Enam Sunsum no do Rohwehwɛ Nyimdzee

Elder Mathias Held ne Kasae

Ɔkã Eduosuon no ho

Ɔwɔ dɛ yesũa hu nokwar no a yɛnnam hɛn adwen nko do mbom so ɔnam Sunsum no ndze tseabaa na bɔkɔɔ no do.

Enuanom na nkyerɛbaa adɔfo, Ewuradze esi do akã akyerɛ hɛn dɛ “hom ndua adzesũa nye gyedzi so do mper nhwehwɛ nwomasua mpo.’’ Yennkotum edua hɛn adwendwen do nko enya kan na ntseasee, mbom yɛsan so dua Sunsum Krɔnkrɔn n’akwankyerɛ na ne nkenyan do.

Nyimdzee yi ne farbaa a ɔkã ho no nnkaa m’abrabɔ ho aber nyina.

Emi na me yer dɔfo, Irene, bɔdɔɔm Asɔr no mfe 31 a abɛsen kɔ mber a nna yɛawar fofor no. Hɛn beenu no nyinii wɔ Columbia, na hɛn awar n’ekyir abosoom kakra no, m’edwuma dze hɛn kɔree kɛtsenaa Germany. Nna yesusuar na yɛwɔ enyidado akɛse na enyidoadze horow, nna ɔyɛ enyigye na ahomka mber ara yie ma hɛn.

Ber a nna m’adwen tsim m’edwuma do no, nna Irene renya atsenkã dɛ yebenya amandzɛɛbɔ bi efi sor, a yennyim mbrɛ yebesi benya anaa mber no. Ntsi, ɔhyɛɛ ase dɛ ɔrema nkorɔfo asorɔtow a wɔdze wiadze nyimdzee mbuukuu, fie nsiesie mfir, edzibanyɛ mbuukuu, gyaadze ndzɛmba, na dza ɔkekã ho kɔ efiefi kɔtontɔn no kwan, ma wɔreba hɛn fie, a nna daa ɔrotweɔn dɛm amandzɛɛbɔ soronko no.

Ewimbir bi ɔkãa kyerɛɛ me dɛ mberantsɛ beenu bi a wɔhyɛ sor na ase ntar a n’enyi dum bɔbɔɔ hɔn abow mu na onyaa atsenkã pefee koraa na nkenyan soronko dɛ ɔmma wɔmbra mu. Wɔsee no dɛ wɔpɛ dɛ wɔkã Nyankopɔn ho asɛm kyerɛ no, mbom wɔbɛsan aba bio ber a nna moso mowɔ fie. Ana iyi botum ayɛ asɛm no a enyi da kwan no?

Wɔhyɛɛ ase serɛɛ hɛn, na yɛdze hɔn akwankyerɛ no, yɛkenkan wɔ kyerɛwsɛm no mu na yɛbɛtsee ase yie dɛ Jesus Christ yɛ hɛn Agyenkwa na Pomfo. Annkyɛr na yɛfee hɛnho ekyir dɛ nna woenuma hɛn dɛ mbɔdomaba nkakraba, a nna ɔnnyɛ ahyɛmudzi a yɛdwen ho. Naaso worunuma hɛn bio no san so kyerɛ dɛ yɛbɛyɛ Asɔr fofor yi mba, ntsi nna ohia dɛ yɛbɛtse biribiara a ɔfa ho no ase ara yie.

Na yebesi dɛn botum ehu dɛ dza asɛmpasomafo no rekã kyerɛ hɛn wɔ Mormon Nwoma no ho, wɔ Joseph Smith ho, na wɔ nkwagye ho nhyehyɛɛ ho nyinara no yɛ nokwar ankasa? Oye, yɛatse Ewuradze ne nsɛm mu ase dɛ yebotum dze “hɔn aba na hom dze bohu hɔn.’’ Ntsi, wɔ kwan a wɔahyehyɛ do no, yɛhyɛɛ ase dɛ yɛrohwehwɛ Asɔr no mu ber a yɛdze hɛnara hɛn adwendwen enyiwa rohwehwɛ aba no. Ebɛnadze na yehunii? Oye, yehun:

Nkorɔfo a wɔwɔ enyigye na wɔyɛ anyɛnkofo na ebusua ebusua a wɔtse ase dɛ ɔwɔ dɛ yedzi dɛw wɔ abrabɔ yi mu na nnyɛ amandzehu na ahohia nko.
Asɔr a wonntua asɔfo kaw mbom kor a asɔrmba hɔnankasa gye dwumadzi na asodzi.
Asɔr a Jesus Christ na ebusua ebusua wɔ adzebiara hɔn finimfin, bea a asɔrmba kyen kɔm da kor wɔ bosoom mu na woyi dze boa abɔbɔfo na ehiafo, bea a wɔkamfo apɔwmudzen suban, wɔkyerɛkyerɛ hɛn dɛ yɛnntwe hɛn ho mmfi ndur bɔn ho.

