Mesej, Man Ia, mo Ol Man
Tru long ol noes we i no stop, mo spid blong taem blong yumi, bae yumi traehad blong luk Kraes i stap long medel blong laef, bilif, mo seves blong yumi.
Ol brata mo sista. Hemia i Sammy Ho Ching, we i gat seven manis, i stap wajem jeneral konfrens long hom blong hem las Epril.
Long taem blong sastenem Presiden Russel M. Nelson mo ol nara Jeneral Atoriti, han blong Sammy i bisi blong holem titi botel. So, hem i mekem nekis bes samting.
Sammy i givim niu mining long tingting ia blong vot wetem leg blong yu.
Welkam long medel yia konfrens blong Jos Ia blong Jisas Kraes blong Ol Lata-dei Sent. Blong mekem yumi rere blong toktok raon long mining ia blong kam tugeta tu taem long yia, bae yumi luk long wan ples blong histri blong Luk long Niu Testeman.
“Nao taem Jisas i kam kolosap long taon ya Jeriko, i gat wan blaenman i stap sidaon long saed blong rod, we oltaem hem i stap askem mane long ol man;
“ … [Hem] i harem we plante man i stap pas long rod, hem i askem se, “?Wanem samting ya?”
“ … oli talem … se, ‘Man Nasaret ya Jisas, hem i stap wokbaot long rod.’
“Hem i singaot, i se, ‘!Jisas! !Laen blong King Deved! !Plis yu sore long mi!’”
Oli kros long toktok blong hem, nao ol man oli traem talem se bae hem i stap kwaet, be “hem i gohed, i singaot bigwan moa.” From hem i gohed we i gohed, oli tekem hem i go long Jisas, mo, wetem hat i fulap long fet, i askem blong Jisas i mekem hem i save luk bakegen mo i hilim hem.
Smol ples ia i tajem hat blong mi evri taem mi ridim. Yumi save filim man ia i rili trabol. I olsem yumi save harem hem i singaot blong Sevya i luk hem. Yumi smael from hem i no wantem stop—i tru, strong tingting blong hem blong singaot i go antap taem evriwan i talem hem blong daonem voes blong hem. Stori ia, insaed mo aotsaed, i wan swit stori abaot wan strong fet. Be, semmak wetem evri skripja, moa yumi ridim, moa yumi faenem samting insaed.
Wan tingting we i stikim mi, i no longtaem i pas, i we man ia i filim save se i gat ol pipol wetem Spirit raon long Hem. Ful mining blong stori ia i hang long sam woman mo man we oli no save nem blong olgeta, we taem fren blong olgeta i askem, “?wanem samting ia,?” oli bin gat visen blong talemaot se Kraes nao i mekem ol man oli muvmuv; Kraes nao i “Man Ia.” I gat wan lesen blong yumi evriwan i lanem. Long saed blong fet mo strong save, !i help blong askem man we i gat fet mo strong save! “?Blaen man i save lidim narafala blaen man?” Jisas i bin askem wantaem. “Spos … olsem, bambae tufala evriwan i mas foldaon long hol.”
Blong lukaotem fet mo strong save, i stamba tingting blong yumi long ol konfrens ia, mo taem yu joenem mifala tedei, bae yu luksave se, wanem yu lukaotem, yumi tu i lukaotem. Lukluk raon long yu. Long ples ia, long ol graon ia, yu luk ol famli blong eni saes oli kamaot long evri ples, oli kam. Ol olfala fren oli mit bakegen, wan naes kwaea i stap womap, mo ol man blong agens oli kilkilim fevret emti bokis blong olgeta . Ol misinari blong bifo oli lukaotem ol foma kompanion blong ol, mo ol niu riten misinari oli lukaotem ol niu kompanion evriwan (!yufala i save wanem mi minim!). Mo ol foto? !Ah lala, tumas! Wetem ol mobaelfon long evri han, yumi nomo talem “evri memba i wan misinari” be “evri memba i wan fotografa.” Long medel blong naes taem we man i muvmuv, i stret blong wan i askem “?Wanem samting ia?”
Olsem long stori ia long Niu Testeman, olgeta we oli save luk, bae oli luksave se, nomata evri nara samting we konfrens taem ia i givim, bae i no gat mining nating sapos yumi no faenem Jisas i stap long medel blong evri samting ia. Blong kasem visen ia we yumi stap lukaotem, hiling ia we Hem i promesem, mining ia we yumi save se i stap ia, yumi mas katem rod i go tru long ples we i muvmuv—nomata i wan glad—mo putum ful tingting blong yumi long Hem. Prea blong evri spika, hop blong evriwan we i singsing, respek blong evri ges—evri samting ia i blong invaetem Spirit blong Hem we i Jos blong Hem—Kraes ia we i stap laef, Smol Sipsip blong God, Prins blong Pis.
Be yumi no nid blong stap insaed long konfrens senta blong faenem Hem. Taem wan pikinini i ridim Buk blong Momon blong fas taem mo i kam blong laekem strong paoa long tingting blong Abinadae, o maj blong ol 2,000 strong soldia, yumi save ademap tu se, Jisas i stamba long gudfala stori ia, i stanap olsem wan tolfala strong man ova long evri pej blong stori, mo i joenem evri nara bigfala pipol insaed long stori ia.
