Meu Kila Vakacava?
Ni da vakasaqara ena gumatua, vakadeitaki kei na marau me vulica na kosipeli i Jisu Karisito ka vakatavulica vakataki, ena veisautaka na vuniyaloda.
Kemuni na taciqu kei na ganequ, sa dua na ka rekitaki me da tiko vata tale nikua ena koniferedi raraba ni Lotu i Jisu Karisito ni Yalododonu Edaidai ena nona veidusimaki na noda parofita lomani o Peresitedi Russell M. Nelson. Au vakadinadinataka vei kemuni ni na noda na galala dokai me da rogoca na domona na noda iVakabula, ko Jisu Karisito, mai na nodra ivakavuvuli o ira era na masu, lagasere, ka vosa ena vuku ni veigagadre eso ni noda gauna ena koniferedi oqo.
Me vaka e volai ena Cakacaka, A vakavulica o Filipe na Dauvunau na kosipeli vua e dua na kai Iciopea e dua na dauniyau ka dau maroroya na nona iyau taucoko na ranadi kei Iciopea. Ni lesu tiko mai ena sokalou mai Jerusalemi, a wilika na ivola i Aisea. Ni sa vakauqeti ena Yalo, a toro volekati koya yani o Filipi ka kaya, “o sa kila na ka ko sa wilika se segai?
“A sa kaya [na dauniyau], Au sa rawata vakaivei kevaka sa sega e dua me tuberi au? …
“Sa qai dalaga ko Filipi ka sa tekivu ena tiki ni Vola Tabu ko ya, a sa vunautaki Jisu vua.”
Na nona taro na turaga ni Iciopea oya e vakananuma vei keda na noda ilesilesi vakalou taucoko me da segata me da vulica ka veivakavulici vakataki keda ena kosipeli i Jisu Karisito. Ia, ena ituvaki ni vuli kei na veivakavulici ni kosipeli, eda na vaka na kai Iciopea ena so na gauna—eda na gadreva na nona veivuke e dua na qasenivuli yalodina ka vakauqeti; ka so na gauna eda na vakataki Filipe—eda na gadreva me da veivakavulici ka veivaqaqacotaki vei ira tale eso ena nodra saumaki mai.
Na noda inaki ni da segata me da vulica ka vakavulica na kosipeli i Jisu Karisito sai koya me da vakalevutaka noda vakabauta na Kalou kei na Nona ituvatuva vakalou ni marau vakakina vei Jisu Karisito kei na Nona isoro ni veivakaduavatataki me da rawata na saumaki tudei. Na vakabauta kei na saumaki sa tubu cake tikoga vakaoqo ena vukea noda cakava ka rokova na veiyalayalati kei na Kalou, ka vaqaqacotaka noda gagadre me da muri Jisu ka na basika kina na veisau dina vakayalo vei keda—ena dua tale na kena vosa, ena veisautaki keda ki na dua na tamata vou, me vaka e vakavulica na iApositolo o Paula ena nona ivola vei ira na kai Korinica. Na veisau oqori ena kauta mai vei keda e dua na bula marau, vuai vinaka, ka bulabula ka na vukea me tawamudu na noda rai. Sega beka ni o koya sara ga oqori na ka a yaco vua na dauniyau ni Iciopea ena nona sa vulica baleta na iVakabula ka saumaki ki na Nona kosipeli? E tukuni ena ivolanikalou ni “sa lako ena nona sala ko koya ka reki tiko.”
E sega ni ka vou na ivakaro me da vulica ka veivakavulici vakataki keda ena kosipeli; sa dau tokaruataki tiko e veigauna mai na ivakatekivu ni bula vakatamata. Ena dua na gauna, ni a tiko voli o Mosese kei ira na nona tamata ena buca ko Moapi ni se bera ni ra butuka yani na vanua yalataki, a vakauqeti koya na Turaga me vakasalataki ira na nona tamata ena vuku ni nodra itavi me ra vulica na lawa kei na veiyalayalati era sa ciqoma mai vua na Turaga ka vakavulica vei ira na nodra kawa, ni vuqa vei ira era a sega ni vakila na kosovi ni Wasa Damudamu se na ivakatakila soli mai na Ulunivanua ko Saineai.
