Founga ʻOku Tāpuekina ai ʻa e Toʻu Tupú ʻe he Lakanga Fakataulaʻeikí
ʻE lava ke langaki kitautolu ʻo fakafou ʻi he lakanga fakataulaʻeikí. ʻOku ʻomi ʻe he lakanga fakataulaʻeikí ʻa e māmá ki heʻetau moʻuí.
ʻOku ou houngaʻia ke ʻi heni. ʻI he taimi naʻá ku fuofua ʻiloʻi ai te u maʻu e faingamālie ke lea atu he ʻaho ní, naʻá ku mātuʻaki fiefia, peá u ongoʻi loto fakatōkilalo ʻi he taimi tatau. Kuó u fakaʻaongaʻi ha taimi lahi ke fakakaukauʻi e meʻa te u lava ʻo vahevahé, pea ʻofa ʻe folofola hangatonu atu e Laumālié ʻi heʻeku pōpoakí.
ʻI he Tohi ʻa Molomoná, ʻoku tuku ai ʻe Līhai ha tāpuaki ki hono ngaahi fohá takitaha kimuʻa pea toki mālōloó, ʻa ia naʻe tokoni ke nau ʻilo ai honau mālohingá mo e meʻa taʻengata te nau lava ʻo aʻusiá. Ko e siʻi taha au ʻi ha fānau ʻe toko valu, pea ʻi he taʻu kuo hilí, ko e fuofua taimi ia ke u tokotaha pē ʻi ʻapi. Kuo faingataʻa kiate au ʻa e ʻikai ofi mai hoku ngaahi tokouá mo e tuongaʻané pe ʻi ai ha taha ke talanoa ki aí. Kuo ʻi ai ha ngaahi pō ne u mātuʻaki ongoʻi taʻelata ai. ʻOku ou houngaʻia ʻi heʻeku ongomātuʻá, ʻa ia kuó na fai hona lelei tahá ke tokoniʻi aú. Ko ha sīpinga ʻe taha ko e taimi ne loto ai ʻeku tamaí ke ne tuku mai ha tāpuaki lakanga fakataulaʻeiki fakanonga lolotonga ha taimi faingataʻa ʻe taha. Hili ʻene faingāué, naʻe ʻikai hoko fakafokifā ha liliu, ka naʻá ku lava ʻo ongoʻi ha nonga mo ha ʻofa mei heʻeku Tamai Hēvaní pea mo ʻeku tangataʻeikí. ʻOku ou ongoʻi monūʻia ke maʻu ha tamai moʻui taau ʻokú ne lava ʻo foaki ha ngaahi tāpuaki lakanga fakataulaʻeiki ʻi ha taimi pē ʻoku ou fiemaʻu aí, mo tokoni ke u ʻilo hoku ngaahi mālohí mo e tuʻunga taʻengata te u lava ʻo aʻusiá, ʻo hangē pē ko hono tāpuekina ʻe Līhai ʻene fānaú.
