Deleuill er Kid me a Dios
Ng diak el iior er a ikel duubech el mei er kid er tial klengar, eng sebeched loumera er a Dios e metik er a deureng er Ngii.
Ng uaia Job er a Chuodel Renged, e a taem el dengara ringel e kede mo omdasou el kmo a Dios a mla mo iikrid. Ng klemedengei er kid el kmo a Dios a ngarngii a klisichel tomer a lechub eng choroid a ringel a uchul, e kede mo melchesiu loumondai sel sekum Ngii a diak lengesukid, e locha mo oker el kmo, “a lsekum a Dios a diak el beskak a ngesou el kululuuch el kirel, eng mekera sebechek loumera er Ngii?” Sera lesal kmal ngara ringel, e a Job a mle tal loker el kmo:
“Bo modengei el kmo a Dios a mla choroid er ngak a rokui el klungiolek e mla mekrrengak.
“Ak ngara langel er a ringel, ‘el metemelang!’ A kuleker lolengit a ngesou, e diak onger.”1
A nger Ngii el mo er a Job, e a Dios a millekoi el kmo, “Me ke melebeakl er ngak el leko kau a bai melemalt?”2 A lechub e ke kmo, “Ngak a mekngit? Ke oltuub er ngak le komdasou el kmo ke melemalt?”3 A Jehovah mlorimel lomeklatk er a Job er sel klou ultutelel me a llemesel, meng mlo riou a rengul a Job e mlo medengei el kmo ng diak a ngii di el ngera er ngii el mo mengaisisiu er a llomes, klisiich, me a llemalt lolab a Dios e dirkak bol sebechel mo dechor medal a kerkeriil er a Ngarbab el Dios:
“Ak medengei el kmo kau a sebechem el remuul a rokui el tekoi,” ngii a dilung, “e diak a ngera el diak modengelii.
“… Ng dimlak kumtab a tekoi; el ngii a mle meklou a belkul mei er ngak, el dimlak kudengei. …
“Mechelecha eng di ngak louketui er ngak, e mla ouchel a renguk el di mo uaia chab.”4
A ulebongel, e a Job a milsa Rubak, e a “Rubak a ulemekngeltengat aikel uriul sils er a Job el diak el uaia uchelel.”5
Ng kmal di klebelengud loba sel di uldesued kid a rechad el mo merritel er a Dios, e mo omdasou, el kmo, “Ng diak ngara deureng, me a Dios a locha ngarngii a mekngit loruul er ngii.” Kid, a Rengelekel el ngara tial klengar er a beluulechad, el ngesonges a klemedengei er kid ruchei, me a chelechang, me a klukuk, e Ngii a kmo, A rokui el tekoi er chelechang, a kmal di kudengei el rokui.”6 A Jacob a ulemeklatk el kmo lak molasm el mellach er a Rubak, e bai mosiik el mo oltirakl aike ledung. Le kemiu a medengei el kmo ngii olab a llomes, me a llemalt, me a klou el chubechub, el kirel a rokui el urerel.”7
A rebebil a cheleuid el kirel a yaksok er a Dios lomdasu el kmo a dolngesenges er Ngii e kede mo ngmai a kmo ngera ruriul el telutk a temel. Te locha mo omdasou el kmo, “Omko ak mo er a mision, e a Dios a mo omekngeltengat er ngak er a ungil chebechiil me a klengelakel,” a lechub “A lsekum eng diak kuruul a urerek er a skuul sel le Chedaol sils, e a Dios a mo omekngeltengat er a ungil teng,” a lechub “a lsekum ak melecha ongeltacher, e a Dios a mo omekngeltengat er ngak er a ureor el soak el mo er ngii.” E a lsekum eng diak blo mutaut el uaisei loltirakl aikel sorir, e te mo omelchesiu el cheloit er a Dios. Eng di diak el uaisei sel dosaod a chedaol tekoi. Ng diak domdasu er a moktek er a Dios el kmo ng uaia mesil el (1)dolilt er a soad el klengeltengat, (2)dolecha ikel kirel ungil lureor, e (3) e kid a nguu sel soad.8
A Dios a kmal mengull a telbillel me a yaksok er Ngii el mei er a dersta er kid. Ng diak el kired el simbai el kirel tiang.9 A klisichel a tngakireng er a Jesus Kristo—el mle riou er a rokui el tekoi e liluut el mo er bab10 e olab a rokui el klisiich er a eanged me a chutem11—a meketeklii el kmo a Dios a sebechel e mo kudmokl a rokui el Telbilel. Ng klou a ultutelel sel dongull e doltirakl a Llechul, eng di diak el bek el klengeltengat lokiu otirekled er a llach12 a ruul, e kldmokl, e ulterekokl a temel loltirakl er a soad. Ng kired el mo er sel tkul er bab el sebeched e mereko mechei meng Ngerchelel lorrael a klengeltengat, er a ikel lousbech a bedenged me a chedaol klengar kid.
