“Bra Bɛka Mo Do”
Jesus Christ to nsa frɛ hɛn dɛ yɛmfa ahyɛmudzi anamɔn kwan no mbra fie mbra hɛn Ɔsor Awofo hɔ na yɛnye hɔn a yɛdɔ hɔn no atsena.
Mo nuanom na me nkyerɛbaa adɔfo, ɔyɛ emi na mo hokafo Wendy ahomkã dɛ yɛnye hom wɔ ha Ahomgyeda anapa yi. Pii na woesisi fitsi hɛn wiadze mfɛndzanan ehyiadzi a odzi ekyir no. Woetu temple afofor ahyɛ Nyame nsa wɔ Concepción, Chile; Barranquilla, Colombia; na Rome, Italy. Sunsum no huei kɛsenara wɔ krɔnkrɔn dwumadzi yinom mu ma yɛtsee.
Mema mbaa (na mbarimba) dodow a ndaansa yi wɔakenkan Mormon Nwoma na woekopue enyigyedze na akoradze a wɔdze esie no do. Anwanwadze a hom enya ho nkaabɔ no hyɛ me nkuran.
Ɔyɛ me nwanwa dɛ mfe-11 mbanyinmba a, afei wɔayɛ deaconfo, dze sacrament no kɔ aporɔw Kwesida biara emudzi mu. Wɔnye hɛn mfe-11 mbasiamba no a, worusũa enyiberdo na wɔrosom dɛ Beehivefo no, kɔ temple. Mbrantsɛ na nkataasia nyina rekã asɛmpa nokwar no ho asɛm no wɔ pefeeyɛ na ndamyɛ mu.
Midzi dɛw wɔ mbofra na mbabun a wɔroboa akyerɛkyerɛ asɛmpa no wɔ hɔn efiefi mu ber a wɔnye hɔn awofo dzi fie adzesũa a Asɔr no ma ho abamba no do.
Yenyaa mfe anan Blake a, Kwesida anapa bi, ɔtam Asɔr buukuu bi na ɔtsẽaa mu dɛ, “Mihia dɛ menyɛn mo sunsum!” no mfonyin.
Blake, hɛn enyi agye ɔwo na binom so a wɔresan mu eyi dɛ wɔbɛmee wɔ Jesus Christ n’asɛmpa nsanananmu no mu, dze anyɛn hɔn esunsum. Na yedzi dɛw dɛ yenyim dɛ dodowara renya Nyankopɔn no tum no wɔ hɔn abrabɔ mu ber a wɔsɔr na wɔsom wɔ temple mu no.
Dɛ mbrɛ hom mu dodowara nyim no, hɛn ebusua nyaa mpaapaamudzi a ɔkã akoma no bosoom ebiasa a wɔabɛsen yi, ber a hɛn babaa Wendy fii ɔnnkyebo abrabɔ yi mu no. Ne nda a odzi ewiei a ɔnye kokoram yarba dzii akõ no, ɔyɛ m’adom dɛ menyaa kwan dze kraa no wɔ egya na babaa nkɔmbɔdzi mu.
Musuoo ne nsa mu na mekãa mbrɛ mesii dɔɔ no na m’enyisɔ dɛ meyɛ n’egya. Mesee dɛ: “Ewaree wɔ temple mu na esie w’ahyɛmudzi no nokwar mu. Ɔwo na wo kun gyee mba beesuon baa hom fie na hom tsetsee hɔn dɛ wɔnyɛ Jesus Christ esuafo nokwafo, Asɔrmba akokodurfo, na ɔman mba pa. Na hɔn so wɔasan mu eyiyi hokãfo a wɔtse dɛm ara. Wo papa enyi asɔ wo papaapa. Ahyɛ me enyigye kɛse!”
Obuae kommyɛ mu, “Daddy, meda ase.”
