“Kari, Magsunod sa Akon”
Si Jesucristo nagaagda sa aton nga maglakat sa dalan sang kasugtanan pabalik sa puluy-an sang aton mga Ginikanan nga Langitnon kag mangin kaupod ang mga pinalangga naton.
Mga pinalangga kong kauturan, kami sang asawa ko nga si Wendy nagakalipay nga makaupod kamo sining aga nga Inugpahuway. Madamo na sing nagkalatabo halin sang nagligad nga pangkabilugan nga komperensya. Ginpahanungod ang bag-o nga mga templo sa Concepción, Chile; Barranquilla, Colombia; kag Rome, Italy. Nakabatyag kita sang dako nga pagbubo sang Espiritu sa sining sagrado nga mga kahiwatan.
Ginapanginbulahan ko ang madamo nga kababayin-an (kag kalalakin-an) nga sang sining nagligad nagbasa sang Libro ni Mormon kag nagtukib sang kalipay kag tinago nga mga manggad. Nainspirar ako sang mga balita parte sa mga milagro nga nabaton.
Nagadayaw ako sang 11-anyos nga mga young men nga, sa karon bilang mga deacon, takos nga nagapanagtag sang sakramento tagsa ka Domingo. Nagakadto sila sa templo kaupod ang aton mga 11-anyos nga mga young women, nga maukod nga nagatuon kag nagaalagad bilang mga Beehive. Alangay mga young men kag young women ang nagawali sang mga kamatuoran sang ebanghelyo nga may kaathag kag dako nga pagtuo.
Nagakasadya ako upod sa mga kabataan kag mga lamharon nga nagabulig sa pagtudlo sang ebanghelyo sa ila mga puluy-an samtang nagatinguha upod ang ila mga ginikanan nga sundon ang nasentro-sa-puluy-an, suportado-sang-Simbahan nga kurikulum.
Nabaton namon ining litrato sang apat-ka-tuig nga si Blake, nga, sang temprano pa sang Sabado sang aga, nagkuha sang isa ka libro sang Simbahan kag nagsinggit, “Kinahanglan ko sapupuhon ang akon espiritu!”
Blake, nakunyag kami sa imo kag sa iban pa nga nagapili nga sapupuhon ang ila mga espiritu paagi sa pagpaayaw sa mga kamatuoran sang ginpanumbalik nga ebanghelyo ni Jesucristo. Kag nagakasadya kami sa paghibalo nga madamo ang nagabaton sang gahum sang Dios sa ila mga kabuhi samtang sila nagasimba kag nagaalagad sa templo.
Sa nahibal-an sang madamo sa inyo, ang amon pamilya nag-eksperiyensya sang masubo nga pagkahamulag tatlo ka bulan na ang nagligad sang ang amon anak nga si Wendy nagtaliwan sa sining dutan-on nga kabuhi. Sa ulihi nga inadlaw sang iya pagpakigbato sa kanser, ginbugayan ako sang oportunidad nga makahambalanay sa katapusan nga tion bilang mag-amay.
Ginkaptan ko ang iya nga kamot kag ginhambalan sia kon ano ko sia kapalanga kag kon ano ako kamapinasalamaton nga mangin iya amay. Siling ko: “Nagpakasal ka sa templo kag matutom nga nagtuman sang imo mga kasugtanan. Kamo sang imo bana nag-abiabi sang pito ka mga kabataan sa inyo puluy-an kag ginpadako sila nga mga debotado nga mga disipulo ni Jesucristo, mga mabakod nga mga miyembro sang Simbahan, kag mapuslanon nga mga pumuluyo. Kag nagpili man sila sang mga asawa [ukon bana] nga may amo man nga mga kinaiya. Ginapabugal ka gid katama sang imo amay. Ginhatagan mo ako sing tuman kadako nga kalipay!”
Malinong sia nga nagsabat, “Salamat gid, Tay.”
Isa yadto ka makatalandog, masubo nga tion para sa amon. Sa iya 67 ka tuig, upod kami nga nag-obra, upod nga nagkanta, kag sa masami upod nga naga-ski. Pero sa sinang gab-i, ginhambalan namon ang mga butang nga pinakaimportante, pareho sang mga kasugtanan, mga ordinansa, pagkamatinumanon, pagtuo, pamilya, katampad, pagpalangga, kag kabuhi nga wala katapusan.
Nahidlaw gid kami sa amon anak. Apang, bangod sa ginpanumbalik nga ebanghelyo ni Jesucristo, wala kami nabalaka sa iya. Samtang amon ginapadayon ang pagtuman sang amon mga kasugtanan sa Dios, nagakabuhi kami nga nalangkag nga makaupod namon sia liwat. Samtang wala pa, yari kami diri nagaalagad sa Ginuo kag sia nagaalagad sa Iya didto—sa paraiso.
