Jesus Christ No Nokwar Asɛmpa, a Ɔtsen na Ɔnnyɛ Kyinkyinɛnn no
Yɛrodɔ Nyankopɔn na yɛrodɔ hɛn anyɛnkofo nye erosom ne fapem nkyerɛkyerɛ, adzesũa ho abamba a Asɔr dze ma wɔ fie adzesũa; Ahomgyeda sunsum mu som; na nkwagye ho edwuma no.
Mo nuanom na nkyerɛbaa, ɔyɛ dzen ma me dɛ mebɛgye edzi dɛ ɔyɛ mfe 71 a abɛsen, wɔ afe 1948 mu no, nna meyɛ asɛmpasomafo wɔ Ngyiresi Aborɔkyir, na mfe 44 a abɛsen no na emi na mo hokãfo Barbara yɛfaa hɛn ebusua kãa hɛnho kɔɔr Canda ber a na meyɛ Canada Toronto Asɛmpakã president no. Ber a nna morosom wɔ hɔ no Ebɔbira afe 1976 mu no, wɔfrɛɛ me baa Eduosuon no hɔn Quorum a Odzi Kan no mu, na ber a enyi nnda wɔ afe 1985 mu no, wɔfrɛɛ me baa Asomafo Duebien no hɔn Quorum no mu. Iyi nntse dɛ ɔfrɛ a nna wɔafrɛ me dadaw no, a dabi wobesian wo no kã ho no, mensianee fi Duebien mu no nnyɛ dza obeye seisiei, naaso mobɔ mpaa dɛ gyedɛ mewie adze nyina a Ewuradze afrɛ me dɛ menyɛ no nko ana dɛm da aba.
Morodwen afa me mfe 43 a abɛsen a medze asom dɛ Wiadze Mfɛndzanan Asɔrpanyin Tumdzifo na ndzinoa no a menya dze asom Ɔsor Egya ne mba ho no, meebohu no yie dɛ Ɔpɛ dɛ Ne mba nyina, nya asomdwee, enyigye, na ahomkã wɔ hɔn abrabɔ mu.
Nkɔnhyɛnyi Lehi kyerɛkyerɛɛ dɛ, “Adasa tse ase, ama woeenya enyigye. Siantsir pii wɔ hɔ a yennkenya asomdwee, enyigye, na ahomkã wɔ abrabɔ yi mu, a ohia, ɔkõ, esian, na dza ennyi nnda a ɔsan hɛn ekyir wɔ edwumayɛ, apɔwmudzen, na ebusua nkitahodzi mu no kã ho.
Yerunntum mpo nnya nhyɛdo biara wɔ dza ofi ehuu mu ba a ɔkã hɛn abrabɔ wɔ asaase yi do ho, naaso ber a yɛper dɛ yɛbɛyɛ Ewuradze Jesus Christ esũafo nokwafo no, yebotum enya asomdwee, enyigye na ahomkã, a wiadze mu ɔhaw a otwa hɛn ho hyia no mmfa ho.
Dakor bi me mba no kor bisaa dɛ, “Dad, minnyim ara sɛ mubotum asan akɔ a?” Mubuaa dɛ, “Dza Ɔsor Egya rohwehwɛ ma yɛayɛ ara nye dɛ yɛbɔbɔ hɛn mbɔdzembɔ biara a yebotum dababiara.” Enuanom na nkyerɛbaa, hom mbɔ hom mbɔdzembɔ biara a hom botum ayɛ no dababiara, na enyi bɛba do no, hom bohu dɛ hom Sor Egya nyim hom na dɛ Ɔdɔ hom. Na ber a hom bohu no dɛm no—hom bohu ankasa no—hom abrabɔ benya botae na nkyerɛase yie na enyigye na asomdwee bɛhyɛ hom mã.
Osiandɛ Ɔyɛ Wiadze Kan no, Agyenkwa no see dɛ: “Ma obiara a ɔgye me dzi no anntsena sum mu.”
“Jesus Christ nye dzin a Egya no dze ama, na dzin biara nnyi hɔ bio a wɔdze ama a wɔnam do bɛgye [hɛn] nkwa;
“Dɛm ntsi, nyimpa nyinara wɔ dɛ wɔfa dzin a Egya no dze ama no to hɔn do.”