Nna ɔyɛ mber a okitsa akoma ma hɛn, yekyii enyisuwa. Ne mfe 67 mu no, yɛbɔmu yɛɛ edwuma, toow ndwom, na yɛtaa bɔɔ mu tsĩi papatser wɔ esukwankyiaba do. Mbom dɛm ewimbir no, yɛkasaa faa ndzɛmba a ho hia tsitsir, tse dɛ ahyɛmudzi, ayɛdze horow, setsie, gyedzi, ebusua, awar mu nokwardzi, ɔdɔ, na onnyiewiei nkwa.
Yɛafẽ hɛn babaa no dodow. Naaso, osian Jesus Christ n’asɛmpa nsanananmu no ntsi, yɛnnhaw hɛnho wɔ noho. Ber a ahyɛmu a yɛnye Nyame edzi no yɛkɔ do dzi no nyi no, yɛbɔ hɛn bra dɛ mbrɛ daakye yɛnye no bɛtsena. Seisei, ber a yɛrosom Ewuradze wɔ ha yi nna ɔrosom No wɔ hɔ—wɔ paradise.
Nokwar, emi na me yer yɛkɛseraa Paradise afe yi ahyɛse no—Paradise, a ɔwɔ California, no. Mbrɛ okesii no, hɛn nsera mber a wɔahyehyɛ no bae no nna hɛn babaa no fii wiadze mu no odzii dɔnhwer 40 mpo. Yɛnye, Elder Kevin W. Pearson na ne yer, June, na Ahotseweefo a wɔwɔ Chico California Stake no hyɛɛ hɛn dzen. Yɛtsee hɔn gyedzi kɛse ho nsɛm, hɔn som ndzeyɛɛ, na anwanwadze a osisii hɔn mu wɔ ɔsɛɛ kɛse a ofi gyaframee mpo a ɔmaa wɔhwer egyapadze pii a ne sasõ mmbaa California abakɔsɛm mu da.
Yɛwɔ hɔ no, yɛnye polisinyi ɔfesa abrantsɛ, John, a ɔkã hɔn a wodzii kan bɔboae no kasaa pii. Ɔkaa sum kebii a ɔbɛhyɛɛ Paradise do Ɔberɛfɛw 8, [afe] 2018 mu, ber a gyaframee na gyasenama twuwii faa kurow no mu, hyeew adan na ndzɛmba dze ɔsɛɛ kɛse a woenngya hwee kã nsõ ekukuw na brikese wusuw bɛn a wɔayɛ kwatserkwa.
Dɔnhwer 15 mu no, John kãa ne kaar duaa sum kebii no mu a gyasenama rototow esian mu ber a ɔroboa nkorɔfo nkorkor, ebusua kor na kor so eguan akɔ bea a ɔyɛ ahotɔ—ne nyina mu no nna ɔyɛ esian ma nankasa no nkwa. Naaso edwuma dzen a ɔtse dɛm mu no, dza ogyaa John akomatu kɛse nye nsɛmbisa a ɔhyɛɛ no do kɛse no: “Henfa na m’ebusua wɔ?” Dɔnhwer pii akomatu kɛse mber ekyir no, ɔtsee dɛ woeyi hɔn dwudwoodwo.
John n’asɛm a ɔfa n’ebusua a ɔdween hɔn ho no ekenyan me dɛ menkasa nkyerɛ hom mu binom a wokodu hɔn ɔnnkyebo abrabɔ ewiei a bia wobebisa dɛ “Henfa na m’ebusua wɔ?” Da no a ɔreba no mu no, ber a ewie wo ɔnnkyebo nsɔhwɛber na ahen sunsum wiadze no, asɛmbisa yi a ɔtsew akoma no bɛda wo bo mu: “Henfa na m’ebusua wɔ?”
Jesus Christ kyerɛ kwan no a wɔdze san kɔ hɛn onnyiewiei fie no. Ɔtse hɛn Ɔsor Egya ne nhyehyɛɛ a ɔfa onnyiewiei mpontu no ase kyɛn hɛn mu biara. Nokwar, Ɔno nye ne nyina no kotowdo-bo no. Ɔyɛ hɛn Pomfo, hɛn Ɔyarsãfo, na hɛn Agyenkwa.
