Stap Lukaotgud blong Prea Oltaem (Alma 34:39; Moronae 6:4; Luk 21:36)
Blong lukaotgud oltaem i wan mas, blong faet agensem fasin blong tingting nating long laef mo mekem samting wanwan taem.
Mi prea se bae givhan blong Tabu Spirit i stap wetem yufala mo mi taem yumi stap glad mo wosip tugeta.
Long Epril 1976, Elda Boyd K. Packer i bin i bin toktok i go stret long ol yut blong Jos ia long jeneral konfrens. Long mesej blong hem we yumi save gud “Ol Krokodael blong Kakae Spirit,” hem i tokbaot, olsem wanem, long wan wok we hem i go mekem long Afrika, ol krokodael we oli haed gud oli stap lukaot blong kakae animol we i no lukaotgud. Afta, hem i talem se ol krokodael oli olsem Setan, we i lukaot blong kakae ol yut we oli no lukaotgud, taem hem i haedem se sin i mekem man i ded.
Mi gat 23 yia taem Elda Packer i givim toktok ia, mo Susan mo mi i stap wet long fasbon pikinini blong mitufala sam dei afta. Mitufala i sapraes long wanem mesej blong hem i stap talem abaot fasin blong stap longwe long sin, mo hao hem i yusum gud fasin blong ol animol blong tijim wan impoten lesen long saed blong spirit.
Susan mo mi i bin travel long Afrika blong mekem plante wok blong jos. Mo mitufala i gat janis blong luk ol naesfala animol we oli stap long kantri ia. Mitufala i tingbaot hao toktok blong Elda Packer i tajem laef blong mitufala, nao mitufala i traem luklukgud mo lanem sam impoten lesen aot long fasin blong wael laef blong Afrika.
Mi wantem tokbaot ol fasin mo ol trik blong tufala jita we Susan mo mi bin stap luk, we tufala i go lukaotem kaekae blong tufala mo joenem wetem sam samting we mitufala i luk, i go long evri dei laef blong stap laef folem gospel blong Jisas Kraes.
Ol Jita mo Ol Topi
Ol jita oli ol animol long graon we oli ron spid bitim ol nara animol mo spid blong olgeta i save kasem 120 kilometa long aoa. Olgeta naes animol ia oli save stanap kwaet mo ron wantaem nomo kasem 109 kilometa long wan aoa, long tri seken taem nomo. Ol jita oli animol we i folemgud kaekae blong olgeta mo ron spid long sot ples blong ronem mo kakae animol.
Susan mo mi i spendem tu aoa olsem blong luklukgud tufala jita we tufala i stap luklukgud wan grup blong ol topi, wan kaen animol we i fulap long Afrika. Tolfala drae gras blong ol flat ples blong Afrika i gol braon mo i haedem gud ol jita ia taem oli stap folfolem grup blong ol topi ia. Tufala jita i seperet long tufala, ating kolosap 91 mita olsem, be tufala i wok wan.
Taem wan jita i sidaon stret long gras, mo i no muv, narawan i slip flat long graon mo i stap krip sloslo i go kolosap long ol topi ia we i no save samting. Nao, jita ia we i bin sidaon, i lus insaed long gras long semtaem ia we nara jita i sidaon stret. Paten ia, blong jenjenisim tufala, blong wan i slip flat mo krip i go fored mo narawan i sidaon stret long gras, i gohed blong wan longfala taem. Tingting biaen long waes trik ia, i blong pulumaot tingting mo giaman long ol topi, mo long wei ia, karemaot tingting blong olgeta long denja we i stap kam kolosap. Tufala i wet longtaem be tufala i gogohed, tufala i wok wan blong winim nekis kaekae blong tufala.
Bitwin bigfala grup blong ol topi mo ol jita, i gat samfala olfala mo strong topi we oli stanap, olsem ol gadman, long ol smol hil blong graon. Nao oli save lukluk gud antap long ol smol hil ia, mo ol gadman topi ia oli waj gud blong ol saen blong denja.
Nao, wantaem nomo, taem ol jita oli kam kolosap we oli rere blong atak, ful grup blong ol topi oli tanem raon mo oli ronwe. Mi no save sapos, o hao ol gadman topi oli talem long bigfala grup, be woning i bin go, mo evri topi oli muv i go long sef ples.
?Wanem nao ol jita oli mekem afta? Oli no wet. Tufala jita i gohed long trik blong tufala, blong wan i slip flat mo muv, mo narawan i sidaon stret long gras. Kaen trik ia i gohed i gohed. Tufala i no stop. Tufala i no spel, o stop smol. Tufala i gohed long trik blong tufala blong pulumaot tingting mo mekem ol topi oli luk nara ples. Susan mo mi i lukluk ol jita oli go lus, oltaem oli muv i go kolosap moa long grup blong ol topi ia.
Long naet ia, Susan mo mi i gat wan naesfala storian abaot wanem mitufala i bin luk mo lanem. Mitufala i toktok raon tu long eksperiens ia wetem ol pikinini mo ol apu blong mitufala, mo faenem plante gudfala lesen. Naoia, bae mi tokbaot tri long ol lesen ia.
