ක්රිස්තුස්වහන්සේගේ සාමය සතුරුකම අහෝසි කරයි
ක්රිස්තුස්වහන්සේ කෙරෙහි ඇති ප්රේමය අපේ ජීවිත ආවරණය කරන විට, අපි එකඟ නොවීම් වලට එළඹෙන්නේ නිහතමානීකම, ඉවසීම සහ කරුණාව සමඟයි.
මගේ ආදරණීය සහෝදර සහෝදරියනි, ව්යායාම ආතති පරීක්ෂණයකදී, හදවතට දැනෙන බර වැඩිවෙනවා. ඇවිදීම හැසිරවිය හැකි හදවත්, ඉහළට දිවීමේ ඉල්ලීම් සපුරාලීමේදී අරගල කළ හැකියි. මේ ආකාරයෙන්, ආතති පරීක්ෂණය මඟින් වෙනත් ආකාරයකින් නොපෙනෙන යටින් පවතින රෝග හෙළිකරගන්නට පුළුවන්. එවිට හඳුනාගත් ඕනෑම ගැටළුවකට ඒවා එදිනෙදා ජීවිතයේ බරපතල ගැටලු ඇතිකිරීමට පෙර ප්රතිකාර කරන්නටත් පුළුවන්.
COVID-19 වසංගතය නිසැකවම ගෝලීය ආතති පරීක්ෂණයක් වෙලා තිබෙනවා! එම පරීක්ෂණය මිශ්ර ප්රතිඵල පෙන්නුම් කර තිබෙනවා. ආරක්ෂිත සහ ඵලදායී එන්නත් වැඩිදියුණු කර තිබෙනවා. 1 වෛද්ය වෘත්තිකයන්, ගුරුවරුන්, රැකබලා ගන්නන්, සහ වෙනත් අය වීරෝදාර ලෙස පරිත්යාගයන් කර ඇති අතරම—දිගටම එසේ කරමින් ඉන්නවා. බොහෝ අය ත්යාගශීලී බව සහ කරුණාව පෙන්වා තිබෙන අතර—දිගටම එසේ කරමින් ඉන්නවා. කෙසේවෙතත්, යටින් පවතින අවාසිත් පැහැදිලි වී තිබෙනවා. අවදානමට ලක්විය හැකි පුද්ගලයින් පීඩාවට පත්වී ඇති අතර—දිගටම එසේ වෙමින් පවතිනවා. මෙම ඒ හා සමඟ පවතින අසමානකම් විසඳීමට කටයුතු කරන අයව දිරිමත් කර ස්තූති කළ යුතුයි.
මෙම වසංගතය ගැලවුම්කරුවාණන්ගේ සභාවට සහ එහි සාමාජිකයින් සඳහාත් වන අධ්යාත්මික ආතති පරීක්ෂණයක්. ඒ අකාරයෙන්ම ප්රතිඵලත් තිබෙන්නේ මිශ්ර වෙලයි. “උසස් හා ශුද්ධ වූ ආකාරයකින්” 2 දේවසේවයේ යෙදීම, එන්න මා අනුගමනය කරන්න විෂයමාලාව, සහ නිවස කේන්ද්ර කරගත් සභාවේ ආධාරය ඇති ශුභාරංචි ඉගැන්වීම තුළින් අපේ ජීවිත ආශිර්වාද ලබා තිබෙනවා. මෙම දුෂ්කර කාලයේදී බොහෝ අය අනුකම්පා සහගත උපකාර සහ සැනසීම ලබාදී තිබෙනවා ඒවගේම දිගටම එසේ කරනවා. 3
කෙසේවෙතත්, සමහර අවස්ථා වලදී, අධ්යාත්මික ආතති පරීක්ෂණය විවාදාත්මක බව හා බෙදීම් සඳහා නැඹුරුතාවයක් පෙන්නුම්කර තිබෙනවා. ගැලවුම්කරුවාණන්ගේ සැබෑ අනුගාමිකයන් ලෙස අපගේ හදවත් වෙනස් කිරීමට හා එක්සත් වීමට අපට කළ යුතු වැඩ කොටසක් ඇති බව මෙයින් ඇඟවෙනවා. මෙය නව අභියෝගයක් නොවන නමුත්, එය තීරණාත්මක අභියෝගයක්. 4