Tatau ai pē pe ko e hā ho tūkungá, te ke lava maʻu pē ʻo maʻu ha tāpuaki lakanga fakataulaʻeiki. Te ke lava ʻo maʻu ʻa e ngaahi tāpuaki ʻo e lakanga fakataulaʻeikí ʻo fakafou he kau mēmipa ʻo e fāmilí, ngaahi kaungāmeʻá, kau tangata ngāue fakaetauhí, kau taki lakanga fakataulaʻeikí, mo ha Tamai Hēvani he ʻikai te ne teitei liʻaki koe. Naʻe pehē ʻe ʻEletā Niila L. ʻEnitaseni: “ʻOku lahi ange e ngaahi tāpuaki ʻo e lakanga fakataulaʻeikí ʻi he tangata ʻoku kole ange ke ne ngāue ʻaki e [meʻafoakí]. … ʻI heʻetau moʻui tāú, ʻoku fakalahi ʻe he [ngaahi ouau ʻo e] lakanga fakataulaʻeikí ʻetau moʻuí.”1
ʻOua te ke momou ke kole ha tāpuaki ʻi he taimi ʻokú ke fie maʻu ai ha fakahinohino lahi angé. Ko e ngaahi mōmeniti ʻo ʻetau faingataʻaʻiá ʻoku tau fie maʻu lahi taha ai e tokoni ʻa e Laumālié. ʻOku ʻikai ha taha ʻe haohaoa pea ʻoku tau foua kotoa ha ngaahi faingataʻa. ʻE ala tofanga hatau niʻihi ʻi he loto hohaʻá, loto mafasiá, maʻunimaá, pe ongoʻi ʻoku ʻikai ke tau tāú. ʻE lava ke faitokonia kitautolu ʻe he ngaahi tāpuaki lakanga fakataulaʻeikí ke tau ikunaʻi ʻa e ngaahi faingataʻá ni mo maʻu ha nonga ʻi heʻetau laka atu ki he kahaʻú. Fakatauange ʻoku tau fāifeinga ke moʻui taau ke maʻu e ngaahi tāpuaki ko ʻení.
Ko ha founga ʻe taha ʻoku tāpuekina ai kitautolu ʻe he lakanga fakataulaʻeikí ʻoku fakafou mai ia ʻi he tāpuaki fakapēteliaké. Kuó u ako ke tafoki ki hoku tāpuaki fakapēteliaké ʻi ha taimi pē ʻoku ou ongoʻi mamahi ai pe taʻelata. ʻOku tokoniʻi au ʻe hoku tāpuaki fakapēteliaké ke u ʻilo e tuʻunga te u lava ʻo aʻusiá pea mo e palani pau ʻa e ʻOtuá maʻakú. ʻOkú ne fakanonga mo tokoniʻi au ke u sio fakalaka atu ʻi heʻeku fakakaukau fakamāmaní. ʻOkú ne fakamanatu mai ʻeku ngaahi meʻafoakí pea mo e ngaahi tāpuaki te u maʻu ʻo kapau te u moʻui taau. ʻOku toe tokoni foki ke u manatuʻi mo ongoʻi nonga, ʻe ʻomi ʻe he ʻOtuá ʻa e ngaahi talí mo fakaava mai ʻa e ngaahi matapaá ʻi he taimi pē ko ia te u fiemaʻu taha ai iá.
ʻOku tokoni ʻa e ngaahi tāpuaki fakapēteliaké ke teuteuʻi kitautolu ke tau foki ʻo toe nofo mo ʻetau Tamai Hēvaní. ʻOku ou ʻilo ʻoku maʻu ʻa e ngaahi tāpuaki fakapēteliaké mei he ʻOtuá pea te ne lava ʻo tokoniʻi kitautolu ke liliu hotau ngaahi vaivaí ko e ngaahi mālohinga. ʻOku ʻikai ko ha pōpoaki ʻeni mei ha taha fie mana; ʻoku talamai ʻe he ngaahi tāpuakí ni e meʻa ʻoku fie maʻu ke tau fanongo ki aí. ʻOku nau hangē ko ha Liahona kiate kitautolu takitaha. Ko e taimi ʻoku tau fakamuʻomuʻa ai e ʻOtuá pea tui kiate Iá, te Ne tataki kitautolu ʻi hotau ngaahi faingataʻaʻiá.