A President Brigham Young a silodii el kmo a klaumera er ngii a dimlak el meteketek lokiu a dersta el teletael a lechub eng klengeltengat ng bai uchul a sioning er ngii me a deleuill er ngii lobengkel a Jesus Kristo. Ng dilu: “A klaumera er ngak a diak el ngara urerel a Rubak el ngara ikel iuns, e obetiterir a rechad el mertiang, … a lechub eng klengeltengat el ngii a milsterir tirkal chad a lechub eng tirkel chad, me a dengeltengat me a lak, ng bai klaumera er ngak a ngara Rubak el Jesus Kristo, me a klemedengei er ngak el bla kngai er ngii.”13
A ouchel reng me a blekongesenges, me a omesiou me a mo chuarm, me a ungil urered a kmal ngarngii a ultutelel. Ng soad el mo teloi er tirkel Ether a melekoi er tir el kmo “te di meruul a ungil lomeruul.”14 Eng di diak el sal iior er a ikel oleko ngochur el llechukl er a hong er a babeluades. Aika el tekoi a meklou a ultutelel leng rullid me kede mo meruul a urerel a Dios e rolel eng sebeched loureor Lobengkel sel dolasm el melodech er a klechad er kid el mo uaia santo.15 Sel lebeskid a Demad er a Babeluades el merkid a Ngii me a Ngelekel, el ngii a diak a ulebengelel deleuill Lobengterir lokiu a krasia er a Jesus Kristo, el Osobeled.
Kid a ngelekel a Dios, e mla moterekokl el kirel a diak a ulebengelel klengar. Kede mo melai a dikesed er Ngii, “dikesed el obengkel a Kristo.”16 A Demad a soal mo omekrael er a dersta er kid el ngara Rolel a telbiil el bek el blekekled a ultuil er a usbechellel a tal chad loltirakl er a moktek er Ngii el kirel a ngarbab el deureng er kid Lobengkel. Ng sebeched lolsingch el kirel a mui klaumera er kid er a Chedam me a Ngalek, me a mesisiich el beltikereng er Tir, me a blelekl longelaod me a ulekrael er a Chedaol Reng.
Meng uaisei, e tial rael a diak el beot el mei er kid el rokui. Ng betok a kedmekill eng mo sebechel mo beot. A Jesus a millekoi:
“Ngak a meral rachel, e a Chedam a uchul a kerrekar.
“A bek el rachel el ngar ngak el diak lourodech [a Chedam] a lolai el mengeroid: e a ikel ourodech a longimd me ng meloseb e mengal mo bekerredechel.”17
A teletael el Dios ousbech er ngii el mengoeas e mengikiid, a kirel, el bebil er a taem eng kmal meringel. A domtab a tekingel a Paulus, e kid a mo “ngmai dikesed el obengkel a Kristo; a lsekum e kede obengkel el mo chuarm, e kede dirrek el mo obengkel er a klebkellel.”18
A leuaisei, e sel desiseb er a ikal ringel el mengikiid er kid, e lak bol kesib a rengud er a Dios, e bai bo dekeed er ngii. Momekedong er a Chedam loba ngklel a Ngalek. Morael el Obengterir el ngara Reng, er a bek el sils. Ea cherengel a taem e bechititerir me lochotii a mui el klaumera er Tir el mo er kau. Bo mungil mo Medengelterir e bo mungil medengelkau.19 A Dios bo lomtebechel.20 A Osobel a mla dmu er kid:
“Morrenges er a Jesus Kristo el ngii a sebechekled el mo er a Chedam, el mengeluch er ngii el kirem—
“El kmo: Chedam, a ringel me a kodall er ngike el dimlak a kngtil, el kau a kilengei er ngii; a rsechel a Ngelekem el Sechal a mlechoit, a rsechel ngike el kau uldureklii me luchul e a klebkall le ko er kau;
“A le uaisei, e Chedam, e bechititerir tirka el odam er ngak [me a rodos er ngak] el tir oumera er ngak, me lemei er ngak e bo el nguu a diak a ulebengelel klengar.”21
Momdasu a bebil er a okesiu er a roumerang el sechal me a redil el loumera er a Dios, e ungil medengei el kmo a yaksok er Ngii a mo er tir er a chelsel tial klengar malechub eng kodall. A klaumera er tir a dimlak el ultuil er a ikel Dios a riruul a lechub eng dimlak el ruul er a keltukl el teletael a lechub eng sel dilubech el taem eng di te bai medengelii el bekokeuii el Chedam me a Jesus Kristo el meral Osobelir.
A Abraham er sera bocha lolenget er ngii a prist er a Egypt er a Elkanah, eng lilangel el mo er a Dios mel sebecheklii, me a Dios a rirellii.22 A Abraham a kiliei el mo demerir a roumerang el uchul a rokui el telungalek er a beluulechad a mlo mukngeltengat.23 E a uchei risei, e tiaikid losisiu el altar, e ngkal osisiu el prist er a Elkenah a millenget er a retedei el klikiid el redil “el uchul a kldung er tir… e dimlak el sorir el mengull er a chelid er a kerrekar a lechub el bad.”24 Te mlad er sei el martyrs.