ගැලවුම්කරුවාණන් නෙපිවරුන් වෙත ගිය විට උන්වහන්සේ මෙසේ ඉගැන්වුවා, “එහි නුඹලා අතරෙහි විරුද්ධවාදිකම් නොතිබිය යුතුය. … එනම් විවාදයේ ආත්මය ඇත්තා මා කෙරෙන් නොවන්නේය, එහෙත් යක්ෂයාගෙන් වන්නේය, ඔහු විවාදයේ පියාය, තවද ඔහු එකෙක් අනෙකා සමග කෝපයෙන් විවාද වීමට මනුෂ්යයන්ගේ හදවත් කළඹවන්නේය.” 5 අපි කෝපයෙන් එකිනෙකා සමඟ රණ්ඩු වන විට සාතන් සිනාසෙන අතර ස්වර්ගයේ දෙවියන්වහන්සේ හඬනවා. 6
සාතන් සිනාසෙන්නටත් දෙවියන්වහන්සේ අඬන්නටත් අවම වශයෙන් ඇත්තේ හේතු දෙකයි. පළමුවෙන්ම, මතභේද මගින් යේසුස් ක්රිස්තුස්වහන්සේ සහ උන්වහන්සේගේ “ධර්මිෂ්ඨ ක්රියාද, … කරුණාවද, එමෙන්ම අනුග්රහයද” මගින් පැමිණෙන ගැලවීම පිළිබඳ අපගේ සාමූහික සාක්ෂි දුර්වල කිරීම. 7 ගැලවුම්කරුවාණන් මෙසේ පැවසුවා, “නුඹලා එකිනෙකාට ප්රේම කරපල්ලාය කියා, අලුත් ආඥාවක් මම නුඹලාට දෙමි. … “ඔබ සැම එකිනෙකාට ප්රේමකරනවා නම්, ඔබ සැම මාගේ ගෝලයෝ බව එයින් සියල්ලන් දැනගන්නවා ඇත.” 8 මෙම සංවාදයද සත්යයක්—අපි එකිනෙකාට ප්රේමය නොපෙන්වන විට අපි උන්වහන්සේගේ ගෝලයෝ නොවන බව කවුරුත් දන්නවා. උන්වහන්සේගේ ගෝලයන් අතර මතභේදයක් හෝ සතුරුකමක් 9 පවතින විට උන්වහන්සේගේ පසුදවස් වල කාර්යයට බාධා ඇතිවෙනවා. 10 දෙවනුව, පුද්ගලයන් වශයෙන් අපට මතභේද, අධ්යාත්මික වශයෙන් අහිතකරයි. අපෙන් සාමය, ප්රීතිය, සහ විවේකය සොරාගැනෙන අතර ආත්මයාණන්ව දැනීමේ අපගේ හැකියාවට බාධා සිදුවෙනවා.
යේසුස් ක්රිස්තුස්වහන්සේ පැහැදිලි කළේ “එකෙක් අනෙකා සමඟ කෝපයෙන් විරුද්ධ වීමට මනුෂ්යයන්ගේ හදවත් කැළඹවීම මෙය [උන්වහන්සේගේ] දහම නොවන්නේය; එහෙත් [උන්වහන්සේගේ] දහම වන්නේ එවැනි දේ ඉවත් කළ යුතු බවයි.” 11 සිත රිදවාගැනීමට හෝ කෝපවීමෙන් හෝ විනිශ්චය කිරීමෙන් වෙනස් මතයන් වලට ප්රතිචාර දක්වන්නට මම ඉක්මන් වෙනවානම්, මම අධ්යාත්මික ආතති පරීක්ෂණය අසමත් වෙනවා. මෙම අසමත් පරීක්ෂණයෙන් මම බලාපොරොත්තු රහිත යැයි අදහස් වෙන්නේ නෑ. ඒ වෙනුවට, එයින් පෙන්නුම් කරන්නේ මා වෙනස් වියයුතු බවයි. ඒවගේම එය දැනගැනීම හොඳයි.