Fitsi ber a wɔpaam Adam na Eve fii Eden Ture no mu no, Jesus a ɔyɛ Christ no atsen No tum abasa no mu ama hɔn nyina a wɔsan mu yi dɛ wɔbɛka No do no. Kyerɛwsɛm no si do ara kyerɛw dɛ bɔn ahorow nyina a ofi nyimpa ahorow nyina hɔ ekyir no, N’abasa mu da ho ara atsen wɔ hɔn do.
Hɛn mu kor biara no sunsum n’awosu atsenkã nye dɛ ebusua dɔ no bɔwɔ hɔ daapem. Ɔdɔ ho ndwom pii ma enyidado hun kɔ do tsim, dɛ ɔdɔ nye dza hom hia ara sɛ hom pɛ dɛ hom tsena afebɔɔ a Na binom gye dzi ator mu dɛ Jesus Christ No Wusoɛr no bɔ anohoba dɛ nkorɔfo nyina nye hɔn adɔfo nyina bɛtsena bio wɔ owu ekyir.
Nokwar, Agyenkwa no Nankasa maa ɔdaa edzi pefee dɛ ɔwɔ mu dɛ No Wusoɛr ma ɔdasanyi biara a ɔatsena ase pɛn no awerɛhyɛmu dɛ ɔbɔsoɛr ampaara efi owu mu na ɔatsena ase afebɔɔ, naaso dodowara na wɔrohwehwɛ sɛ yɛpɛ nkwagye ntowdo ndzinoa no a ɔkrɔn no a. Nkwagye yɛ ankorankor asodzii; mbom nkwagye ntowdo yɛ ebusua asodzii.
Hom ntsie nsɛnfua yinom a Ewuradze Jesus Christ kãa kyerɛ No nkɔnhyɛnyi: “Na nokwar, mese hom dɛ, dɛm mbra ho nhyehyɛɛ nye iyinom: Ahyɛmudzi, nhyehyɛɛ, nkyekyeree, asɛdze, nsewdzi, bɔhyɛ, nyɛe, nsesemu, fɛkuwbɔ anaa enyidakwan nyina a wɔannyɛ na …ammfa anohoba Sunsum Krɔnkrɔn no annsɔw ano … owuekyir no biribi papa biara anaa tum biara anaa nhyɛ biara, osiandɛ sɛ nyimpa wu a, nhyehyɛɛ biara a wɔannyɛ no wɔ kwan yi do no ba ewiei.
Ntsi, ebɛnadze na ohia ma ebusua enya nkwagye ntowdo afebɔɔ? Yɛfata dɛm ndzinoa no ber a yɛnye Nyankopɔn dzi ahyɛmu, yesie ahyɛmu yinom, na yɛgye ayɛdze a ohia tsitsir nyina.
Iyi ayɛ nokwar fitsi mber ahyɛse. Adam na Eve, Noah na ne yer, Abraham na Sarah, Lehi na Sariah, na Jesus Christ esuafo nokwafo nyina—fitsi ber a wɔbɔɔ wiadze no—wɔnye Nyankopɔn edzi ahyɛmu kor noara. Wɔagye ayɛdze kor noara a hɛn dɛ yɛyɛ Ewuradze ne nsanananmu Asɔr ndɛ asɔrmba agye no dɛm ayɛdze horow no yɛgye no enuma na temple mu no.
Agyenkwa no to nsa frɛ hɛn nyina dɛ yenka No do nkɔ enuma esu no mu na, mber mu no yɛnye Nyankopɔn edzi ahyɛmu binom akã ho wɔ temple mu na yɛagye na yedzi nokwar ama ayɛdze yinom a wohia tsitsir a ɔkã ho no. Iyinom nyina ho hia sɛ yɛpɛ dɛ yenye hɛn ebusua ebusua na Nyame nya nkwagye ntowdo a.
