Na Taudonu ni Nona Vinaka na Kalou
Ni da waraka tu ena vosota na Turaga, e dau yaco kusarawa dina mai eso na veivakalougatataki vei keda.
Ena vica na yabaki sa oti, na luvei keirau gonetagane yabaki lima ea lako mai vei ka kaya, “Ta, au sa qai kila e dua na ka. Au sa qai kila ni voleka vei iko e gauna balavu sara vei au.”
Ni dau kaya na Turaga se ko ira na Nona tamata na veika me vaka na, “Sa bogi vica ga” se “Sa sega ni yawa na gauna,” e rawa ni vakaibalebale dina ki na dua taucoko na bula se sivia. Na Nona gauna kei na Nona gauna tuvani, e duidui mai na noda. E ka bibi na vosota. Ni sega oqo, eda sega ni rawa ni tubu se bulataka na vakabauta na Kalou ki na bula kei na vakabulai. Ia na noqu itukutuku nikua o ya, ni da waraka vosota tiko mada ga na Turaga, eso dina na na veivakalougatataki e lako kusarawa mai vei keda.
Ni ra sa vesuki o Alama kei ira na nona tamata mai vei ira na Leimanaiti, era a masulaka na veisereki. Era a sega ni sereki kusarawa mada, ia ni ra waraka vosota tiko na veisereki, ea vakaraitaka mai na Turaga na Nona lomavinaka ena so na veivakalougatataki totolo. Ea vakamalumutaka vakatotolo o Koya na yalodra na Leimani ka ra sega kina ni ravuti ira. Ea vakaukauwataki ira talega na tamata i Alama ka vakamamadataka nodra icolacola. Ena gauna eratou sa galala mai kina, era tou sa lako ki Saraemala, ka ratou tukuna sara na nodratou e talanoa ki na dua na ivavakoso kurabui. Era kurabui na tamata e Saraemala, ia “ni ra sa vakananuma tale na taudonu ni nona vinaka na Kalou kei na nona kaukauwa ena nona sereki Alama kei ira na wekana mai na veivakabobulataki, era sa qai tabalaka cake na domodra ka vakavinavinaka vua na Kalou.”
Na vinaka taudonu ni Kalou e lako mai vei ira kece era tagi ki Vua ena inaki dina kei na lomadra taucoko. Oqo e oka kina o ira era tagi yani ena igu ni taqaya, ni rairai yawa dina na veivakabulai ka vakabalavutaki na rarawa, ka vakalevutaki dina.
E vakakina vua e dua na parofita gone ka rarawa tu me vaka ni sa tiko ena butobuto ni yalayala ni dua na ikeli ka qai tagicaka yani: “Oi kemuni na Kalou, ko ni sa tiko evei? A cava na kena dede ko ni na tarova tiko kina na ligamuni … ? Io, Oi kemuni na Turaga, me vakaevei na kena dede … ?” Me kena isau, ea sega ni sereki Josefa vakatotolo na Turaga, ia ea vakarorogotaka vakatotolo o Koya na vakacegu.
E solia talega na Kalou na inuinui kusarawa ni veivakabulai ena yaco ga. Se cava ga, se evei ga, vei Karisito ka mai vei Karisito e dau tu ga kina nuidei e tavaki keda tu mai. E tu voleka sara e matada.
Me kena ikuri, e noda na Nona yalayala: “Na noqu yalololoma ena sega ni takali vei iko.”
E uasivita na veika kecega, na loloma na Kalou. Vata kei Paula, au vakadinadinataka ni sega ni dua na ka e rawa ni “tawasei keda mai na loloma ni Kalou, sa yaco ena vukui Karisito Jisu.” Na noda ivalavala ca mada ga, e dina ni na tawasei keda vagauna mai na Nona Yalotabu, ena sega ni rawa ni tawasei keda mai na taladrodro kei na vakavolekati ni Nona loloma vakalou vakatama.