ගැලවුම්කරුවාණන්ගේ අමෙරිකාවේ සංචාරයෙන් පසු ජනතාව එක්සත් වුණා; “තවද එම දේශය පුරාම විවාද නොවීය.” 12 ඔබ සිතන ආකාරයට ජනතාව එකමුතු වූයේ ඔවුන් සියල්ලන්ම එක හා සමාන වූ නිසාද, නැත්නම් ඔවුන්ට විවිධ වූ මත නොතිබූ නිසාද? මම එය සැක කරනවා. ඒ වෙනුවට, මතභේද සහ සතුරුකම් අතුරුදහන් වී ගියේ ඔවුන් අනෙක් හැමදේටම වැඩියෙන් ඔවුන්ගේ අනුගාමිකත්වය ගැලවුම්කරුවාණන් මත තැබූ නිසායි. ඔවුන් ගැලවුම්කරුවාණන් කෙරෙහි දැක්වූ ප්රේමයට සාපේක්ෂව ඔවුන්ගේ වෙනස්කම් පහව ගිය අතර, ඔවුන් “දෙවියන්වහන්සේගේ රාජ්යයේ උරුමක්කාරයන්” ලෙස එක්සත් වුණා. 13 එහි ප්රතිඵලය වූයේ “එහි දෙවියන්වහන්සේගේ හස්තයෙන් මවනු ලැබුවාවූ සියලුම ජනතාව අතර වෙනත් ප්රීතිමත් ජනතාවක් සිටිය නොහැකිය.” 14
සමගියට උත්සාහයක් අවශ්යයි. 15 එය අපගේ හදවත් තුළ දෙවියන්වහන්සේ කෙරෙහි ප්රේමය වර්ධනය කරගන්නා විට 16 සහ අපගේ සදාකාල ඉරණම කෙරෙහි අවධානය යොමුකරන විට වර්ධනය වෙනවා. 17 දෙවියන්වහන්සේගේ දරුවන් ලෙස අපගේ පොදු මූලික අනන්යතාවය 18 සහ නැවත පිහිටුවා ඇති ශුභාරංචියේ සත්යයන් සඳහා වූ අපගේ කැපවීම තුළින් අපි එක්සත් වෙනවා. ඒ වෙනුවට, දෙවියන්වහන්සේට ඇති අපගේ ප්රේමය සහ යේසුස් ක්රිස්තුස්වහන්සේ කෙරෙහි අපගේ අනුගාමිකත්වය අන් අය කෙරෙහි අව්යාජ සැලකිල්ලක් ජනනය කරනවා. අනෙක් අයගේ ගතිලක්ෂණ, දෘෂ්ඨි කෝණයන්, සහ කුසලතාවන්ගේ බහුරූපදර්ශකය අපි අගය කරනවා. 19 පෞද්ගලික අවශ්යතා සහ දෘෂ්ටිකෝණයන්ට වඩා අපගේ අනුගාමිකත්වය යේසුස් ක්රිස්තුස්වහන්සේ වෙතට තැබීමට අපට නොහැකි නම්, අපි අපගේ ප්රමුඛතා හා වෙනස නැවත සලකා බැලිය යුතුයි.
“ඔබ මා සමඟ එකඟ වෙනවා නම්—ඇත්තෙන්ම අපට එකමුතුකම ඇති කළ හැකියි!” යැයි පැවසීමට අපි නැඹුරු විය හැකියි. ඇසීමට වඩා හොඳ ප්රවේශයක් වන්නේ, “සමගිය ඇතිකිරීම සඳහා මට කුමක් කළ හැකිද? මෙම පුද්ගලයාට ක්රිස්තුස්වහන්සේ වෙත සමීප වීමට උපකාර කිරීමට මම කෙසේ ප්රතිචාර දැක්විය යුතුද? මතභේද අඩු කරගැනීමට සහ දයානුකම්පිත සහ සැලකිලිමත් සභා ප්රජාවක් ගොඩනැගීමට මට කුමක් කළ හැකිද?”