Sa matuod-tuod, kami sang akon asawa nagbisita sa Paraiso sang damlag pa sining tuig—nga amo ang Paradise, California. Ang natabo, gintalana ang amon pagbisita didto wala pa mag-40 ka oras pagkatapos nga magtaliwan ang amon anak sa sini nga kinabuhi. Kami, kaupod sanday Elder Kevin W. Pearson kag ang iya asawa nga si June, ginpabakod sang mga Santos sang Chico California Stake. Nahibaluan namon ang ila dako nga pagtuo, ang ila pag-minister, kag ang mga milagro nga nagkalatabo bisan pa sa tunga sang makaluluya nga kapyirdihan sa pinakagrabe nga sunog sa kasaysayan sang California.
Samtang yara didto, malawig namon nga naistorya ang isa ka lamharon nga pulis nga si John, isa sa madamo nga maisog nga una nga nagresponde. Nag-istorya siya sang parte sa madamol nga kadulom nga nagpanaog sa Paradise sang Nobyembro 8, 2018, samtang ang kalayo kag mga baga naglinupad sa banwa, nga naglamon sang mga propyedad kag pagkabutang nga daw sumpa kag nagbilin sang - tinumpok nga abo kag upos nga mga simburyo.
Sa sulod sang 15 ka oras, nagmaneho si John pakadto-pakari sa madamol nga kadulom nga may nagakirab nga mga bangkaw sang baga samtang iya ginabuligan ang tagsa ka tawo, ang tagsa ka pamilya nga makalampuwas padulong sa kaluwasan—tanan wala sapayan sa peligro sa iya kaugalingon nga kabuhi. Apang sa amo kabudlay nga buluhaton, ang ginkahadlukan ni John amo ang iya nakabalaka nga pamangkot: “Sa diin ang akon pamilya?” Pagligad sang malawig, makahaladlok nga pagkalisud, sang ulihi nahibal-an niya nga hilway sila nga nakahalin.
Ang istorya ni John parte sa iya pagkabalaka sa iya pamilya ang nagtulod sa akon nga maghambal karon sa inyo nga ayhan nagapamangkot kon nagahilapit na ang katapusan sang inyo dutan-on nga kabuhi, “Sa diin ang akon pamilya?” Sa sinang magaabot nga adlaw kon matapos na ninyo ang inyo mortal nga pagtilaw kag magsulod na sa kalibutan sang mga espiritu, pagaatubangon ninyo inang makawasak-tagipusuon nga pamangkot: “Sa diin ang akon pamilya?”
Si Jesucristo nagatudlo sang dalan pabalik sa aton wala katapusan nga puluy-an. Mas naintiendihan Niya sing mas maayo ang plano sang wala katapusan nga pag-uswag sang aton Amay nga Langitnon sangsa bisan sin-o sa aton. Kon pamensaron gid, Sia amo ang haligi sini tanan. Sia amo ang aton Manunubos, ang aton Manugpaayo, kag ang aton Manluluwas.
Halin sang gintabog sila ni Adan kag Eba gikan sa Hardin sang Eden, gintanyag ni Jesucristo ang Iya gamhanan nga kamot agud buligan ang tanan nga magapili nga sundon Sia. Sing sulit-sulit, ang balaan nga mga kasulatan naglista nga wala sapayan sang tanan nga mga sala gikan sa bisan ano nga klase sang mga tawo, ang Iya mga kamot padayon nga nagatan-ay.
Ang espiritu sa sulod sang tagsa sa aton natural nga nagahandum sang pagpalangga sa pamilya nga magpadayon sa katubtuban. Ang mga kanta sang paghigugma nagapalapta sang butig nga paglaum nga gugma lang ang inyo kinahanglan kon luyag ninyo nga mangin magkaupod tubtob sa katubtuban. Kag may pila nga sayop nga nagapati nga ang Pagkabanhaw ni Jesucristo nagahatag sang pasalig nga makaupod sang tanan nga tawo ang ila mahal sa kabuhi pagkatapos sang kamatayon.
Sa matuod, ang Manluluwas Mismo tuman kaathag nga nagplastar nga samtang ang Iya Pagkabanhaw nagapasiguro nga ang tagsa ka tawo nga nagkabuhi matuod gid nga mabanhaw kag mabuhi sing tubtob sa katapusan, masobra pa ang ginakinahanglan kon luyag naton sang mas mataas nga pribelihiyo sang pagkahitaas. Ang kaluwasan butang nga pang-indibidwal, pero ang pagkahitaas butang nga pang-pamilya.