E vakasalataki ira nona tamata o Mosese:
“Mo ni vakarorogo mada na Isireli, ki na ilesilesi kei na lewa kau sa vakavulica vei kemuni, mo ni cakava mo ni bula kina, mo ni lako ka taukena na vanua sa solia vei kemuni ko Jiova na Kalou ni nomuni qase. …
“… Mo ni vakavulica ga vei ira na luvemuni, kei ira na makubumuni.”
A tinia ko Mosese, ka kaya, “Ia mo ni vakabauta mada na nona ilesilesi, kei na nona ivakaro, kau sa vakarota vei kemuni ena siga oqo, me yaco kina vei kemuni na ka vinaka, vei ira talega na luvemuni, ka me dede kina na nomuni bula ena vanua sa solia vei kemuni ko Jiova na nomuni Kalou, me sega ni mudu.”
Era sa dau dusimaki keda tikoga na parofita ni Kalou ni dodonu me da susuga cake noda matavuvale ena veisusu kei na ivakavuvuli ni Turaga” ia “ena rarama kei na dina.” A kaya o Peresitedi Nelson ena dua na gauna lekaleka sa oti, “Ena gauna oqo ni bula tawasavasava rerevaki kei na takalevu ni iyaloyalo vakasisila, sa nodra itavi tabu na itubutubu me ra vakavulica vei ira na luvedra na bibi ni Kalou [kei Jisu Karisito] ki na nodra bula.”
Kemuni na taciqu kei na ganequ, nona ivakasala noda parofita sa ivakananumi ni noda itavi yadua me da segata me da vulica ka vakavuvulitaka ki na noda matavuvale ni tiko e dua na Tamada Vakalomalagi ka lomani keda ka sa vakarautaka e dua na ituvatuva vakalou ni marau me baleti ira na Luvena; ni o Jisu Karisito, na Luvena, sai koya na Dauveivueti ni vuravura; ka na rawati na bula ena noda vakabauta na Yacana. Me yavutaki noda bula ena uluvatu ni noda Dauveisereki, o Jisu Karisito, ka na rawa ni vukei keda yadua kei na matavuvale me ceuti tu e yaloda na veivakauqeti vakayalo, ka na vukea noda vosota tu vakadede ena noda vakabauta.
Sa rawa beka ni o ni nanumi rau na tisaipeli i Joni na Dauveipapitaiso ena nodrau muri Jisu Karisito ni oti nodrau rogoca na ivakadinadina nei Joni ni o Jisu na Lami ni Kalou, na Mesaia Era a ciqoma na veisureti nei Jisu o ira na tamata vinaka oqo me ra “lako mai ka raica” ka tiko vata kaya ena siga oya. A yaco me ra kila ni o Jisu na Mesaia, na Luve ni Kalou, ka muri Koya ena gauna kece ni nona bula sa vo.
Ena ivakarau vata oya, ni da ciqoma na nona veisureti na iVakabula me da “lako mai ka raica,” e gadrevi me da dei tiko Vua, meda luvuci keda ena ivolanikalou, rekitaka, vulica Nona ivunau, ka bula ena ivakarau e bula kina o Koya. Ena gauna ga oqori eda na qai kilai Koya ka vakadinata na domona, ka kila ni da lako mai Vua ka vakabauti Koya, eda na sega sara ni via kana se via gunu. Eda na kila na dina ena veigauna kece, me vaka a yaco vei rau na tisaipeli erau a tiko vata kei Jisu ena siga ko ya.
Kemuni na taciqu kei na ganequ, oya ena sega ni yaco vakacala ka. Noda vakamatautaki keda ki na veivakayarayarataki cecere duadua ni bula vakalou e sega ni rawarawa; e gadrevi kina me da dau kaciva na Kalou ka vulica na ivakarau me da kauta mai kina na kosipeli i Jisu Karisito ki na noda bula. Ni da kitaka vakakina, au yalataka ni na kauta mai na dina ki yaloda kei na noda vakasama ka vakadinadinataka na veivakauqeti ni Yalo Tabu, ena vakavuvulitaka na veika kecega.
