Kana Magiti ena Vosa i Karisito
Na kana magiti ena vosa i Karisito ena rawa ni yaco ena gauna cava ga kei na ituvaki cava ga, kevaka eda vakarautaka na yaloda.
E lomani keda na Tamada Vakalomalagi. Sa vakarautaka tu o Koya e dua na ituvatuva uasivi meda marautaka kina na Nona veivakalougatataki. Ena bula oqo, eda sa sureti kece meda lako vei Karisito ka ciqoma na kosipeli vakalesui mai i Jisu Karisito ena papitaiso, ciqoma na isolisoli ni Yalo Tabu, ka bulataka na kosipeli ena yalodina. E vakamacalataka o Nifai na noda vakadonuya meda papitaiso sai koya noda curuma na “sala qiqo ka rabailailai,” ka tokaruataka meda tomana tiko noda “toso ki liu ka tudei vei Karisito, … ka kana magiti ena vosa i Karisito, ka vosota me yacova na ivakataotioti,” me rawa ni ciqomi na veivakalougatataki kece sa vakarautaka tu na Tamada Vakalomalagi vei keda (2 Nifai 31:19–20).
E veivakananumi tale o Nifai vei keda ni kevaka meda “kana magiti ena vosa i Karisito,” era na “tukuna vei [keda] na veika kece [meda] kitaka” (2 Nifai 32:3) eda na qai vakaukauwataki meda vorata rawa na “gasau vidi waqa ni meca” (1 Nifai 15:24).
Na Cava na Kana Magiti?
Niu se gone, au nanuma ni kana magitio ya meda kania vakalevu na raisi, sushi, kei na soy sauce. Au sa kila oqo ni kana magiti dina e levu cake mai kena marautaki e dua na kakana totoka. Eda sotava kina na reki, veivakabulabulataki, marau, veiwasei, vakaraitaki ni lomani na matavuvale kei ira na daulomani, vakaraitaka noda vakavinavinaka vua na Kalou, ka tara cake na veimaliwai ni da marautaka tiko na kakana levu e totoka sara. Au vakabauta ni da kana magiti ena vosa i Karisito, e dodonu meda vakasamataka na veika vata ga e sotavi kina. Na kana magiti ena ivolanikalou e sega walega ni kena wiliki. E dodonu me kauta mai na reki dina ka tarai cake noda veimaliwai kei na iVakabula.
E matata na kena vakavulici oqo ena iVola i Momani. Nanuma na tadra nei Liai ni a raica e dua na vunikau “sa talei sara na vuana me [na] marau kina na tamata.” Na vuana oqo e matataka na loloma ni Kalou, ka sa kania oti o Liai na vuana, “ni sa … kamikamica sara, ka uasivi cake mai na vuanikau kecega sa tovolea oti o [koya].” A “vakasinaita na [yalona] ena marau levu sara” koya oqo sa gadreva sara me wasea ki na nona matavuvale (1 Nifai 8:10–12).
Ni da kana magiti, eda na raica talega ni levu ni keda kakana se kena veimataqali e sega ni dua na ka, ke sa vakasinaiti tu na yaloda ena vakavinavinaka. A kana lewe ni manumanu droka na matavuvale nei Liai ena lekutu, ia a vakamacalataka o Nifai na veivakatovolei dredre oqo, ka kaya, “Ka sa rui levu sara na nona veivakalougatataki na Turaga” ka yaco na “neimami yalewa … [me] ra sa kaukauwa” ka vakasucu gone rawa “ka sega ni vosa kudrukudru” (1 Nifai 17:1–2).
Na kana magiti ena so na gauna e oka kina na vakatovolea kei na kania. E tukuna tiko o Alama e dua na sorenikau vinaka e teivaki ena lomada. Ni da veitovotovo kina, eda na raica ni sa tekivu “me kana vinaka sara”(raica na Alama 32:28–33).