ක්රිස්තුස්වහන්සේ කෙරෙහි ඇති ප්රේමය අපේ ජීවිත ආවරණය කරන විට, 20 අපි එකඟ නොවීම් වලට එළඹෙන්නේ නිහතමානීකම, ඉවසීම සහ කරුණාව සමඟයි. 21 අපි අපේම සංවේදීතාවන් ගැන අඩු සැලකිල්ලක් දක්වන අතර අසල්වැසියා ගැන වැඩි වැඩියෙන් සිතනවා. “මධ්යස්ථ වීමට හා එක්සත් වීමට” අපි උත්සාහ කරනවා. 22 අපි “සැක සහිත ආරවුල්” වල පැටලෙන්නේ නෑ, අප සමඟ එකඟ නොවන අයව විනිශ්චය කරන්නේ නෑ, හෝ ඔවුන්ට වැටීමට ඉඩහරින්නේ නෑ. 23 ඒ වෙනුවට, අපි සිතන්නේ අප සමඟ එකඟ නොවන අය තමන්ට ඇති ජීවන අත්දැකීම් සමඟ තමන්ට කළ හැකි උපරිමය කරන බවයි.
මගේ බිරිඳ අවුරුදු 20 කටත් වැඩි කාලයක් නීතිඥවරියක් ලෙස කටයුතු කළා. නීතිඥවරියක් වශයෙන්, ඇය බොහෝ විට විරුද්ධ මතයන් පැහැදිලිව ප්රකාශ කළ අනෙක් අය සමඟ වැඩකළා. නමුත් ඇය රළු හෝ තරහ නොගෙන එකඟ වීමට ඉගෙනගත්තා. විරුද්ධ උපදෙස් වලට ඇය මෙසේ කිව්වා, “මට පේනවා අපි මේ ප්රශ්නයට එකඟ වන්නට නොයන බව. මම ඔබට කැමතියි. ඔබේ අදහසට මම ගරු කරනවා. එම ආචාරශීලීභාවය ඔබත් මට ලබාදෙනු ඇතැයි මම බලාපොරොත්තු වෙනවා.” බොහෝවිට මෙය එකිනෙකා අතර ගෞරවය හා වෙනස්කම් තිබියදීත් මිත්රත්වයට පවා ඉඩ සලසනවා.
ගැලවුම්කරුවාණන්ගේ අනුගාමිකත්වය තුළ හිටපු සතුරන්ට පවා එක්සත් විය හැකියි. 24 ෆින්ලන්තයේ සභාවට මුල් අවධියේදී හැරී ආ මගේ පියා සහ ආච්චිලා සීයලාට ගෞරව කිරීම සඳහා, 2006 දී, ෆින්ලන්ත හෙල්සින්කි දේවමාළිගාවේ කැපකිරීමට මම සහභාගී වුණා. මගේ පියා ඇතුළු, ෆින්ලන්ත ජාතිකයින් දශක ගණනාවක් පුරා ෆින්ලන්තයේ දේවමාළිගාවක් ගැන සිහින මැව්වා. ඒ අවස්ථාවේ, දේවමාළිගා දිස්ත්රික්කය ෆින්ලන්තය, එස්තෝනියාව, ලැට්වියාව, ලිතුවේනියාව, බෙලරුසියාව සහ රුසියාව යන ප්රදේශ ආවරණය කළා.
කැපකරන අවස්ථාවේදී, මම පුදුම සහගත දෙයක් ඉගෙනගත්තා. ප්රධාන ක්රියාන්විතයේ පළමු දිනය රුසියානු සාමාජිකයින්ට දේවමාළිගා නියෝග ලබාදීම සඳහා වෙන්කර තිබුණා. මෙය කෙතරම් විශ්මයජනක දෙයක් දැයි පැහැදිලි කිරීමට අපහසුයි. රුසියාව සහ ෆින්ලන්තය සියවස් ගණනාවක් පුරා බොහෝ යුද්ධ කර තිබෙනවා. මගේ පියා රුසියාව පමණක් නොව සියලුම රුසියානුවන් කෙරෙහිද අවිශ්වාසය හා අප්රසාදය පළකළා. ඔහු එවැනි හැඟීම් දැඩි ලෙස ප්රකාශ කළ අතර, ඔහුගේ හැඟීම් රුසියාව කෙරෙහි ෆින්ලන්තයට තිබූ සතුරුකමට සමාන වුණා. ෆින්ලන්ත වැසියන් සහ රුසියානුවන් අතර 19 වන සියවසේ පැවති යුද්ධය විස්තර කරන ලද වීර කාව්යයන් ඔහු කටපාඩම් කර තිබුණා. ෆින්ලන්තය සහ රුසියාව නැවත විරුද්ධවාදීන් වූ, දෙවන ලෝක යුද්ධ සමයේදී, ඔහුගේ අත්දැකීම් වලින් ඔහුගේ අදහස් වෙනස් කිරීමට කිසිවක් සිදුකළේ නෑ.
