Mesemechokl a Soad Loltirakl er a Soal
Sel doltirakl er a soal a Rubak ra chelsel a klengar er kid sei ea techall el me er kid el mo metik er sel kot el kesiokel el ngisel a chesiuch er a beluulechad—sel rengedel a babeluades.
A tara taem, ea Osobel a melekoi ra tal chad e ra oteruul el losiik a “ungil ngisel a chesiuch.” Meng ngkal chad ra oteruul er a losiik, eng miltik e ra imong “el meringel el chad.” Ng di, a lsekum eng kirel nguu tial meringel chad el ngisel a chesiuch e ngikal chad a kirel loterau a rokui el kloklel, meng di mle mereched e dmeu a rengul el rulii.
Ngulkiu tial kedeb e selebch el cheldecheduch, ea Osobel a mlo ungil lolsisechakl el kmo a rengedel a babeluades a di uai ea diak el mochar el ngisel a chesuich, eng meral kot el kesiokel el klalou el ngarbab ra bek el tekoi el dourreng. Sel blekeradel el kmo ngkel chad er a oteruul el di mle mereched el loterau a rokui el kloklel mel nguu sel kesiokel el ngisel a chesiuch a ungil meketeklii el kmo kid a kired el mesemechokl a uldesued ma dourreng lobengkel a soal a Rubak e kongei el meruul a rokui el tekoi el mora ikel sebeched er tial omerael ra klechad me de ngai aikel klengeltengat er a rengedel a Dios.
Sel soad el nguu tial klou el nguked, eng meral kired, er a bek el tekoi, el mora bkul rebab el sebeched el mo mechei a rokui el dongismuk eldi kirel a soad e choridid er a ngii dil olibesongel el tekoi el mo orreked er kid er a mo cherrungel el ngerecheled el mora Rubak ma ikel ngarbab e chedaol Teletelel. A Apostol Paulus a mesaod a ikal skel omengikiid el ua “do[bang] a uldesuel a Kristo.” Ng uai a okesiul a Jesus Kristo, eng belkul a kmo kede blechoel “[meruul] aikel soal [a Rubak]” er a klengar kid, a lechub eng uaia tekingir a rebebil el kmo, kede “meruul aikel soal a Rubak.”
Ea doltirakl ra ebangkelio, e “[meruul] aikel mo ungil ra [Rubak]” a melutk er kid lodars a rengud el mo er Ngii. A Osobel a mlo ungil lolsisechakl er sel klou a belkul el osisechakl ra lolsisechakl er a re Mesiungel:
“E le ak mla ra babeluades el mei, el diak kuruul er a soak, e bai soal ngikel uldureklak.
“E tia ea soal a Chedam el uldureklak mak mlei, me seikid a bek el tekoi el blal beskak a diak bol riid, leng lemuut elmo okiis er sel uriul sils.
“E tiang sel soal ngike el uldureklak, me a rokui el chad el mesa Ngelekel, e oumerang er ngii, a nguu a diak a ulebengelel klengar: e ngak a mo okisii er sel uriul sils.”
A Osobel a ngiluu sel cherrungel e chedaol el telkael ra kle ngariou el reng el mora Chedam el kongei er sel Ngii a soal me bo el tang ngii mesel soal a Chedam. Ngii a mle tal lolekoi, “E ngkel luldureklak a obengkek: a Chedam a diak el chitak mel dil ngak; le ngak a blechoel meruul a ikel tekoi e lungil er ngii.” Sera lolsisechakl ra Profet Joseph Smith el kirel a ikel ongarm ma ringel er sel Tngakireng, ea Osobel a dilul kmo:
Maluaisei, Ngak, el Dios, a mlo chuarm ra ikal teletael el kiriu, meng diak bo er a ringel a lsekum ke mo ouchel a kengtemiu; …
El ngii el ringel el mle er ngak, el Dios, el kot el ngarbab er a rokui, el rirellak el mo omritel er a ringel, e mlo merserasech a bedengek, e mlo chuarm a bedengek ma renguk—me bol sebechek el diak nguu sel mechuached el kob, e bolak el sebechek—
Eng di, a klebkall le bo er a Chedam, e ak ngiluu e kildmeklii a ngerchelek el mo er a rokui el ngelekel a chad.
Me tial taem el de ngar tial klengar, e kede blechoel mengisemuk a tekoi el domdasu e kede medengei, ma ikel domdasu eng kot lungil, ma ikel domtab e ngoureor el kired, el kuk ngodech ra ikel lutebengall el lodengei a Demad ra Babeluades, likel lungil mora ulebongel, e meral bedochel a urelel el kirel a rengelekel ersel Uldesuel. Tial klou lomengismuk a sebechel kmal mo chetituokel, tokuni sel domtab a ikel ulaoch el ngarngii ra chedaol llechukl er chelechal taem: “Tiakid a bo modengelii el dirrek, ra ikal lulebongel el sils … a rechad a di mo omdasu e ra di tir, … e kuk sorir a tamtereng el ngar ruchei ra Dios.”