Dza ɔkã ho:

Yɛpɛɛ ankorankor no mpontu no, wɔ nwomasũa, edwumadzen na ahodan ho ntsĩmu no.
Yesũaa nyimpa ho ayamuhyehye nhyehyɛɛ mboa nwanwa no ho asɛm.
Na wiadze mfɛndzanan ehyiadzi nye ndwom dɛɛdɛw na sunsum mu fapem horow a no mu dɔ na wɔkãa no hɔ no yɛɛ hɛn ahomka.

Yehun iyi nyinara ekyir no, nna yenntum nnhu mfomdo wɔ Asɔr no mu. Mbom, yɛpɛɛ adzebiara a yehunii no dodow. Naaso, nna yɛdaho nntum nnyɛ adwen dɛ wonnuma hɛn osiandɛ nna yɛpɛ dɛ yehu adzebiara ansaana yeenuma.

Mbom hɛn adwen nnsii gyinae no mpo, nna abotar mu ara Ewuradze resiesie hɛn, nna Ɔrowen hɛn, na nna Ɔroboa hɛn ma yeehu dɛ ɔwɔ dɛ yesũa hu dɛ onnyi dɛ yedua hɛn adwendwen nko do dze hu nokwar no, mbom yɛsan dua Sunsum no ne ndze bɔkɔɔ na tseabaa koraa no do a, tsitsir ara ɔkasa kyerɛ hɛn akoma no so do.

Dɛm ndze no na ne nkã-tse nsunsuando baa ewimbir bi, abosoom 10 ekyir a yeesũa asɛmpa no, ber a yɛkenkan wɔ Mosiah 18 dɛ, “Na hom pɛ dɛ … soasoa kor biara n’adzesoa, … na wɔkyekye hɔn a wohia awerɛkyekyer no hɔn werɛ, … sɛ iyi yɛ ɔpɛ a ofi hom akoma mu a, nna ebɛnadze na osiw hom kwan dɛ wobonuma hom wɔ Ewuradze ne dzin mu?’’

Dɛm asɛnsin fi Mormon Nwoma mu no hɛɛn hɛn akoma na akra mu, na awerɛfir mu yɛtsee nkã na yehun dɛ siantsir biara nnyi hɔ dɛ wonnkonuma hɛn. Yehun dɛ apɛdze a wɔabobɔ edzin wɔ nyiyimu yinom mu no nye hɛn so hɛn akoma n’apɛdze na ndzɛmba no nye dza ho hia ankasa. Nna wohia dodow sen iritse adzebiara ase osiandɛ nna dza yenyim dada no ye. Nna daa daa yɛdan Ɔsor Egya dɔfo n’akwankyerɛ nsa no na yɛwɔ awerɛhyɛmu dɛ Ɔbɔkɔ do akyerɛ hɛn kwan.

Ntsi, dɛm da noara, yɛhyɛɛ hɛn enuma ho da, na ewiei no annkyɛr na wonumaa hɛn!

Ebɛnadze na yesũae fi dɛm sũahu no mu?

Odzi Kan, yesũaa dɛ yebotum yɛatwer Ɔsor Egya dɔfo ara yie, Ɔno a daa daa Ɔrobɔ mbɔdzen dɛ Ɔbɔboa hɛn ma yɛabɛyɛ nyimpa a Onyim dɛ yebotum ayɛ. Yesii Ne nsɛm ho nokwar nwanwa no pi mber a Ɔkãa dɛ, “Medze me nsɛm bɛma adasamba nsensaneeba tsia nsensaeeba, ahyɛdze tsia ahyɛdze, ha kakra, hɔ kakra; na nhyira nkã hɔn a wodzi m’ahyɛdze do … , na wobosua nyansa; na nyia ɔgye no, mebɛma no pii.’’

Na otsia ebien, yesũaa dɛ, dza ɔkã hɛn adwendwen ho no, afã bi so nye dɛ yerenya nyimdzee a obotum ama hɛn akwankyerɛ na ntseasee. Ɔyɛ Sunsum Krɔnkrɔn ne ndze bɔkɔɔ na tseabaa no na ɔrekasa kyerɛ hɛn akoma na hɛn adwen.

Mepɛ dɛ medze hɛn ahom a yɛdze hu adze toto fapem yi ho. Hɛn Egya a ɔwɔ Sor mma hɛn enyiwa kor pɛ, mbom honandua mu enyiwa ebien. Yebotum dze enyiwa kor nko ehu adze yie, naaso enyiwa a otsia ebien ma hɛn nhumu kor so. Sɛ wɔdze nhumu ebien no bɔmu wɔ hɛn adwen mu a, wɔma hɛn dza etwa hɛnho ehyia no yie dɛ mbrɛ ɔtse.

