Beltikereng, Omerk, Siotai
Sel doubeltikereng, omerk, e siotai, e kede mo olngeseu er a klou e chetengakl ureor el kudmkelii a beluulechad el kirel a luut er a Mesiah.
Ka bom chelellakl, e momdasu el omko kom ngak, el dechor ra rois er a Galilee, e sioning er a mengasireng el klebkellel a mla mekiis er a kodall el Osobel loldingel er a roltirakl er Ngii. Ng diak el sal mo mechas a rengum el remenges a tekoi, el Ngii a millekoi er tir, a Tekingel kmo “morael mong, e molisechakl a rokui el beluu, e molecholb er tir el ngara ngklel a Chedam, me a Ngalek, me a Chedaol Reng.”1 Ng merang el ikal tekoi a smisichid, e meklemesid, e oderchid, el uaia re Apostol er Ngii. E temeral, mle blak a rengrir el meruul uaisei.
Ng mengasireng, leng dimlak di le Apostol a mlo oltirakl a tekingel a Jesus. A rechedal a uchelel a Ikelesia, re rebeches el mol muut er a remeketeketang, a dirrek el mlo oltirakl a tekingel Osobel, lomerk er a ungil chais er a ebangkelio el mo er tirkel ble lodengelterir. Sel dechal a rengrir el mo omerk er a klaumerang er tir er a Jesus Christ a ngilsouir tial beches el dirk milteketek el Ikelesia el mukeroul el mo klou.2
Kid el dirrek, el oltirakl er a Kristo, a dirrek el kired el mla mongit el mo oltirakl er tial oderchelel er chelechal sils, el diuaia a dengara rois er a Galilee er a lekot louchais er ngii. Tial oderuchel a liluut lomuchel er sera 1830, er a Joseph Smith er a loterkeklii a ochellel er a Samuel el mo kot el misionari er a Ikelesia er a Jesus Kristo.3 Seikid el mei er chelechang, eng betok er a 1.5 milion el misionari a mla misii a beluulechad lolisechakl a rokui el beluu e melecholb er tirkel mla kongei er a ungil klumech er a mla moluut el ebangkelio.
Tiaikid a osischekled. El kot el desemeriar ngii.
Ng omuchel er a remekekerei el ngalek el mo er a remeklou er kid, e kede mengiil er a taem el mo sebeched el mo oltirkal er a tekingel Osobel el mo omerk er a ebangkelio el mo er a beluu er a beluulechad. Ak medengei el kmo kemiu a rengeasek el sechal me a redil a mlo melchesuar a mesisiich lodubech er a tekingel a profet er kid er a chelii er a le siotai er kemiu el mo kldmokl el kirel a urerel a misionari el uaia tekingel Oosbel el mo er a re Apostol er Ngii.
El uaia chad el dechor mengiil mo melchesokl, e kede mengiil lolsingch er sel meral siotai, el ngarngii a saing er a profet, lolchetel a uchelel a urerem! Tial klemeriar reng a chedaol e ulekrael; engdi, ka me domes er tial ker: ngera meng diak de rokui lomuchel er chelechang?
Kom locha oker, “Ak mekera e mo misionari a lak a llechukl ngklek el kubang?” A lechub e kede kmo, “A remecherrungel el misionari a mla moterekokl el kirel tial ureor. Ng soak el mo olngeseu eng di locha mo urirul sel bol chelellakl a roki el tekoi.”
Rodam me a rodos, ng kmal beot el tekoi! Doureng a saul, le tekingel Osobel a sebechel kmal beot el tekoi, el beot a bo dodengelii el rokui lomuchel sel demekekerei: beltikereng, omerk, e siotai.
Beltikelreng
A kot el tekoi el sebeched el rulii a mo oubeltikereng el uaia Osobel.
Ng oberaod a rengud er a rigel me a uldikel el domes er a beluuelchad er chelechal taem. Eng di, ng dirrek el kired el muklatk er a klou el chubechub me a ngesou el mla mocholt er a rechad er a ngii di el ker lokiu a blakereng er tir lolngeseu—er tirkel mla modik er a delengcheklir, mla mo chacheroid tir me a telungalek er tir, a lechub e te kuk ngara chelsel a ngodech el klengitelreng me a berraod.