Kyerɛwsɛm no kyerɛkyerɛ hɛn dɛ Satan pɛ dɛ ogya nkorɔfo kɔ sum mu. No mbɔdzembɔ biara nye dɛ ɔbɔtow Jesus Christ N’asɛmpa no ho nokwar na kan no mu. Dɛ mbrɛ Lehi kyerɛkyerɛɛ ne mba no, abɔnsam “ pɛ nyimpa nyinara hɔn mbɔbɔryɛ dɛ mbrɛ ɔnoara so tse.” Sɛ Ɔsor Egya “n’edwuma na … enyimyam” nye “dɛ [Ɔ]dze nyimpa ne bɛkyebo na onnyiewiei nkwa bɔbɔ adze,” a Lucifer “n’edwuma” nye dɛ ɔdze Nyame ne mba hɔn awerɛhow na onnyi ewiei mbɔbɔryɛ bɔbɔ adze. Bɔn na mbratõ bir Christ ne Kan no wɔ hɛn abrabɔ mu. Dɛm ntsi na hɛn ahwehwɛdze nye dɛ yɛbɛda Christ ne Kan no mu ara yie, dza ɔbrɛ hɛn asomdwee, enyigye, na ahomkã no.
Abosoom 18 abɛsen no, Ewuradze ekenyan No nkɔnhyɛnyi na Asomafo ma wɔdze nsesã nwanwa binom aba. Mbom, mehaw nye dɛ bia na nsakyeree noara no ho enyigye ntsi, nsesã no sunsum mu botae no bɛyew.
Joseph F. Smith kãa dɛ Jesus Christ no nokwar asɛmpa , a ɔtsew, na ɔnnyɛ kyinkyinɛnn no wɔdze asan aba. Ɔyɛ hɛn asɛdze dɛ yɛma otsim wɔ asaase yi do.” Ɔdze kãa ho dɛ “nokwar asɛmpa, a ɔtsen na ɔnnyɛ kyinkyinɛnn no nye “Christ no nkwagye nkyerɛkyerɛ no.”
Gyedzi ho Nsɛmpɔw mu no, Nkɔnhyɛnyi Joseph Smith kyerɛkyerɛɛ dɛ “dɛ ɔnam Christ no Werdambɔ do adasamba nyinara botum enya nkwa, ber a wɔyɛ setsie ma mbra no na Asɛmpa n’ayɛdze no.”
Asɛmpa fapem a odzi kan no nye gyedzi wɔ Ewuradze Jesus Christ mu, nnuho, enuma, Sunsum Krɔnkrɔn akyɛdze na eritsim ekodu ewiei. No nua Hyrum kyerɛkyerɛɛ dɛ: “Hom nkɔ do nkã [na wonsi do]: hom bohu dɛ ofi da to da no wobeyi adwenkyerɛ fofor na kan ntowdo akyerɛ hom. Hom botum esansan mu … ama wɔatse ase ara yie. Nkyii hom botum ama hɔn a [hom] kyerɛkyerɛ hɔn adze no atse ase pefee.”
Akwan pa a yebotum ehu Asɔr no sunsum mu botae no nye yɛdze Jesus Christ no nokwar nkyerɛkyerɛ, a ɔtsen, na ɔnnyɛ kyinkyinɛnn no bɔbɔ bra na yɛdze Agyenkwa ne mbrasɛm etsitsir ebien no so edzi dwuma: “Hom mfa hom akoma nyina, … ndɔ Ewuradze hom Nyankopɔn. Hom ndɔ hom nyɛnko dɛ homankasa homho.”
Yɛreyɛ setsie ama mbrasɛm ebien no ma hɛn kwan a yɛdze nya asomdwee na enyigye mbordo. Sɛ yɛdɔ Ewuradze na yɛsom No na yɛdɔ hɛn anyɛnkofo na yɛsom hɔn a, yenya ahomkã mbordo a ofi kwan pa a ɔtse dɛm do ba.
Erosom ne fapem nkyerɛkyerɛ nye yɛrodɔ Nyankopɔn na hɛn anyɛnkofo; adzesũa ho abamba a Asɔr dze ma wɔ fie adzesũa, na Ahomgyeda sunsum mu som, na nkwagye edwuma wɔ ntwamutam n’afã ebien a Relief Society na Elderfo quorum horow no boa no. Iyinom nyina gyina mbrasɛm krɔnkrɔn no do dɛ yɛndɔ Nyankopɔn na yɛndɔ hɛn anyɛnkofo . Ana biribi botum ayɛ ahyɛase dze, fapem koraa na ɔnnyɛ kyinkyinɛnn kyɛn dɛm a?