Pamatii ining mga pulong nga ginhambal sang Ginuong Jesucristo sa Iya propeta: “Ang tanan nga mga kasugtanan, mga kontrata, mga paghugpong, mga obligasyon, mga panumpa, mga saad, mga paghikot, mga kaangtanan, kag mga ginapaabot, nga wala ginhimo ukon ginsudlan kag ginselyuhan sang Balaan nga Espiritu sang pangako … wala sing epekto, gahum, ukon pwersa sa kag pagkatapos sang pagkabanhaw gikan sa minatay; bangod ang tanan nga mga kontrata nga wala ginhimo sa sini nga katuyuan may katapusan kon ang tawo patay na.”
Gani, ano ang ginakinahanglan agud ang pamilya mapahitaas tubtob sa katubtuban? Mangin takos kita sa sinang pribelihiyo paagi sa paghimo sang mga kasugtanan sa Dios, sa pagtuman sining mga kasugtanan, kag pagbaton sang kinahanglanon nga mga ordinansa.
Nangin subong na sini gikan sa ginsuguran sang panahon. Si Adan kag Eba, Noe kag ang iya asawa, Abraham kag Sara, Lehi kag Sarai, kag ang iban pa nga mga debotado nga mga disipulo ni Jesucristo—sugod sang gintuga ang kalibutan—naghimo sang amo man nga mga kasugtanan sa Dios. Nagbaton sila sang amo man nga mga ordinansa nga ginahimo naton bilang mga miyembro sang ginpanumbalik nga Simbahan sang Ginuo sa karon nga panahon: yadtong mga kasugtanan nga aton ginabaton sa tion sang bunyag kag sa sulod sang templo.
Ang Manluluwas nagaagda sa tanan nga magsunod sa Iya sa mga tubig sang pagbunyag kag, sa husto nga tion, maghimo sang dugang nga mga kasugtanan sa Dios sa templo kag magbaton kag mangin tampad sa dugang nga importante nga mga ordinansa. Ini tanan kinahanglanon kon luyag naton mapahitaas upod sa aton mga pamilya kag upod sa Dios sa katubtuban.
Ang kasakit sa akon tagipusuon amo nga madamo sa mga tawo nga palangga ko, nga ginadayaw ko, kag ginrespeto ko ang nagbalibad sang Iya pangagda. Ginabale-wala nila ang mga pag-ayo ni Jesucristo sang Sia magpangagda, “Kari, magsunod sa akon.”
Nahangpan ko kon ngaa nagahibi ang Dios. Nagahibi man ako para sa subong nga mga abyan kag kaparyentihan. Maayo sila nga mga lalaki kag babayi, debotado sa ila pamilya kag responsibilidad sa sosyedad. Maalwan sila nga nagahatag sang ila tion, kusog, kag manggad. Kag ang kalibutan mas maayo tungod sa ila pagpaninguha. Pero ginpili nila nga indi maghimo sang kasugtanan sa Dios. Wala nila mabaton ang mga ordinansa nga magapahitaas sa ila upod ang ila mga pamilya kag magahugpong sa ila sa katubtuban.
Kon pwede lang nga mabisitahan ko sila kag agdahon sila nga pamensaron sang madalom ang nagapabakod nga mga layi sang Ginuo. Ginapanumdom ko kon ano ang sarang ko ihambal agud ila mabatyagan kon daw ano kadako sang pagpalangga sang Manluluwas sa ila kag kon ano ko sila kapalangga kag mahunahuna kon paano ang mga babayi kag lalaki nga nagatipig sang kasugtanan mahimo nga magbaton sang “kabug-usan sang kalipay.”
Kinahanglan nila maintiendihan nga bisan matuod nga may lugar para sa ila sa pihak nga kinabuhi—upod ang maayo nga mga lalaki kag babayi nga wala man nagpili nga maghimo sang kasugtanan sa Dios— indi ina ang lugar kon sa diin ang mga pamilya mag-updanay liwat kag - mahatagan sang pribelihiyo nga mabuhi kag mag-uswang sa katubtuban. Indi ina ang ginharian kon sa diin ila maeksperiyensyahan ang kabug-usan nga kalipay—sang wala katapusan nga pag-uswag kag kalipayan. Ining kompleto nga mga bugay sarang lamang mabaton paagi sa pagkabuhi sa ginpahitaas nga selestiyal nga ginharian upod sa Dios, ang aton Wala’y Katapusan nga Amay; sa Iya Anak nga si Jesucristo; kag ang aton maayo, takos, kag kwalipikado nga mga miyembro sang pamilya.
Luyag ko isiling sa akon indi palahambal nga mga abyan:
“Sa sining kabuhi, wala kamo magpili nga mangin ika-duha lang nga pinakamaayo sa bisan ano nga butang. Apang, sa inyo pagpamatok sa pagbaton sing lubos sang ginpanumbalik nga ebanghelyo ni Jesucristo, ginapili ninyo nga magbaton sang ikaduha lang nga pinakamaayo.