Hangē pē ko hono tāpuakiʻi ʻe he ʻOtuá ʻa Siosefa Sāmita ʻaki e lakanga fakataulaʻeikí ke lava ʻo fakafoki mai e ngaahi tāpuaki ʻo e ongoongoleleí, te tau lava ʻo maʻu e ngaahi tāpuaki ʻo e ongoongoleleí ʻi heʻetau moʻuí ʻo fakafou ʻi he lakanga fakataulaʻeikí. ʻOku foaki mai kiate kitautolu ʻi he uike takitaha ha faingamālie ke tau maʻu e sākalamēnití. Te tau lava ʻi he ouau lakanga fakataulaʻeikí ni ke ʻiate kitautolu maʻu ai pē ʻa e Laumālié, ʻa ia te ne lava ʻo fakamaʻa mo fakahaohaoaʻi kitautolu. Kapau ʻokú ke ongoʻi ʻoku fie maʻu ke siʻaki ha meʻa mei hoʻo moʻuí, fetuʻutaki ki ha taki falalaʻanga te ne lava ʻo tokoniʻi koe ki he hala totonú. ʻE lava hoʻo kau takí ʻo tokoni atu ke ke maʻu ʻa e mālohi kakato ʻo e Fakalelei ʻa Sīsū Kalaisí.
Mālō mo e lakanga fakataulaʻeikí, ʻoku tau lava foki ai ke maʻu e ngaahi tāpuaki ʻo e ngaahi ouau ʻo e temipalé. Talu mei heʻeku lava ʻo hū ʻi he temipalé, mo ʻeku fokotuʻu ha taumuʻa mo fakamuʻomuʻa ʻeku ʻalu maʻu pē ki aí. ‘I heʻeku tukutaimi mo fai e ngaahi feilaulau ʻoku fie maʻu ke u ofi ange ai ki heʻeku Tamai Hēvaní ʻi Hono fale tapú, kuo tāpuekina ai au ʻaki ʻeku maʻu ha fakahā mo ha ngaahi ueʻi kuo nau faitokonia moʻoni au ʻi heʻeku moʻuí.
ʻE lava ke langaki kitautolu ʻo fakafou ʻi he lakanga fakataulaʻeikí. ʻOku ʻomi ʻe he lakanga fakataulaʻeikí ʻa e māmá ki heʻetau moʻuí. Naʻe pehē ʻe ʻEletā Lōpeti D. Heili: “Ka ne ʻikai e mālohi ʻo e lakanga fakataulaʻeikí, ‘ʻe fakaʻauha ʻo ʻosiʻosingamālie ʻa e māmaní kotoa’ (vakai, T&F 2:1–3). He ʻikai ha maama, pe ʻamanaki lelei—ko e fakapoʻuli pē.”2
ʻOku poupouʻi kitautolu ʻe he ʻOtuá. ʻOkú Ne finangalo ke tau foki ange kiate Ia. ʻOkú Ne ʻafioʻi fakataautaha kitautolu. ʻOkú Ne ʻafioʻi koe. ʻOkú Ne ʻofa ʻiate kitautolu. ʻOkú Ne tokaimaʻananga mo tāpuekina maʻu pē kitautolu ʻo aʻu ki he taimi ʻoku tau ongoʻi ʻoku tau taʻe-taau mo iá. ʻOkú Ne ʻafioʻi e meʻa ʻoku tau fie maʻú mo e taimi ʻoku tau fie maʻu ai iá.
“Kole, pea ʻe foaki kiate kimoutolu; kumi, pea te mou ʻilo; tukituki, pea ʻe toʻo kiate kimoutolu:
“He ko ia kotoa pē ʻoku kolé, ʻokú ne maʻu; pea ko ia ʻoku kumí, ʻokú ne ʻilo; pea ko ia ʻoku tukitukí, ʻe toʻo kiate ia” (Mātiu 7:7–8).
Kapau ʻoku teʻeki ke ke maʻu ha fakamoʻoni ki he lakanga fakataulaʻeikí, ʻoku ou tapou atu ke ke lotu mo kole ke ke ʻilo ʻiate koe pē hono mālohí, pea lau e folofolá ke ke ongoʻi e folofola ʻa e ʻOtuá. ʻOku ou ʻiloʻi kapau te tau feinga ke ongoʻi e mālohi ʻo e lakanga fakataulaʻeiki ʻo e ʻOtuá ʻi heʻetau moʻuí, ʻe tāpuekina kitautolu. ʻI he huafa ʻo Sīsū Kalaisí, ʻēmeni.