kpong mmo eke etiede ntem” (2 Timothy 3:5). Ami mfiak nting nte, ewongore ekpong mmo eke etiede ntem.
Ediwak ndutime ye idomo uwem emi etie nte “anawuri ekpe” (Matthew 7:15). Eti ekpeme erong eyebenge, ekpeme, onyung aduat erong ye otu erong kini anawuri ekpe emi ekperede ndidi (se ke John 10:11–12). Nte ekpeme erong emi oyomde nditiene edisana uwem eke Eti Ekpeme erong, ndi nyin idige andikpeme ukpong nyin ye eke mbon efen nko? Dian ye item eke mme prophet, okut-nkukut, ye andiyarare eke nyin inyimede mi, ye odudu ye eno Edisana Spirit, nyin imekeme ndikut mme anawuri ekpe emi edidide edieke nyin itingde-enyin inyung ibenge-ke idem. Midige ntre, kini nyin idide ikpikpu ekpeme erong ino ukpong nyin ye eke mbon efen, unomo ekeme nditibe. Mme unomo ada ekesim ediwak unomo. Ami ndoho nte yak nyin kiet-kiet idi nti ekpeme erong.
Ifiok-ukpeb ye Iko Ntiense
Udia-Obong edi edinam emi anwamde nyin ndidu ke usung, ndien ndidia nte odotde edi idiongo ete ke nyin imenim mme ediomo ekesangade do ye ofuri edinam eken. Esisit isua emi ekebede, kini nnwan mi, Anita, ye ami, ikenamde utom ke Arkansas Little Rock Mission, ami mma nworo man nkekpeb nkpo ye missionaries mbiba. Kini ukpebnkpo oro,eti eyeneka erenowo emi nyin ikekpebde odoho ete, “Ami mmesidi Ufok Abasi mbufo; ntak emi mbufo esitade uyio enyung ewongde mmong kwa usen Ederi? Ke Ufok Abasi nyin, nyin inam oro akang mbiba ke isua, ini Easter ye ini Ukabare-isua, ndien oro enehede enyene ufon.”
Nyin ibuana ye Enye koro ema eteme nyin ete “isobo otokiet ke ndita uyo nyung nwong mmong” (Moroni 6:6; se nko ke D&C 20:75). Nyin ikoot Nwed Matthew 26 ye 3 Nephi 18 isioro uyio. Enye oboro ke imo ikwe ntak emi nyin ikpediade ntre..
Ekem nyin ibuana edida-ndomo emi ite: “Edieke afo enyenede unomo ke usung isang. Enyene unan unyung udiongoke idem aba. Owo okut ete ke udiongoke idem okot iwiwa number 911. Esin unwam eno fi ndien ekem afo edidiongo idem.”
Nyin idibup eyeneka eren emi ite, “Ke ini afo ofiokde ebiet emi odude, nso mbume ke afo ekpenyene?”
Enye oboro ete, “Ami mkpoyom ndifiok nte nkasangade ndisim mi ye owo emi okokutde mi. Mkpekom enye kpukpru usen koro enye ama anyanga uwem mi.”
Nyin ibuana ye eti eyeneka emi danga Andinyanga akanyanga uwem nyin ye nte anade nyin ikom Enye kpukpru usen!
Nyin ibup ete, “Ke ofiokde ete ke Enye okono afo ye nyin uwem Esie, afo esiwak didie ndita uyio nyung nwong mmong emi edide idiongo eke ikpokidem ye iyip Esie?”
Enye oboro ete; “Mme kop, mme kop. Edi nkpo kiet efen osuho. Ufok Abasi mbufo itiehe nke eke nyin.”
Ke oro nyin iboro ete, “Nso ke akpanam edieke Jesus Christ Andinyanga ekpebede ke enyin-usung oko?”
Enye oboro ete, “Ke ndo-ndo oro, ami mkpetongo edong mi.”
Nyin ibup, “Nte idige ukem oro ke ekere kini ebede oduk mme chapel eke mbon Latter-day Saint —enyene utenge ono Andinyanga?”
Enye oboro ete, “Mme kop, mme kop, mme kop!”
Enye ama edi Ufok Abasi nyin ke Ederi Easter oro ndien esifiak edi.
Ami mmoyom nyin kiet-kiet ibup idem nyin ete, “Ewe edinam, ke esit edide udia-Obong, ke ami nyene ndibo, ndien ewe ediomo ke ami nyene ndinam, nim, nyung mkpono?” Ami nwongo nte ke ndibuana ke edinam iko Abasi nyung nim ediomo emi asangade do eyeda akamba unwana ye ukpeme osok nyin ke idiok ererimbot emi. Ke enying Jesus Christ, amen.