“Ang Manluluwas nagsiling, ‘Sa balay sang akon Amay may madamo [nga mga mansyon].’ Ugaling, sa indi ninyo pagpili nga maghimo sang mga kasugtanan sa Dios, ginabaton ninyo ang pinaka-kubos nga atop sa inyo uluhan sa bug-os nga katubtuban.”
Luyag ko padayunon sa pag-ayo sa akon mga hipuson nga mga abyan sa pagsiling:
“Ibuhos ang inyo tagipusuon sa Dios. Pamangkuta Sia kon ining mga butang matuod. Hatagi sang tion agud tun-an ang Iya mga pulong. Magtuon sing insakto! Kon matuod nga palangga ninyo ang inyo pamilya kag kon luyag ninyo nga mapahitaas upod sa ila sa wala’y katapusan, bayari ang bili sa karon—paagi sa seryoso nga pagtuon kag pangamuyo—agud mahibaluan ining wala’y katapusan nga mga kamatuoran kag dayon ipangabuhi ang mga ini.
“Kon indi kamo sigurado kon nagapati kamo sa Dios, sugdi dira. Hangpa nga sa kawad-on sang mga eksperiyensya upod sa Dios, sarang ang isa ka tawo magduda sang pagkayara sang Dios. Gani, ibutang ang inyo kaugalingon sa lugar nga sarang kamo makaangkon sang mga eksperiyensya upod sa Iya. Ipaubos ang inyo kaugalingon. Magpangamuyo nga makaangkon sang mga mata nga makakita sang gahum sang Dios sa inyo kabuhi kag sa kalibutan sa inyo palibot. Pangabaya Sia nga ihambal sa inyo kon yara matuod Sia para sa inyo—kon kilala Niya kamo. Pamangkuta Sia kon ano ang iya balatyagon tuhoy sa inyo. Kag dayon magpamati.”
May isa ako ka pinalangga nga abyan nga may limitado nga mga eksperiyensya upod sa Dios. Apang luyag niya nga makaupod ang iya nagtaliwan nga asawa. Gani ginpangabay niya ako nga buligan sia. Ginpaisog ko sia nga makigkita sa aton mga misyonero agud nga mahangpan ang doktrina sang Simbahan kag tun-an ang mga kasugtanan sang ebanghelyo, mga ordinansa, kag mga bugay.
Kag ginhimo niya ini. Pero sa pamatyag niya ang dalan nga ila ginhambal sa iya nagapangayo sa iya nga maghimo sang madamo nga pagbag-o sa iya kabuhi. Siling niya, “Inang mga kasuguan kag mga kasugtanan tama ka budlay para sa akon. Dugang pa, indi ko mahimo magbayad sang ika-pulo, kag wala ako sang tion agud mag-alagad sa Simbahan.” Dayon ginpangabay niya ako, “Kon mapatay ako, palihog himoa ang kinahanglanon nga buluhaton sa templo para sa amon sang akon asawa agud magkaupod kami liwat.”
Maayo lang, indi ako ang husgado sining tawo. Pero ginakwestyon ko ang kaepektibo sang tal-os nga buluhaton sa templo para sa isa ka tawo nga may oportunidad agud mabunyagan sa sining kabuhi—agud maordinan sa priesthood kag magbaton sang mga bugay sang templo samtang yari diri sa duta—apang naghimo sang hungod sa buot nga desisyon nga sikwayon ining banas.
Pinalangga kong mga kauturan, si Jesucristo nagaagda sa aton nga usuyon ang dalan sang kasugtanan pauli sa aton Mga Ginikanan nga Langitnon kag mangin kaupod sang aton mga pinalangga. Ginaagda Niya kita nga ‘kari, magsunod sa akon.
Karon, bilang Pangulo sang Iya Simbahan, ginaayo ko sa inyo nga nagdistansya sang inyo kaugalingon sa Simbahan kag sa inyo nga wala pa gid matuod-tuod nga nagpanikasog nga hibaluon kon ang Simbahan sang Manluluwas napanumbalik na. Himoa ang espirituhanon nga buluhaton agud mahibal-an ninyo mismo, kag palihog himoa na subong. Wala na kita sang tiyempo.
Nagasaksi ako nga ang Dios buhi. Si Jesus ang Cristo. Ang Iya Simbahan kag ang kabug-usan sang Iya ebanghelyo ginpanumbalik agud bugayan ang aton mga kabuhi sang kalipay, sa karon kag sa magaabot. Ginasaksi ko ini sa ngalan ni Jesucristo, amen.