A tara olangch lochotii el toutang tial lulauch sel chelechal taem eng mla mkuuk el teletael ra beluulechad, el blal nguu a rubdois, el rechad el di obang a klechad er tir e blechoel di olkebai ra imol tekoi el kmo, “A le ngarngii a mo dubech, ngak a ngarngii a kuk kumerang er ngii malechub ak meruul er sel mo ungil el kirek.” A Paulus el Apostol a dilul kmo, a re bek el chad “a di chemau a tekoi el kirir, e diak el lomdasu ra kirel a Jesus Kristo.” Tial teletael ra uldasu a blechoel el ua loledaes mel “klemerang” er tirkel tir a chellaod el di osiik a dimo kirir, ma ikel sorir, malechub eng sorir el diak el lomals a bebil ra blekeradel el diak lomekesui ra uldesuel a ou beltikelreng el Dios mesel soal el kirir. A lsekum kede mechei a rengud ma uldesued meng ngomsau a ikaikid el teletael er a uldasu, eng sebeched el kutmokl a meklou lolibesongel el kired ra ngeiul sel kot el kesiokel el ngisel a chesiuch el Dios lokiu a beltikelreng a mla kutmeklii el mora Rengelekel el—diak a ulebengelel klengar.
Meng mera el uaisei el derta er kid a merael eldi kid el mesiou el ngarsel lomeroled er tial rael ra telbiil, e melasem el olserchakl a rengud ma uldesued mel delalem er a Jesus Kristo, e kired el mo kerekikl e blechoel lomes me lak kede mechitikaik el nguu tial blekerdelel a uldasu ra beluulechad el mera klengar er kid. A Elder Quentin L. Cook a dilu el kmo “sel de meral ngarse el omilkingel a Kristo a lmuut el klou el moktek ra kuk di dengara teleteled.”
Betik er a renguk el resechelik, sel dolilt el mecherei a Dios mel kot el mesisiich el ongitikaik ra chelsel a klengar er kid ruchei ra ikel soad el tekoi, eng sebeched el ngoriakl er a omesiunged e toketek a klisiched el lodak a uldesued ma rengud lobengkel a Osobel. Ea kuk tara tekoi, sel lak de bsang a Dios a techellel mel siseb er a klengar er kid, eng di mo kid, ea lak a ulekrael ra Rubak lomtebechel, e kede omdasu el lekong di ungil a bek el tekoi el doruul ma lak ke doruul. Kede dirrek el sebeched el merers er kid el meruul a tekoi loltirakl a soad, e melekoi el kmo, “Ak kuk di meruul a tekoi loltirakl er sel soak.”
A tara sils, el Osobel lolsisechakl a Llechul, ea re bebil ra rechad, tirkel di mle tir el millutk er tir el melemalt el Pharisees, a uletngakl a Klemechel e mle beches el melekoi el kmo tir a rengelekel a Abraham, el belkul a kmo a uchelir a mesterir a tokubets el llemeltir ra osengel a Dios. Sel luldasu a lultireklii mete mlo ultuil ra di uldesuir e mlo diak loumerang a ikel Osobel a ulsisechakl. A omilkingir a re Pharisees el mora Jesus a mle bleketakl el olchotel el kmo te dimlak lomekerreu meng dimlak ra rengrir el remenges a tekingel Osobel ma teletelel a Dios. Meng ulenger, ea Jesus el mellomes a rengul e diak a dektel a millekoi el kmo a lsekum mete meral ngelekel a Abraham ra telbiil, e te meruul a urerel a Abraham, sel sekum tomes el kmo ngkel “Dios ra Abraham” a dechor ra mederir e olsisechakl er tir a klemera er seikid el taem.
Rodam me a Rodos, mesel momes, e doruul a ua ikal mengiseksikt a uldesued el kmo “ngera ungil kirek” mesel kuk ngera ungil kirel a Rubak” a diak el beches el teletael el kora ngodech er chelechal beluulechad. Ng tekoi ra chuodel el luldasu e mla berk el meketeket el taem e blechoel el ouid a osengir a re leko te medengei rengir e mo rrau a rengrir e omeksaul ra re betok el ngelekel a Dios. Tial luldasu a, a meral, chuodel el chelbeldil a cherarou; ng cheleblad el rael el mekekokil el mengesuseu ra re ngelekel a Dios elmo cheroid er sel merang e ulterkokl el rael ra telbiil. Meng teletael de ngara chelse el reua blebeled, beluad, ongarm ra bedenged ma uldesued a meral mengetikaik er tial lomroled, me a ikel tekoi el meklou a belkul, a ngarngii a basio er a chelsel a rengud el sebeched el mimokl el melilt a le soad malechub a le chetid el mo oltirakl er sel teletael el Rubak a mla kutmeklii el kirel a klengar er kid. Meral tekoi, “Ngii a mechesengar a rael e mengetakl ruchei, ea bek el le bo rengii a [bleketakl].”