ෆින්ලන්තයේ හෙල්සින්කි දේවමාළිගාව කැපකිරීමට වසරකට පෙර, ෆින්ලන්ත සාමාජිකයින්ගෙන් පමණක් සමන්විත වූ දේවමාළිගා කමිටුව, කැපකිරීම සඳහා වූ සැලසුම් සාකච්ඡා කරන්නට රැස්වුණා. මෙම කැපකිරීමට සහභාගී වීම සඳහා රුසියානු ශුද්ධවන්තයින් දින ගණනාවක් සංචාරය කරන බවත් ඔවුන් ආපසු නිවසට යාමට පෙර ඔවුන්ගේ දේවමාළිගා ආශිර්වාදයන් ලබාගැනීමට බලාපොරොත්තු වනු ඇති බවත් මෙම රැස්වීමේදී යමෙකු නිරීක්ෂණය කළා. එම දේවමාළිගාවේ දේවමාළිගා නියෝග ඉටුකළ පළමු සාමාජිකයින් රුසියානුවන් විය යුතු බවත්, ෆින්ලන්ත ජාතිකයින්ට තව ටික කාලයක් බලාසිටිය හැකි බවත් කමිටුවේ සභාපති වන, සහෝදර ස්වෙන් එක්ලන්ඩ් යෝජනා කර තිබුණා. කමිටු සාමාජිකයින් සියලුමදෙනා එකඟ වුණා. ඇදහිලිවන්ත පසුදවස් වල ෆින්ලන්ත ශුද්ධවන්තයින් රුසියානු ශුද්ධවන්තයින්ට ඉඩලබාදීම සඳහා ඔවුන්ගේ දේවමාළිගා ආශිර්වාද ප්රමාද කළා.
එම දේවමාළිගා සභා රැස්වීමට පැමිණ සිටි ප්රාදේශීය සභාපති, වැඩිහිටි ඩෙනිස් බී. නියුන්ස්වැන්ඩර්, පසුව මෙසේ ලිව්වා: “මේ මොහොතේ තරම් මම කිසිවිටෙකත් ෆින්ලන්ත ජාතිකයින් ගැන ආඩම්බර වී නෑ. තම නැගෙනහිර අසල්වැසියා සමඟ ෆින්ලන්තයේ දුෂ්කර ඉතිහාසය… සහ අවසානයේදී තමන්ගේම භූමියේ දේවමාළිගාවක් ඉදිකිරීමේ උද්යෝගය යන සියල්ල ඔවුන් පසෙක දැමුවා. රුසියානුවන්ට මුලින්ම දේවමාළිගාවට ඇතුළු වීමට ඉඩදීම [එය] ආදරය හා පරිත්යාගයේ ප්රකාශයක්.” 25
මේ කරුණාව ගැන මම මගේ පියාට වාර්තා කළ විට, ඔහුගේ හදවත උණුවී ඔහු හඬා වැටුණා, එම තද ෆින්ලන්ත ජාතිකයාට එසේ වීම ඉතා දුර්ලභ දෙයක්. එතැන් සිට වසර තුනකට පසු ඔහුගේ මරණය තුරුම, ඔහු කිසිවිටෙකත් රුසියාව ගැන වෙනත් සෘණාත්මක හැඟීමක් ප්රකාශ කළේ නෑ. ඔහුගේ සෙසු ෆින්ලන්ත වැසියන්ගේ ආදර්ශයෙන් ආභාෂය ලැබූ මගේ පියා, අනෙකුත් සියලුම සලකාබැලීම් වලට වඩා යේසුස් ක්රිස්තුස්වහන්සේ තුළ ඔහුගේ අනුගාමිකත්වය උසස්ව තැබීමට තීරණය කළා. ෆින්ලන්ත