Lesen namba 1—Lukaot long Trik blong Devel blong Stap Haed
Long mi, ol jita ia oli naes, oli fit, mo oli save pulum ae blong man. Skin blong jita we i yelo, grei waet ia wetem ol blak spot, i stap olsem wan gud samting blong haedem olgeta, mekem se oli no save luk olgeta taem oli stap folfolem kaekae blong olgeta long ol graon blong gras long Afrika.
Long semmak wei, ol aedia mo aksen denja long saed blong spirit, oli save luk olsem se oli naes, man i wantem tumas, o mekem man i glad. Olsem ia nao, long wol blong yumi tedei, wanwan long yumi i nid blong lukaotgud long swit trik ia we i priten se hem i gud. Olsem Aesea i givim woning from: “!Sore tumas long olgeta we oli singaotem ol nogud samting se oli gudfala, mo ol gudfala samting oli nogud, we oli tekem se tudak i laet, mo laet i tudak, we oli tekem konkon i swit, mo swit i konkon!”
Long wan taem we ol tingting oli fasfas, we blong spolem laef blong man, oli singaotem se hem i wan raet, mo oli tekem se trabol i fridom, nao yumi gat blesing ia blong stap laef long las dei dispensesen ia, taem we laet blong gospel we i kambak i save saen moa insaed long laef blong yumi mo i helpem yumi luksave ol tudak giaman mo trik blong enemi.
“From olgeta we oli waes mo oli bin akseptem trutok, mo oli bin tekem Tabu Spirit olsem gaed blong olgeta, mo oli no bin folem ol giaman toktok—i tru, mi talem long yufala, bambae mi no katemdaon olgeta mo no sakem olgeta i go long faea, be bae oli stap laef long dei ia.”
Lesen namba 2—Stastap Wekap mo Stap Lisingud
Long wan topi, wan smol taem we hem i no lukaotgud, o i no lisingud, i save invaetem wan strong atak blong wan jita. Semmak, sapos yumi stap gladglad long wanem i stap mo no stap strong long spirit i mekem se yumi save foldaon isi long ol swit trik blong enemi. Blong no gat tingting, long saed blong spirit, i invaetem ol bigfala denja insaed long laef blong yumi.
iStock.com/Angelika
Nifae i tokbaot gud hao, long ol las dei, Setan bae i kam traem blong mekem tingting blong ol pikinini blong God i kwaet mo giaman se oli sef long bodi “mekem se bae oli talem se: ‘Evri samting i oraet long Saeon; yes, Saeon i stap kam antap gud, evri samting i oraet”—mo olsem ia nao devel i giaman long sol blong olgeta, mo i lidim olgeta i gowe sloslo daon long hel.”
Blong lukaotgud oltaem i wan mas blong faet agensem fasin blong tingting nating long laef mo fasin blong mekem samting wanwan taem. Blong stap lukaotgud, i taem we, o i aksen ia blong stap lukaotgud oltaem long yumi blong no foldaon long denja o had samting. Mo blong stap lukaotgud oltaem long yumi i minim aksen ia blong stastap wekap blong lukaotgud long mo protektem yumi. Long saed blong spirit, yumi nid blong stastap wekap mo lisingud long ol kwaet toktok blong Tabu Spirit, mo luksave ol saen we oli kam long ol gadman blong Lod antap long ol taoa.
“Yes, mo tu, mi askem strong long yufala, … blong yufala i stap lukaotgud blong prea oltaem, blong devel i no lidim yufala i gowe wetem ol temtesen blong hem, … from luk, hem i no givim wan gudfala pei long yufala.”
Blong mekem laef blong yumi i stap mo i stanap long Sevya mo gospel blong Hem, i mekem yumi gat paoa blong winim fasin ia blong man we i folem fasin blong wol blong stap pulum win mo stap les long saed blong spirit. Taem yumi gat ol blesing ia blong gat ol ae blong luk mo ol sora blong harem, bae Tabu Spirit i save yumi gat moa paoa blong luk mo lisin taem bae yumi ting se yumi no nid blong luk o lisin, o taem we yumi ting se i no gat samting blong luk o lisin long hem.
Lesen namba 3—Andastanem Tingting blong Enemi
Wan jita i wan we i fasin blong hem blong lukaot mo kilim ol nara animol. Long ful dei, evri dei, wan jita i stap lukaot blong kilim animol.
Setan “i enemi blong stret mo gud fasin mo i enemi blong olgeta we oli stap lukaot blong mekem tingting blong God” Ful dei, evri dei, tingting mo stamba tingting blong hem, i blong mekem nomo ol boe mo gel blong God oli harem nogud olsem hem.
Plan blong hapines blong Papa, i stap blong i givim daereksen long ol pikinini blong Hem, blong helpem olgeta blong gat glad, mo blong tekem olgeta oli kam hom sef long Hem, wetem ol bodi we oli laef bakegen long ded mo oli olsem hemia blong wan god. Devel i wok blong mekem ol boe mo ol gel blong God oli konfius, mo oli no hapi, mo blong stopem progres blong taem we i no save finis. Enemi i neva stop blong wok blong atakem ol samting insaed long plan blong Papa we hem i no laekem nating olgeta.