Mesel de mesiungel a Kristo, eng soad elmo merael ersel rael el Ngii a mla mechesengar el kired er sera le ngartial klengar e lolsisechakl. Ng diak ke dil soad el meruul a Soal ma ikel rokui el mo ungil er Ngii ng dirrek el soad el mo uai Ngii. Mesel dolasem el moungil ra bek el telbiil el bla de siseb er ngii e kiei loltirakl a “rokui el tekoi el tuobed er a ngerel a Dios,” e kede mo selbechakl el diak kede rebet er a ikel delengerengel ma chelebirukel el tekoi ra beluulechad—cheleuid luldasu ma llach el ngoikid el choridid er a ikel kmal kesiokel el ngisel a chesiuch.
Ak melchesuar ra renguk el kirel sel reng ra kle ngariou reng el mora Dios el mla remutech a klengar ra re mekedung el mesiungel a Kristo, sel lolilt elmo meruul a ikel lungil er a Rubak. Ak medengelii a ngeasek el chad el dimlak el keltmokl elmo mesiou el milchesuar el mong e mesiou ra Rubak sera le rengesii a tara klou el merredel ra Ikelesia ra louchais a klaumera er ngii ma chedaol el blekeradel ra losiou el misonari.
Meng tekingel, ngkal ngeasek el chad, er chelechal bla bol merek el mesiou el misionari, el dilul kmo: “Sera kurrenges er sel klaumera er ngkel Apostol ra Osobel Jesus Kristo, eng mlo sebechek el melchesuar ra beltikelreng ra Dios el me rengak, e mlo soak louchais er seikid el beltikelreng el mora rebebil. Seikid el taem e ak mlo medengei el kmo ng kirek elmo mesiou el ngii ma le bla rengii a dektek, ou mededenger, e bekikl. Ak mle mui loumerang ra ikel klengeltengat ma telbilel a Dios el mora Rengelekel. Chelechal sils, e ngak a beches el chad; A kumera el kmo tial ebangkelio a klemerang ea Ikelesia ra Jesus Kristo a mla lmuut el mera beluulechad.” Ngkal ngeasek el chad a milliltt er sel rolel a Rubak e mla mo okesiul el meral mesiungel ra rokui el tekoi.
A kedung el ngeasek el dil a kiltmeklii ra rengul el diak lolodech a llechul ra lolengit er ngii me lobail el mekngit mel sebechel loureor er tial siobai loureor er ngii. Medengei el kmo a bedengel a chedaol el sengk el mlara Demad ra Babeluades e basio el sebechel a Reng el kiei er ngii, eng mle soal kiei lokiu a ngarbab el llach ra kuk tial beluulechad. Ng dimlak el dil ngilai a klaumerang er tirkel milsang el kiei loltirakl er a klemerang el ebangkelio ra Jesus Kristo, ng dirrek el millemolem loureor, el mle telkib el taem el chetiteuokel. Ng soal el meruul er sel ngii a ungil ra Rubak, ra bai sel lungil ra beluulechad, a mlo ungil meketeklii a telbilel ra le meringel el melilt.
Rodam ma rodos, kede blechoel chelbangel ra ikal diosisiu el dolib ra chelsel a omroled ra bek el taem. Ngultuil er a dechal a rengud e kongei el mo chelellakl e moltirakl ra melemalt e melbedebek loba kle ngariou el reng el kongei el kmo ngarngii er kid a chelitechetul a tech ra chelsel a klengar er kid elmo oitechetur a klisiched elmo chemau a Dios, e mui el kongei el moltirakl er Ngii ra dil kid. Sel meral skeng el kirel a omesiunged a ultuil el de kengei el chemoit e choridii sel mechut el klengar er kid e nguu a rengud me a delbenged el rokir el msa Dios meng mo sebechel sel Ngii a soal el me rekid.
A tara kot el chetengakl taem e ra klengar a mo rengii sel de betik e ra deurreng el mei sel doruul aikel tekoi “el soal a Rubak” me a “ikel soad” a mo tang! Sel doltirakl e lak doumededenger el rulii a soal a Rubak el mo soad a ngeiuul a klou e smiich el lomesiou! Seikid el taem, e kede mo mechedaol el mora Rubak, el mocha odars a rokui el soad elmo er Ngii. A uai tial lodersel a reng, sel dosaod er ngii, a klebokel, mesisiich, e omult.
A kuuchais er kemiu el kmo sel doltirakl a soal a Rubak ra chelsel a klengar er kid a techall el me rekid elmo metik ersel kot el kesiokel el ngisel a chesiuch ra beluulechad—sel rengedel a babeluades. Ak meluluuch mede bek el chad, er chelechal taem e temed, bol sebeched louchais, loba bleketakl el telbiil, el mora Demad ra Babeluades ma Osobel Jesus Kristo el kmo “sel lungil Kiriu, a ungil kirek.” Aika kulekoi el ngara chedaol ngklel a Osobel el Jesus Kristo, amen.