Na Marau ni Veiqaravi Yalosavu
Eda sa yalataka vua na Tamada mai Lomalagi ni da na qaravi Koya kei ira na tani ena loloma ka cakava na Nona lewa ena ka kecega.
Ni mai cava na koniferedi raraba sa oti, e levu na tamata era torovi au ena taro vata ga: “Era logaloga vinaka li na idabedabe oya?” Na noqu isaunitaro e tautauvata ena veigauna kecega: “O ira na idabedabe oya era logaloga vinaka sara ga ke sega ni o vosa.” “E dina oqo, donu? Na noqu idabedabe e sega so ni logaloga vinaka ena koniferedi oqo, ia au vakavinavinaka dina ena veivakalougatataki kei na dokai ni vosa vei kemuni ena yakavi edaidai.
Ena so na gauna ni da veiqaravi tiko, eda laki dabe ena idabedabe duidui eso. Eso era idabedabe dakoba ia ka so tale e sega, ia eda sa yalataka vei Tamada mai Lomalagi ni da na qaravi Koya kei ira na tani ena loloma ka cakava na lomana ena ka kecega.
Ena vica na yabaki sa oti, era vulica na itabagone ena Lotu ni “nomu ‘vakatekivu ena veiqaravi vua na Kalou’ [Vunau kei na Veiyalayalati 4:2], o sa sema tiko ki na ilakolako uasivi duadua. O sa vukea tiko me vakatotolotaki Nona cakacaka na Kalou, ia e ka uasivi, marautaki, ka totoka na ka e sotavi.”1 E ilakolako eda rawata kece—se yabaki cava—ka ilakolako ena kauti keda ena ka e tukuna na noda parofita lomani ni “salatu ni veiyalayalati.”2
Ka ni rarawa, e seva, ni da bula tiko ena vuravura nanumi koya vakaikoya ka ra dau taroga wasoma na tamata, “E ka ni cavai vei au?” ka sega ni taroga, “Au na rawa ni vukei cei nikua?” se “Au rawa ni vukea vakavinaka cake vakacava na Turaga ena noqu veikacivi?” se “Au sa solia tiko beka noqu ka kecega vua na Turaga?”
E dua na ivakaraitaki uasivi ni veiqaravi yalosavu ki na noqu bula o Sister Victoria Antonietti. O Victoria e dua na qasenivuli ni Lalai ena noqu tabana niu a tubu cake tiko mai Argentina. Ena veiyakavi ni Tusiti, ni keimami dau lai soqoni ena Lalai, e dau kauta mai vei keimami e dua na keke jokeliti. Era taleitaka kece na keke—io, o ira kece vakavo ga oi au. Au cata na keke jokeliti! E dina ni dau via wasea vei au na keke, au dau vakasuka e veigauna na nona isolisoli.
Dua na siga ni sa veiwaseyaka oti na keke jokeliti vei ira na vo ni gone au tarogi koya, “Na cava ko sega ni kauta tale mai kina e dua na mataqali duidui—vaka na moli se vanila?”
Ni dredre oti vakalailai, ea tarogi au, “Vakacava mo tovolea mada e dua na tikina lailai? Na keke oqo e waki vata kei na dua na isaluwaki talei, kau yalataka ni o tovolea, ko na taleitaka!”
Niu veiraiyaki, au kurabui, ni vaka era taleitaka kece na keke. Au mani vakadonuya meu tovolea. E rawa ni o kilakila mada na ka e yaco? Au a taleitaka! O ya na imatai sara ga ni gauna au a taleitaka kina na keke jokeliti.
A taura toka e vica na yabaki emuri meu qai kila na isaluwaki vuni ni keke jokeliti nei Sister Antonietti. Keitou dau sikovi tinaqu e veimacawa kei iratou na luvequ. Ena dua na veisiko oqori, keirau a marautaka tiko kei Nau e dua na tiki ni keke jokeliti, kau talanoataka tiko vua na noqu mai taleitaka na keke jokeliti. Ea qai vakararamataki au ena vo ni italanoa.
“Mo raica, Cris,” a kaya ko nau, “Ko Victoria kei na nona matavuvale e sega ni levu nodratou ivurevure, ia ena veimacawa e dau digia o koya na saumi basi me kauti koya kei na va na luvena ki na Lalai se me volia na isaluwaki me caka keke jokeliti kina ki na kalasi ni Lalai. E dau digia ga o koya na keke jokeliti mai na basi, ka ratou dau taubaletaka na sivia na rua na maile [3 na km], dua na mua, se draki cava ga.”
Ena siga oya au qai qoroya vakalevu cake na nona keke jokeliti. E bibi cake, niu vulica ni isaluwaki vuni ni keke nei Victoria na nona loloma vei ira ka qaravi ira tiko kei na nona solibula yalosavu e vukui keimami.
Niu vakananuma lesu na keke nei Victoria e vukei au meu nanuma na solibula yalosavu ni italanoa ni gauna ka a vakatavulica na Turaga vei ira na nona tisaipeli ena Nona lako ki na valeniyau ni valetabu. Kemuni kila na italanoa. A vakatavulica o Elder James E. Talmage ni a tu kina e 13 na kato, “kina loma ni vei kato oqori era vakalutuma kina na tamata nodra isolisoli ena inaki [duidui] ka vakatakilai [ena] volavola ena kato.” E vakaraici ira ko Jisu na laini ni dausolika, ka wili kina na duidui mataqali tamata. Eso era solia nodra isolisoli ena “dina ni inaki” ka so tale era vakalutuma “na ibinibini siliva kei na koula,” ka nuitaka me laurai, kilai, ka qoroi ena nodra isolisoli.
