Kam Folem Mi—Plan blong Lod blong Ol Teknik blong Agensem Enemi, mo Ol Gudfala Plan

Oktoba 2019 Jeneral Konfrens

Kam Folem Mi—Plan blong Lod blong Protektem mo Go Agensem Plan blong Setan

I Kam long Mark L. Pace

Sandei Skul Jeneral Presiden

Lod i stap mekem rere ol pipol blong Hem agensem ol atak blong enemi. Kam Folem Mi hem i Plan blong Lod blong Ol Teknik Agensem Setan, mo Ol Gudfala Plan

Yumi stap glad blong kam tugeta long bigfala jeneral konfrens blong Jos Ia blong Jisas Kraes blong Ol Lata-dei Sent. Hem i wan blesing blong kasem maen mo wil blong Lod tru long ol tijing blong ol profet mo aposol blong Hem. Presiden Russel M. Nelson i profet blong Lod we i stap laef. Yumi mas talem tangkyu from kaonsel we i kam tru long insperesen mo daereksen we yumi kasem tedei.

Mi ademap witnes blong mi long hemia blong olgeta we oli bin toktok fastaem. Mi serem testemoni long saed blong God, Papa blong yumi long Heven we i no save finis. Hem i stap laef mo I lavem yumi mo i stap lukaot gud long yumi. Plan blong hapines blong Hem i givim blesing ia blong laef long wol, mo long en, blong yumi gobak stap wetem Hem.

Mi serem testemoni tu long saed blong Jisas Kraes. Hem i wan Pikinini ia nomo blong God. Hem i bin sevem yumi long ded, mo Hem i mekem yumi fri long sin taem yumi praktisim fet long Hem mo sakem sin. Sakrifaes blong Atonmen blong Hem we i no save finis long bihaf blong yumi, i givim blesing ia blong no save ded mo laef we i no save finis. “Yumi talem tangkyu long God from bigfala presen we i no gat narawan i naf long hem, we i tabu Pikinini blong Hem.” (“Kraes we i Laef: Testemoni blong Olgeta Aposol,” 36299 852 ).

Ol Lata-dei Sent raon long wol oli gat blesing blong wosipim Jisas Kraes long ol tempol blong Hem. Wan long ol tempol ia oli stap bildim yet long Winnipeg, Kanada. Waef blong mi, Anne Marie, mo mi, i gat janis blong visitim ples we oli stap bildim tempol long hem long manis blong Ogis long yia ia. Oli disaenem tempol ia i naes tumas mo i tru se bae i naes tumas taem bae i finis. Be nomata hemia, bae yumi no save gat wan tempol we i naes tumas long Winnipeg, o long eni nara ples, sapos i no gat wan fandesen we i strong.

From oli bin stap mekem graon i aes mo afta meltem bakegen blong mekem graon i fulap long Winnipeg, i bin had blong rere long fandesen blong tempol. Mekem se, oli bin tingting strong se fandesen blong tempol bae oli mekem long 70 sapot aean we bae oli kavremap wetem simen. Ol sapot aean ia i 18 meta longwan mo 30 go kasem 50 sentimeta i go kros. Oli sperem i go long graon kasem taem oli kasem bed blong ston, we i kolosap 15 meta andanit graon. Long wei ia, ol 70 sapot aean ia i givim wan strong fandesen blong naesfala Winnipeg tempol.

Olsem ol Lata-dei Sent, yumi stap lukaot wan fandesen we i semmak olsem long ol laef blong yumi—wan fandesen long saed blong spirit we yumi nidim long rod blong yumi tru long laef ia mo i gobak long hom blong yumi long heven. Fandesen ia oli stanemap long bed blong ston blong jenis blong hat blong yumi i go long Lod Jisas Kraes.

Yumi tingbaot ol tijing blong Hileman long Buk blong Momon: “Mo nao, ol boe blong mi, tingbaot, tingbaot se hem i long ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendem aot ol strongfala win blong hem, yes, ol spia blong hem long wael win, … bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en, from ston; long hem we yutufala i bin bildimap yutufala, we i wan sua fandesen, wan fandesen, long hem we sapos ol man i bildimap olgeta long hem oli no save foldaon” (Hileman 5:12).

Tangkyu tumas we yumi stap laef long wan taem we ol profet mo ol aposol i tijim yumi long saed blong Sevya Jisas Kraes. Blong stap folem ol kaonsel blong olgeta i helpem yumi blong stanemap wan strong fandesen long Kraes.