Kana Magiti ena Vosa i Karisito
Na kalougata ni kana magiti ena vosa i Karisito sa ka kaukauwa ka veisautaka na bula. E tolu tiko na kena mataqali au sureti kemuni kina mo ni vakayagataka ena nomuni bula.
iMatai, na vosa i Karisito ena vukea “me vakatorocaketaki [noda] gumatua vakayalo meda ciqoma na ivakatakila” (“iVakatakila ki na Lotu, iVakatakila ki na Noda Bula,” Liaona Me 2018, 96) ka dusimaki keda bula yani ena noda bula. E vakavulica o Momani ni vosa i Karisito sa “dau vakayarayarataki ira na tamata me ra vakayacora na ka [sa] dodonu,” ka ra sa kaukauwa cake sara mai na veika e cakava rawa na “iseleiwau” (Alama 31:5). Niu vakasaqara na vuku ni Kalou meu walia kina na noqu bolebole, e wasoma meu tovolea na “dodonu ni vosa ni Kalou,” (Alama 31:5), kau sa vakauqeti kina meu vakatulewa matua, vorata rawa na veitemaki, ka vakalougatataki na noqu bula ena vakalevutaki ni noqu vakabauti Karisito ka lomani ira era tiko voliti au. A vakavulica vakabibi vei keda na noda parofita o Russell M. Nelson, ni “sa roro mai na gauna ena sega kina ni rawa meda vakabulai vakayalo ke sega na veidusimaki, veituberi, veivakacegui, kei na veivakauqeti tikoga ni Yalo Tabu” (“iVakatakila ki na Lotu, iVakatakila ki na Noda Bula,” 96). Ena yaco mai na ivakatakila sa gadrevi ni da sasagataka na “mana ni vosa,” ka yaco na vosa me kaukauwa cake mai na cava ga eda saga se raitayalotaka.
Ai karua, ni da sotava na dredre ena noda kilai keda vakataki keda kei na noda rokovi keda vakataki keda, ena vukei keda na “vosa talei ni Kalou” (Jekope 2:8) ena ivolanikalou meda kila se o cei dina o keda ka soli mai na kaukauwa e uasivia mai na noda. Niu sa kila niu sa luve ni Kalou sa dua dina na gauna kamica duadua au se qai bau sotava vakadua. Ni tekivu na noqu veiyabaki ni tinivakacaca, au a sega tu ni kila e dua na ka baleta na ivakavuvuli ni iVakabula. Niu sa wilika ena imatai ni gauna na Veiyalayalati Vou, sa yaco na vosa i Karisito me vakabula dina na mavoa ni yaloqu. Au a kila kina niu sa sega ni tiko duadua ka niu sa luve ni Kalou. Niu sa mai kidava o cei dina oi au ena mata ni Kalou, au sa raica rawa na noqu nuidei tawacava mai na Veisorovaki i Karisito.
A wasea vakakina o Inosi na ka a sotava ena nona a vakararamataki mai na nona vakanananutaka tiko na vosa i Karisito. Ni sa vakatara o Inosi na vosa a vakavulica vua o tamana me baleta na “bula tawamudu, kei na nodra reki na Yalododonu, me [lutu] vakavinaka sara ki [lomana],” ni sa “waloloi; ka a tekiduru o [koya] e matana na [nona] Dauniveibuli … ena masu kaukauwa” (Inosi 1:3–4). Ena masu o ya a kila kina na iVakabula ka vulica ni da sa ka yaga sara, ka lomani ka rawa ni da vosoti mai na noda caka cala, ka da sa luvena vakaidina na Kalou.
iKatolu, eda rawa ni laveta cake na nodra bula eso mai na vosa i Karisito. Me vakataki Inosi ga ena nona gauna kei na vanua a tara kina na yalona na vosa i Karisito, ni na cakava na Turaga na Nona itavi me tara na yalodra o ira eda na wasea kina na kosipeli. E vuqa vei keda sa yalolailai ni da saga meda sureta e dua me rogoca na kosipeli ka qai sega ni yaco na ka eda a gadreva. Se cava ga e yaco, sa sureti keda tiko na Turaga meda dolava na gusuda ka wasea na itukutuku ni kosipeli kivei ira.