“Mai na kedra maliwa na lewe vuqa e dua na yada, o koya e … vakalutuma ki loma ni kato ni-iyau e rua na ilavo parasa ka vakatokai na peni; na nona isolisoli ka tautauvata ni lailai sobu mai na veimama ni dua na sede vaka Amerika. E kacivi iratou yani na Nona tisaipeli na Turaga ki Vua, vakaraitaka na yada dravuadravua-bikai kei na nona ivalavala, ka kaya: ‘Au sa kaya vakaidina vei kemudou, Na yada dravudravua oqo sa biuta vakalevu ki na kato ni lavo, ko ira kecega era sa biuta vakalailai ga: Ni ra sa biuta kina eso ko ira kecega mai na nodra ka e vuqa; ia ko koya oqo, sa dravudravua, ka sa biuta na ka kecega, io na nona ka kece e bula kina’ [Marika 12:43–44].”3
Na yada e sega ni rairai ni taura e dua na idabedabe kilai ena itikotiko ni nona gauna. E taura o koya e dua na ka bibi cake: na nona inaki e savasava, ka solia na ka kece e rawa ni solia. E rairai ni solia e lailai mai vei ira eso tale, ka levu cake mai vei ira tale eso, ka duidui mai vei ira eso tani tale. Ena mata ni so, na ka e solia e tawayaga, ia ena mata ni iVakabula, na “kila ni nanuma kei na inaki ni lomada,”4 sa solia o marama na nona ka kecega.
Oi kemuni na taciqu, eda sa solia tiko li noda ka kecega vua na Turaga ka sega ni tarova? Eda sa solia tiko li noda gauna kei na taledi mera rawa ni vuli me lomana na Turaga ka muria Nona ivunau na itabatamata tubu mai. Eda sa veiqaravi tiko li vei ira wavoliti keda kei ira ka da lesi meda taqomaka ena gumatua—solibulataka tiko na gauna kei na igu ka rawa ni vakayagataki ena so tale na sala? Eda sa bulataka tiko li na ivunau lelevu e rua—meda lomana na Kalou ka meda lomani ira na Luvena?5 Vakawasoma na loloma oya e vakavatukanataki ena veiqaravi.
E vakatavulica o Peresitedi Dalin H. Oaks: “Na noda iVakabula e soli Koya ki na veiqaravi yalosavu. E vakatavulica ni oi keda yadudua e dodonu meda muri Koya ena noda tarovi keda mai na malele yalo ni nanumi koya me rawa ni da qaravi ira na tani.”
E tomana:
“E dua na ivakaraitaki kilai ni noda soli keda me qaravi ira na tani …oya na solibula ka ra cakava na itubutubu baleti ira na luvedra. O ira na tina era vosota na mosi ka vakayalia nodra ka bibi kei na logavinaka me vakasucuma ka susuga na gone yadudua. O ira na tama era moica nodra bula kei na nodra veika bibi me tokona e dua na matavuvale. …
“…Eda marautaki ira talega ka ra qarava na lewe ni matavuvale vakaleqai vayago kei na itubutubu qase. O ira na itavi oqori era sega ni taroga, e ka ni cavai vei au? Na veika kece oqo e gadrevi ga kina na kena biu vakatikitiki ni logaloga vinaka yadua me veiqaravi yalosavu. …
“[Ia] ko ira kecega oqo era vakaraitaka na ivakavuvuli tawamudu ni da na marau cake ka vakasinaiti cake ni da cakacaka ka veiqaravi ena ka eda solia, ka sega mai na ka eda ciqoma.
“Na noda iVakabula e vakatavulici keda meda muri Koya ni da cakava na solibula ka gadrevi meda soli keda ena veiqaravi yalosavu vei ira na tani.”6
E vakatavulica vakakina o Peresitedi Thomas S. Monson ni “e rairai ni da veitaratara ena matanavotu kei na noda Dauveibuli, eda na sega ni tarogi, ‘E vica na itutu ko a taura?’ ia o koya ga ‘E vica na tamata ko a vukea?’ E yaco, ni da sega ni rawa me da lomana dina na Turaga me yacova sara ni da sa na qaravi Koya ena noda qaravi ira na tamata.”7
Dua tale na ivosavosa, kemuni na taciqu, ena sega ni yaga kevaka eda dabe tiko ena noda idabedabe dakoba se voraki ni vakacavara na bose ena idabedabe lobi veveka e muri. Ena sega mada ga ni yaga, ke gadrevi, me da kalawa yani ki na valeniwawa me da laki vakadula na gone e tagi. Na ka ga e yaga ni da lako mai kei na gagadre me veiqaravi, me da raici ira eda qaravi ira tiko ka marau ni kidavaki ira, ka vakatakilai keda vei ira ka da wasea vata na idabedabe lobi—toro yani ena veiwekani dina ga ni da sega mada ga ni lesi me qaravi ira. Ia ena qai yaga dina sara ga ni da cakava na ka kece eda cakava kei na isaluwaki bibi ni veiqaravi waki vata kei na loloma kei na solibula.
Sa yaco meu kila mai ni ke sega mada ni da kila na buli keke jokeliti e rawa ni da qasenivuli ni Lalai gugumatua ka daudina, baleta ni oqo e sega ni baleta na keke. Oqo na loloma ka tu mai na daku ni cakacaka.
Au vakadinadinataka ni loloma oya e yaco me tabu mai na solibula—na solibula ni dua na qasenivuli ia ka levu cake sara mai na icavacava ka solibula tawamudu ni Luve ni Kalou. Au soli ivakadinadina ni bula tiko o Koya. Au lomani Koya ka gadreva meu biuta tani na gagadre ni nanumi koya ga meu loloma kina ka veiqaravi me vaka e cakava O Koya. Ena yaca i Jisu Karisito, emeni.