Wan yia i pas, long fas toktok blong hem blong openem Oktoba 2018 jeneral konfrens, Presiden Russell M. Nelson i talem strong toktok mo woning ia: “Longtaem stamba tingting blong Jos, i blong helpem evri memba blong gat moa fet long Lod Jisas Kraes, mo long Atonmen blong Hem, blong helpem olgeta blong mekem mo kipim ol kavenan we oli mekem wetem God, mo blong mekem ol famli oli kam strong moa, mo silim olgeta. Long wol blong yumi tedei, we i defdefren evriwan, hemia i no isi. Enemi i stap gat moa faet agensem fet, mo agensem yumi, mo agensem ol famli blong yumi long wan spid we i go antap moa. Blong laef long saed blong spirit, yumi nidim ol teknik blong agensem enemi, mo ol gudfala plan” (“Fas Toktok,” Liahona, Nov 2018, 7–8; oli ademap italik).

Folem mesej blong Presiden Nelson, Elda Quentin L. Cook blong Kworom blong Olgeta Twelef Aposol i presentem Kam Folem Mi risos blong wanwan man, woman mo famli. Ol toktok blong hem i go olsem ia:

“Niufala hom stadi risos Kam Folem Mi … oli mekem blong i helpem ol memba blong lanem gospel insaed long hom.”
“Buk ia i blong wanwan man, woman mo famli insaed long Jos.” [Kam Folem Mi—Blong Wanwan Man, Woman mo Famli 2019), vi].”
“Stamba tingting blong mifala i blong balensem eksperiens long Jos mo long hom long wan wei we bae i mekem fet i kam antap, spirit i kam antap, mo i gat moa bigfala jenis long laef i go long Papa long Heven mo Lod Jisas Kraes.” Luk long Quentin L. Cook, “Wan Jenis long Laef we I Tru mo I Stap I Go long Papa long Heven mo Lod Jisas Kraes,” Liahona, Nov 2018, 9–12.

Stat long Jenuware long yia ia, Ol Lata-dei Sent raon long wol oli stat blong stadi long Niu Testeman, wetem risos blong Kam Folem Mi olsem gaed blong yumi. Wetem wan plan blong evri wik, Kam Folem Mi i helpem yumi blong stadi long ol skripja, doktrin blong gospel, mo ol tijing blong ol profet mo aposol. Hem i wan risos we i gud tumas blong yumi evriwan.

Afta long naen manis blong stadi hadwok ia raon long wol, ?wanem nao yumi luk? Yumi luk Ol Lata-dei Sent long evri ples oli stap gro long fet mo devosen i go long Lod Jisas Kraes. Yumi luk wanwan man, woman mo famli i putum taem truaot long wik blong stadi ol toktok blong Sevya blong yumi. Yumi luk ol instraksen blong gospel i kam moa gud long ol klas long Sandei taem yumi stadi ol skripja long hom mo serem ol tingting blong yumi long Jos. Yumi luk glad we i moa bigwan long famli mo fasin blong stap wan taem muv blong stap ridim ol skripja i go long stap stadi long ol skripja long wan wei we i moa dip.

Hem i wan janis blong mi blong visit wetem fulap Lata-dei Sent mo blong harem stret, ol eksperiens blong olgeta wetem Kam Folem Mi. Ol filing mo tingting blong fet blong olgeta i fulumap hat blong mi wetem glad. Hemia sam long ol komen we mi bin harem long ol defdefren memba blong Jos:

Wan papa i serem, “Mi laekem tumas Kam Folem Mi from i givim wan janis blong testifae long Sevya i go long pikinini blong mi.”
Long wan nara hom, wan pikinini i talem, “Hemia i wan janis blong harem papa mo mama blong mi i serem ol testemoni blong olgeta.”
Wan mama i serem: “Mifala i kasem insperesen blong save hao blong putum God faswan. Long taem we mifala [i ting se mifala] ‘i nogat’ mifala i bin [fulap] wetem hop, glad, pis, mo sakses long ol wei we mifala i save no se i posibol.”
Wan kapol i luksave: “Mifala i stap ridim skripja long wan defren wei we mifala i no bin rid long hem bifo. Mifala i stap lanem fulap moa bitim we mifala i stap lanem bifo. Lod i wantem blong yumi stap luk ol samting long wan defren wei. Lod i stap rere long yumi.”
Wan mama i talem: “Mi lavem we mifala i stap lanem ol semmak samting tugeta. Fastaem, mifala i stap ridim. Tedei, mifala i stap lanem.”
Wan sista i serem lukluk ia: “Bifo, yu gat lesen mo ol skripja i sapotem. Naoia, yu gat ol skripja mo lesen i sapotem.”
Wan nara sista i komen: “Mi filim save wanem i defren taem mi mekem [komperem wetem] taem mi no mekem. Mi faenem i moa isi blong toktok long ol nara man abaot Jisas Kraes mo ol bilif blong yumi.”
Wan bubuwoman i talem, “Mi singaotem ol pikinini mo apupikinini blong mi long ol Sandei mo mifala i serem ol tingting mo lukluk long Kam Folem Mi tugeta.”
Wan sista i luk se: “Kam Folem Mi i fil olsem Sevya Hemwan i stap givhan long mi. Hem i wan insperesen we i kam long heven.”
Wan papa i komen, “Taem yumi yusum Kam Folem Mi, yumi olsem ol pikinini blong Isrel, we oli stap makem ol doa blong yumi, blong protektem ol famli blong yumi long paoa blong man blong prapa spolem ol samting.”