Ena rua na yabaki sa oti, a tara na Turaga na yaloi tinaqu lomani, ka a vukei koya me sa ciqoma na cakacaka vakalotu ni papitaiso. Au a waraka tu mai me voleka ni 35 na yabaki me yacova mai na siga oya. Ena kena gadrevi vua me vakatulewa kina, e vuqa na lewe ni Lotu era veiqaravi vakaidina vua me vakataki Karisito. Dua na Sigatabu, sa lomana sara me sa gole ki lotu. A vakamuria sara na veivakauqeti oqo. Ni sa laki dabe toka ena yatu e liu ka waraka me tekivu na soqoni ni sakaramede, sa tucake tu e matana e dua na cauravou lailai yabaki va ka wanonovi koya tu. A kidavaki cauravou ena matadredredre. A gole sara yani vakatotolo o cauravou me laki dabe ena nona idabedabe, ena yasa kadua ni yatu a dabe toka kina o tinaqu. A tomika sara o cauravou e dua na ka mai na nona idabedabe ka lesu mai ka solia vei tinaqu e dua na ivolanisere ka lesu ki nona idabedabe. A raica sara o tinaqu ni ra biu tu na ivolanisere ena veidabedabe e valenilotu. A rawa sara ga vua me tomika cake e dua ena idabedabe toka voleka vua. Ia, a taleitaka sara vakalevu na ivakarau vinaka nei cauravou, ka vulica mai nodratou vale vakakina ena lotu. Sa dua dina na gauna vinaka vua. Sa vakila vakaukauwa o koya ni sa sureti koya tiko na Kalou me lako mai ka muria na iVakabula. Sa vakila e lomana ni sa dodonu me papitaiso. A sega ni saga o cauravou me kilai na ka a cakava, ia a cakava ga na nona vinaka duadua me bulataka na vosa ni Kalou ka lomana na wekana. Na yalololoma nei cauravou a bulia e dua na veisau bibi ni yalo vei tinaqu.
Na vosa i Karisito ena tara vakabibi na yalo ni tamata ka dolava na matadra era se bera tu ni raici Koya. Ena gaunisala ki Emeo, a taubale vata tiko kei Jisu e rua na tisaipeli. Rau a rarawa voli ka rau sega tu ni kila vinaka ni sa mai qaqa vei mate na iVakabula. Ena yaloluluvu, rau a sega ni kilai koya na Karisito bula sa taubale vata tiko kei rau. Dina ga ni o Jisu sa “sereka vei rau mai nai ivolatabu kecega na vosa ka tukuni kina ko koya,” rau se sega ga ni kilai Koya na iVakabula sa tucaketale me yacova ni ratou sa dabe ka dovi madrai kei Koya. A sa qai tadola na “matadrau”. Oi keda—se noda itokani, ilawalawa vata, kei ira na tiko tikivi keda—ni da kana magiti ka dovi madrai vata kei Koya, sa na tadola na matada ni kila ka. Ni rau vakasamataka na tisaipeli e Emeo na nodrau gauna vata kei na iVakabula sa tucaketale, rau a kaya ni sa katakata vinaka na lomadrau ni sa dolava o Koya vei rau na ivolanikalou (raica na Luke 24:27–32). Ena yaco dina oqo kivei keda kece.
iTinitini
Me itinitini, au sa vakadinadinataka ni kana magiti ena vosa i Karisito ena rawa ni yaco ena gauna cava ga kei na ituvaki cava ga, kevaka eda vakarautaka na yaloda meda ciqoma. Na kana magiti ena vosa i Karisito ena kauta mai na ivakatakila e tokona na bula, vakadeitaka o cei dina oi keda kei na keda yaga e mata ni Kalou ni da sa Luvena, ka liutaki ira noda itokani vei Karisito kei na bula tawacava. Meu sa tinia ena noqu vakarogotaka yani na veisureti nei Nifai ena nona kaya: “Ia, sa kilikili mo dou toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega. O koya, kevaka dou sa toso ki liu, ka kana magiti ena vosa i Karisito, ka vosota me yacova na ivakataotioti, raica, sa kaya vakaoqo na Tamada: Dou na rawata kina na bula tawamudu” (2 Nifai 31:20). Ena yacai Jisu Karisito, emeni.