M’akoma mu awerɛhowdzi nye dɛ nkorɔfo pii a modɔ hɔn, hɔn a mekamfo, na hɔn a mubu hɔn no nngye Ne nsato no do. Wɔpow Jesus Christ No ntotɔserɛ no ber a Ɔfrɛ hɔn dɛ, “Hom mbra, mbɛka Mo do.”
Maatse siantsir a Nyankopɔn sũ no ase. Moso musũ ma anyɛnkofo na ebusuafo a wɔtse dɛm. Wɔyɛ mbarimba na mbaa awanwafo a, wɔdze hɔn mber ara yie ma hɔn ebusua na ɔman asɛdze. Wɔdze hɔn mber, ahom na ahodze ma etuhoakyɛ mu. Na wiadze no ayɛ bea pa ɔnam hɔn mbɔdzembɔ ntsi. Naaso wɔasan mu eyi dɛ wɔnye Nyame nnkedzi ahyɛmu. Wɔnngyee ayɛdze horow no a ɔbɛma hɔn na hɔn ebusua ebusua enya nkwagye ntowdo na wɔakyekyer hɔn abɔmu afebɔɔ no.
Me yamu ankyɛ mobɔkɔ akɛsera hɔn na mato nsa afrɛ hɔn dɛ wɔmfa ahwɛyie nsusu Ewuradze ne mbrasɛm no a ɔfata no. Madwen dza mubotum aka ho ama wɔaatse mbrɛ Agyenkwa no si dɔ hɔn no, na woeehu mbrɛ mesi dɔ hɔn, na wɔaba ebohu mbrɛ mbaa na mbarimba ahyɛmu siefo no botum enya “enyigye ne mãhyɛ” no.
Ohia dɛ wɔtse ase dɛ mber a kwan wɔ hɔ ma hɔn owuekyir no—ɔfa mbarimba na mbaa awanwafo so a wɔsan mu yi dɛ wɔnye Nyame nnkedzi ahyɛmu no—hɔ no nnyɛ bea a wɔbɛka ebusua ebusua abɔ mu na wɔama woenya ndzinoa wɔbɛtsena ase na woetu mpon afebɔɔ. Hɔ no nnyɛ ahenman no a wobenya enyigye ne mãhyɛ—dɛ mpontu na enyigye a ɔmmbuadze da no. Nhyira a ɔkrɔn koraa yinom botum aba hɔn a wɔnye Nyankopɔn, hɛn Onnyiewiei Egya, na Ne Ba, Jesus Christ na hɛn ebusua mu mba a wodzi mu, na wɔafata dɛ wɔbɛtsena celestial ahenman a ɔkrɔn no mu no hɔn do.
Metse dɛ menkã nkyerɛ m’anyɛnkofo a wɔda ho rotweɔn no:
“Abrabɔ yi mu no, hom anngye biribiara a onndzi mu nnwie no. Naaso, dɛ hom ropow dɛ hom bofoa Jesus Christ n’asɛmpa a wɔdze asan ananmu yi, hom refa dza onndzi mu nnwie.
“Agyenkwa no see dɛ, ‘M’Egya fie wɔ tsenabew pii.’ Naaso, dɛ hom afa dɛ hom nye Nyame nnkedzi ahyɛmu mu no, hom regye etsifi nkuruwii ketseaba koraa wɔ hom etsifi do wɔ daapem nyina mu.
Mobɔkɔ do etu m’anyɛnkofo twentwemfo no akã dɛ:
“Hom nhue hom akoma ngu hom Ɔsor Egya do. Hom mbisa No, sɛ ndzɛmba yinom yɛ nokwar. Hom mfa mber nsũa Ne nsɛm. Hom nsũa ara yie! Sɛ edɔ w’ebusua ara yie na epɛ dɛ enye hɔn nya nkwagye ntowdo afebɔɔ nyina mu a, yɛ ho edwuma seisei—edua adzesũa enyiber do na ntotɔserɛ mpaabɔ do—dze ehu nokwar yinom na nkyii edzi do.