ජාතිකයින් අඩුවෙන් ෆින්ලන්ත ජාතිකයන් වුණේ නෑ; රුසියානුවන් අඩුවෙන් රුසියානු ජාතිකයන් වුණේ නෑ; සතුරුකම පලවා හැරීම සඳහා කිසිඳු කණ්ඩායමක් තම සංස්කෘතිය, ඉතිහාසය හෝ අත්දැකීම් අත්හැරියේ නෑ. ඔවුන්ට එසේ කරන්නට අවශ්ය වූයේ නෑ. ඒ වෙනුවට, ඔවුන් යේසුස් ක්රිස්තුස්වහන්සේ තුළ ඔවුන්ගේ අනුගාමිකත්වය ඔවුන්ගේ මූලික සලකාබැලීම කරගත්තා. 26
ඔවුන්ට එය කළ හැකි නම්, අපටත් එසේ කළ හැකියි. අපගේ උරුමය, සංස්කෘතිය සහ අත්දැකීම් යේසුස් ක්රිස්තුස්වහන්සේගේ සභාවට ගෙන ඒමට අපටත් පුළුවන්. ලාමන්වරයෙකු ලෙස සාමුවෙල් තම උරුමයන් නිසා ලැජ්ජා නොවූ අතර, 27 නෙපිවරයෙකු ලෙස මොර්මොන් ඔහුගේ උරුමය නිසා එසේ වූවේත් නෑ. 28 නමුත් ඒ එකිනෙකා ගැලවුම්කරුවාණන් කෙරෙහි ඔවුන්ගේ අනුගාමිකත්වයට මුල්තැන දුන්නා.
අපි එක්සත් නැතිනම්, අපි උන්වහන්සේගේ නොවේ. 29 දෙවියන්වහන්සේ කෙරෙහි අපගේ ප්රේමය සහ ගැලවුම්කරුවාණන් කෙරෙහි වූ අපගේ අනුගාමිකත්වය අන් සියලු සලකාබැලීම් වලට වඩා ඉහළින් තැබීමට අපි නිර්භීතව කටයුතු කිරීම මගේ ආරාධනාවයි. 30 එක්කෙනෙකු වීමට වූ ගිවිසුම වන—අපගේ අනුගාමිකත්වය තුළ ආවේනික වූ එම ගිවිසුම අපි තහවුරු කරමු.
සාර්ථකව ක්රිස්තුස්වහන්සේගේ අනුගාමිකයන් බවට පත්වූ ලොව පුරා සිටින ශුද්ධවන්තයන්ගේ ආදර්ශය අපි අනුගමනය කරමු. “අපගේ සාමය වන, … අප අතර ඇති වෙන්කිරීමේ මැද බිත්තිය බිඳදමා; එය උන්වහන්සේගේ [වන්දිගෙවීමේ පරිත්යාගයෙන්] අහෝසි කළ,” යේසුස් ක්රිස්තුස්වහන්සේ මත අපිට රඳාපවතින්නට පුළුවන්. 31 ලෝකයට යේසුස් ක්රිස්තුස්වහන්සේ පිළිබඳ අපගේ සාක්ෂිය ශක්තිමත් වන අතර අපි අධ්යාත්මික වශයෙන් සෞඛ්ය සම්පන්නව සිටියි. 32 මම සාක්ෂි දරන්නේ අපි “විවාදයෙන් වැළකී” “ස්වාමින්වහන්සේ සමඟ ප්රේමයෙන් සමාන අදහස් ඇති අය වී උන්වහන්සේ සමඟ ඇදහිල්ලෙන් එක්සත් වන විට” උන්වහන්සේගේ සාමය අපගේ වන බවයි. 33 යේසුස් ක්රිස්තුස්වහන්සේගේ නාමයෙන්, ආමෙන්.