Setan i no gat wan bodi, mo progres blong hem blong taem we i no save finis, i stop. Semmak olsem we, wota we i ron long bed blong hem, i stop from wan dam i blokem, semmak, progres we i no save finis blong enemi i stop from se hem i no gat wan bodi blong mit mo bun. From hem i bin agens, Lusifa i blokem hemwan long evriwan long ol blesing mo eksperiens blong laef long wol ia, we i posibol nomo tru long wan tabenakol blong mit mo bun. Wan long ol skripja mining blong toktok ia, no save kam antap samtaem, i kamaot klia long wei we hem i no gat paoa blong progres, mo blong i kam olsem Papa long Heven.
From se, blong wan gat bodi blong mit mo bun i stamba blong plan blong hapines blong Papa, mo blong yumi develop long saed blong spirit, nao Lusifa i lukaot blong stopem progres blong yumi mo temtem yumi blong yusum ol bodi blong yumi long fasin nogud. Presiden Russel M. Nelson i bin tijim se, blong stap sef long saed blong spirit, long en, i “‘blong neva tekem fas giaman step we i go long ples we yu no sapos blong go long hem, mo blong mekem wanem yu no sapos blong mekem.’ … Olsem ol man, yumi evriwan i gat samting we bodi i wantem we i nid blong yumi save gohed blong laef. ‘Ol samting we bodi i wantem, i nid blong mekem se laef blong man i gogohed. ?So, enemi i mekem wanem? … Hem i atakem yumi tru long ol samting we bodi i wantem. !Hem i temtem yumi blong kakae ol samting we yumi no sapos blong kakae, blong yumi dring ol samting we yumi no sapos, mo blong lavem narawan long wei we yumi no sapos blong mekem!’”
Wan long nogud fani samting blong taem we i no save finis, i we, enemi, we i stap harem nogud from se hem i no gat bodi blong mit mo bun, i stap invaetem mo switim yumi blong serem harem nogud blong hem tru long fasin nogud blong yusum bodi blong yumi. Stret tul we hem i no gat, mo no save yusum, nao i kam stamba samting we hem i wantem giaman long yumi long hem blong prapa spolem bodi mo spirit blong yumi.
Blong stap andastanem tingting blong wan enemi, i wan mas blong rere gud blong ol kaen atak olsem. Hem i from se Kapten Moronae i bin save tingting blong Ol Man blong Leman, we hem i bin rere blong mitim olgeta long taem we oli bin kam, mo i bin winim olgeta. Mo semfala prinsipol mo promes ia i blong wanwan long yumi.
“Sapos yufala i rere, bae yufala i no fraet.
Invitesen, Promes mo Testemoni
Semmak olsem yumi save lanem ol impoten lesen taem yumi luklukgud long fasin blong ol jita mo ol topi, wanwan long yumi i mas lukaotem ol lesen mo ol woning long ol simpol taem blong evri dei laef. Taem yumi stap lukaotem blong gat wan maen mo wan hat we i open blong kasem daereksen we i kam long heven tru long paoa blong Tabu Spirit, nao sam long ol bigfala instraksen we yumi save kasem mo plante long ol strong woning we oli mekem yumi stap sef oli kamaot long ol evri dei eksperiens blong yumi. Ol parabol we oli gat paoa oli stap long ol skripja mo long evri dei laef blong yumi.
Mi bin tokbaot bigwan tri nomo long ol plante lesen we Susan mo mi i faenem tru long eksperiens long Afrika. Mi invaetem mo leftemap tingting blong yu blong tingtingbak long ol jita mo ol topi ia, mo faenem sam moa lesen blong yuwan mo famli blong yu. Plis, tingbaot oltaem se hom blong yu i tru senta blong stap lanem mo stap laef folem gospel.
Taem yu mekem folem invitesen ia wetem fet, bae ol insperesen tingting bae oli kam long maen blong yu, ol filing blong spirit i solap long hat blong yu, mo bae yu luksave ol aksen we yu mas tekem, o gohed long hem blong yu save “putum long yu ful klos blong faet blong [God], blong yu save stanap agensem rabis dei ia, from we yu mekem evri samting finis, blong yu save stanap.”
Mi promes se ol blesing blong rere gud mo proteksen long saed blong spirit bae i kam fulap insaed long laef blong yu taem yu stap lukaotgud blong prea, wetem strong tingting mo oltaem.
Mi testifae, se blong stap gogohed long kavenan rod bae i givim sefti long saed blong spirit mo bae i invaetem glad we i stap oltaem insaed long laef blong yu. Mo mi witnes se Sevya we i bin girap mo i stap laef bae i sapotem mo mekem yumi kam strong moa long tugeta, ol gud mo nogud taem. Abaot ol trutok ia, mi testifae olsem long tabu nem blong Lod Jisas Kraes, amen.