“Sɛ innyim ara dɛ egye Nyame mpo dzi a, nna hyɛ ase wɔ ha. Tse ase dɛ sɛ innyi Nyame ho nkitahodzi sũahu biara a, ibotum agye kyim dɛ Nyame biara nnyi hɔ. Ntsi, fa woho si gyinabew a ebɛhyɛ ase enye No benya nkitahodzi sũahu do. Brɛ woho adze Bɔ mpaa dɛ ibohu Nyame ne nsa wɔ w’abrabɔ mu na wɔ wiadze a oetwa woho ehyia no mu. Bisa No ma Ɔnkã nkyerɛ wo dɛ sɛ Ɔwɔ hɔ ampaara a—sɛ Onyim wo a. Bisa no ma Ɔnkã N’atsenkã wɔ woho nkyerɛ wo. Na nkyii tsie.”
Nyɛnko dɔfo kor a ɔtse dɛm, nna onnyim Nyame yie. Naaso ɔdɔɔ pɛɛ dɛ ne yer a oewu no ɔnye no bɛtsena bio. Ntsi obisaa me dɛ mo mboa no. Mehyɛɛ no nkuran dɛ onhyia hɛn asɛmpasomafo no ama ɔaatse Christ ne nkyerɛkyerɛ no ase na oesũa asɛmpa ahyɛmudzi, ayɛdze, na nhyira horow no.
Ɔno dze ɔyɛe. Naaso ɔdween ho dɛ kwan a wotuu no fo dɛ ɔmfa do no behia no ma ɔayɛ nsesã mbordo wɔ n’abrabɔ mu. Ɔsee dɛ, “Mbrasɛm na ahyɛmudzi no yɛ dzen dodow ma me. Afei so, munnkotum etua ebupɛn du, na minnyi mber a medze bɔsom wɔ Asɔr no mu.” Nkyii obisaa me dɛ, “Menya wu a, mepa wo kyɛw yɛ temple edwuma a ohia ma emi na me yer ama yeetum aabɔmu aatsena bio.”
Ndaase mu ara, mennyɛ ɔbarimba yi no ɔtsɛmbuafo. Mbom minngye nndzi dɛ temple edwuma a wɔyɛ ma obi a onyaa kwan dɛ wobonuma no wɔ abrabɔ yi mu—wɔahyɛ no asɔfodzi na ɔagye ne temple nhyira ber a ɔwɔ ɔnnkyebo asetsena yi mu—naaso ɔgyee enyim bɔɔ adwenpɔw dze poow dɛm kwan no, ɔbɛyɛ edwuma.
Mo nuanom na me nkyerɛbaa adɔfo, Jesus Christ to nsa frɛ hɛn dɛ yɛmfa ahyɛmudzi anamɔn kwan no mbra fie mbra hɛn Ɔsor Awofo hɔ na yɛnye hɔn a yɛdɔ hɔn no atsena. Ɔto nsa frɛ hɛn dɛ “hom mbra mbɛka mo do.”
Afei, dɛ meyɛ N’Asɔr no ne President no, mototɔ serɛ hom a hom atwe homho efi Asɔr no ho na hom a hom nhwehwɛɛ mu ara yie dɛ, hom bohu dɛ Agyenkwa N’Asɔr no a wɔdze asananmu aba no. Hom nyɛ sunsum mu edwuma no nhwehwɛ mma hom ho, na meserɛ, hom nyɛ no seseiara. Mber retsia.
“Megye dase dɛ Nyame tse ase.” Jesus nye Christ no. N’Asɔr na N’asɛmpa ne mãhyɛ no wɔdze asanananmu aba dze enyigye ehyira hɛn abrabɔ, ha na ma ɔreba no. Megye ho dase wɔ Jesus Christ ne dzin mu, amen.