Oqo eso ga na sala kei na iwalewale ena “vakalougatataki [keda] kusarawa kina ko Koya.” Edaidai, meu kauta mai na veivakavuvuli oqo e yaco tiko ka vakavoleka, au wasea vei kemuni na veika sotavi ni rua na tamata ka tu na nodrau bula me itukutuku ni vinaka taudonu ni Kalou.
Mai na gauna a se yabaki tinivakacaca kina ko Emilie e a coko tu ena veivakalolomataki ni wai gaga. Na vakatovolea e mua ki na ivakarau, ka yaco na ivakarau me cokota ki na vakatotogani ka vesuki vakayabaki tu kina, dina ga ni so na gauna e vakavudua ni bulavinaka. E vunitaka matua ko Emilie na nona leqa, vakabibi ni sa yaco me dua na yalewa vakawati ka tina.
Na itekivu ni nona vakabulai e sega ni vakila o koya ni sa yaco tiko na vakabulai. Ena dua na miniti, e vakayacori tiko vei Emilie e dua na vakadidike vakavuniwai, ka qai tarava, e sa kau tiko ena lori ki na dua na valenibula. E sa tekivu taqaya ni vakasamataka ni sa na tawasei mai vei iratou na luvena, na watina, kei na nona vale.
E na bogi koya, ni tu taudua e loma ni rumu liliwa, butobuto, e a lokini o Emilie e nona loga ka mamakeukeu. Na nona rawata me vakaibalebale e seavu yani, ni luvuci ena lomaleqa, rere, kei na butobuto veisuguti ena rumu kei na lomana, e nanuma sara ga o Emilie ni sa na mate ena bogi koya. Taudua.
Ena ituvaki taqaya oya, e a qai kaciva rawa na kaukauwa o Emilie me duri mai na nona idavodavo ka tekia na duruna. E sega na vakaivukivuki me vaka e dau yaco vagauna me tiki ni masu eliu, e soli koya taucoko ki vua na Turaga ena vakatakerekere ni lomaleqa, “Na Kalou lomani, au gadrevi Kemuni. Ni yalovinaka ka vukei au. Au sega ni via tu taudua. Yalovinaka, kauti au takosova na bogi oqo.”
Ka vakasauri, me vaka e kitaka vei Pita e gauna makawa, e a dodoka na Ligana ko Jisu, ka toboka na yalona sa lutudromu tiko. E ologi Emilie e dua na veivakadeitaki, loloma, kei na vakacegu vakurabuitaki. E sa sega tale ni liliwa tiko na rumu, e sa sega ni qai tiko taudua, ka imatai ni gauna mai na nona se yabaki 14, e kila o Emilie ni sa na donu na veika kece. E “yadra yani vua na Kalou” ko Emilie ka lutu na nona moce ena vakacegu. Ia e vakaoqo noda raica ni “kevaka dou sa yalomalumalumu ka veivutuni, ena kau yani vakatotolo vei kemuni na ituvatuva ni veisereki.”
Na vakabulai nei Emilie kei na nona sereki vakadua e taura na gauna balavu—kei na veiqaravi ni vica vata na vula, veituberi, kei na veivakasalataki, na gauna e a tokoni ka so na gauna e kau tu ena Nona lomavinaka. Ia na lomavinaka oya e tiko ga kei lewa me yacova ni sa curuma na valetabu kei na watina kei rau na luvena me vauci ka tawamudu. Me vakai ira na tamata mai Saraemala, e soli vakavinavinaka o Emilie ni nanuma lesu na vinaka taudonu ni Kalou kei na Nona kaukauwa ni sereki koya mai na nona vakabobulataki.
Oqo, mai na nona bula e dua tale na italanoa mai vua e dua na dauvakabauta yaloqaqa. Ena Tiseba 27, 2013, e a kidavaki rau ena marau o Alicia Schroeder na nona itokani lomani, o Sean kei Sharla Chilcote, ka rau tadu vakakidacala mai ki nona matanivale. E bisopi talega nei Alicia ko Sean, e a solia vua na nona talevoni veikauyaki ka kaya ena lomabibi, “Alicia, keirau lomani iko. Ko gadreva mo taura na qiri qo.”