Ng dirk tekoi, chais a merael el retela el chedil er a beluu er a Poland, lokiu a sebekreng er tir el kirir tirkal chiiessang el telungalek, e te milchobech a doldubech el mlirir a rengalek er a basio er a train, el kldmokl el bo lousbech a rechedil sel bel iuul er a bitang e le kerd er a ksia. Ng meral tekoi, el Demad er a Babeluades a ungil a rengul kirel tial omeruul er a ngesou, le sel dosebechakl er a ta me a tang er a berraod, e kede “otireklii a llechul a Kristo.”4
Ngii di el taem el dochotii a blekerdelel a Kristo el mo er a rengara bita er kid, e kede omerk er a ebangkelio— luldimukl a lak dedul mo ngerang.
A beltikereng el mo er a ngara bita er kid el chad a klebokel lolchotel sel ongeru el ngarbab el llach el mo oubeltikereng el mora odam er kid;5 e olchotel a mengikiid el Chedaol Reng er a rengud. Sel dochotii a beltikereng er a Kristo el mo er a rebebil, e nguchul e tirkel mes a ungil lomerelled “a kobkelii [a] Chedam er a babeluades.”6
Tia doruul er ngii el diak a ngera el dongerchir ngii ruriul.
Ng uaisei, el doureng, me bo lekengei er a beltik el reng er kid, eng di a ikel bol ruul a diak el sebeched el mekerang.
A doruul me a teleteled a ngii a klou a ultutelel.
Ngokiu a diua beltikereng er a Kristo el mo er a rebebil, e kede blak a rengud lomerk er a klebokel, el melodech a klengar el ebangkelio er a Kristo, e mui loltirakl er a ngarbab Loderchelel.
Mouchais
A ongeru el tekoi el sebeched el rulii a omerk.
Sera uchelel a buil er a COVID-19, e a Brother Wisan er a Thailand a ulmelchesiu soal louchais a uldesuel kirel aikel losuub er a Babier er a Mormon lokiu a social media. A tara post er ngii, e nguluuchais er a cheldechederir a reteru el misionari er a chelsel a Babier er a Momron, el Alma me a Amulek.
A odam er ngii, er a Winai, el ulterekokl a klechelid er ngii, a mlo mechas a rengul er tial post, me ngulker, “Ng sebechek el nguu tial hong el tekoi er a Thailand?”
A Wisan a ulereor losiik rolel e a Babier er a Mormon a morngii lokiu a reteru el redil misionari, el mlo omuchel lolisechakl er ngkal odam er ngii.
A Wisan a mlo teloi er a omesuub el okiu a melidiul, e uluchais a ngara rengul kirel a Babier er a Mormon. A Winai a meduch el meluluuch e mesuub loba reng losiik er a klemerang, el mo kongei e nguu a klemerang. Sesei el buil, e a Winai a miltecholb!
Uriul e a Wisan a millekoi el kmo, “Ngarngii a ngercheled el mo dongu er a chimal a Dios, e kired el blechoel kldmokl el Kirel el mo meruul a Urerel er sel Teletelel.” Tial mengasireng el dilubech er a telungalek a mlo uaisei le Wisan lulemerk er a ebangkelio er sel beot el teletelel.
Kede rokui louchais a kmo ngerang el mora rebebil. Kede blechoel meruul er ngii. Kede ouchais a katsudo el soad lomes me a kall el soad, oltobedechur el tekoi el deuiles, basio el deborngii, sunga el soad, me a ungil tekoi el soad.
Ng mekera dedechel a bebil er a tekoi el mora ikang er a ikel soad el tekoi el kirel a ebangkelio er a Jesus kristo?
A Elder Dieter F. Uchtdorf a milsaod el kmo: “A lsekum a chad oker kau el kirel tial mlo merek el sandei er kau, e lak mkes louchais el kirel aikel milkedmokl er a chelsel a ikelesia. Mouchais el kirir a remekekerei el ngalek el mlo dechor mederir a rechad e mengitakl me a teletelir el melasm el mo uaia Jesus. Mosaod el kirir a recheldebechel er a rengeasek el chiloit a temir lolngeseu er a remechuodel el meluches a reksi er tir.”7
A omerk a diak el belkul a kmo kede “olterau” er a ebangkelio. Ng diak a belkul moluches er a kemanget el osisechakl a lechub e momeketakl er a cheleuid luldesuel a chad.