A Joseph er a recheuodel, el mloterau er a rubekul sera lengeasek, meng mlo obult el mo er a Dios. Cherengel a taem, e ngii a mlo ngarbab el chad er sel blil a mastang er ngii el ngara Egypt eng di a rokui el ngii a ulab a mlo diak ele bechil a Potiphar a ultelecheklii er a cheleblad el tekoi. A Joseph a mle sebechel mo omdasou el kmo, “Ak mo kelebus le ngak lultirakl er a llach er a tekoi er a deleboes.” Eng di ng bai millemolem lultuil er a Dios meng mlo selbechakl er a chelsel a blil a kelebus. A Joseph a mlo mekngit a rengul ele ngkel sechelil el dirrek el mlara kelbus, a rirellii a yaksok lobengekel a Joseph, engdi ngulbes er ngii er a uriul a luut el mlo er a deruchellel er a blil a Pharoah. Maleuaisei, e kemiu a medengei, a Rubak a rirellii a Joseph meng nguu sel kot el ngarbab el deruchall me a klisiich el ongingil a Pharaoh, el uchul a Joseph a mlo sobecheklii a blai er a Israel. A Joseph a mui el medengei el kmo “a rokui el tekoi a dmak loureor el mo klungiaol el mo er tirkel rokui loubeltikereng el mo er a Dios.”25
A Abinadi a tilbir el mo otireklii sel chedaol urerel. “Ak mo rokir a cheldechedechak,” ng millekoi, “e sola diak a belkul a [ngii di el ngera a ledubech el mei er ngak], ngii di bok sobel.”26 Ng dimlak el mochib er a mekngit el kodall, eng di ng meral silobel er a rengedel a Dios, e a chimol chad lulebult el ngii a uchul, el Alma, a ngildechii a klengar er a re Nephite el mo lmuut er a lemei a Kristo.
A Alma me a Amulek a tilobed er a blil a kelebus er a Ammonihah el mle nger er a ongterir, e a ruldechelakl er tir a mlad.27 Eng di, uchei risei, e tirkal losisiu el mekngit el chad a ulemidokl er a rulmerang el redil me a rengalek el mo er a chelsel a ngau. A Alma, er a lomes er tial kdekudel el teletael er a ringel eng mlodubech er a Chedaol Reng el diak loltengel er a klisichel a Dios el mo olsobel er tir er a ngau,”28 me luchul e bol nguu a klebkellel a Dios.29
A Profet Joseph Smith a lilangel er a blil a kelebus er a Liberty, Missouri, el dikea el sebechel ngosuterir a Resanto el mla modechelakl e modik er a delengcheklir er a taem er a kelekolt. “Dios, ke ngara ker?” A Joseph a lilangel. “Ngua ngera klemanget el cheroid a chimam?”30 A nger lengiluu, a mle yaksok er a Rubak el kmo: “A ringel el omngarngii a di telkib el taem; e a lsekum e ke ungil lotekengelii, e a Dios a mo osebelau er a eanged. … Kau a diak muaia Job.”31
A ulebongel, a Joseph a millekoi el uaia Job el kmo, “A lokotkak a [Dios], me ngak a di oumera er ngii.”32
A Elder Brook P. Hales a uluchais el kirel a Sister Patricia Parkinson, e milchell lungil lomes eng sera bol teruich me a ta rekil eng mlo mikou.
A Elder Hales a uluchais el kmo: “Ng meketeketang el taem el kudengelii a Pat e dirk dilu er ngii el kmo ak chemat er a ungil blekerdelel el di blechoel dmeu a rengul. Ng dilu el kmo, ‘Ea ng, dirkak mngara blik lobengkek me mesekak, ng uaisei? Ngarngii aikel kuk mekngit el taem er ngak. Ng betok el bla bol seselk a renguk, e betok el bla klangel.’ Eng di, ngii a millekoi, ‘Sera kumuchel el mo diak kumes, eng mle ngodech, eng di ak mle medengei el kmo a Chedam er a Babeluades me a Osobel a ulebengkel a telungalek er ngak me a ngak. … Tirkel loker el kmo ng kesib a renguk le ngak el mikou, e a kunger el kmo: ‘Ng techa kesib a renguk er ngii? A Chedam er a Babeluades obengkek; ng diak cheloit. Ngii a di obengkek er a bek el taem.’”33
Ea ulebongel, eng klengeltengat er sel selemosem el deleuill er kid me a Chedam me a Ngalek el kid osiik er ngii. Ng kmal klou a relii e diak a ulebengelel. Kede sioning lobengkel a Paulus “el ringel el dengarngii er tial klengar er a [chutem] a diak dongaisisiu er sel klebkall el mo mocholt er kid ruriul.”34 Ak sioning el kmo ng diak el iior er a ikel duubech el mei er kid er tial klengar, eng sebeched loumera er a Dios e metik er a deureng er Ngii.
“Mo oumerang er a Rubak loba rengum el rokir; e lak multuill er a di klemedengei er kau.
“A rokui el tekoi el moruul e modersau el mo er ngii, e ngii a mo omekrael er kau.”35
El ngara a ngklel a Jesus Kristo, amen.