Ko Mario, na wati Alicia, e tiko ena tai ka dua ni talevoni. E a tiko ko tagane ena dua na vanua yawa kei ira na luvedrau ena dua na lakolako se namaki tu mai vakabalavu ni vodo lori ni waicevata. Sa yaco e dua na vakacalaka vakadomobula. E sa mavoa bibi ko Mario, ka sa toki yani na luvedrau yabaki tini, ko Kaleb. Ni sa tukuna vei Alicia o Mario na mate nei Kaleb, e luvuci o Alicia e dua na kidacala vakaitamera kei na domobula ena vica wale sara vei keda e kila rawa. E vakalutuki koya. E wadokau ena yaluma tawacavuti, e sega ni rawa ni toso se vosa ko Alicia.
Erau laveti koya cake vakatotolo ko Bishop kei Sister Chilcote, ka tauri koya. Eratou veitagicaki ka lolosi titobu vata ena vica na gauna. E a qai solia ko Bishop Chilcote e dua na veivakalougatataki vei Alicia.
Na ka e yaco tarava e sega ni taqei rawa vakavo kevaka eso na kila matata ni Veisorovaki nei Jisu Karisito kei na taudonu ni Nona vinaka na Kalou E kotora malua na ligana o Bishop Chilcote e ului Alicia ka, ena domo sautaninini, e a tekivu vosa. E a rogoca e rua na ka o Alicia ni vaka e cavuta sara ga vakai Koya na Kalou. Ai matai, e rogoca ni cavuta na yacana, Alicia Susan Schroeder. Ka qai rogoca ni sa kaciva o bisopi na kaukauwa ni Kalou sa Cecere Sara. Ena tiki ni gauna oya—ena kena cavuti walega na yacana kei na kaukauwa ni Kalou—e vakasinaiti Alicia e dua na vakacegu tawatukuni rawa kei na loloma, logavinaka kei na dua na sala na reki. Ka se tiko ga kei koya.
Oqo, e dina sara, ko Alicia, Mario, kei na nodrau matavuvale eratou se lolosi ka calati Kaleb tiko ga. E ka dredre! E veigauna niu vosa vei rau, e dau tonawanawa na matai Alicia ni tukuna tiko vei au na levu ni nona lomana ka vakananuma nona gonetagane lailai. Ka tovakiwai tiko na matana ni tukuna vei au e tokoni vakacava mai vua na Dauveisereki Cecere ena tiki yadua ni veika e sotava, tekivutaki mai na Nona vinaka taudonu e loma ni nona taqaya titobu ka vakuri oqo kei na inuinui serau ni dua na veisotari kamica ni “sa bogi vica ga.”
Au sa vakila ni ka sotavi ni bula e dau kauta vagauna mai na veilecayaki kei na yavavala ka rawa ni cakava me dredre na ciqoma, kidava se maroroya na mataqali vakacegu ka lako mai vei Emilie kei Alicia. Au sa lako curuma na gauna vakaoqo. Au vakadinadinataka ni, gauna vakaoqo, na noda maroroi walega e sa dua na ivakaraitaki lomani ka kaukauwa ni vinaka taudonu na Kalou. Nanumi, Isireli makawa e qai tini ga ni sereki “mai vua na Kalou vata ga ka a maroroi ira voli mai” e veisiga.
Au vakadinadinataka ni ko Jisu Karisito e sa Dauveisereki Cecere, ia ena Yacana, au yalataka ni ko vuki Vua ena lalawa dina kei na yalomu taucoko, ena sereki iko o Koya mai na veika kecega e vakarerea me musuka se vakarusa nomu bula se marau. Na veisereki oya ena dede beka mai na ka o vinakata—e rairai ena dua na bula taucoko se balavu cake. O koya, me solia vei kemuni na logavinaka, yaloqaqa, kei na inuinui, me totokoni ka vakaukauwataki kemuni ki na siga me itini ni sereki, au vakatura vei kemuni kau vakadinadinataka na taudonu ni nona vinaka na Kalou ena yaca i Jisu Karisito, emeni.