Na nona taro na kai Iciopea, “Meu kila vakacava vakavo kevaka e dua na tamata e tuberi au?” e dua na kena ibalebale bibi ena noda dui itavi vakatamata yadua me da bulataka na ivakavuvuli ni kosipeli eda sa vulica. Vua na kai Iciopea, me kena ivakaraitaki, a cakacakataka na dina a vulica mai vei Filipe. A kerea me papitaiso. Sa qai kila ni o Jisu Karisito na Luve ni Kalou.
Kemuni na taciqu kei na ganequ, sa dodonu me vakaraitaki ena noda ivalavala na veika eda vulica ka vakatavulica. E gadrevi me da vakaraitaka na noda vakabauta ena ivakarau ni noda bula. Na qasenivuli vinaka duadua o koya e dau matanataka vakavinaka. Ni da vakavulica e dua na ka eda bulataka dina ena vukica na yalodra o ira eda vakavulica. Kevaka eda gadrevi ira na tamata, se ra lewe ni matavuvale se sega, me ra vakaiyautaki ira ena ivolanikalou kei na nodra ivakavuvuli na iapositolo kei na parofita bula, era na gadreva me ra raica ni taleitaka tiko na yaloda. Sa vakakina, kevaka eda vinakata me ra kila ni parofita, daurairai ka dauvakatakila ni noda gauna oqo o Peresitedi Russell M. Nelson, era na gadreva me ra raici keda ni da laveta na ligada me da tokoni koya ka saravi keda ni da muria tiko na nona ivakavuvuli vakauqeti. Me vaka na ivosavosa kilai levu ni Amerika oya, “E rogo levu cake na ka o cakava mai na ka o tukuna.”
E so beka vei kemuni ena gauna sara ga oqo o ni tarogi kemuni tiko, “Elder Soares, au sa cakava tiko na veika kece oqo kau vakamuria tiko vakataki au na iwalewale oqo vakakina na matavuvale, ia ka ni rarawa, eso na noqu daulomani era sa vakayawaki ira tiko ga mai vua na Turaga. Na cava meu cakava?” Vei kemuni o ni sotava tiko ena gauna sara ga oqo na yalo rarawa, yaluma, kei na veivutuni beka, yalovinaka mo ni kila era sega ni sa yali vakadua na noda daulomani baleta na Turaga e kila na vanua era tu kina ka wanonovi ira tiko. Nanuma tiko, era sa Luvena talega!
Ena dredre beka ni da kila vakavinaka sara na vuna era sa lakova kina eso na tamata e dua tale na sala. Na ka vinaka duadua eda rawa ni cakava ena ituvaki oqori me da lomani ira ga ka maroroi ira, masulaka nodra taqomaki ka vakasaqara na veivuke ni Turaga mo kila na ka mo cakava ka tukuna. Marautaka vata kei ira na veika era qaqa kina; mo nodra itokani ka raica na veika vinaka e tu vei ira. Me da kakua ni viritaka na itauwelu vei ira ia meda vakamareqeta na keda isema kei ira. Kakua ni biligi ira se vakalewai ira. Lomani ira ga! Na italanoa vakaibalebale ni gone cidroi e vakavulica vei keda ni gauna era kilai yalodra kina na gone, e vakavuqa ni ra dau gadreva me ra lesu mai ki vale. Kevaka e yaco oya vei ira nomu daulomani, vakasinaita na yalomu ena loloma, cicivi ira, leleca na domodra, ka reguca, me vaka na tamai koya na gone cidroi..
Kena ilutua, bula kilikili tikoga, mo ivakaraitaki vinaka vei ira ni veika o vakabauta, ka toro voleka vua na noda iVakabula ko Jisu Karisito. E kila ka ciqoma o Koya na noda yaluma titobu kei na mosi, ka na vakalougatataka na nomu igu kei na nomu yalodina vei ira na nomu daulomani kevaka e sega ena bula oqo, ena bula sa bera mai. Kemuni na taciqu kei na ganequ, mo ni nanuma tiko na inuinui e dua na tiki bibi ni ituvatuva vakosipeli.