Dɛmara, na wɔama hɛn nsɛmnsɛm ne farbaa ebien, wɔ hɛn honandua na sunsum mu ahom do. Hɛn adwen dua hɛn honandua atsenkã do na adwendwen do. Naaso ɔnam Sunsum Krɔnkrɔn n’akyɛdze do no, Egya no asan so ama hɛn nhumu a otsia ebien a ohia dodow koraa na ɔno yɛ nokwar no, osiandɛ ofi No hɔ pɛɛ ba. Mbom, osiandɛ Sunsum n’awasa no taa yɛ bɔkɔɔ no ntsi, nkorɔfo pii hɔn enyi nnyi farbaa a ɔkã ho no do.

Sɛ nhumu ahorow ebien yinom bɔmu wɔ hɛn akra mu a, mfonyin kor a odzi mu kyerɛ ndzɛmba ho nokwar dɛ mbrɛ nokwar ara wɔtse no. Nokwar, ɔnam Sunsum Krɔnkrɔn no nhumu a ɔkã ho do no, “gyedzi ahorow’’ bi a, yɛnam hɛn adwen mu ntseasee do hu no nkotsee, no botum eyi noho dɛ ndaadaa anaa omuo koraakoraa. Hom nkaa Moroni ne nsɛm no: “Na ɔnam Sunsum Krɔnkrɔn no tum do, hom botum ehu nokwar a ɔwɔ ndzɛmba nyinara mu.’’

Me mfe 31 mu dɛ Asɔrba no, mber pii na meehu dɛ sɛ yɛdan hɛn adwendwen nko na yɛpow anaa yebu hɛn enyi gu sunsum mu ntseasee a yebotum edua Sunsum Krɔnkrɔn n’awasa na nkenyan do enya no do a, nna ɔtse dɛ yɛdze enyiwa kor nko nam abrabɔ no mu. Naaso, yɛrekã pefee a, nokwar ara, wɔama hɛn “enyiwa ebien.’’ Adwenkyerɛ ahorow ebien no nkabɔmu na obotum ama hɛn nokwar horow nyinara ho nokwar mfonyin na odzi mu wɔ adzebiara a yenya no wɔ hɛn abrabɔ mu ho, dɛmara dɛ hɛn su na hɛn botae horow ho ntseasee nwanwa dɛ Ɔsor Egya tseasefo ne mba.

Mekaa dza President Russell M. Nelson kyerɛkyerɛɛ hɛn afe a abɛsen kɔ no mber a ɔkãa dɛ “nda a ɔreba mu no, yennkotum atsena ase sunsum mu a Sunsum Krɔnkrɔn n’akwankyerɛ, ne kyerɛpɛn, n’awerɛkyekyer, na ne daa nhyɛdo nnkãho.’’

Medze nokwar koraa a odzi mu ehu dɛ:

Yɛwɔ Egya dɔfo a ɔwɔ Sor, na hɛn nyina yɛpeen do dɛ yɛbɛba asaase yi do, a ɔka nhyehyɛɛ krɔnkrɔn no ho.
Jesus nye Christ no; Ɔtse ase na ɔyɛ m’Agyenkwa na Pomfo.
Joseph, banyimba okuafo ahobrɛadzenyi no, wɔfrɛɛ no na ɔbɛyɛɛ nkɔnhyɛnyi okunyin a ɔhyɛɛ iyi ase, mberano ne mãhyɛ, a ne nsaafee, tum, na Nyankopɔn n’asɔfodzi krɔnkrɔn nyinara kã ho.
Mormon Nwoma no yɛ Jesus Christ ho dase a otsia ebien, na ɔsɛ dɛ ebusua ebusua bɔbɔmu etsim afebɔɔ.
Hɛn Ewuradze Jesus Christ, nam hɛn nkɔnhyɛnyi tseasefo, President Russell M. Nelson do, dzi iyi, N’Asɔr a wɔdze asanananmu no kan, ndɛ.

Iyinom na nokwar horow pii so bi a ɔsombo abɛyɛ sunsum mu adanse fapem wɔ dza Nyankopɔn roboa me ma maabɛyɛ ho. Na m’enyi da nkyerɛkyerɛ afofor pii kwan a Ɔpɛ dɛ emi—na hom—nya ber a yedua ɔbra nwanwa yi mu na “ yendua … adzesua nye gyedzi so do mpo.’’

Minyim dɛ ndzɛmba yinom yɛ nokwar na megye ho dase wɔ Jesus Christ ne dzin mu, amen.