Sel doruul a urerel a misionari, e a Dios a diak lousbech er kau el kora uaia omongkar Ngii; Ng bai, olengit er kau, el mo ouchais el Kirel.
Sel douchais a ungil tekoi el mla duubech er a ebangkelio el mora rebebil, e kede a oltirakl er a oderchelel a Osobel.
Siotai
A ongedei el tekoi el sebechem el rulii a siotai.
A Sister Mayra a dirk mlo chedal a ikelesia er a beluu er a Ecuador. A deureng er ngii er a ebangkelio a mle mereched el mo mesisiich ruriul er a techolbechild meng siotai er a resechelil me a rebetik er a rengul lokiu a social media. Betok el chedal a telungalek er ngii me a resechelil el miles a post er ngii a uleker a ker. A Mayra ulenger tir, el mle blechoel siotai er tir el mora blil e kebetech tir me a remisionari.
A rechad er a blil a Mayra, rebebil er ngii, anti er ngii, teru el cousin er ngii, me a rebebil er a sechelil a miltecholb le ngii el mle blak a rengul siotai er tir el “mei e momes,” “mei e mosiou,” e “mei e bom teloi.” Ngokiu a bleketakl el siotai er ngii, eng betok er a lluich el chad a kilengei er a ongtil el mo metecholb el mo chedal a Ikelesia er a Jesus Kristo. Tia mlo uaisei le Sister Mayra a mle siotai er a rebebil el mo melchesuar a deureng el chedal a Ikelesia.
Ng kmal betok a teletael er a ongit el sebeched el meruul el mora rebebil. Ng sebeched el siotai er a rebebil el “mei e momes” er a teletael er a sakrament, a lechub omilil er a ward, ma online video louchias er a ebangkelio er a Jesus Kristo. “Mei e momes” a sebechel ongit el mo menguiu er a Babier er a Mormon a lechub mo oldingel er a templo er a temel a open house ruchei er a lemoterekokl. Bebil er a taem, e a ongit a kuk di kired—ongit el mei er kid, el meskid a ues ma techall el meliuekl er kid el de bekiis e meruul.
Chelechal taem, e a rechedal a ikelesia blechoel lomerk a klumech lokiu a social media. Ngarngii a kmeed el dart, a lechub eng telael, el ungil teletael el sebechem louchais. Tia meskid ongit el “mei e momes,” “mei e mosiou,” e “mei e bom teloi.”
Sel desiotai ra rebebil el mo mesuub er a ebangkelio er a Jesus Kristo, e kid oltirakl er a okedong er a Osobel er tial Urerel.
Ulebongel
Betik er a renguk el rodam me a rodos er ngak, kede mla mesaod a kldei el beot el tekoi—bleketakl el tekoi—el ngii dil chad a sebechel meruul. Tekoi el sebechem el meruul! Ke mla meruul aika el tekoi er chelechang—e locha diak motebengar el kmo ke meruul!
Ak siotai er kemiu el mo osiik rolel e ke mo oubeltikereng, omerk, e siotai. Sel bomuaisei, e ke mo melchesuar a mui el deureng el kmo ke oltirakl a tekingel a Osobel.
Tial kungelechel er kemiu el mo meruul er ngii a diak el beches el prokuram. Ko mla rongesii tial osisechakl ruchei. Tia diak el “beches el klou el tekoi el mo tuobed” el Ikelesia olengit me bo moruul er ngii. Aika el edei el tekoi a di olchotel a kmo kede uangera a roltirakl er a Jesus Kristo.
Ng diak mousbech er a llechukl ngakl a lechub el babier.
Ng diak el sal kirem el mokedong.
Aika el kldei el tekoi sel bol telengtengil a klechad me a klengar kid, eng mo kse er kid, el diak morimel lolchotel a meral beltikereng.
Meng uai tirkel loltirakl er a Kristo el mlo kldibel e mesuub er Ngii er a Galilee er a erul telael rak er a memong, e kid a dirrek el sebeched el mo oltirakl er a ongtil Osobel el mo omerk er a ebangkelio el mo er a beluulechad.
Sel doubeltikereng, omerk, e siotai, e kede mo olngeseu er a klou e chetengakl ureor el kudmkelii a beluulechad el kirel a luut er a Mesiah.
Mebo doltirakl er a okedong er a Osobel e mo otireklii a ngarbab Loderchelel a ngii a nglunguchek el ngara ngklel a Jesus Kristo, amen.