Yɛdze asɛmpa nhyehyɛɛ a ɔnnyɛ kyinkyinɛnn no robɔ nokwar bra a ɔtsen no bɛma hɛn mber ara yie ma yɛdze asera ekunafo, egyanka, ankonam, hɔn a wɔyar, na abɔbɔfo. Yebenya asomdwee, enyigye, na ahomkã wɔ hɛn abrabɔ yi mu ber a yerosom Ewuradze na hɛn anyɛnkofo.
Ahomgyeda nsesã no a otsim wɔ fie adzesũa a, Asɔr ma asɛmpa ho adzesũa na adzesua ho abamba no yɛ kwan a yebotum ekenyan hɛn sunsum na hɛn som ma Nyame wɔ hɛn efiefi mu. Ebɛnadze na obotum ayɛ fapem dze a, ɔnnyɛ kyinkyinɛnn na ɔyɛ nwanwa? Enuanom na nkyerɛbaa, hom tum hu dɛ adzesũa na asɛmpa nkyerɛkyerɛ wɔ hɛn ebusua ebusua mu no yɛ kwan a ohia a yɛdze nya enyigye na ahomkã wɔ hɛn abrabɔ mu.
Ɔrekasa fa Ahomgyeda ho no, Agyenkwa no kãa dɛ, “Na nokwar, iyi nye da a woeyi esi hɔ ama hom dɛ hom nhom mfi hom ndwuma nyina ho, na hom nsom Ɔsorsornyi no.” Ɔsɔɔw do dɛ, “Ama hom enyigye aahyɛ mã … [edua] enyigye na mpaabɔ mu … a hom [wɔdɛ hom] dze akoma a enyigye ahyɛ no mã nye enyimtsewee da ase wɔ ndzɛmba yinom ne nyɛe ho … [na] hom dze enyigye akoma nye enyimtsewee yɛ.”
Meserɛ hom nhyɛ nsɛmfua tsitsir a ɔwɔ nyikyerɛ yi mu: enyigye, enyigye, daase, akoma a enyigye ahyɛ mu mã, enyigye akoma, na enyimtsewee. Ɔyɛ me dɛ yerisie Ahomgyeda no wɔdɛ ɔdze enyimtsewee brɛ hɛn.
Ber a yɛsom wɔ abɔso na krɔnkrɔn kwan do no, meserɛ hom nsusu mbrɛ osi hia papaapa dɛ yekyia obiara a ɔba hɛn Asɔr nhyiamu ase ho, nkanka afoforfo na ahɔho no. Hɛn nyina wɔ dɛ asɔr ndwom no tow yɛ hɛn dɛw na yɛdze akoma na adwen a woebue tsie sacrament mpaabɔ no enyidahɔ mu.
Bishop na n’apamfo hɔn mu kor a, ɔkyɛ dasegye tsiabaa a otsim enyigye ho nhyehyɛɛ na Christ no nokwar asɛmpa, a ɔtsen na ɔnnyɛ kyinkyinɛnn no, na odzi enyim wɔ gyedzi dasegye mu wɔ hɛn akɔnkye na dasegye nhyiamu ase. Nkaafo no nyina wɔdɛ wodzi ne fasusu no do. Yehia dɛ yɛkaa dɛ gyinabea a ɔfata binom wɔ hɔ a yɛbotum akã nsɛm a woesisi anaa yɛbɛkyɛ hɛn akwantu mu nsɛm. Ber a yɛma hɛn dasegye yɛ tsiabaa na otsim Christ asɛmpa no do no, Ewuradze bɛma hɛn sunsum mu nkenyan ber a yɛnye hɛn ho kyɛ hɛn dasegye no.
Sɛ yɛdwen dɛ yɛrodɔ Nyankopɔn na yɛrodɔ hɛn anyɛnkofo ho a nna yetum tse erosom ndamyɛ mu no ase yie. Yɛkã no tsiabaa a, yɛsom osiandɛ yɛdɔ Ɔsor Egya na Ne mba. Hɛn mbɔdzembɔ a yɛdze rosom no bowie konyimdzi mu sɛ yɛamma wɔannyɛ kyinkyinɛnn a. Abrabɔ mu ndzɛmba a ɔnnyɛ kyinkyinɛnn no na ɔdze enyigye kɛse ba, ntsi ohia dɛ yɛyɛ ahwɛyie ma yɛannkɔdwen dɛ ɔsɛ dɛ wɔdze bi kã nsesã no a yeenya no ho ama yɛdze aatow hɛn gyedzi na dasegye a ɔyɛ dzen mu wɔ Nyame ne mba hɔn akoma mu.