Semmak; taem wan fren i stap lanem abaot bilif blong yumi, hem i save filim se hem i lus wetem ol toktok we i blong yumi o blong praktis blong relijin blong yumi—sam kaekae nomo, saplae blong dipen long yuwan, ol rod blong ol paeonia, mo dijitol famli tri, mo plante fulap stek senta, we sam, oli tekem se i wan gudfala ples blong kakae wan bigfala stek we oli rusum gud. So, taem ol niu fren blong yumi oli gotru long plante niu samting blong luk mo harem, yumi mas poenem rod i pasem ol plante bisi samting ia, mo mekem olgeta oli luk nomo long mining blong evri samting ia, long hat ia we i pam, blong gospel we i no save finis—lav blong Papa mo Mama long Heven, presen blong wan tabu Pikinini we i pem praes, gudfala Tabu Spirit we i soem rod, mo evri trutok ia we oli kambak long ol las dei mo plante moa.
Taem wan i go long tabu tempol blong fas taem, bae eksperiens ia i tajem hem bigwan. Wok blong yumi i blong meksua se ol tabu simbol ia, o ol tabu seremoni ia, ol tabu klos mo ol presentesen ia we oli luk, i no blong karemaot tingting blong yumi long, be i blong poenem tingting blong olgeta long Sevya, we yumi stap ia blong wosipim. Tempol i haos blong Hem, mo Hem i mas kam nambawan long maen mo hat blong yumi—bae hae doktrin blong Kraes i fulumap ful bodi semmak olsem i fulumap ol tempol odinens—stat long taem yumi ridim toktok antap long doa long fored i go kasem las minit yumi spendem insaed long bilding ia. Long medel blong evri sapraes we yumi faenem, yumi mas luk, antap long evri samting, mining blong Jisas insaed long tempol.
Tingting long bigfala muvmuv blong ol niu wok mo niu anaonsmen insaed long Jos long ol las manis we oli pas ia. Taem yumi stap givgivhan long wanwan long yumi, o mekem yumi kam gud moa long Sabat wok, o akseptem wan niu program blong ol pikinini mo ol yut, bae yumi mestem stret risen blong ol jenis ia sapos yumi luk se oli ol seperet samting, be i no ol joen samting blong helpem yumi blong bildimap yumi blong stanap strong antap long Strong Ston ia we i sevem yumi. I tru, i tru, hemia wanem Presiden Russel M. Nelson i minim taem hem i askem yumi blong yusum nem blong Jos we God i givim. Sapos Jisas—Nem blong Hem, doktrin blong Hem, eksampol blong Hem, tabu fasin blong Hem—i save stap long senta blong wosip blong yumi, bae yumi kam sapotem trutok we Alma i bin tijim: “I gat plante samting we bae oli kam; [be] luk, i gat wan samting we i moa impoten long evriwan— … Ridima i stap laef mo i stap kam long medel blong ol pipol blong hem.”
Wan las tingting: Taem ia we Josef Smit i bin stap long hem long namba 19 senturi i laef wetem ol grup blong Ol Kristin witnes we oli kompit. Be wetem bigfala noes ia we oli bin mekem, ol man ia, long sam wei, oli bin stap blokem Sevya ia nao we yangfala Josef i bin stap lukaotem. Hem i bin stap faet, wetem wanem hem i singaotem: “tudak mo konfius.” Hem i aot i go stap hemwan long bus blong ol tri, mo long ples ia, i luk mo harem wan moa bigfala witnes we i bitim eni samting we yumi tokbaot long moning ia, se Sevya i stap long hat blong gospel. Wetem presen ia blong save luk, we hem i neva ting long hem, Josef i bin luk, long visen, Papa blong Hem long Heven, Hae God ia blong yunives, mo Jisas Kraes, Wan Stret Pikinini ia Nomo blong Hem. Afta, Papa i soem eksampol we yumi stap kam from tedei: Hem i poenem Jisas, i talem se: “Hem, Hem i Pikinini blong Mi we Mi Lavem Tumas. !Lisin gud long Hem!” I no gat toktok i talem tabu aedentiti blong Jisas, nambawan ples blong Hem long plan blong fasin blong sevem man, mo ples we Hem i stanap long hem long ae blong God i bitim ol fotin toktok ia.
?Muvmuv mo konfius? ?Hip blong ol man mo raorao? I gat fulap kaen olsem insaed long wol blong yumi. I tru, olgeta we oli no gat hop mo olgeta fetful oli stil stap raorao ova long visen ia, mo ova long evri nara samting we mi tokbaot tedei. Sapos yu stap traehad blong luk klia moa mo faenem mining long medel blong ol plante kaen tingting, mi poenem yu i go long semfala Jisas ia mo talemaot witnes blong mi olsem wan aposol, se eksperiens blong Josef Smit, i bin hapen olsem kolosap 1,800 yia i pas afta we blaen fren blong yumi i save luk bakegen long Jeriko rod ia blong bifo. Mi testifae we tufala ia, mo plante moa kam kasem tedei, se i tru, wanem oli bin luk mo harem long laef, i no Jisas we i stap wokbaot long rod i go, be, hem i we Jisas i stap kam long yumi, i stop long saed blong yumi, mo i stap mekem hom blong Hem i stap wetem yumi.
Ol sista mo brata. Tru long ol noes we i no stop, mo spid blong taem blong yumi, bae yumi traehad blong luk Kraes i stap long medel blong laef blong yumi, bilif blong yumi, mo seves blong yumi. Ples ia nao, tru mining i stap long hem. Mo sapos i gat sam dei, we lukluk blong yumi i sot, o tras i go daon, mo bilif i stap long tes blong i kam smut moa—from bae i kam smut moa—bae yumi singaot bigwan moa: “!Jisas! !Laen blong King Deved! !Plis yu sore long mi!” Mi promes, wetem paoa blong aposol mo strong save blong wan profet, se bae Hem i harem yu mo talem, naoia o afta: “!Ale, yu openem ae blong yu, yu lukluk! Bilif blong yu i mekem yu yu gud finis.” Welkam long jeneral konfrens. Long nem blong Jisas Kraes, amen.