Ena loma ni veiyabaki e vuqa ni veiqaravi ena Lotu, au sa raici ira na lewenilotu yalodina ena nodra bulataka ena gugumatua na ivakavuvuli oqo. Oqo e baleta e dua na tina ni gone tu taudua kau na vakatokai koya o “Mary.” Ka ni rarawa, ni a veibiu o Mary. Ena gauna oya a vakadinadinataka o Mary ni nona vakatulewa bibi duadua baleta nona matavuvale e vakayalo. Se bibi tikoga vua na masu, vuli ivolanikalou, lolo, kei na lako i lotu kei na valetabu?
A dau yalodina tu ga o Mary, ia ena ilesu ni sala bibi sara oya, a lewa me kukuva matua toka na veika e kila ni dina. A kunea na kaukauwa ena “Na Matavuvale: Ai Vakaro ki Vuravura Raraba,” ka vakavuvulitaka ena maliwa ni veivakavuvuli vakasakiti e vuqa ni “sa nodra itavi bibi sara na itubutubu me ra tuberi ira cake na luvedra ena loloma kei na buladodonu” ka vakavulici ira me ra dau muria tikoga na ivakaro ni Kalou. Sa dau vakasaqara e veigauna na isaunitaro mai vua na Turaga ka wasea vei iratou na luvena e lewe va ena veigauna vakamatavuvale yadua. Eratou dau veivosakitaka vakamatavuvale na kosipeli ka veiwasei vakataki iratou ena veika eratou dui sotava kei na nodratou ivakadinadina.
E dina ni tu na veika rarawa eratou dau sotava, eratou tara cake na luvena na loloma ena kosipeli i Karisito kei na gagadre me ratou veiqaravi ka wasea vei ira tale eso. E tolu vei iratou era sa lesu mai na kaulotu tudei, ka veiqaravi tiko oqo o koya e gone duadua ena kaulotu mai na Ceva kei Amerika. A wasea na luvena yalewa qase duadua, ka sa vakawati ena gauna oqo ka tudei tu ena nona vakabauta, “au sega ni bau vakila me vaka ni a susugi keitou duadua ga o tinai keitou baleta ni dau tiko ga ena neitou vuvale na Turaga. Ni dau wasea o tinaqu vei keitou na nona ivakadinadina baleti Koya, sa tekivu me keitou golevi Koya yadua ena neitou dui taro. Au vakavinavinakataka vakalevu na nona vakabula mai na kosipeli.”
Kemuni na taciqu kei na ganequ, a rawata na tina ni gone vinaka oqo me cakava na nona vuvale me vanua ni vuli vakayalo. Me vaka na taro a taroga na kai Iciopea, a tarogi koya vakavica kina o Mary, “Eratou na vuli vakacava na luvequ vakavo kevaka e tuberi iratou na tinadratou?”
Kemuni na itokani lomani ena kosipeli, au vakadinadinataka vei kemuni ni da vakasaqara ena gumatua me vulica na kosipeli i Jisu Karisito ka vakatavulica vakataki keda e vuniyaloda, tudei, ka dina ena inaki dina kei na veivakayarayarataki ni Yalo, ena veisautaka na yalo ka uqeta na gagadre me bulataki na dina ni Kalou ena ivakavuvuli eso oqo.
Au vakadinadinataka ni o Jisu Karisito na iVakabula kei vuravura. Sa Dauveivueti o Koya, ka bula tiko. Au kila ni liutaka tiko na Nona Lotu mai vei ira na Nona parofita, daurairai ka dauvakatakila. Au vakadinadinataka talega vei kemuni ni bula tiko na Kalou, ka lomani keda sara. E vinakata o Koya meda lesu tale ki na Nona iserau—o keda kece sara. E vakarogoca o Koya na noda masu. Au wasea na noqu ivakadinadina ena dina eso oqo ena yaca tabu i Jisu Karisito, emeni.