Mma yɛmmfa nhyiamu horow, enyidakwan, anaa ahwehwɛdze horow biara nnkã ho ma ɔnnyɛ ndzɛmba kyinkyinɛnn. Hom mma ɔnyɛ tsiabaa. Ɔyɛ tsiabaa dɛm a na hom benya asomdwee, enyigye na ahomkã no a merekã ho asɛm no.
Mfe pii mu no Asɔr no baanodzi botae, dɛ ma wɔakã no wɔ Handbook 2, mu no yɛ enyidakwan a ɔyɛ pefee na ɔnnyɛ kyinkyinɛnn, no mu na meserɛ kã:
Baanodzifo hyɛ asɔrmba nyina nkuran dɛ wɔngye asɔfodzi ayɛdze nyina a ohia tsitsir, wonsie ahyɛmu a ɔkã ho, na wɔmfata nkwagye ntowdo na onnyiewiei nkwa no. …
“Mpanyimfo: Wɔhyɛ panyin kor biara nkuran dɛ ondzi mu a ɔbɛfata dɛ ɔgye temple ayɛdze horow no. Hom nkyerɛkyerɛ mpanyimfo nyina ma wɔnhwehwɛ hɔn ewuakɔr na wongyina nyɛ temple ayɛdze horow no mma hɔn.
“Mbabun: Hom mboa aberantsɛba kor biara ma ɔngye Melchizedek Asɔfodzi no, ɔngye temple ayɛdze horow no, na ɔmfata dɛ ɔbɔsom etuhoakyɛ asɛmpakã. Hom mboa ma wonsiesie akataasiaba kor biara ma ɔnyɛ na onsie ahyɛmudzi krɔnkrɔn na ɔngye temple ayɛdze horow no. Hom ndua dwumadzi ahorow a oye do mfa nhyɛ mbabun no dzen.
“Asɔrmba Nyina: “Hom mboa asɔfodzi na ekuw ekuw baanodzifo, ward abaguafo, ward na asɛmpasomafo etuhoakyɛfo, na asɔrmba mbɔ mu nyɛ edwuma wɔ mbɔdzembɔ a ɔsaa do mfa ngye ankorankor, nhyɛ ebusua ebusua na Asɔr atɔw no dzen, na wondua nsakyeree, asetsena na dwumadzi nkenyan do mfa mboa Israel ano. Kyerɛkyerɛ asɔrmba, ma wɔnyɛ ahodan ma hɔnho na hɔn ebusua ebusua na wɔmboa abɔbɔfo na ehiafo wɔ Ewuradze no kwan do.”
Mosom wɔ Asɔr no mu no dze sunsum mu sũahu soronko pii ehyira me. Meyɛ dasefo dɛ Ewuradze na Ɔhwɛ N’Asɔr do ma wɔyɛ No botae. Menya sunsum mu akwankyerɛ a ɔbor me nyansaa do koraa. Enyigye a ɔwɔ asɛmpa abrabɔ mu ma me nye dɛ otsim wɔ Jesus Christ no nokwar asɛmpa, a ɔtsen, na ɔnnyɛ kyinkyinɛnn do.
Masom wɔ nkɔnhyɛfo beesia na Asɔr ne Presidentfo fi Spencer W. Kimball do besi Russell M. Nelson hɔn nsaafee na akwankyerɛ ase. Megye dase dɛ hɔn mu kor biara yɛ nkɔnhyɛnyi a Nyame asan mu eyi no. Wɔakyerɛkyerɛ hɛn fapem tsitsir a ɔfa Asɔr no na asɛmpa no na Christ ne nkyerɛkyerɛ no ho. President Nelson rosɔw Ewuradze edwuma do akɔ kan wɔ kwan nwanwa do. Mese “kwan nwanwa” osiandɛ ɔno nko nye Asomafo mu ɔbaako a ɔkyɛn me panyin, naaso ɔyɛ me dzen dɛ mobɔto no! Meyɛ dasefo dɛ asɔfodzi nsaafee na Nyankopɔn no nkɔnhyɛnyi egudo no gu no do. President Nelson kyerɛkyerɛ Jesus Christ no nokwar asɛmpa, a ɔtsen, na ɔnnyɛ kyinkyinɛnn no. Megye me dasee dɛ Jesus nye Christ no, na iyi nye N’Asɔr—iyi ho na megye dase ahobrɛadze mu wɔ Jesus Christ dzin mu, amen.