Ol brata mo sista, hem i wan glad blong visitim yu mo harem olsem wanem ol traehad blong yufala wetem Kam Folem Mi i stap blesem ol laef blong yufala. Tangkyu long strong tingting mo wok blong yufala.

Blong stap stadi long ol skripja wetem Kam Folem Mi olsem wan gaed i givim moa paoa long fasin blong jenisim laef blong yumi i kam long Jisas Kraes mo gospel blong Hem. Yumi no katemaot wan aoa long jos long Sandei blong gat wan aoa moa blong skripja stadi long haos nomo. Blong stap lanem gospel i wan hadwok we yumi mekem oltaem truaot long wik. Wan sista i serem wetem mi se: “Gol hem i no blong mekem jos i wan aoa moa sot; !hem i blong mekem jos i sikis dei moa longwan!”

Nao, tingting bakegen long woning blong profet blong yumi, Presiden Nelson, we i bin givim taem hem i openem Oktoba 2018 jeneral konfrens:

“Enemi i stap gat moa faet agensem fet, mo agensem yumi, mo agensem ol famli blong yumi long wan spid we i go antap moa. Blong save laef long saed blong spirit, yumi nidim teknik blong agensem hemia, mo ol gudfala plan” (Ol Fas Toktok,” 7).

Mo afta (kolosap 29 aoa afta) long Sandei aftenun, hem i klosem konfrens wetem promes ia: “Taem yu stap wok strong blong jenisim hom blong yu i kam wan senta blong lanem gospel, … paoa blong enemi insaed long laef blong yufala mo hom blong yufala, bae i kamdaon.” (“Blong Kam Ol Lata-dei Sent we I Givim Eksampol,” Liahona, Nov 2018, 113).

?Olsem wanem nao ol atak blong enemi i stap kam antap hariap mo long semmak taem paoa blong enemi i stap kamdaon tu? I save hapen, mo i stap hapen truaot long Jos, from se Lod i stap rere long pipol blong Hem agensem ol atak blong enemi. Kam Folem Mi hem i plan blong Lod blong ol teknik agensem enemi, mo ol gudfala plan. Olsem Presiden Nelson i bin tijim, “Niufala kurikulom insaed long hom we i senta, mo Jos i sapotem, i gat paoa blong openem doa blong paoa blong ol famli.” Be nomata hemia, hem bae i nidim ol bes efot blong yumi; yumi nid blong “[folem] wetem ful tingting mo kea blong jenisim hom blong olgeta i kam wan tabu ples blong fet” (“Blong Kam Ol Lata-dei Sent we I Givim Eksampol,” 113).

Long en blong evri samting, olsem we Presiden Nelson i talem tu, “Wanwan long yumi i responsibol blong wanwan i gro long saed blong spirit,” (“Ol Fas Toktok,” 8).

Wetem risos blong Kam Folem Mi, Lod i stap rere long yumi “long ol hadtaem we yumi stap fesem naoia” (Quentin L. Cook, “Wan Jenis long Laef we I Tru mo I Stap,” 10). Hem i stap helpem yumi blong stanemap “wan sua fandesen, wan fandesen, long hem we sapos ol man i bildimap olgeta long hem oli no save foldaon” (Hileman 5:12)—fandesen blong wan testemoni we oli angkarem strong long bed blong ston blong laef ia we yumi jenisim i go long Lod Jisas Kraes.

Letem ol evri dei hadwok blong yumi blong stap stadi long ol skripja i mekem yumi strong mo pruvum se yumi naf blong kasem ol blesing we oli bin promesem long yumi. Mi prea olsem long nem blong Jisas Kraes, amen.